1. Indu Adam na Eva tji va pirukira Jehova mOtjikunino tja Eden, Jehova wa yanḓiparisa vi ozondekurona zawo?

OKUZA koruveze indu ovandu tji va uta okutjita ourunde na tji va rira ovahahomonena, Jehova wa raisa kutja eye oMukuru ngu yandja omayanḓiparisiro. Tjimanga Adam na Eva tji va za nokupirukira Mukuru mOtjikunino tja Eden, Mukuru wa yandja otjiṋa tji tja yanḓiparisa ozondekurona za Adam. Pa ri nomaundjiro woruyaveze kovandu. Ovandu tji va zu omakwizikiro nga tjangwa mu Genesis 3:15, ma ye ve pe omaundjiro wokutja korusenina “indji onyoka onguru,” ndji ri Satan Omudiaboli noviungura vye avihe ovivi, mai yandekwa.​—Omavan. 12:9; 1 Joh. 3:8.

2. Jehova wa yanḓiparisa vi Noa?

² Omukarere wa Jehova wena Noa, wa hupire mouye ourunde, nu ovandu veṱunḓu re uriri ombaave karere Jehova. Ozondjito  zoutwe notuvakiro nḓa takavarere mouye ongondoroka na Noa, mape ya atja ze tjita kutja me rihahize. (Gen. 6:4, 5, 11; Judas 6) Posi yokutja Jehova we mu pa ondjivisiro ndje mu pa ouvanḓe mbwaa hepa, kutja ma panḓere po mozongondjero ze ‘zokuryanga puna Ndjambi.’ (Gen. 6:9) Jehova wa raera Noa kutja Eye ma yandeke ouye ourunde mbo, nu we mu pa omirari ohunga nokutja ma sokutjita vi kutja ma yame eṱunḓu re. (Gen. 6:13-18) Jehova wa ri Mukuru omuyanḓiparise ku Noa.

3. Jehova wa yanḓiparisa vi Josua? (Tara kotjiperendero pomautiro worupa ndwi.)

³ Kombunda, Josua wina wa ri notjiungura otjizeu tjokuhitisa otjiwaṋa tja Mukuru mEhi Ekwizikwa. Ihi aatji kamburire mo okurwisa oviwaṋa ovinamasa mbya ri momaturiro ngo. Josua tjiri wa ri nepu ewa rokurikenda. Jehova wa muna otjiṋa hi, na raere Moses kutja ma tunduuze Josua. Mukuru wa tja: “Rakiza ku Josua okuyenda, mu pendaparisa nu mu zeuparisa, eye tjinga e ri ngu ma hongorere otjiwaṋa hi, nu e ri ngu me ve pe ehi ndi ndi mo munu.” (Deut. 3:28) Ngunda Josua e hiya uta otjiungura tje, Jehova we mu yanḓiparisa nomambo nga: “Rizemburuka nomarakiza wandje ngu maye tja: ‘Yanḓipara nu rira ependa!’ O tira, nu o mumapara, orondu Ami, ngu mbi ri Muhona, Ndjambi woye, mbi ri puna ove ngamwa akuhe ku mo i.” (Jos. 1:1, 9) Inga tjiri omazeuparisiro omawa!

4, 5. (a) Jehova wa yanḓiparisa vi ovakarere ve voruveze orukuru? (b) Jehova wa yanḓiparisa vi Omuna we?

⁴ Jehova ka yanḓiparisire omundu auhe kourike we uriri, nungwari wina ee ve yanḓiparisa otjotjimbumba. Momahunganekero, Jehova wa huhumiṋa Ovajuda mba ri mouhuura koBabilon, na tja: “O tira, Ami mbi ri puna ove! OwAmi Ndjambi woye, o urumisiwa i otjiṋa! Me ku zeuparisa, nu me ku vatere; me ku tjevere, nu me ku yama.” (Jes. 41:10) Ovakriste voruveze orukuru va ri nongamburiro otjingeyo, nu wina ovakarere va Mukuru ndino ve nongamburiro ndjo.​—Lesa 2 Ovakorinte 1:3, 4.

⁵ Jesus wina wa muna omayanḓiparisiro okuza ku Ihe. Pombapitisimo ye, Jesus wa zuva eraka ra Ihe okuza keyuru, nda tja: “Ingwi Eye Omuna wandje omusuverwa Ami mu mbi nonyuṋe.” (Mat. 3:17) Omambo ngo mape ya ya yanḓiparisa Jesus motjiungura tje atjihe tjokuzuvarisa!

