1-2. Otjihorera tja Angelito matji tu hongo tjike?

HAPO ove we kurisiwa i yovanene mbe ri Ovahongonone va Jehova? Tjiperi nao, zemburuka kutja ongamburiro yovanene voye ka ndji mai tjiti kutja urire epanga ra Jehova. Nandarire kutja ovanene vetu ve karera Mukuru poo kave mu karere, auhe wetu ma hepa okutunga oupanga we omuini kuna Jehova.

² Tara kotjihorera tja Angelito. Eye we kurisiwa meṱunḓu rOvahongonone va Jehova. Nungwari eye tja ri omuṱiṱi ka ri noupanga wopopezu kuna Mukuru. Eye wa tja, “Ami ee karere Jehova mena rokutja ee vanga okuritjatisa keṱunḓu randje.” Nandarire nao Angelito wa twapo oruveze okulesa Ombeibela nokuripurira koukoto, nu eye wa uta okukumba ku Jehova aruhe. Kwa kongorera tjike? Angelito wa tja: “Ami mbe rihonga kutja omuano umwe wokukara noupanga wopopezu kuna Tatee wandje Jehova okumutjiwa nawa.” Ongaro Angelito ma ri, mai tjiti kutja tu ripure nomapuriro omananḓengu nga: Hapo pe nombangu pokati kokutjiwa Jehova nokumutjiwa nawa? Nu matu sokutjita tjike kutja tu tjiwe Jehova nawa?

3. Hapo pe nombangu yaye pokati kokutjiwa Jehova nokumutjiwa nawa?

³ Eṱe mape ya atu munu kutja tu tjiwa Jehova nawa mena rokutja tu tjiwa ena re poo oviṋa tjiva mbye hungira nokutjita.  Posi yokutja okutjiwa Jehova nawa ku kamburira movingi. Eṱe matu hepa okurihonga ohunga na ye novikaṋena vye oviwa. Indu tji twa tjiti nao matu yenene okuzuva nawa omuano mbwe ripura nu me toora omukambo mozongaro pekepeke. Ihi matji tu vatere okutjiwa kutja Jehova u yakura omuano mu tu ripura noviṋa mbi tu tjita. Nu tjitwa tjiwa ombango ya Jehova, eṱe matu sokuitjita.

4. Ovihorera mbi ri mOmbeibela mavi tu vatere vi?

⁴ Ovandu tjiva mape ya ave tu nyekerere mena rokuvanga okukarera Jehova nu nandarire ave utu okutupirukira mena rokuyenda kozombongarero zombongo. Eṱe tji twa kara nongamburiro mu Jehova, eye ke mee tu imbirahi. Nu matu utu okutunga oupanga oukarerere kuna Mukuru. Hapo matu yenene okutjiwa Jehova nawa? Ii, matu yenene. Ovihorera vyovandu mbe ha ri ohomonena tjimuna Moses nOmbara David, vi raisa ouatjiri mbo. Matu ziri omapuriro yevari nga otja tji matu rihongo oviṋa mbi va tjita: Hapo Jehova ve mu tjiwa vi? Nu omapu yeṋe ngu matu rihongo okuza kovihorera vyawo?

5. Hapo Moses wa toorora okutjita ye?

⁵ Moses wa toorora okukarera Mukuru. Indu eye tja ri notjiwondo tjozombura 40, Moses wa toorora okukara pu novakarere va Mukuru Ovaisrael, pendje nokutjiukwa otja “omuna womusuko wa Farao.” (Hebr. 11:24) Moses wa panḓa okukara notjihako tjokombanda, indu tje rikuta ku nOvaisrael mba ri ovakarere moEngipte. Eye katirire omazenge wombara Farao omuhonapare omunamasa ngwaa tjiukwa otja mukuru. Iho tjiri tja raisa kutja Moses wa ri nongamburiro yomasa mu Jehova. Ongamburiro otja indjo ya tjita kutja Moses ma kare noupanga wopopezu kuna Jehova oure womuinyo we.​—Omiano 3:5.

