1-2. Ongwaye tje ri otjiṋa otjiwa kweṱe okukonḓonona ehungi ra Simson?

 MO RIPURA ohunga na iye indu tji wa zuu ena ndi Simson? Ove mape ya o ripura ohunga nomurumendu ngwa ri omunamasa tjinene. Otjingaperi. Posi yokutja Simson wa toora omukambo mbwe mu etera omihihamo omingi. Nungwari, Jehova wa yandja ombango kongamburiro onḓakame ya Simson, neye wa tjita kutja ongamburiro ye onḓakame i tjangwe mOmbeibela kokutja tu mune mo ouwa.

² Jehova wa ungurisa Simson okuyenenisa oviṋa ovihimise okuvatera ovakarere ve Ovaisrael. Ozombura ozengi kombunda yonḓiro ya Simson Jehova wa hinga omuapostele Paulus okutjanga ohunga novandu mba ri nongamburiro, mu mamu kamburire mo Simson. (Hebr. 11:​32-34) Otjihorera tja Simson matji yenene okutuyanḓiparisa. Eye we riyamekere ku Jehova, nandarire kehi yozongaro ozonḓeu ma ri. Morupa ndwi, matu kahungirira koviṋa mbi matu yenene okurihongera ku Simson nomuano otjihorera tje mu matji yenene okutuyanḓiparisa.

3. Otjiungura tjiṋe Simson tja muna?

³ Indu Simson tja kwatwa, Ovafilisti aave honaparere po nokuṋiṋikiza otjiwaṋa tjOvaisrael. (Ovapang. 13:1) Ovaisrael va munine omauzeu omengi mena rokutja Ovafilisti aave ve honaparere po noutwe. Jehova wa toorora Simson a rire ngu ‘ma kutura Ovaisrael kOvafilisti.’ (Ovapang. 13:5) Posi yokutja iho tja ri otjiungura otjizeu. Kutja ma yenenise otjiungura otjizeu hi, Simson aa hepa okuriyameka ku Jehova.

4. Omomuano uṋe Jehova ma vatera Simson okuriyama omuini kOvafilisti? (Ovapangure 15:​14-16)

 ⁴ Tara kotjihorera tji matji raisa omuano Simson mari nongamburiro mu Jehova nokuriyameka ku ye. Otjikando tjimwe, orupa rwovita rOvafilisti rwee ku kambura Simson motjihuro hi Lehi, mape ya tji tja ri moJuda. Ovajuda aave tira, ku nao owo va tya okuyandja Simson kovanavita. Owo va pandeka Simson nozongoze mbari ozombe nave mu yandja kOvafilisti. (Ovapang. 15:​9-13) “Nungwari ombepo ya Ndjambi ya harisa Simson omasa” na pora ozongoze nḓo. Nu okuzambo eye wa toora “eṱupa roruyeo orutarazu rwokasino” ne ri ungurisa okuzepa ovarumendu 1 000 Ovafilisti.—Lesa Ovapangure 15:​14-16.

5. Omomuano uṋe Simson ma raisa kutja eye ee riyameke ku Jehova?

⁵ Ongwaye Simson tja ungurisa oruyeo rwokasino? Katjinene omundu okuungurisa oruyeo okurwa motjirwa. Nokuhinokukeyakeya Simson aa tjiwa kutja Jehova me mu vatere okutaara Ovafilisti nandarire kutja wa ungurisa otjikeṋa. Ku nao, omurumendu omuṱakame ngwi wa ungurisa ngamwa otjiṋa okuyenenisa ondando ya Jehova. Mena rokuriyameka ku Jehova, Simson wa muna outoṋi ounene.

6. Otjikeṋa tji matu rihongere okuza kehungi ra Simson?

⁶ Eṱe wina matu yenene okupewa omasa i Jehova okuyenenisa otjiungura tjetu, nandarire kutja matji munika aayo otjizeu. Nu Mukuru ma yenene okutuvatera momuano mbu mape ya atu ha undjire ko. Kara nongamburiro kutja Jehova ngwa yandja omasa ku Simson me ku vatere okutjita ombango ye indu tji we riyameke ku ye kutja me ku vatere.—Omiano 16:3.

