1. Petrus aa fula vi kombunda yaindu Jesus tja tjita otjihimise okumuvatera kutja ma kambure omahundju omengi?

 PETRUS aa kambura omahundju nu wa kara ouṱuku auhe nokuhinokukambura otjiṋa. Nokuhinokuundjira ko, Jesus wa tja: “Hingira okayaha kokure momeva nu mu yumbe ozombate zeṋu okupata ozohi.” (Luk. 5:4) Petrus wa keyakeya, posi yokutja wa tjita ihi Jesus tje mu raera. Petrus novarumendu mbaave ungura pamwe va pata omahundju omengi tjinene nu ozonete nḓe pata omahundju za uta okutauka. Indu tji va muna kutja Jesus wa tjita otjihimise, owo “va himisiwa” i yotjiṋa ho. Petrus wa tja: “Za po pu ami, Muhona, orondu owami omundu omunauvi!” (Luk. 5:​6-9) Petrus mape ya we rimuna kutja kamundu omunanḓengu nu ka pwire okukara pu na Jesus.

2. Ongwaye okuripurira kotjihorera tja Petrus tje ri ombatero kweṱe?

² Petrus aa hungire ouatjiri, eye wa ri “omundu omunauvi.” Omatjangwa ye raisa kutja eye povikando tjiva aa hungire nokutjita oviṋa mbyaavi tjiti kutja eye kombunda ma fule navi. Hapo ove povikando tjiva u rimuna tjimuna Petrus? Hapo u notjikaṋena kaaṋi poo oungundipare mbu u kondja na wo oure woruveze orure? Tji pe ri nao, ove mo yenene okumuna omayanḓiparisiro mokukonḓonona otjihorera tja Petrus. Omomuano uṋe? Ripura notjiṋa hi, Jehova ka tja yandjera ozondataiziro za Petrus okutjangwa mOmbeibela. Nungwari eye wa yandjera kutja ze tjangwe kokutja tu rihongere ku zo. (2 Tim. 3:​16, 17) Indu tji twe rihongo ohunga noungundipare wa Petrus, iho matji tu vatere okutjiwa kutja Jehova ka undjire ko kutja tu rire ohomonena. Jehova u vanga kutja tu panḓere po, nandarire kehi youngundipare wetu.

3. Ongwaye tji matu hepa okupanḓera po?

 ³ Ongwaye tje ri ounahepero kweṱe okupanḓera po? Indu tji matu kayenda komurungu okukondja okutjita otjiṋa, tu yenena okutjitjita nawa. Otjotjihorera, omundu tji ma vanga okurihonga okunyanda otjiketara pe ya a kambura ozombura ozengi okutjitjiwa. Oruveze ndwo, tji ma kondjo okurihonga mape ya a tjiti ozondataiziro ozengi, posi ya tji ma kayenda komurungu okurihonga, ma yenene okutjitjiwa nawa. Nandarire kutja ma tjiwa okunyanda otjiketara nawa, mape ya movikando tjiva a zunḓa. Posi ya ka yumbu ohama. Eye u kondja okukayenda komurungu okurira omunyande omuwa. Momuano tjingewo, nandarire kutja twa yenene okutaara oungundipare kaaṋi, mape ya atu tataiza rukwao. Posi ya tu kondja okukayenda komurungu okuungurira koungundipare mbwo. Atuhe tu tjita ozondataiziro, nu Jehova me tu vatere okuungurira koungundipare wetu indu tji tu hi nokuyumba ohama. (1 Petr. 5:10) Ngatu katare kotjihorera tja Petrus tjokupanḓera po. Otjari Jesus tje mu raisira nandarire kehi youngundipare we matji tu vatere okukayenda komurungu okurikotamena ku Jehova.

