1, 2. (a) Ongwaye ovandu momayuva womuapostele Paulus tjaave rikende ohunga noukarere nongutukiro? (b) Paulus aa tunduuza ovandu okutara ku uṋe tji mave vanga ongutukiro yatjiri?

OVATURE va Roma, Ovakriste voruveze orukuru mu va turire, va ri nomutongatima kutja aave rwire ozoveta, nousemba nongutukiro. Posi yokutja, otjiṋa tji tja tjita kutja Ouhonapare wa Roma u rire ounamasa nounene tjinene, ya ri mena rokutja wa ri novakarere ovengi. Oruveze rumwe, ozoperesende ape 30 zovandu mouhonapare mbo, va ri ovakarere. Mape ya kutja oukarere nongutukiro, ooviṋa ovandu vakauriri nOvakriste, mbyaave hungirire ko tjinene.

² Otutuu twomuapostele Paulus tjinene aatu hungire ohunga nongutukiro. Posi yokutja, ondando yotjiungura tje tjokuzuvarisa, kaya ri oyokurundurura oviwaṋa poo ozohoromende zoruveze ndo. Nu ihi otjiṋa ovandu ovengi voruveze ndo tjaave zeri. Paulus novakambure ovakwao, kaave tara kovanane vovandu kutja arire mba eta onguturiro, nungwari va ungura oukukutu okuvatera varwe okuzuva ombuze ombwa yOuhona wa Mukuru, nonḓengu onene yotjisuta tjonguturiro Jesus Kristus tja suta. Paulus aa tunduuza ovakambure ovakwao okutara ku Ingwi ngu yandja onguturiro yatjiri. Okutara kotjihorera, morutuu rwe orutjavari ndwa tjanga  kovakambure mombongo ya Korinte, eye wa tja: “Embo ndi ‘Muhona’ poṋa mba mari hee ‘Ombepo’; nu pu pe nOmbepo ya Muhona pe nongutukiro.”​—2 Kor. 3:17.

3, 4. (a) Otjikeṋa tji tja hinga Paulus okutjanga omambo nge ri 2 Ovakorinte 3:17? (b) Matu sokutjita vi tji matu vanga okuyorokera ongutukiro ndji za ku Jehova?

³ Pomautiro worutuu rwe kombongo yOvakorinte, Paulus wa hungira ohunga nongeṋangeṋeno ya Moses tja heruka okuza kOndundu Sinai, indu tja za nokukahungira ku nomuengeli wa Jehova. Otjiwaṋa tji tja muna Moses, tja uta okutira, nu Moses wa twako ewiwiri kotjiuru tje. (Eks. 34:29, 30, 33; 2 Kor. 3:7, 13) Paulus wa kahurura kutja, omundu “tji ma tanaukire ku Muhona, ewiwiri mari isiwa ko.” (2 Kor. 3:16) Omambo wa Paulus maye hee tjike?

⁴ Otja tji twe rihongo morupa ndwa kapita, Jehova, Omuute woviṋa avihe, Eemundu erike ngu nouyara wokutjita atjihe tji ma vanga nokuhina omundu, poo otjiṋa tji matji mu tjaere. Kunao, katjihimise kutja pu Jehova, na “pu pe nOmbepo ya Muhona,” pe nongutukiro. Posi yokutja tji matu vanga okuyorokera ongutukiro ndjo nouwa mbu za mu yo, matu ‘sokutanaukira ku Muhona.’ Ihi matji hee kutja matu sokukara noupanga wopopezu kuna ye. Ovaisrael tji va ri mokuti ongaango, kava ri noumune wa Jehova ohunga nomuano mbwee ve tjindi. Yari tjimuna omitima nomeripura wawo ya kutjirirwe i ewiwiri nu vya kukutire. Nu owo aave vara ongutukiro yawo okuza koEngipte, otjomuano wokukovisa ovihepwa vyawo vyokorutu poo ozonḓuma zawo.​—Hebr. 3:8-10.

5. (a) Ombepo ya Jehova i yandja ongutukiro yaye? (b) Matu tjiwa vi kutja okukara motjovakamburwa poo okurira omukarere, kaku hee kutja ko nongutukiro Jehova ndje yandja? (c) Omapuriro yeṋe ngu matu sokuzira?

⁵ Nungwari ongutukiro ndji etwa i ombepo ya Jehova, kai ri tjimuna ongutukiro koukarere. Oyo ya kapita oviṋa ngamwa avihe ovandu mbi ve zera okuyenenisa. Ombepo ya Jehova i kutura ovandu koukarere wouvi nonḓiro, na komerikotameneno woposyo novitjitwa vyawo. (Rom. 6:23; 8:2) Indji tjiri ongutukiro ohimise! Omundu u yenena okukara nongutukiro ndjo nandarire kutja u ri motjovakamburwa poo omukarere. (Gen. 39:20-23) Sisi Nancy Yuen na Mbuti Harold King, va ri mongaro otjingeyo, orondu va kara ozombura ozengi motjovakamburwa mena rongamburiro yawo. Mo yenene okutara omahungi wawo mo-JW Broadcasting. (Tara kehi yepu ndi OMAPURIRO NOMAHUNGI WOVITJITWA > OKUTJINDA OMAUZEU.) Posi yokutja matu sokuripura oveni kutja, hapo tu vara ongutukiro ndji pondondo yokombanda? Nu matu yenene vi okuungurisa ongutukiro ndji momuano wounongo?

