1. Ousupi komurungu yonḓiro yomuapostele Petrus, Jehova we mu ungurisa okutjita tjike?

 OMUAPOSTELE Petrus wa karera Jehova nouṱakame oure wozombura ozengi. Eye aa ungura otjiungura tjokuzuvarisa pu na Jesus. Eye wa uta otjiungura tjokuzuvarisa mokati kovandu mbe he ri Ovajuda nu kombunda eye wa karira okaṋepo korutu orunane. Kuṱa komaandero wehupo re, eye tjaa tjiwa kutja u ri pokuṱa, Jehova we mu pa oviungura ovingi okuungura. Mozombura nḓa ape 62-64 O.Z., Jehova we mu ungurisa okutjanga otutuu tuvari mOmbeibela, orutuu 1 no-2 rwa Petrus. Petrus aa zeri kutja otutuu twi tu vatere Ovakriste kombunda yonḓiro ye.—2 Petr. 1:​12-15.

2. Omena raye otutuu twa Petrus tji twa tjangwa moruveze ndu ri ro?

² Petrus wa tjanga otutuu twe moruveze indu ovakambure ovakwao maave ‘ṱoruhoze momarorero ngamwa aehe mu va ri.’ (1 Petr. 1:6) Ovandu ovarunde aave kondjo okutjiukisa omahongero woposyo nozongaro ozohakohoke mombongo yOukriste. (2 Petr. 2:​1, 2, 14) Ovakriste mba turire mo Jerusalem va ri pokuhungamwa i “ondjandero yoviṋa avihe.” Ovaroma va ri pokunyona otjihuro nOndjuwo ondjapuke ya Muhona. (1 Petr. 4:7) Otjingaperi kutja otutuu twa Petrus twa vatera Ovakriste okutjiwa omuano wokurira ovaṱakame kehi yomauzeu ngu va ri na wo nomuano wokurirongerisa komauzeu ngu mave kamuna moruyaveze. b

3. Omena raye tji matu sokukonḓonona otutuu twa Petrus?

 ³ Nandarire kutja Petrus wa tjanga otutuu twe kOvakriste veserewondo etenga, Jehova wa twa mo otutuu twi mEmbo re. Ku nao, eṱe matu yenene okumuna ouwa motutuu two. (Rom. 15:4) Otja mbu tu hupa mouye mbu handjaura omeritjindiro omahakohoke, eṱe wina tu muna omauzeu ngu mape ya aye tjiti kutja irire ouzeu okukarera Jehova. Nu wina, moruyaveze rwopopezu matu kamuna ozombamisiro ozonene kombanda ya inḓa nḓa eta omaandero wa Jerusalem nOndjuwo ondjapuke ya Muhona. Motutuu twa Petrus atuyevari mu noviṋa ovinanḓengu mbi matu zemburukisiwa. Ovyo mavi tu vatere okurirongerera omaandero wouye mbwi, okuhinokutira ovandu nokusuverasana nomasa tjinene. Nu wina mavi yenene okuvatera ovanene vombongo okutjiwa omuano mu mave yenene okuvatera ovakambure ovakwao mombongo kutja ve zikame.

4. Otja tji pa raisiwa mu 2 Petrus 3:​3, 4, otjikeṋa tji matji yenene okungundiparisa ongamburiro yetu?

⁴ Eṱe twa kondorokwa i yovandu mbe hi nongamburiro mu imbi Ombeibela mbi i hungira ohunga noruyaveze. Ovapirukire mape ya ave tu nyekerere mena rokutja tu hungira ohunga nomaandero wouye oure wozombura ozengi. Ovandu tjiva ve tja omaandero kamaaye ya. (Lesa 2 Petrus 3:​3, 4.) Indu tji matu zuu omambo otja ingo okuza komundu ku matu zuvarisa, komundu ngu tu ungura pamwe poo kokaṋepo keṱunḓu, ongamburiro yetu mape ya ai teratera. Petrus wa hungira ohunga noviṋa mbi mavi yenene okutuvatera.