4. Otja ku Lukas 5:​5-10, Petrus wa tja vi ohunga na ye omuini, nu Jesus we mu vatera vi?

⁴ Omatjangwa wOmbeibela kaye raisa kutja omena raye Petrus tja tja eye “omundu omunauvi” poo kutja omauvi yeṋe eye ngee ripura na wo. (Lesa Lukas 5:​5-10.) Posi ya mape ya wa tjita ozondataiziro ozonene. Jesus aa tjiwa kutja Petrus aa tira, ngahino mena rokutja Petrus ee rimunu okuhinonḓengu. Posi yokutja Jesus wina aa tjiwa kutja Petrus ma yenene okurira omuṱakame. Ku nao, Jesus wa raera Petrus momuano omuwa kutja ‘a tira.’ Ongamburiro Jesus ndja ri na yo mu Petrus ya rundurura ehupo ra Petrus. Petrus nomuangu we Andreas va isa ongetjefa yawo yomahundju nu ave rire ovakongorere va Messias voruveze aruhe, nu Jehova we ve sera ondaya momiano omingi pekepeke.—Mar. 1:​16-18.

5. Omomuano uṋe Petrus ma serwa ondaya mena rokuhinokuyandjera oumune we ouvi okumutjaera okukongorera Jesus?

⁵ Petrus wa kamuna oviṋa ovingi oviwa otjomukongorere wa Kristus. Eye wa muna Jesus ama verukisa ovavere, ama pitisa ozondemone, nokupendura ovaṱi. b (Mat. 8:​14-17; Mar. 5:​37, 41, 42) Petrus wina wa muna otjirimunikise tja Jesus tjaatji sokutjitwa moruyaveze, tji matji raisa Jesus otjOmbara yOuhona wa Mukuru. Petrus kena pa zemba otjiṋa hi. (Mar. 9:​1-8; 2 Petr. 1:​16-18) Petrus ka tja muna oviṋa mbi andakuzu kena wa kongorera Jesus. Eye wa ri  nondjoroka kokutja kena wa yandjera ouripura ouvi mbwo okutjita kutja ma pandjare ozondaya nḓo.

6. Hapo Petrus wa hakahana okutuurunga oungundipare we? Kahurura.

⁶ Petrus aa kondjo nomaungundipare we nandarire kutja wa muna nokuzuva ovingi ohunga na Jesus. Tara kovihorera tjiva. Indu Jesus tja hungira ohunga nomuano mu ma hihamisiwa nokuṱa otja komaprofetero wOmbeibela, Petrus wa vyura na raere Jesus kutja ape ha tjitwa nao ku ye. (Mar. 8:​31-33) Ovikando pekepeke Petrus novaapostele varwe va ri nozombata zokutja owaṋi pu wo avehe ngu ri omunenenene. (Mar. 9:​33, 34) Ongurova osenina komurungu yonḓiro ya Jesus, Petrus wa konda okutwi komurumendu. (Joh. 18:10) Ongurova ndjo, Petrus wa ri nemuma na pataṋa epanga re Jesus ovikando vitatu. (Mar. 14:​66-72) Iho tja tjita kutja Petrus ma rire tjinene.—Mat. 26:75.

7. Kombunda yombendukiro ya Jesus Petrus wa pewa oruveze okutjita vi?

⁷ Jesus kena wa isa omuapostele we nga wire momuinyo. Kombunda yaindu Jesus tja za nokupendurwa, eye wa yandja oruveze ku Petrus kutja Petrus me mu raisire kutja ngamba we mu suvera. Jesus wa ṋanga Petrus okukarera nomerisusuparisiro otjomurise wozonḓu ze. (Joh. 21:​15-17) Petrus we riyandjera okutjita imbi Jesus mbye mu raera. Meyuva ra Pentekoste, eye wa ri moJerusalem mokati ka imba mba ri ovatenga okutwirisiwa nombepo ondjapuke.