7. Otjihorera tjiṋe tji matji raisa ounanḓengu wokupaha omuhunga okuza ku Jehova?

⁷ Ovakambure ovakwetu ovengi mbe norupa motjiungura tjokutunga va raisa ongamburiro mu Jehova. Morukapitaveze, ovakambure potuingi aave tungu Omatuwo wOmerikotameneno omape notuveze tware. Mena rokutja ovandu ovengi ve papitisiwa, otjira tja Jehova aatji hepa okutjita omarundurukiro. Ovarumendu ovakambure mbe nomerizirira va kumba ku Jehova nokukondja okupaha omiano omipe, tjimuna okuranda otuveze  nokuṱuna. Robert ngwa ungura oviungura ovingi vyokutunga ongondoroka nouye, wa tja: “Rutenga kari oupupu ku tjiva okutjita oviṋa momuano omupe.” Eye wa tja: “Omuano mbwo wa pangukire komuano mbwa tu ungura oure wozombura ozengi. Posi yokutja ovakambure ovakwetu va ri nonḓero okuyakura omarundurukiro ngo nu iho tja tjita kutja Jehova ma sere ondaya komarundurukiro ngo.” Iho otjihorera tjimwe tji tji raisa omuano Jehova me hongorera po ovakarere ve okuyenenisa ombango ye. Otja oruveze tji maru kayenda eṱe atuhe matu hepa okuripura epuriro ndi, ‘Hapo ami mbi paha omuhunga wa Jehova nu mbi nonḓero okutjita omarundurukiro kutja mbi mu karere momuano omusemba?’

8. Otjikando tjiṋe tjimwe Simson tja ṱire onyota tjinene, nu wa tjita tjike?

⁸ Ove mape ya mo zemburuka oviṋa vyarwe ovihimise Simson mbya tjita. Eye erike wa zepa ongeyama nu kombunda wa ka zepa Ovafilisti 30 motjihuro hi Askelon. (Ovapang. 14:​5, 6, 19) Simson aa tjiwa kutja eye katja tjita oviṋa mbi nokuhinombatero ya Jehova. Otjikando tjimwe eye wa ṱire onyota tjinene kombunda yokuzepa Ovafilisti 1 000. Eye wa tjita vi? Pendje nokuriyameka ku ye omuini okukapaha omeva, eye wa ningira ombatero ku Jehova.—Ovapang. 15:18.

9. Jehova wa tjita vi indu Simson tje mu ningira ombatero mongumbiro? (Ovapangure 15:19)

⁹ Jehova wa zuvira Simson ne mu tjitire otjihimise mokumupa omeva. Indu Simson tja nwa komeva nga, eye wa “hara omasa na kotora omuinyo.” (Lesa Ovapangure 15:19.) Pe munika aayo ondjombo ombe ndjo ya kara ko ozombura ozengi nga indu omuprofete Samuel tja hingwa okutjanga embo rOvapangure. Ovaisrael mba muna omeva ngaaye pupu ngo, mape ya ye ve zemburukisa kutja indu tji ve riyameke ku Jehova, eye ma vatere ovakarere ve ovaṱakame moruveze ndu mave hepa ombatero.

10. Ovikwaye mbi matu sokutjita kutja tu mune ombatero ya Jehova? (Wina tara kotjiperendero.)

¹⁰ Eṱe wina matu hepa okupaha ombatero ya Jehova nandarire kutja tu nondjiviro ndji ṱa pi poo twa ungura ovingi motjiungura tje. Eṱe matu sokurira overisusuparise natu yakura kutja matu yenene okuungura otjiungura Jehova tje tu ningire okutjita indu tji twe riyameke ku ye erike. Tjimuna Simson ngwa hara omasa kombunda yokunwa omeva Jehova nge mu pa, eṱe wina matu hepa okuyakura ombatero ya Jehova ndji mai tu vatere okurira ovaṱakame ku ye.—Mat. 11:28.