5. Otjikeṋa tji matji tu vatere okuundja omaandero wouye mbwi nomuretima? (2 Petrus 3:​8, 9)

⁵ Ku tjiva mape ape munika aayo Jehova u womba okuyandeka ouye ourunde mbwi. Omambo wa Petrus maye yenene okutuvatera, mena rokutja ye tu zemburukisa kutja oumune wa Jehova ohunga noruveze wa panguka tjinene ku imbwi wovandu. (Lesa 2 Petrus 3:​8, 9.) Ku Jehova ozombura eyovi ze ri tjimuna eyuva rimwe. Jehova u nomuretima nu ka vanga kutja nangarire omundu umwe ma yandekwe. Posi yokutja, indu eyuva re tji re ya, ouye mbwi, mau yandekwa. Tjiri, tu nondjingonekero yokuungurisa oruveze ndwa sewa ko nai okuzuvarisa kovandu avehe mouye.

6. Omomuano uṋe mu matu ‘undju nonḓero’ eyuva ra Jehova? (2 Petrus 3:​11, 12)

⁶ Petrus u tu rakiza ‘okuundja nonḓero’ eyuva ra Jehova. (Lesa 2 Petrus 3:​11, 12.) Omomuano uṋe? Eyuva arihe matu yenene okuripura nomuano ehupo mu mari karira ewa mouye oupe. Rimuna omuini tji mo suvana omuinyo omukohoke, tji mo ri ovikurya oviveruke, na tji mo tjakanene ovasuverwa voye tji mave pendurwa movakoke, na tji mo hongo ovandu mba hupire ozombura ozengi nḓa kapita, ohunga nomayenenisiro womaprofetero wOmbeibela. Indu tji mo ripura ohunga noviṋa mbi mavi ku vatere okuundja oruveze ndwo nonḓero nokutjiwa kutja omaandero ye ri popezu. Indu tji twa ‘tjiwa oviṋa mbi’ komurungu woruveze ohunga noruyaveze kamaatu “popwa i omapukisiro” wovahonge wovizeze.—2 Petr. 3:17.

7. Okutira ovandu mape ya aku ṱunu vi kweṱe?

⁷ Mena rokutja matu tjiwa kutja eyuva ra Jehova ri ri popezu, eṱe tu kondja pu matu yenene okuraera ombuze ombwa ku varwe. Posi ya, povikando tjiva tu tira okutjita nao. Omena raye? Mena rokutja tu tira imbi ovandu mbi mave yenene okuripura ohunga na eṱe poo mbi mave yenene okutjita kweṱe. Iho tja tjitwa ku Petrus. Ongurova Jesus tjaa  sokupangurwa, Petrus aa tira okuriraisa otja umwe wovahongewa va Jesus nu we mu pataṋa povikando pekepeke kutja ke nokumutjiwa nandarire kutja ee mu tjiwa. (Mat. 26:​69-75) Nungwari, Petrus wa isa okutira ovandu nu kombunda wa katjanga kutja: “Amu tira ovandu, nu amu uruma ko.” (1 Petr. 3:14) Omambo wa Petrus ye tu pa ongamburiro yokutja matu yenene okuisa okutira ovandu.