8. Hapo Petrus wa tjita ondataiziro iṋe onene moAntiokie?

⁸ Nandarire kutja, eye wa rira Omukriste omutwirisiwa Petrus aa kondjo noungundipare we omuini. Mombura ndji 36 O.Z., Mukuru wa hinda Petrus ku Kornelius ngu ha ri Omujuda. Mukuru wa twirisa Kornelius nombepo ondjapuke, tji tji ri otjiraisiro otjikahu kutja “Ndjambi u vara ovandu avehe pu pe ṱeki pamwe,” nokutja imba mbe he ri Ovajuda mave yenene okurira orupa rwombongo yOvakriste. (Oviung. 10:​34, 44, 45) Kombunda yanao, Petrus wa uta okurya pu novakambure mbe ha ri Ovajuda tji tjari otjiṋa tji mape ya tjaa ha tjiti. (Gal. 2:12) Posi yokutja, Ovakriste tjiva aave munu kutja kave sokurya pu nOvakriste mbe he ri Ovajuda. Indu tjiva mba ri noumune mbwo tji ve ya koAntiokie, Petrus we rihumba na ha vanga okurya pu na imba mbe ha ri Ovajuda, ngahino mena rokutira okupindikisa Ovakriste mba ri Ovajuda. Omuapostele Paulus tja muna otjiṋa hi, eye wa vyura Petrus momurungu wa varwe. (Gal. 2:​13, 14) Nandarire kutja, Petrus wa tjita ondataiziro ndjo eye kena pa yumba ohama. Otjikeṋa tji tje mu vatera?

9. Johanes 6:​68, 69 ri raisa vi ouṱakame wa Petrus?

⁹ Petrus wa ri omuṱakame nu kena wa yandjera otjiṋa kaaṋi okumutjaera okukongorera Jesus. Otjotjihorera, otjikando tjimwe Jesus wa hungira otjiṋa tji tja ri otjizeu kovahongewa ve okutjizuva nawa. (Lesa Johanes 6:​68, 69.) Ovengi va isa okukongorera Jesus nokuhinokuundja poo okupaha omakahururiro. Posi ya, ka tjitire nao. Eye wa ri omuṱakame nu wa tja Jesus erike ongu “nomambo womuinyo waaruhe.”

10. Jesus wa raisa vi ongamburiro mu Petrus? (Wina tara kotjiperendero.)

¹⁰ Jesus kena pa isa Petrus. Ongurova osenina komurungu wonḓiro ye, Jesus aa tjiwa kutja Petrus novaapostele varwe mave mwesa. Posi yokutja, Jesus wa raera Petrus kutja u nongamburiro kutja Petrus ma kotoka nu ma kayenda komurungu okurira omuṱakame. (Luk. 22:​31, 32) Jesus aa tjiwa kutja “Ombepo vari mai vanga, nungwari indji onyama otjingundi.” (Mar. 14:38) Nandarire kutja, Petrus wa pataṋa  okumutjiwa, Jesus kena pa yumba ohama nomuapostele we. Kombunda yombendukiro ye, Jesus we rimunikisa ku Petrus indu tja Petrus tja ri erike. (Mar. 16:7; Luk. 24:34; 1 Kor. 15:5) Otjiṋa ho mape ya tja yanḓiparisa Petrus ngwa ri nomuhihamwatima ohunga noviṋa mbya tjita.