6. Ovaisrael va raisa vi kutja kava ri nondangi kongutukiro Jehova ndje ve pa?

⁶ Tji twa utu okumuna onḓengu onene yotjiyandjewa hi, maku tu hingi okuraisa ondangi ku ingwi ngwe tu pa otjiyandjewa hi. Ovaisrael kave raisire ondangi ku Jehova indu tji va kuturwa koukarere moEngipte. Omieze omiṱiṱi tji va za nokukuturwa okuza koEngipte, owo va uta okuhihamenwa i ovikurya nomanuwa ngaave nu moEngipte. Nu va uta okuunaunina ovikurya Jehova mbyee ve pe, nu nandarire aave vanga okuyaruka koEngipte. Pu mape hee kutja, owo aave vara ‘omahundju, omakungu, nomatanga, nozoseu, nozonyanga, nozomongorwa,’ nonḓengu onene ponguturiro ndji va muna, yokurikotamena ku Mukuru watjiri Jehova momuano omusemba. Okutja katjikumise kutja Jehova wa pindikira otjiwaṋa tje! (Num. 11:5, 6, 10; 14:3, 4) Nu ihi otjiṋa tji matu yenene okurihongera ko.

7. Paulus wa yenenisa vi eronga ndi ri 2 Ovakorinte 6:1, neṱe matu yenene vi okuhorera ku ye?

⁷ Omuapostele Paulus wa tunduuza Ovakriste kutja ngave raise ondangi kongutukiro Jehova  ndje ve pa okupitira mOmuna we, Jesus Kristus. (Lesa 2 Ovakorinte 6:1.) Mo zemburuka omuhihamo nongurunguse Paulus ndja ri na yo, mena rokutja eye wa pandekerwe i ouvi nonḓiro? Posi yokutja eye wa tja: “Okuhepa uri ku Ndjambi! Eye u tjita nai mu Jesus Kristus oMuhona wetu!” Omena ratjike? Eye wa kahururira Ovakriste ovakwao na tja: “Orondu omatwako wOmbepo nge yandja omuinyo mu Kristus Jesus ye ndji kutura komatwako wouvi nowonḓiro.” (Rom. 7:24, 25; 8:2) Eṱe wina matu sokuhorera ku Paulus, natu raisa ondangi ku Jehova kokutukutura koukarere wouvi nonḓiro. Okupitira motjisuta tjonguturiro, eṱe tu yenena okukarera Mukuru nomeritjiviro omawa womomutima, nu tu kara nondjoroka okutjita nao.​—Eps. 40:8.

8, 9. (a) Erakiza riṋe omuapostele Petrus nda yandja ohunga nokuungurisa onguturiro yetu? (b) Omarorero waye ngu tu muna ndino?

⁸ Eṱe matu sokuraisa ondangi. Nungwari wina katu sokuungurisa onguturiro Jehova ndje tu pa momuano omuvi. Omuapostele Petrus wa rakiza ovakambure ovakwao kutja, ave ungurisa onguturiro ndji va pewa okuvandeka na yo ouvi ngamwa auhe. (Lesa 1 Petrus 2:16.) Hapo erakiza ndi, kari nokukuzemburukisa ohunga notjiṋa tji tja tjitwa kOvaisrael, indu tji va ri mokuti ongaango? Eṱe wina tu ri moumba otjingewo, nu ngahino ounene pu imbo. Mouye wa Satan mu noviṋa tjimuna omizaro nokuriṱuna, ovikurya nomanuwa, omanyando na vyarwe ovingi, mbi tu nana ombango. Ovarandise potuingi ve ungurisa ovandu vombuniko ombwa okuraisa oviṋa vyawo, otjomuano wokutupukisa, tu ute okumuna kutja matu hepa oviṋa mbyo, ngunda ape heri nao. Tjiri oupupu okuwira mongwehe ndji, nokuungurisa onguturiro yetu momuano omuvi!

