Omaprofetero tjiva nga tamunwa morupa ndwi ye hungira ohunga noviṋa mbya tjitirwa tjimwe. Omaprofetero aehe ngo ye raisa kutja tu hupa moruveze ‘rwomaandero wouye.’—Dan. 12:4.

• Omatjangwa Omavan. 11:7; 12:13, 17; 13:1-8, 12

  Omaprofetero “Otji puka” tja honaparera ouye oure wozombura ozengi. Moruveze rwomaandero, Otjiuru tjatjo otjitjahambombari tjari notjito. Nu kombunda otjiuru ho tja veruka “nouye auhe” wa kongorera ihi otjipuka. Satan u ungurisa otjipuka ho ‘okurwisa ozondekurona nḓa sewa po.’

  Omayenenisiro Kombunda yomupupo, ozohoromende nḓa ri ozonavita kuna Jehova za uta okuhonaparera po ovandu. Ozombura ozengi kombunda yanao movita ovitenga vyouye, ohoromende onamasa ndji o Britain ya pandjara omasa wayo tjinene. Oyo ya karira onamasa rukwao tji yaza nokurikuta kuno United States. Tjinenenene momayuva omasenina Satan u ungurisa omauhonapare aehe kombanda yehi okutatumisa ovakarere va Mukuru.

• Etjangwa Dan. 11:25-45

  Omaprofetero Momayuva omasenina ombara yokomanene wehi nombara yokomamuho wehi maze ru kumwe okurarakana ouvara.

  Omayenenisiro O Germany ya rwa kuno Britain no United States. Mombura ndji 1945 o Soviet Union na imba mbaave yandja oruvara kuyo va ri ra ombara yokomanene wehi. Mombura ndji 1991, o Soviet Union otji yawa, nu kombunda o Russia na imba mbe yandja oruvara kuyo omba rira ombara yokomanene wehi.

• Omatjangwa Jes. 61:1; Mal. 3:1; Luk. 4:18

  Omaprofetero Jehova wa hinda “omuhindwa” we “kutja a ṱune ondjira komurungu” ngunda Ouhona wa Messias au hiya zikamisiwa. Nu “omuhindwa” ngwi wa uta “okueta ombuze ombwa kovasyona.”

  Omayenenisiro Okuza mombura ndji 1870, C. T. Russell novakwao mba ri puna ye va konḓonona Ombeibela oukoto okutjiwa kutja oyo tjiri i honga tjike. Nu okuza mombura ndji 1881, owo va uta okumuna kutja ounahepero tjinene ovakarere va Mukuru okuzuvarisa. Owo va pitisa omambo nge notupa tjimuna “Wanted 1 000 Preachers” no “Anointed to Preach.”

• Etjangwa Mat. 13:24-30, 36-43

  Omaprofetero Omurumendu wa kuna ovikokotwa mehi romakunino. Nu okuzambo omunavita wa kuna ozondombora mehi romakunino, moruveze ndo omakondero otji ya uta nu ozondombora aze haṋewa kovikokotwa.

  Omayenenisiro Momautiro wombura ndji 1870 ombangu pokati kOvakriste vatjiri na imba woposyo ya uta okumunikwa poruhaera. Moruveze rwomaandero, Ovakriste vatjiri ve panguka ku imba woposyo.

• Etjangwa Dan. 2:31-33, 41-43

  Omaprofetero Ozombaze zotjitenda nozomunoko zotjiserekarera za ungurwa povitenda pekepeke.

  Omayenenisiro Omunoko u kuramena po ovandu mba honaparerwa po i o Britain no United States nu mbe pirukira ozohoromende nḓo. Mena rovandu mbo, ozohoromende nḓo kaze yenene okuungurisa ouvara wa zo okuura.

• Omatjangwa Mat. 13:30; 24:14, 45; 28:19, 20

  Omaprofetero “Ovikokotwa” vya wongerwa “motjipwikiro” nu “Omukarere omuṱakame nomunazondunge” wa zikwa “kombanda yovakarere ovakwao.” Nu omazuvarisiro ‘wombuze Ombwa yOuhona’ ya uta okuhandjauka “mouye auhe.”

  Omayenenisiro Mombura ndji 1919 omukarere omuṱakame nomunazondunge wa zikwa kombanda yovakarere ovakwao. Okuza koruveze ndo ovakonḓonone wOmbeibela va uta okuzuvarisa nomasa. Ndino, Ovahongonone va Jehova ve zuvarisa momahi wokombanda 200 nu ve pitisa omambo nga zikamena kOmbeibela momaraka wokombanda 1 000.

