HAPO oove omundu ngu raisa ondangi? Atuhe matu sokuripurira kepuriro ndo. Ombeibela ya hunganeka kutja ovandu ovengi moruveze rwetu kave ‘nokuraisa ondangi.’ (2 Tim. 3:2) Ove ngahino wa rora okuhakaena ku novandu mbe vanga kutja varwe ve ve ungurire poo ve ve pe oviṋa. Owo ve muna kutja tji va pewa otjiṋa kave nokuhepa okuraisa ondangi. Ove mape ya o itavere kutja okukara pu novandu otja imbo katjiṋa otjiwa.

Mena repu ndo, ovakarere va Jehova ve tunduuzwa okuraisa ondangi poo ‘okutja okuhepa!’ Eṱe matu sokutja “okuhepa . . .  momihingo avihe.” (Kol. 3:15; 1 Tes. 5:18) Nu wina okuraisa ondangi ku tu yetera ouwa. Omomiano viṋe?

Epu rimwe enanḓengu ndi matu sokutjera okuhepa aruhe, omena rokutja ku tu vatera okukara nondjoroka. Indu omundu tji matja ndangi, peya atji tjiti kutja ma kare noumune ouwa ohunga na ye omuini nu ingwi ngwa raisirwa ondangi u kara noumune ouwa wina. Ongwaye okuraisa ondangi tji ku yeta enyando ku ingwi ngu ma yandja na ingwi ngu ma pewa? Otjotjihorera indu omundu tji ma ungurisa oruveze rwe okukutjitira otjiṋa, i rira mena rokutja wa munu kutja mo hepa otjiṋa ho. Eye u rikendera ove. Indu tji wa munu kutja omundu ngo u rikendera ove, mo kara noumune ouwa na ove omuini. Tjiri pa tjitwa nao ku Rut. Boas aa vatere Rut. Kunao Rut tja muna kutja Boas ee rikendere ye, eye wa ri nenyando.—Rut 2:10-13.

Ounanḓengu tjinene kweṱe okuraisa ondangi ku Mukuru. Nokuhinomakeyakeyero ove u ripurira koviyandjewa Mukuru mbye kayenda komurungu okuyandja. (Deut. 8:17, 18; Oviung. 14:17) Okuripurirako oukoto koviṋa avihe Omuute wetu mbye tu tjitira maku tu vatere okuraisa ondangi ku ye, nokumuna kutja tjiri Mukuru we tu suvera nu u tu vara.—1 Joh. 4:9.

Twa sokuripurirako oukoto koviṋa Jehova mbye tupa nu matu sokutja ndangi ku vyo. (Eps. 100:4, 5) Pe munika kutja, “okuraisa ondangi ku tjita kutja ovandu ve kare nondjoroka.”

Epu rarwe ewa rokuraisa ondangi omena rokutja ku pamisa oupanga. Atuhe tu vanga kutja ovandu ve raise ondangi ku imbi mbi matu ve tjitire. Indu tji mo raisa ondangi komundu warwe koviṋa oviwa mbye ku tjitire, amuyevari mu rira omapanga omawa. (Rom. 16:3, 4) Kombanda ya nao, ovandu mbe raisa ondangi ku varwe potuingi ve vatera varwe. Owo ve muna varwe tji mave ve ve tjitire oviṋa oviwa, nu iho tji ve hinga kutja ve vatere varwe wina. Otjiperi kutja, okuvatera varwe ku tupa ondjoroka. Jesus opazokutja: “Mokuyandja mu nenyando tjinene pokupewa.”​—Oviung. 20:35.

Robert Emmons, omuungure poUniversity ya California nu ngu ri morupa ndu konḓonona omuano ovandu mu ve raisa ondangi, wa tja: “Kutja tu rire ovandu mbe raisa ondangi, matu hepa okutjiwa nawa kutja omundu auhe u hepa omukwao. Povikando tjiva tu yandja nu oruveze rwarwe tu pewa.” Kutja tu hupe nokukara nondjoroka tu hepa ombatero okuza ku varwe momiano omingi. Otjotjihorera, owo mape ya ave tupe ovikurya poo ave tu vatere kutja tu mune omapangero  omawa. (1 Kor. 12:21) Omundu ngu raisa ondangi tjiri u vara oviṋa varwe mbi ve mu tjitira. Hapo ove u raisa poo u tja ndangi ku varwe koviṋa mbi ve ku tjitira?