11. Omomuano uṋe Jesus ma kwizikira Petrus kutja Jehova me mu vatere?

¹¹ Jesus wa vatera Petrus okumuna kutja Jehova me mu vatere novihepwa vye. Jesus tja za nokupendurwa wa vatera Petrus novaapostele varwe okupata omahundju momuano omuhimise. (Joh. 21:​4-6) Otjihimise hi tjiri tja vatera Petrus okumuna kutja Jehova ma yenene okumupa oviṋa avihe mbi ma hepa. Ngahino omuapostele Petrus okuzambo wa zemburuka omambo wa Jesus kutja Jehova ma parura imba ‘rutenga mbe paha ouhona waNdjambi.’ (Mat. 6:33) Oviṋa avihe mbi vya vatera Petrus okutwa po otjiungura tjokuzuvarisa poruveze orutenga mehupo re nu ka twapere ongetjefa ye yokupata omahundju poruveze orutenga. Eye wa zuvarisa nouvanḓe meyuva ra Pentekoste 33 O.Z., nu wa vatera ovandu ovengi okuyakura ombuze ombwa. (Oviung. 2:​14, 37-41) Okuzambo, eye wa vatera Ovasamaria nOvakriste mbe ha ri Ovajuda okuyakura Kristus. (Oviung. 8:​14-17; 10:​44-48) Jehova tjiri wa ungurisa Petrus momuano wapeke okuyeta ovandu pekepeke mombongo.

12. Omomuano uṋe otjihorera tja Petrus mu matji tu vatere indu tji tu kondja noungundipare kaaṋi?

¹² Jehova ma yenene okutuvatera okupanḓera po. Kaaruhe tji mai rire oupupu okukayenda komurungu, indu tjinene tji tu kondja noungundipare kaaṋi oure woruveze orure. Povikando tjiva, oungundipare wetu mape ya au munika aayo ouzeu pu imbwi Petrus mbwa ri na wo. Posi yokutja Jehova ma yenene okutupa omasa kutja atu ha yumbu ohama. (Eps. 94:​17-19) Otjotjihorera, omurumendu omukambure umwe aa rara povarumendu ovakwao oure wozombura ozengi ngunda e hi ya rihonga ouatjiri. Eye wa rundurura ehupo re, nu okuzambo wa uta okuhupa otja komirari vyOmbeibela. Posi yokutja, eye povikando aa kondjo nozonḓuma ozombi. Otjikeṋa tji tje mu vatera okupanḓera po? Eye wa tja: “Jehova u tu pa omasa. Nombatero yombepo ya Jehova . . . , ami mbe rihonga kutja me yenene [okukayenda komurungu] okuhupa omuano Jehova mbu ma vanga kutja tu hupe . . . Jehova wa yenena okundjiungurisa, nu nandarire kutja  kawami ohomonena eye u kayenda komurungu okundjipa omasa.”

13. Omomuano uṋe mu matu yenene okuhorera kotjihorera tja Petrus otja Oviungura 4:​13, 29, 31? (Wina tara kotjiperendero.)

¹³ Otja tji twa munu rukuru, Petrus wa tjitire ozondataiziro ozonene mena rokutira ovandu. Posi yokutja Petrus tja za nokukumba, eye wa yenena okurira ombanḓe. (Lesa Oviungura 4:​13, 29, 31.) Eṱe wina matu yenene okuhinokutira ovandu. Tara kotjihorera tja Horst, omurumendu omukambure ngwa turire moGermany moruveze rwOvita vyOuye Ovitjavari. Eye povikando pekepeke we riyandjera okuṋiṋikiziwa poskole kutja ma tje “Ondjamo i za mu Hitler!” Nandarire kutja, Horst aa tjiwa kutja okukorisa nao onavi, eye povikando tjiva aa hungire omambo ngo mena rokutira ozomiṱiri novanatje poskole. Pendje nokumurokohera ovanene va Horst va kumba pu na ye okuningira Jehova kutja me mu pe ouvanḓe. Nombatero yovanene ve nokuriyameka ku Jehova, Horst korusenina wa kakara nomasa nga tjita kutja ma zikame. Eye kombunda wa tja: “Jehova kena pe ndjesa. c