11. Omomuano uṋe mu matu yenene okuriyameka kombatero ya Jehova? Yandja otjihorera.

¹¹ Tara kotjihorera tja Aleksey, umwe wovarumendu ovakambure moRussia ngu tjinda ondatumisire onḓeu. Otjikeṋa tji tje mu vatera okutjinda ongaro onḓeu ndjo? Eye nomukazendu we ve konḓonona Ombeibela nokurikotamena pamwe aruhe. Eye wa tja: “Ami mbi kondja okutjita omakonḓononeno wandje omuini nokulesa Ombeibela eyuva arihe. Ami nomukazendu wandje tu hungirira ketjangwa reyuva nokukumba pamwe ku Jehova omuhuka omunene auhe.” Ihi matji tu hongo tjike? Pendje nokuriyameka kweṱe oveni, eṱe matu sokuriyameka ku Jehova. Omuano uṋe? Mokutjita oviṋa mbi mavi kurisa ongamburiro yetu tjimuna okukonḓonona Ombeibela, okukumba, okukara pozombongarero zombongo nokuzuvarisa. Tji twa tjiti nao Jehova me tu vatere noviṋa mbi matu hepa kutja tu kayende komurungu okumukarera. Eye wa yandja omasa ku Simson, neye wina ma yenene okutupa omasa.

12. Omukambo uṋe omuvi Simson mbwa toora nu oupanga we ku na Delila womorusuvero wa pangukire vi?

¹² Simson wa ri omundu otja eṱe, eye wina kaari ohomonena, ku nao povikando tjiva wa yenene okutoora omikambo omivi. Omukambo umwe mbwa toora we mu wisira mongaro onḓeu tjinene. Kombunda yaindu Simson tjaa karere otjomupangure, eye “wa hura omukazendu wena Delila ngwa turire motjana tjaSorek.” (Ovapang. 16:4) Komurungu wanao, Simson aa vanga okukupa omukazendu Omufilisti. Jehova wa yandjera Simson kutja ma tjite nao kokutja ma rwise Ovafilisti. Kombunda, Simson wa kakara mondjuwo yomukazendu omukorondu motjihuro tjOvafilisti, Gasa. Oruveze ndo, Mukuru otja yandja omasa ku Simson okuisa ko ovipapeko vivari vyomuvero wotjihuro, tji tja tjita kutja otjihuro tjingundipare. (Ovapang. 14:​1-4; 16:​1-3) Posi yokutja Delila mape ya wa ri Omuisrael, ku nao oupanga wa Simson womorusuvero ku na ye kawa ri mena rokuvanga okurwisa Ovafilisti.

13. Delila wa tjita tjike ku Simson?

¹³ Delila wa yakura ovimariva ovingi vyombopero okuza kOvafilisti kokutja ma horore Simson. Mena rokutja eye we mu suverere tjinene, eye mape ya kena pa muna imbi Delila mbya vanga okutjita. Nu Delila wa kara pokupura Simson kutja ongwaye tje nomasa omengi nao, nu korusenina Simson we mu raera. Ouhumandu, ondataiziro ya Simson ya tjita kutja ma pandjare omasa we nu wina ma pandjare ombatero ya Jehova oure woruveze kaaṋi.—Ovapang. 16:​16-20.

14. Ovikwaye mbya tjitwa ku Simson mena rokutja wa ri nongamburiro mu Delila?

¹⁴ Simson wa muna omihihamo omizeu mena rokukambura mu Delila pendje nokukambura  mu Jehova. Ovafilisti ve mu kambura nave mu poṱuparisa. Owo ve mu twa monḓorongo moGasa, motjihuro eye tja teyere omivero vyatjo. Ovandu mbo ve mu tjita kutja ma rire omukarere nu ma kweye ovikokotwa. Okuzambo Ovafilisti va eta Simson pomukandi wawo okumunyekerera. Owo va tjita ombunguhiro onene ku Mukuru wawo woposyo Dagon, mena rokutja owo aave kambura kutja we ve vatere okukambura Simson. Owo va eta okuza konḓorongo pomukandi wawo ‘okuyekuveyorokisa’ nokumunyekerera.—Ovapang. 16:​21-25.

15. Omomuano uṋe Simson ma raisa kutja eye ee riyameke ku Jehova rukwao? (Ovapangure 16:​28-30) (Tara kotjiperendero tjokombanda yokambo nga.)

¹⁵ Simson wa tjita ondataiziro onene, posi ya eye wa kayenda komurungu okukarera Jehova. Eye wa kayenda komurungu okupaha omuano wokuyenenisa otjiungura tje Jehova tje mu pa tjokurwisa Ovafilisti. (Lesa Ovapangure 16:​28-30.) Simson we riheka ku Jehova na tja: “Ndji pa omasa rukwao otjikando hi uriri kutja mbi sutise Ovafilisti.” Mukuru watjiri wa zira ongumbiro ya Simson nu e mu pe rukwao omasa nga ri na wo. Ku nao, Simson wa zepa Ovafilisti ovengi meyuva ndo okukapita imba zepere rukuru.