Epu rarwe ndi matu sokuraisa ondangi, omena rokutja ku tu vatera okuyandja ombango koviṋa oviwa pendje nokuripurira ku imbi ovivi. Momuano warwe, ourizemburuka wetu u ungura tjimuna osipe. Owo u tjita kutja tu yandje ombango koviṋa oviwa nu atu ha yandja ombango tjinene komauzeu wetu. Otja pu mo raisa ondangi ku tjita kutja u yandje ombango tjinene koviṋa oviwa, nu iho tji tjita kutja u kare nondangi tjinene. Indu tji wa yandja ombango koviṋa mbi mo yenene okuraisa ko ondangi mehupo ro ye, maku ku vatere okutjita imbi omuapostele Paulus mbye tu ningira okutjita indu tja tja: “Nyandeye mu Muhona aruhe!”​—Fil. 4:4.

Okuraisa ondangi ku tu vatera okuripura momuano omuwa. Ku rira ouzeu komundu ngu raisa ondangi okukara neruru, nokupindika tjimanga. Ovandu mbe raisa ondangi potuingi kave suvere omauini. Owo ve kara nohange na imbi mbi ve navyo nu kave vanga okuripahera oviṋa ovingi.​—Fil. 4:12.

OtjOmukriste, ove u tjiwa kutja Satan u vanga kutja u we momuinyo indu tji mo munu omauzeu momayuva omasenina nga. Eye u vanga kutja u kare nongaro yomaunaunino. Mena rokutja tji u nongaro ndjo ma rire ouzeu kovandu okupuratena kove tji mo zuvarisa ombuze ombwa. Okuraisa ondangi ku raisa kutja tu novihape vyombepo. Otjotjihorera, tu kara nondjoroka mena rokutja tu muna oviṋa oviwa Mukuru mbye tupa nu tu nongamburiro momakwizikiro we.​—Gal. 5:22, 23.

Tji u ri umwe wovakarere va Jehova, ove mape ya oyakura oviṋa mbya hungirwa morupa ndwi ohunga nokuraisa ondangi. Nu wina mo yakura kutja kaupupu aruhe okutja ndangi nokuyandja ombango koviṋa imbi oviwa. Posi yokutja iho atji tjiti kutja u rihahize. Ove mo yenene okuraisa ondangi aruhe mehupo roye. Omomuano uṋe? Paha oruveze ndu mo yenene okuripura ohunga noviṋa ku mo raisa ko ondangi mehupo roye. Otja pu mo tjiti nao aruhe, ma rire oupupu kove okuraisa ondangi. Nu iho matji tjiti kutja u kare nondjoroka kombanda ya imba mbe ripurira komauzeu ngu ve muna. Ripura noviṋa oviwa Mukuru novandu varwe mbi ve tjita okukuyanḓiparisa nu mbi kupa ondjoroka. Mape ya outu okutjanga oviṋa mbyo membo. Mu ro mo yenene okutjanga oviṋa vivari poo vitatu mbi u nondangi ko eyuva arihe.

Ovakonḓonone va muna kutja tji matu tja ndangi ku varwe aruhe, tji yenena okurundurura omuano mbu tu ripura nu ku rira oupupu kweṱe okukara noumune ouwa ohunga nehupo retu. Omundu ngu raisa ondangi u kara nondjoroka. Ripura noviṋa oviwa avihe mbi wa muna, yorokera oviṋa avihe oviwa mbi mavi tjitwa kove nu aruhe raisa ondangi. Vara oviṋa avihe oviwa mbi mo munu nu itja, “okuhepa ku Muhona, Eye tjinga e ri omuwa.” Ii, “Itjeye okuhepa . . .  momihingo avihe.”​—1 Ekuruh. 16:34; 1 Tes. 5:18.