6. Matu rohongo tjike okuza kotjihorera tja Moses?

⁶ Matu rihongo tjike? Tjimuna Moses, atuhe tu nondando ndji matu sokutjita. Hapo matu karere Mukuru nokuyenda kozombongarero zombongo? Eṱe mape ya atu tjiti ozongondjero okurikotamena ku Mukuru, nandarire indu tji matu pirukirwa iimba mbe ha tjiwa Jehova. Nungwari tji tu nongamburiro mu Tate womeyuru, eye metu vatere.

7-8. Moses wa kayenda komurungu okurihonga tjike?

⁷ Moses wa kayenda komurungu okurihonga ohunga novikaṋena vya Jehova nokutjita ombango ye. Otjotjihorera, indu Jehova tja ningira Moses okupitisa Ovaisrael moEngipte eye aa ivaiva nu wa raera Jehova povikando ovingi kutja ke nokuyenenisa otjiṋa ho. Eziriro Mukuru nda yandja ku Moses ra raisa kutja eye u notjari nu aa tjiwa oumune wa Moses, neye we mu vatera. (Eks. 4:10-16) Kunao, Moses wa yenena okukaraera ombuze yombanguriro ku Farao. Moses kombunda wa muna omasa wa Jehova indu tja yama Ovaisrael nu a nyono ombara Farao notjimbumba tje tjovita mOmurongawotuu.—Eks. 14:26-31; Eps. 136:15.

⁸ Kombunda ya indu Moses tja pitisa Ovaisrael moEngipte, owo aruhe aave unauna. Nandarire nao Moses wa muna kutja Jehova wa ri nomuretima nOvaisrael mba kutura kouhuura. (Eps. 78:40-43) Moses wina wa muna omerisusuparisiro wa Jehova indu tje hina wa nyona Ovaisrael kombunda ya indu Moses tje riheka ku ye kutja ehe ve nyono.​—Eks. 32:9-14.

9. Otja kOvaheberi 11:27, oupanga wa Jehova na Moses wa ri vi?

 ⁹ Kombunda yokupitisa Ovaisrael moEngipte, oupanga wa Moses kuna Jehova we kurira ko, nu ya ri tjimuna ee mu munu. (Lesa Ovaheberi 11:27.) Ombeibala i raisa ohunga noupanga worusuvero mbo. Oyo i tja: “Muhona iya hungire na Moses amave tarasana tjimuna omundu tji ma hungire nepanga re.”​—Eks. 33:11.

10. Kutja tu tjiwe Jehova nawa matu sokutjita vi?

¹⁰ Matu rihongo tjike? Okutjiwa Jehova nawa katu sokurihonga ohunga novikaṋena vye uriri, nungwari matu sokutjita ombango ye wina. Ombango ya Jehova ndino oyokuvanga kutja “ovandu avehe ve ṋingapare nu ve vaze kondjiviro youatjiri.” (1 Tim. 2:3, 4) Omuano umwe wokutjita ombango ya Mukuru okuhonga varwe ohunga na ye.

11. Hapo eṱe tu tjiwa vi Jehova nawa, indu tji matu hongo varwe ohunga na ye?

¹¹ Potuingi tji matu hongo varwe ohunga na Jehova eṱe tu mu tjiwa nawa. Otjotjihorera, tu muna otjari tja Jehova kovandu indu tji me tu vatere okumuna imba mbe nomitima omiwa kutja ve rire omapanga we. (Joh. 6:44; Oviung. 13:48) Tu muna omasa wEmbo re indu tji matu munu imba mbu tu rihonga pamwe tji mave isa ovitjitwa vyawo ovivi nokutjita omarundurukiro mongaro yawo youndu. (Kol. 3:9, 10) Nu wina tu muna omuretima wa Jehova kovandu momaturiro mu tu zuvarisa, mena rokutja u tu hinda kuwo povikando ovingi okuvevatera okurihonga ohunga na ye nokutja ve yamwe.—Rom. 10:13-15.

12. Otja ku Eksodus 33:13, Moses wa ningira tjike, nu omena ra ye?

¹² Moses aa vara oupanga we kuna Jehova pondondo yokombanda. Nandarire indu tja za nokutjita ovihimise mena ra Mukuru, nondengero Moses wa ningira kutja Jehova me mu yandjere okumutjiwa nawa. (Lesa Eksodus 33:13.) Moses wa ri motjiwondo tjozombura 80 indu tja ningira okutjiwa Mukuru, nungwari eye aa tjiwa kutja pe novingi mbi ma sokurihonga ohunga na ye.