6. Otjisasanekero ohunga novimariva ovisilveri, tji tu yanḓiparisa vi?

⁶ Jesus wa horera ku Ihe. Otjisasanekero tja Jesus ohunga novimariva ovisilveri, tji tja yandjwa momahunganekero wa Jesus ohunga nomaandero wouye mbwi, tji tu tunduuza kutja tu rire ovaṱakame. Omuhona wa yozike ovakarere ve ovaṱakame nomambo nga: “Osemba, oove omukarere omuwa nomuṱakame. Ove tjinga awa ṱakama nouṋa ouṱiṱi, otjinga ame ku ziki kombanda yovingi. Hita nu u nyande puna ami!” (Mat. 25:21, 23) Inga tjiri omayanḓiparisiro omanene, wokutja ngatu kayende komurungu okukarera Jehova nouṱakame!

7. Jesus wa yanḓiparisa vi ovaapostele ve, nu tjinenenene Petrus?

⁷ Ovaapostele va Jesus potuingi va ri nombata ohunga nokutja ouṋe ngu u ri omunenenene mokati kawo. Posi yokutja Jesus wa raisa omuretima, neve tunduuza okurira overisusuparise nokutja ngave rire ovakarere, nungwari ave rire ovahona. (Luk. 22:24-26) Petrus tjinenenene wa hihamisa Jesus povikando ovingi. (Mat. 16:21-23; 26:31-35, 75) Nungwari moruveze rokunakaura Petrus,  Jesus we mu yanḓiparisa, nu nandarire we mu pa otjiungura tjokuyanḓiparisa ovakambure ovakwao.​—Joh. 21:16.

8. Hiskija wa yanḓiparisa vi ovahongore votjimbumba tjovita notjiwaṋa tjOvajuda?

⁸ Ovakarere va Jehova ovaṱakame aave tjiwa kutja mave sokuyanḓiparisasana, nandarire ngunda Omuna wa Jehova e hiye ya kombanda yehi, nokuraisa omuano wokuyanḓiparisasana. Indu Hiskija tja tirisiwa i Ovasirie, eye wa woronganisa ovahongore votjimbumba tjovita notjiwaṋa tjOvajuda okuvetunduuza. Nu “ovandu va yanḓiparisiwa i omambo nga.”​—Lesa 2 Ekuruhungi 32:6-8.

9. Embo ra Job ri tu honga tjike ohunga nokuyanḓiparisa varwe?

⁹ Nandarire kutja eye omuini aa hepa okuzeuparisiwa, Job wa raisira omapanga we 3 otjihorera tjokuzeuparisa varwe, orondu ‘omahuhumiṋino wawo ya ri ondatumisire uriri.’ Eye we ve raera kutja, andakuzu wa ri mozongaku zawo, etje ve ‘zeuparisa nomaronga we, nu atja kara pokuhungira kutja me ve huhumiṋe.’ (Job 16:1-5) Nu korusenina, Job wa muna omahuhumiṋino okuza ku Elihu na Jehova omuini.​—Job 33:24, 25; 36:1, 11; 42:7, 10.

10, 11. (a) Ongwaye omuatje wa Jefta omukazona tjaa hepa okuyanḓiparisiwa? (b) Oouṋe mbe hepa omayanḓiparisiro otjingewo ndino?

¹⁰ Otjihorera tjarwe tjomundu ngwaa hepa okuyanḓiparisiwa oruveze orukuru, tja ri otjomuatje wa Jefta omukazona. Komurungu wokukarwa ku nOvaamoni, Omupangure Jefta wa tjita omakwizikiro ku Jehova kutja, Jehova tje mu pe outoṋi, eye ma yandja omundu ngwa tenge po okupita mondjuwo ye okuyekumutjakanena, ku Jehova kutja me kemuungurire pondjuwo ye. Omundu ngwa pita omutenga wa ri omuatje we omukazona erike ṱii, ngwe yekumutjakanena okuraisa enyando re mena routoṋi ihe mbwa muna. Jefta wa hihamwa omutima tjinene. Posi yokutja wa yenenisa oruyano rwe, na hindi omuatje we koSilo, kutja ma kakarere Jehova pondanda yomaturiro oure womuinyo we.​—Ovapang. 11:30-35.