• Omatjangwa Dan. 12:11; Omavan. 13:11, 14, 15

  Omaprofetero Otjipuka tjozonya mbari tja raera ovandu kombanda yehi okutunga “otjiserekarera kondjozikiro yotjipuka,” nu otjo tja ‘suvira osuvaneno motjiserekarera tjotjipuka.’

  Omayenenisiro O Anglo-America ya zikamisa o League of Nations. Otjira ho aatji pewa oruvara i yoviwaṋa vyarwe. Korusenina, ombara yokomanene wehi ye rikuta ku no League of nations okuza mombura ndji 1926 nga 1933. Ovandu aave kambura kutja o League of nations ondji mai eta ohange mouye, iho tji tjiri otjiṋa Ouhona wa Mukuru auyerike mbu mau yenene okutjita. Ovandu wina aave kambura kutja Omihoko Omikutasane mavi yenene okutjita nao.

• Etjangwa Dan. 8:23, 24

  Omaprofetero Ombara otjindandi mai eta “omanyoneno omatirise.”

  Omayenenisiro O Anglo-America ya zepa ovandu ovengi nu ya eta omanyoneno omengi. Otjotjihorera, movita ovitjavari vyouye, o United States ya umba ovipamuke vivari vyomiku ominawanga koviwaṋa mbyari ovinavita no Anglo-America nu ovipamuke mbi vya eta onyoneno onyingi okukapita onyoneno ndja tjitirwe rukuru.

• Omatjangwa Dan. 11:31; Omavan. 17:3, 7-11

  Omaprofetero Otjipuka “otjiserandu” tjozonya omurongo tji tja pita morutjiva rokehi yehi ombara oitjahambondatu. Embo ra Daniel rihungira ombara ndjo otja “otjiyaukise otjitirise kotjipunguhiro.”

  Omayenenisiro Movita ovitjavari vyouye o League of Nations otji ya wa. Kombunda yovita mbyo, Omihoko Omikutasane otji vya ‘zikamisiwa.’ Tjimuna o League of Nations, Omihoko Omikutasane vya pewa ondjozikiro ndja pwira Ouhona wa Mukuru. Omihoko Omikutasane mavi wire ozongamburiro.

• Omatjangwa 1 Tes. 5:3; Omavan. 17:16

  Omaprofetero Oviwaṋa mavi tjivisa kutja “ku nohange norusuvo,” nu “ozonya omurongo” “notjipuka” mavi nyono “omukazendu omukorondu.” Nu okuzambo oviwaṋa mavi nyonwa.

  Omayenenisiro Oviwaṋa mape ya avi tja vya eta ohange norusuvo mouye. Okuzambo oviwaṋa mbi yandja oruvara kOmihoko Omikutasane mavi nyono ozongamburiro zoposyo. Nu iho matji rire omautiro wozombamisiro ozonene. Nu ozombamisiro nḓo maze yanda indu Jesus tji meya okunyona ouye auhe wa Satan.

• Omatjangwa Esek. 38:11, 14-17; Mat. 24:31

  Omaprofetero Gog ma wire ovakarere va Mukuru. Nu okuzambo ovaengeli mave wongo “otjiwaṋa tje otjitoororwa.”

  Omayenenisiro Ombara yokomanene wehi nozohoromende zarwe mave wire ovakarere va Mukuru. Ngunda omawiro ngo aye hiya uta ovatwirisiwa mberi kombanda yehi mave twarewa keyuru.

• Omatjangwa Esek. 38:18-23; Dan. 2:34, 35, 44, 45; Omavan. 6:2; 16:14, 16; 17:14; 19:20

  Omaprofetero “Omukavire” ngwa kavire “okakambe okavapa” ma ‘toṋa rukwao’ mokunyona Gog norupa rwe rovita. “Otjipuka” matji ‘yumbwa merindi romuriro mbu yaka nosurungu,’ nu otjiserekarera otjinene matji nyonwa.

  Omayenenisiro Jesus, Ombara yOuhona wa Mukuru ma yama ovakarere va Mukuru. Jesus novandu 144 000 novaengeli mave nyono oviwaṋa avihe mbya tatumisa ovakarere va Mukuru. Nu ingo ma rire omaandero wouye wa Satan