8. Otjikeṋa tji matji yenene okutuvatera kutja atu ha tira ovandu? (1 Petrus 3:15)

⁸ Otjikeṋa tji matji yenene okutuvatera okuhinokutira ovandu? Petrus u tu raera kutja: “Kareye nondira ku Kristus momitima vyeṋu nu mu Mu yozike otja ngu ri Muhona.” (Lesa 1 Petrus 3:15.) Eṱe matu yenene okurizemburukisa oveni kutja Jesus Kristus Ombara yetu nokutja eye omunamasa. Indu tji mo sokuraera omundu ohunga nombuze ombwa nu tji mo tira, zemburuka Ombara yetu. Ripura na ye nu u mu mune mouripura woye tji ma nana meyuru na tja kondorokwa i yovaengeli ovengi. Zemburuka kutja eye wa “pewa ouvara auhe meyuru na kombanda yehi” nokutja eye ma kara “puna eṋe omayuva aehe nga komaandero wouye.” (Mat. 28:​18-20) Petrus u tja ‘aruhe ngatu rirongere’ okurwira ongamburiro yetu. Hapo ove u vanga okuzuvarisa poruveze pu u ungura, poskole, poo poruveze rwarwe? Ripura komurungu woruveze kutja oruṋe tji mo yenene okutjita nao, tjazumba rirongera kutja mokatjavi. Ningira ouvanḓe mongumbiro nu  kambura kutja Jehova me ku vatere okuhinokutira ovandu.—Oviung. 4:29.

9. Omomuano uṋe Petrus me hi na wa raisa orusuvero otjikando tjimwe? (Wina tara kotjiperendero.)

⁹ Petrus we rihonga omuano wokuraisa orusuvero. Eye opa ri indu Jesus tja tja: “Nambano Ami me mu pe etwako epe ndi: Suverasaneye. Otja tjinga ambe mu suvera, eṋe wina otjinga amamu sokusuverasana.” (Joh. 13:34) Nu nandarire nao, Petrus wa panḓa okurya pu novakambure ovakwao mbe ha ri Ovajuda mena rokutja aa tira Ovakriste mba ri Ovajuda. Omuapostele Paulus wa tja ihi Petrus tja tjita ‘otjavivi.’ (Gal. 2:​11-14) Petrus wa yakura omavyuriro wa Paulus ngo ne rihongere ko. Motutuu twe atuyevari, eye wa tjanga kutja katu sokukara norusuvero uriri kovakambure ovakwetu posi ya twa sokuraisa orusuvero ndwo wina.

10. Otjikeṋa tji matji tu vatere ‘okusuvera ovakwetu nokuhinotjavivi’? (1 Petrus 1:22)

¹⁰ Petrus wa tja matu sokusuvera ovakambure ‘ovakwetu nokuhinotjavivi.’ (Lesa 1 Petrus 1:22.) Orusuvero otja indwo ru kara po indu tji tu “nonḓuviro kouatjiri.” Ouatjiri mbwo u kamburira omahongero wokutja “Ndjambi u vara ovandu avehe pu pe ṱeki pamwe.” (Oviung. 10:​34, 35) Eṱe kamaatu kara nonḓuviro kerakiza ra Jesus ohunga norusuvero indu tji matu raisa orusuvero kovandu tjiva mombongo uriri. Otjiperi kutja mape ya atu kara noupanga wopopezu ku novandu tjiva okukapita varwe tjimuna Jesus. (Joh. 13:23; 20:2) Posi yokutja, Petrus u tu zemburukisa kutja tu sokukondja ‘okusuvera ovanangamburiro ovakwetu’ mena rokutja owo orupa rweṱunḓu retu.—1 Petr. 2:17.

11. Okusuverasana “tjiri nomutima auhe” ku heya tjike?

¹¹ Petrus we tu rakiza kutja matu “sokusuverasana tjiri nomutima auhe.” Ku nao, okusuvera “tjiri” ku he ya okusuvera omundu nandarire indu tje ri ouzeu okuraisa orusuvero ku ye. Otjotjihorera, hapo matu tjiti vi indu omukambure omukwetu tje tu hihamisa momuano umwe poo omukwao? Rutenga mape ya atu vanga okumutjinda momuano eye me tu tjindi pendje nokuraisa orusuvero. Posi yokutja, Petrus we rihongera ku Jesus kutja ongaro otja indjo kai tjata ku Mukuru. (Joh. 18:​10, 11) Petrus wa tja: “Amu yarura ouvi mouvi, nu amu yarura okuyamburura mokuyamburura. Nungwari moruveze rwanao yandjeye ondaya.” (1 Petr. 3:9) Indu tji u norusuvero rwatjiri, ove mo kara noumune ouwa nandarire ku na imba mbe ku hihamisa.