¹¹ Otjiperi kutja tja ri otjiṋa otjizeu ku Jefta, nu mape ya tja ri otjiṋa otjizeu tjinene komuatje we omukazona, ngwa raisa onḓero yatjiri yokuyenenisa ombango ya ihe. (Ovapang. 11:36, 37) Kunao eye kena pa kupwa poo okupanduka ovanatje, nu kena pa yenena okuṱiza ena notjirumatwa tja ihe. Eye tjiri, aa hepa okuyanḓiparisiwa. Ombeibela i tja: “Imbwi ombwa rira omuhingo moIsrael: Ombura aihe ovasuko vOvaisrael iyave kumuka okukaririra [poo ‘okukatanga,’ NW] omukazona wOmugilead Jefta oure womayuva yane.” (Ovapang. 11:39, 40) Nu hapo ko nakuitavera kutja ovakambure ovakombe mbe ungurisa oukombe wawo okuyandja ombango nawa ‘koviungura vya Mukuru,’ wina ve hepa okutangwa nokuyanḓiparisiwa?​—1 Kor. 7:32-35.

12, 13. Petrus wa ‘zeuparisa vi ovakwao’?

¹² Mongurova yokomurungu wonḓiro ye, Jesus wa raera omuapostele Petrus na tja: “Simon, Simon, puratena! Satan wa pewa ousemba okumurora amuhe, nokuhaṋa ovawa kovavi tjimuna omukune tje sisira ovikokotwa kotjisisiro. Nungwari Ami mba kumbira ove, Simon, kutja ongamburiro yoye ai ha yanda. Nove tji we ritanaurire ku Ami, mo sokuzeuparisa ovakweṋu.”​—Luk. 22:31, 32.

¹³ Ombongo yOvakriste yoruveze orukuru, aai vara Petrus otjongunḓe. (Gal. 2:9) Eye wa zeuparisa ovakambure ovakwao, mokuvepa  otjihorera tjouvanḓe poPentekoste na wina kombunda yanao. Komaandero wotjiungura tje tjokuzuvarisa, eye wa tjangera ovakambure ovakwao orutuu. Neye wa kahurura, na tja: “Ami mba tjanga orutuu orusupi ndwi. . . . Mba vanga okumuyanḓiparisa nokuhongonona kutja otji tji ri otjari tjatjiri tja Ndjambi. Zikameye mu tjo.” (1 Petr. 5:12) Otutuu twa Petrus, twa yanḓiparisa Ovakriste ozombura ozengi, nga ku ndino. Nu tjiri tu hepa omayanḓiparisiro otja ingo otja tji matu undju omayenenisiro womakwizikiro wa Jehova.​—2 Petr. 3:13.

14, 15. Omatjangwa Johanes nga hingwa i ombepo ondjapuke okutjanga, ya zeuparisa vi Ovakriste oure wozombura ozengi?

¹⁴ Omuapostele Johanes, wina wa ri ongunḓe kOvakriste voruveze orukuru. Omambo omanyandise womutima nga tjangwa mEvangeli ra Johanes ohunga notjiungura tja Jesus tjokuzuvarisa, tjiri ya zeuparisa Ovakriste oure wozombura ozengi, nga ku nai. MEvangeli ra Johanes ariyerike, omu mu nomambo Jesus nga hungira ohunga nokutja, orusuvero ootjiṋa tji matji tjiukisa ovahongewa ve vatjiri.​—Lesa Johanes 13:34, 35.

¹⁵ Otutuu twa Johanes tutatu, tu raisa ouatjiri warwe ounanḓengu. Indu tji tu nombameno mena rouvi ounene mbu twa tjiti, hapo katu munu omahuhumiṋino momambo nge tja, ‘ombinḓu ya Jesus, mai tu kohorora komauvi aehe’? (1 Joh. 1:7) Indu omeritjiviro wetu womomutima tji maye kayenda komurungu okutupangura, hapo eṱe katu kara nomahoze wondjoroka tji matu lese omambo nge tja, “Ndjambi omunene pomeritjiviro wetu womorukoro”? (1 Joh. 3:20) Johanes erike ongwa tjanga omambo nga: “Ndjambi tjinga e ri orusuvero.” (1 Joh 4:8, 16) Orutuu rwe orutjavari norutjatatu, tu tanga Ovakriste mbe “nongarero youatjiri.”​—2 Joh. 4; 3 Joh. 3, 4.

16, 17. Omuapostele Paulus wa zeuparisa vi Ovakriste voruveze orukuru?