13. Omomuano uṋe umwe mu matu yenene okuraisa kutja tu vara oupanga wetu kuna Mukuru pondondo yokombanda?

¹³ Matu rihongo tjike? Kainatja kutja twa karera Jehova orure ndu ṱapi, eṱe matu sokuvara oupanga wetu kuna Jehova pondondo yokombanda. Omuano umwe mu matu yenene okutjita nao okukumba ku ye.

14. Ongwaye ongumbiro tje ri otjiṋa otjinanḓengu tji tji tu vatera okurihonga ovingi ohunga na Mukuru?

¹⁴ Indu tji mo vanga okurira epanga ewa ropopezu nomundu warwe, ove mo sokuhungira kuna ye aruhe. Kunao tumbuka popezu na Mukuru mongumbiro aruhe, nu o tira okumuraera oumune nouripura wo ye. (Ef. 6:18) Krista, ngwa tura moTurkey wa tja: “Orusuvero nongamburiro yandje mu Jehova vi kurira ko oiri aihe tji me mu raere oumune nouripura wandje mongumbiro nokumuna omuano eye me ndji vatera. Indu tji me munu omuano Jehova me zira ozongumbiro zandje, kwe ndji vatera kutja mbi vare Jehova otja Tate nEpanga randje.”

15. Jehova wa tja vi ohunga nOmbara David?

¹⁵ Ombara David wa kwaterwa meṱunḓu ndaa ri rikotamene ku Jehova Mukuru. Posi yokutja indo ka nda ri epu David ndaa karere Jehova. Eye we kurisa oupanga we omuini kuna Mukuru, nu Jehova we mu suverere tjinene. Jehova wa tja David ‘aa tjata komutima we.’ (Oviung. 13:22) Hapo peya  vi David ma kare noupanga wopopezu kuna Jehova?

16. David we rihonga tjike ohunga na Jehova okuza koviutwa?

¹⁶ David we rihonga ohunga na Jehova okuza koviutwa. Indu David tja ri omutanda, eye aa kara tjinene morupanda okutjevera ozonḓu za ihe. Ngahino ya ri oruveze ndo tja uta okuripurira ko oukoto koviṋa Jehova mbya ungura. Otjotjihorera, indu David tjaa tara meyuru ngurova eye aa munu ozonyose ozengi. Posi yokutja eye kaa munu ozonyose uriri. Eye wina aa munu ovikaṋena vyOmuute. Kunao David wa tjanga kutja: “Omayuru ye serekarera ounene wa Ndjambi, nevaverwa ri hongonona oviungura vyomake we.” (Eps. 19:1, 2) Indu tjee ripura ohunga nomuano ovandu mu va memwa, eye wa muna ounongo wa Jehova. (Eps. 139:14) Nu otja tjee ripurire ko oukoto koviutwa vya Jehova, eye wa muna kutja Jehova omunamasa tjinene okukapita ye.​—Eps. 139:6.

17. Matu rihongo tjike indu tji matu ripurire ko oukoto koviutwa?

¹⁷ Matu rihongo tjike? Kara nonḓero moviutwa, kara noruveze okuripurira kouye ouwa Jehova mbwa mema, nu nyaṋukirwa i wo. Mehupo roye, ripurira ko oukoto koviutwa ongondoroka na ove, tjimuna omiti, ovipuka novandu, kutja mavi ku hongo ye ohunga na Jehova. Nu eyuva arihe mo rihongo ovingi ohunga na Jehova. (Rom. 1:20) Nu eyuva arihe mo munu orusuvero ro ye ku ye tji ma ru kurireko.

18. Otja kEpsalme 18, David wa muna ye?

¹⁸ David wa muna kutja Jehova ee mu vatere. Otjotjihorera, indu David tja yama ozonḓu za ihe kongeyama nongu, eye wa muna kutja Jehova ongwe mu vatera okuzepa ovipuka mbyo. Indu tja zepa omurwe wovita Goliat, David wa muna oukahu kutja Jehova ongwee mu hongorere po. (1 Sam. 17:37) Nu eye tja hena kOmbara Saul ngwa ri neruru na ye, David wa muna kutja Jehova ongwe mu yama. (Eps. 18, ekondwa arihe) Andakuzu David ee ritongamisa a tja muna kutja eye wa toṋa nomasa we omuini. Posi yokutja eye wa ri omurisusuparise, kunao wa muna kutja Jehova ongwe mu vatera.​—Eps. 138:6.

