Satan kena pa raera Eva kutja tja ri kotjihape Mukuru tje ve tjaera okurya omuinyo we ma u kayenda komurungu okuhupa. Posi yokutja eye wa raera Eva kutja tjari kotjihape tjomuti mbo, eye ka maa ṱu. Satan aa hee kutja Eva ma kayenda komurungu okuyorokera ehupo kombanda yehi, nokuhina okukara kehi youvara wa Mukuru.​—Gen. 2:17; 3:3-5.

Ndovazu omahongero woposyo ohunga nokutja omuinyo u hupa komurungu kombunda yonḓiro kaye utire motjikunino tja Eden, hapo yazira pi? Eṱe katu nokutjiwa. Posi yokutja matu tjiwa kutja ozongamburiro azehe zoposyo za isapewa momupupo wa Noa. Kunao Noa neṱunḓu re omba hupa nu owo avehe aave rikotamene ku Mukuru watjiri.

Pu mape hee kutja omahongero wokutja omuinyo u kayenda komurungu okuhupa kombunda yonḓiro, mape ya yauta kombunda yomupupo wa Noa. Indu Mukuru tja pambaukisa omaraka ‘wovandu avehe kombanda yehi’ poBabel, owo va handjaura kutja ovandu ve nomuinyo mbu kayenda komurungu okuhupa kombunda yonḓiro. (Gen. 11:8, 9) Kainatja kutja omahongero woposyo ngo ya uta ruṋe, matu yenene okukara nongamburiro kutja Satan Omudiaboli “ihe yovizeze avihe,” wa ri kongotwe yotjiṋa ho, nu eye wa ri nondjoroka okumuna ovizeze mbyo amavi handjauka mouye auhe.​—Joh. 8:44.