12. (a) Orusuvero rwatjiri maru tu vatere okutjita tjike tjarwe? (b) Ove mo vanga okutjita tjike otja tji pa raisiwa mokavidio nga Preserve the Precious Gift of Unity?

¹² Morutuu rwe orutenga, Petrus wa ungurisa omambo nga ‘okusuverasana tjiri.’ Orusuvero otja indwo karu vandeke omauvi tjiva uriri posi yokutja ru vandeka “omauvi omengi.” (1 Petr. 4:8) Ngahino Petrus wa zemburuka oviṋa Jesus mbye mu honga ohunga nokuisira ozombura nḓa kapita. Oruveze ndwo, Petrus mape ya aa kambura kutja eye omundu omuwa indu tja tja ma isire omukambure omukwao “potuhambombari.” Posi yokutja, Jesus wa honga Petrus na eṱe wina okuisira “povikando omirongo hambombari potuhambombari,” pu mape hee kutja katu sokukara nopoṋa pu matu yandere. (Mat. 18:​21, 22) Indu tji wa muna kutja kaupupu kove okuyenenisa erakiza ndi, o rihahiza. Ovakarere va Jehova avehe mbe he ri ohomonena povikando tjiva va ri nouzeu okuisira. Otjiṋa otjinanḓengu kove nai okukondja otja pu mo yenene okuisira omukambure omukweṋu nokuhangana ku na ye. c

13. Otjikeṋa tji mape ya atji tjiti kutja irire ouzeu kovanene vombongo okukara noruveze okutunduuza ovakambure ovakwao?

¹³ Petrus tjiri kena pa zemba oviṋa Jesus mbye mu raera kombunda yombendukiro ye indu tja tja: “Risa ozonḓu zandje.” (Joh. 21:16) Indu tji u ri omunene wombongo mo tjiwa kutja omarakiza ngo maye hungire ohunga na ove wina. Ku nao, mape ya ai rire ouzeu komunene wombongo okukara noruveze okuyenenisa otjiungura otjinanḓengu hi. Ovanene vombongo rutenga mave sokutjita kutja omaṱunḓu wawo ye kare novihepwa mbi maye hepa. Nokutja omundu auhe meṱunḓu ma munu orusuvero ndwe mu pwire nokuvatera eṱunḓu rawo okutumbuka popezu na Jehova. Owo wina ve hongorera po otjiungura tjokuzuvarisa, nu wina ve rirongerisa nokuyandja omahungi pozombongarero, pomaworonganeno worukondwa no wotukondwa. Tjiva wina ve vatera mOkomiti yomapangero (HLC) poo mOkomiti yokutunga (LDC). Ovanene vombongo tjiri ovarumendu mbe noviungura ovingi.

14. Otjikeṋa tji matji yenene okutunduuza ovanene vombongo okurisa orupanda? (1 Petrus 5:​1-4)

¹⁴ Petrus wa rakiza ovanene vombongo ovakwao na tja ‘riseye orupanda Ndjambi ndwa yandja ku eṋe.’ (Lesa 1 Petrus 5:​1-4.) Indu tji u ri omunene wombongo, eṱe matu tjiwa kutja wa suvera ovakambure ovakweṋu nu u vanga okuvetjevera. Posi yokutja, povikando tjiva mape ya o munu kutja u noviungura ovingi poo wa urwa nu ko nokuyenena okuyenenisa otjiungura ho. Ove mo yenene okutjita vi? Raera Jehova oviṋa avihe mbi mo rikende na vyo nokutja ovakambure ovakweṋu mo vanga okuvevatera pu pe ṱa pi. Petrus wa tja: “Ngamwa ngu ma karere mombongo nga karere yo nomasa ngu ma pewa i Ndjambi.” (1 Petr. 4:11) Ovakambure ovakweṋu mape ya ve muna omauzeu nge hi nokuyenena okuzengururwa mouye mbwi. Posi ya, zemburuka kutja ‘Omurise Omunene’ Jesus Kristus ma yenene okuvevatera okukapita ngamwa. Eye ma yenene okutjita nao ndino na wina mouye oupe. Otjiṋa Jehova tje vanga kutja ovanene vombongo ve tjite, okusuvera ovakambure ovakwao, okuvetjevera nokurira “otjihorera korupanda.”