19. Matu rihongo tjike kotjihorera tja David?

¹⁹ Matu rihongo tjike? Matu hepa okuungura ovingi pendje nokuningira ombatero ku Jehova uriri. Eṱe wina matu sokuzemburuka kutja oruṋe Jehova tje tu vatera nokutja omomuano uṋe. Indu tji tu ri overisusuparise, eṱe tu tjiwa kutja kamaatu yenenisa oviṋa avihe nomasa wetu oveni, nungwari Jehova ongu me tu vatere. Nu otjikando atjihe tji matu munu omuano Jehova me tu vatera, oupanga wetu kuna ye u kurira ko. Omurumendu omukambure wena Isaac moFiji, ngwa karera Jehova oure wozombura ozengi wa muna ouatjiri mbo. Eye wa tja: “Ami mba muna omuano Jehova me ndji vatera okuza koruveze ndu mba uta okurihonga Ombeibela nga ku ndino. Kunao Jehova tjiri epanga randje.”

20. Matu rihongo tjike koupanga wa David na Mukuru?

²⁰ David wa horera kovikaṋena vya Jehova. Jehova we tu mema nonḓero yokuhorera ku ye. (Gen. 1:26) Otja tji matu rihongo ovingi ohunga novikaṋena vya Jehova, ku ri ra oupupu kweṱe okuhorera ku ye. David wa tjiwa Ihe womeyuru nawa, kunao ya ri oupupu ku ye okutjinda varwe tjimuna Jehova. Tara kotjihorera hi. David wa zunḓa komurungu wa Jehova indu tja tjita oruvakiro kuna Batseba na zepa omurumendu we.  (2 Sam. 11:1-4, 15) Posi yokutja Jehova wa raisira David otjari, eye tjinga aa raisire varwe otjari. Mena rokutja David wa ri noupanga ouwa kuna Jehova, Ovaisrael ve mu suverere tjinene nu Jehova we mu ungurisa otjotjihorera kozombara zarwe moIsrael.​—1 Ozomb. 15:11; 2 Ozomb. 14:1-3.

21. Otja kOvaefese 4:24 no 5:1, ‘okuhorera ku Mukuru’ maku tu yetere ye?

²¹ Matu rihongo tjike? Eṱe matu hepa ‘okuhorera ku Mukuru.’ Indu tji matu horere ku Mukuru, ku tu yetera ouwa nu tu rihonga ovingi ohunga na ye. Nu tji matu horere ovikaṋena vye, eṱe wina tu raisa kutja oweṱe ovanatje ve.​—Lesa Ovaefese 4:24; 5:1.

22-23. Maku kongorere ye indu tji matu ṱakamisa imbi mbi matu rihongo ohunga na Jehova?

²² Otja tji twe rihongo, eṱe matu yenene okurihonga ohunga na Jehova okupitira moviutwa vye nEmbo re Ombeibela. MOmbeibela muna ovihorera ovingi vyovakarere va Mukuru ovaṱakame mbu matu yenene okuhorera ko, tjimuna Moses na David. Jehova we tupa ovingi okurihonga ohunga na ye. Okutja kwa sewa kweṱe okukonḓonona ovingi ohunga na ye.

²³ Okurihonga ohunga na Jehova otjiṋa tji tji kayenda komurungu. (Omuzuv. 3:11) Otjiṋa otjinanḓengu kandjiviro onyingi ndji tuna yo ohunga na ye, nungwari omuano mu matu ungurisa ondjiviro ndjo. Tji matu ṱakamisa imbi mbi matu rihongo nokuhorera ku Tate wetu worusuvero, eye ma kara pokutumbuka popezu na eṱe. (Jak. 4:8) Okupitira mEmbo re, eye we tu kwizikira kutja kamaa isa imba mbe kondja okumutjiwa nawa.