16. Ovikwaye mbi matu yenene okurihongera kondataiziro ya Simson?

¹⁶ Nandarire kutja Simson wa muna omihihamo omizeu mena rondataiziro ye, eye kena pa isa okukondja okutjita ombango ya Jehova. Indu tji twa tjiti ozondataiziro nokumuna omavyuriro poo tji twa pandjara omerizirira katu sokuyumba ohama. Zemburuka kutja Jehova ka yumbu ohama nu u tu isira. (Eps. 103:​8-10) Nandarire kutja tu tjita ozondataiziro, Jehova ma yenene okutupa omasa okuyenenisa ombango ye, tjimuna tja tjita ku Simson.

17-18. Ongwaye otjihorera tja Michael tji matji ku yanḓiparisa? (Wina tara kotjiperendero.)

¹⁷ Ngatu tare kotjihorera tjomurumendu omukambure omutanda wena Michael. Eye aa ungura ovingi motjiungura tja Jehova, aa karere otjomuvatere wombongo nu wa ri omukandjira omukarere. Ouhumandu, eye wa tjita ondataiziro ndja tjita kutja eye ma pandjare omerizirira we ayehe mombongo. Eye wa tja: “Komurungu wanao, ami ee ungura ovingi motjiungura tja Jehova nu nai ami mbi rimuna kutja hi yenene okuungura ovingi motjiungura tja Jehova. Ami hi na pu mbe ripura kutja Jehova me ndjesa, posi ya ami ee ripura kutja hapo oupanga wandje ku na ye mau kara tjimuna  tji wa ri rukuru poo kutja me yenene okumukarera mombongo tjimuna tjee mu karere rukuru.”

¹⁸ Michael kena pa yumba ohama. Eye wa tja: “Ami ee yandja ombango tjinene ko ku tuṋa oupanga wandje ku na Jehova mokukayenda komurungu okukumba ku Jehova nomutima auhe, okukonḓonona, nokuripurira ko oukoto ku imbi mbi me konḓonona.” Otja oruveze tjaaru kayenda, Michael wa muna omerizirira we mombongo rukwao. Nu nai eye u karera otjomunene wombongo nu omukandjira omukarere. Eye wa tja: “Ombatero nomayanḓiparisiro ngu mba muna, tjinenenene okuza kovanene vombongo ye ndji vatera okumuna kutja Jehova we ndji suvera. Ami nai mbi yenena okukarera mombongo nomeritjiviro omawa womomutima. Oviṋa mbya tjitwa kwami vye ndji honga kutja Jehova u yenena okuisira omundu auhe ngwe ritanaura tjiri.” Eṱe matu yenene okukara nongamburiro kutja Jehova ma yenene okutuungurisa nokutusera ondaya nandarire kutja twa tjita ozondataiziro. Eye ma yenene okutjita nao indu tji tu ungura oukukutu okutuṋa ozondataiziro zetu nokukayenda komurungu okuṱaṱera ku ye.—Eps. 86:5; Omiano 28:13.

19. Omomuano uṋe otjihorera tja Simson mu tje ku yanḓiparisa?

¹⁹ Morupa ndwi, twa tara kovitjitwa tjiva ovihimise mbya tjitwa mehupo ra Simson. Eye kaari omundu ohomonena, posi ya kena pa yumba ohama kozongondjero ze zokukarera Jehova nandarire kombunda yaindu tja tjita ozondataiziro okuraera Delila oviṋa mbye hi na aa sokumuraera. Nu Jehova wa kayenda komurungu okuungurisa Simson. Mukuru wa ungurisa Simson rukwao momuano omuhimise. Jehova we mu vara otjomurumendu wongamburiro onamasa nu opa zokutjanga ena re mokati ka imba ovaṱakame mba tjangwa mOvaheberi ekondwa 11. Tjiri otjiyanḓiparise okutjiwa kutja tu karera Tate wetu womeyuru worusuvero ngu zera okutupa omasa nu tjinene indu tji twa ngundipara. Ku nao ngatu riyarikaṋe ku Jehova tjimuna Simson, ngwa tja: “Arikana rizemburuka na ami, nu ndji pa omasa rukwao.”—Ovapang. 16:28.