15. Omomuano uṋe omunene wombongo umwe me varura ovakambure ovakwao? (Wina tara kotjiperendero.)

 ¹⁵ William, ngwa karera otjomunene wombongo oure wozombura ozengi, wa muna ounanḓengu wokuvarura ovakambure ovakwao. Indu omutjise wo-COVID-19 tji wa uta, eye novanene vombongo ovakwao ve ripurira kokuhakaena novandu avehe mba ri motjimbumba tji va pewa okuvarura otjivike atjihe. Eye wa kahurura kutja omena raye: “Ovambure ovengi aave kara aveyerike ponganda nu omeripura wawo atja ye hakahana okurira omavi.” Indu ovakambure ovakwao tji ve nouzeu, William u puratena nombango okutjiwa kutja ve nouzeu waye nu mave hepa ye. Okuzambo eye u kondja okupaha omambo nga zikamena kOmbeibela poo ouvidio okuza korungovi rwetu mbu ma yenene okuungurisa okutunduuza ovakambure ovakwao. Eye wa tja: “Okuvarura ovakambure ovakwetu ku heperwa po tjinene nai. Eṱe tu ungura oukukutu okuvatera ovandu mbe he ri ovakambure ovakwetu, ku nao, eṱe wina matu hepa okuungura oukukutu okuvatera ovakambure ovakwetu okukara mouatjiri.”

16. Omomiano viṋe mu matu yenene okuungurira ku imbi mbi twe rihongo okuza kotutuu twa Petrus?

¹⁶ Eṱe twa hungirire komahongero tjiva uriri okuza motutuu tuvari twa Petrus. Mape ya ove wa munu otjiṋa tji mo hepa okuungurira ko. Otjotjihorera, hapo ove mo vanga okukayenda komurungu okuripurira ko oukoto kozondaya nḓu maze keya mouye oupe? Hapo ove wa twa po ondando yokuzuvarisa poviungura, poskole, poo poruveze rwarwe ngamwa? Hapo u muna omiano mu mo yenene okuraisa orusuvero rwatjiri kovakambure ovakweṋu? Vanene vombongo, hapo mwe rimanena okurisa ozonḓu za Jehova nombango aihe? Okurikonḓonona omuini mape ya aku raisa oungundipare kaaṋi, posi ya o rihahiza. “Muhona omuwa” nu eye me ku vatere okutjita omarundurukiro. (1 Petr. 2:3) Petrus wa tja: “Ndjambi omuini . . . me mu pwisa; Eye me mu zeuparisa momasa we ne mu zikamisa.”—1 Petr. 5:10.

17. Mape tjitwa tjike indu tji twa panḓere po natu riyandjere oveni okuhongwa i Jehova?

¹⁷ Petrus rutenga aa munu kutja ka pwire okukara pu na Jesus. (Luk. 5:8) Posi ya, nombatero ya Jehova na Jesus yorusuvero, Petrus wa kongorera Jesus nouṱakame. Ku nao, Petrus wa “yakurwa nomayakuriro omawa omamanise mouhona waaruhe waMuhona nOmuyame wetu Jesus Kristus.” (2 Petr. 1:11) Ihi tjiri tja ri otjisuta tjapeke. Indu tji mwa panḓere po tjimuna Petrus na mu riyandjere okuhongwa i Jehova, eṋe wina mamu kamuna otjisuta tjomuinyo waaruhe. Eṋe mamu “pewa ombwiro yomiinyo vyeṋu ndji ri omayenenisiro wongamburiro yeṋu mu Ye.”—1 Petr. 1:9.