14. Ovarise mbe rikendera ozonḓu zawo ve yanḓiparisa vi imba mba wa momuinyo?

¹⁴ Jehova na Jesus kamaave twesa ko. Kombunda yaindu Petrus tja pataṋa Jesus, eye aa sokutoora omukambo omunanḓengu. Hapo eye ma yumbu ohama poo ma panḓere po otjomuhongewa wa Kristus? Jesus wa kumba ku Jehova kutja ongamburiro ya Petrus ai ha yanda. Jesus wa raera Petrus ohunga nongumbiro ndjo nu we mu raisira kutja u nongamburiro kutja Petrus ma yenene okukayanḓiparisa ovakambure ovakwao. (Luk. 22:​31, 32) Iho tja yanḓiparisa Petrus indu tja zemburuka omambo wa Jesus ngo. Indu tji matu toora omukambo omunanḓengu, Jehova mape ya a ungurisa ovarise mbe rikendera eṱe okutuvatera  nomayanḓiparisiro ngu matu hepa kokutja tu panḓere pouṱakame. (Ef. 4:​8, 11) Paul ngwa karera otjomunene wombongo oure woruveze orure u kondja okuyandja omayanḓiparisiro ngo. Eye u pura imba mbe vanga okurihahiza okuripurira komuano Jehova me ve nanena kouatjiri. Okuzambo u ve pa ongamburiro yokutja orusuvero oruṱakame Jehova ndwe na rwo kamaaru mu yandjere kutja me vese. Eye wa tja: “Ami mba muna ovengi mbe wa momuinyo nu mbe panḓera po nombatero ya Jehova.”

15. Otjihorera tja Petrus na Horst tji raisa vi kutja omambo nge ri mu Mateus 6:33 ouatjiri?

¹⁵ Jehova ma yenene okutuvatera noviṋa mbi matu hepa indu tji twa twa po otjiungura tjokuzuvarisa poruveze orutenga mehupo retu, tjimuna tja vatera Petrus novaapostele varwe noviṋa mbyaave hepa. (Mat. 6:33) Kombunda yOvita vyOuye Ovitjavari, Horst ngwa tamunwa rukuru we ripura okurira omukandjira. Eye wa ri omusyona tjinene, nu aa keyakeya kutja kamaa yenene okumuna ovimariva mbya yenene kokutja ma kare noruveze aruhe motjiungura tjokuzuvarisa. Eye wa tjita vi? Eye we ripura okurora Jehova kutja tjiri me mu vatere noviṋa mbi ma hepa. Ku nao, eye wa ungura otjivike atjihe motjiungura tjokuzuvarisa indu omutarere wotukondwa tjee ku varura ombongo yawo. Komaandero wotjivike eye wa urumine indu omutarere wotukondwa tje mu pa ondjaṱu yombapira mu mwa ri ovimariva, posi ya eye ke mu raerere kutja ovimariva vya zu ku uṋe. Eye wa muna ovimariva mbya yenene okumuvatera oure womieze motjiungura tjoukandjira. Horst wa vara otjiyandjewa ho otjomakwizikiro wokutja Jehova ma yenene okumuparura. Eye wa kara pokutwa Ouhona wa Mukuru poruveze orutenga mehupo re.—Mal. 3:10.

16. Ongwaye tje ri otjiṋa otjiwa kweṱe okurihonga ovingi ohunga na Petrus na imbi mbya tjanga motutuu twe?

¹⁶ Petrus tjiri wa ri nondjoroka okumuna kutja Jesus kena pe mwesa otja pa ningira. Kristus wa kayenda komurungu okuhonga Petrus kutja ma rire omuapostele omuṱakame nokurira otjihorera otjiwa kOvakriste. Neṱe matu rihongo oviṋa ovingi oviwa okuza komahongero ngo. Petrus wa hungirira ku imbi mbye rihonga na vyarwe ovingi motutuu twe tuvari twa tjanga kozombongo meserewondo etenga notwo nai orupa rwOmbeibela. Orupa ndu matu kongorere ko maru kahungirira koviṋa tjiva mbi matu sokuzemburuka okuza motutuu two nomuano mu matu yenene okuviṱakamisa ndino.