 ¹⁶ Meserewondo etenga, mape ya omuapostele Paulus ongwa zeuparisa ovakambure ovakwao tjinene. Pe munika aayo moruveze orukuru rwOvakriste, otjingi tjovaapostele va kara moJerusalem, tji tja ri oruveze orutu orunane maaru kara. (Oviung. 8:14; 15:2) Ovakriste moJudea aave zuvarisa ohunga na Kristus, kovandu mbaave kambura mu Mukuru, mena rokutja aave tjiwa omahongero wOvajuda. Nungwari omuapostele Paulus wa hingwa i ombepo ondjapuke, okukazuvarisira oviwaṋa vyouye wa Grike nowa Roma, mbyaavi rikotamene koomukuru ovengi.​—Gal. 2:7-9; 1 Tim. 2:7.

¹⁷ Paulus wa ryanga mehi arihe ndino ndi tjiukwa otja Turkey, na moGreece noItaly, okuuta ozombongo zOvakriste mokati kovandu mbe hari Ovajuda. Ovakriste ovape mba, ‘va tatumisiwa i ovandu vawo oveni’ nu aave hepa okuzeuparisiwa. (1 Tes. 2:14) Mombura ape 50 O.Z., Paulus wa tjanga orutuu kombongo yOvatesalonika ndja zikwa oupe, na tja: “Eṱe aruhe tu mu tjera okuhepa amuhe ku Ndjambi nu tu mu zemburuka mozongumbiro zetu nokuhaisa. Tu zemburuka komurungu wa Ndjambi Tate ihi otjiungura tjongamburiro yeṋu, nongondjero yeṋu yorusuvero, nonḓaro orure.” (1 Tes. 1:2, 3) Eye wina we ve tunduuza kutja ve yanḓiparisasane, indu tja tja: “Pandiparisasaneye nu mu vaterasane otja punga amu tjita hapo.”​—1 Tes. 5:11.

18. Orutu orunane rwesewondo etenga rwa yanḓiparisa vi Filipus?

¹⁸ Orutu orunane meserewondo etenga, aaru zeuparisa imba mbaave hongorere po ombongo yOvakriste, nouṋepo wombongo auhe. Indu omuzuvarise wena Filipus, tjaa zuvarisire Ovasamaria ohunga na Kristus, ouṋepo worutu orunane ve mu vatera. Owo va hinda Petrus na Johanes, mba ri ouṋepo worutu orunane, okukakumbira ovakambure ovape mbo, kutja ve mune ombepo ondjapuke. (Oviung. 8:5, 14-17) Filipus na imba mbe ritanaura, mape ya va yanḓiparisiwa tjinene i ombatero ndji va pewa i orutu orunane!

19. Orutuu orutu orunane ndu va hinda, rwa ṱuna vi kozombongo zoruveze orukuru?

¹⁹ Kombunda, orutu orunane rwa ningirwa okutya kutja Ovakriste mbe hari Ovajuda, mave hepa okusukarekwa poo indee, otja Omatwako wa Moses tjaaye undjire ko kOvajuda. (Oviung. 15:1, 2) Nombatero yombepo ondjapuke, natji va za nokuhungirira kOmatjangwa, ovarumendu mba va tya kutja kahepero ovandu okusukarekwa rukwao, nowo va tjanga orutuu kozombongo ohunga nondyero ndji. Ovakuramene po vorutu orunane, va hindwa kozombongo okukayandja orutuu ndwi. Nu kwa kongorera tjike? ‘Ovakambure tji va za nokurulesa, arire tji va nyanda omitima tjinene mena rombuze ombwa ndji ndje ve yarura omitima pehi.’​—Oviung. 15:27-32.

20. (a) Orutu Orunane ndino ru yanḓiparisa vi eṱunḓu rovakambure avehe mouye? (b) Morupa ndu maru kongorere ko matu kazira epuriro riṋe?

²⁰ Kundino, Orutu Orunane rwOvahongonone va Jehova, ru yanḓiparisa eṱunḓu roBetel, novazuvarise mbe karera Jehova oruveze aruhe, neṱunḓu retu rovakambure avehe mouye. Nu omayanḓiparisiro nga ye eta ondjoroka nomazeuparisiro, otja tji pari meserewondo etenga. Okuweza ko, mombura ndji 2015, Orutu Orunane rwa pitisa okambo nga Kotoka ku Jehova, ku ka yanḓiparisa ovengi tjinene mouye auhe. Nu hapo owomba uriri mbe ri mouvara, mbu mave sokuhorera ku Jehova okuyanḓiparisa ovakwao? Eziriro kepuriro ndo, mari kazirwa morupa ndu maru kongorere ko.