⁹ Erakiza ra Petrus ndi, wina ri ṱuna koviṋa vyarwe ovinanḓengu mehupo retu, tjimuna omahongero wetu, omuhunga woviungura poo oviungura. Otjotjihorera, omitanda omingi ndino vi ṋiṋikiziwa okuungura nawa moskole, kutja vi yenene okuyenda kotuveze tu tu yandja omahongero omawa wokombanda. Owo ve popwa kutja ve kambure kutja, okukerihonga komurungu ku tjita kutja ve mune oviungura mbi suta nawa, nu mbi varwa pondondo yokombanda. Ovivarero mbi raisiwa momakonḓononeno nge tjitwa, potuingi vi raisa kutja imba mba muna omahongero wokombanda, ve sutwa ovimariva ovingi tjinene pu imba mba mana oskole uriri nu mbe ha ire komahongero wokombanda. Mena rokutja omitanda vi hepa okutoora omikambo mbi mavi ṱunu kehupo rawo arihe, oviṋa otja imbi vi uta okuvenana ombango, nokutjita kutja ve vange okutoora omikambo mbyo. Otjikwaye owo novanene vawo tji mave sokuripurira ko?

10. Ovikwaye mbi matu sokuripurira ko tji matu ungurisa ouyara wetu okutoorora oviṋa mehupo retu?

¹⁰ Ovandu tjiva ve muna kutja, mena rokutja imbi oviṋa mbi mavi ṱunu kehupo rawo oveni, owo mave sokukara nouyara wokuritoororera mbi mave vanga, opuwo indu omeritjiviro wawo womomutima tji maye ve yandjere. Ngahino ve ripurira komambo wa Paulus ohunga novikurya, nga hungira kOvakriste vombongo ya Korinte nge tja: “Okutjavi oukutuke wandje tji mau tjaerwa i omeritjiviro womomutima womundu warwe?” (1 Kor. 10:29) Ouatjiri kutja, tu nouyara wokuritoororera oveni oviṋa tjimuna omahongero, nomuhunga woviungura mbu matu toorora, posi yokutja tu sokuzemburuka kutja ouyara wetu u nopoṋa pu u yandera, nokutja omikambo avihe mbi matu toora vi nouwa poo ouvi mbi vi tu etera. Mena ranao, Paulus opa hungirira omambo nga: “‘Avihe vi ri mouvara wetu!’ Ii, nungwari kakutja avihe otji vi nombatero. ‘Avihe vi ri mouvara wetu!’ Nungwari kakutja avihe otji vi tunga ombongo.” (1 Kor. 10:23) Epu ndi, ri tu vatera okumuna kutja pe noviṋa vyarwe ovinanḓengu tjinene pendje nokuripurira  kozonḓero zetu oveni, indu tji matu ungurisa ouyara wetu moviṋa avihe mehupo retu.

11. Ondando ya Jehova onenenene ndje tu kuturira kouvi nonḓiro, oyatjike?

¹¹ Indu Petrus tja yandja erakiza ohunga nokuungurisa onguturiro ndji twa pewa, eye wina wa hungirira kondando ndji matu sokutjitira nao. Eye we tu tunduuza kutja tu ungurise onguturiro yetu ‘okukarera Ndjambi.’ Kunao, ondando ya Jehova onenenene ndje tu kuturira kouvi nonḓiro, okupitira mu Jesus, ya ri oyokutja tu mu ‘karere’ otjovandu mbe riyandja ku ye.

12. Matu yenene okurihongera tjike kotjihorera tja Noa neṱunḓu re?

¹² Omuano umwe omusemba mu matu yenene okuritjevera kokuhina okuungurisa ouyara wetu momuano omuvi, okukara norupa okuura moviṋa oviyapuke. Tji twa tjiti nao, kamaatu nanukirwa i ozongaro zouye mbwi zokuvanga oviṋa ovinene, nokurambera ozonḓero zetu. (Gal. 5:16) Tara kotjihorera tja Noa neṱunḓu re. Owo va hupire mouye mu mwa ri ozondjito zoutwe noruvakiro. Nungwari kanaa va yandjera kutja ozonḓero noviṋa ovandu ongondoroka na wo mbyaave rambere, vi zunḓe ongaro yawo. Hapo owo va yenena vi okutjita nao? Owo va toorora okuungura oviṋa avihe Jehova mbye ve raera okuungura. Tjimuna okutunga otjitendeze, okuwonga ovikurya ku wo na kovinamuinyo, nokurakiza varwe. Ombeibela i tja: “Noa wa tjita atjihe tja raerwa i Muhona.” (Gen. 6:22) Nu hapo kwa kongorera tjike? Noa neṱunḓu re va yamwa indu ouye mbo tji wa yandekwa.​—Hebr. 11:7.

13. Jesus wa pewa otjiungura tjaye tja yandja kovemukongorere?

¹³ Erakiza riṋe Jehova nde tu pa? Otjovahongewa va Jesus, eṱe tu tjiwa nawa otjiungura tji twa pewa i Mukuru. (Lesa Lukas 4:18, 19.) Ovandu ovengi ndino ngunda va poṱuparisiwa i mukuru omurunde wouye mbwi. Nowo va pandekwa i ozongamburiro zoposyo, ve horera kozongaro nḓe kayendisiwa mouye, na kovitjitwa vyotjiwaṋa. (2 Kor. 4:4) Tjiri ondjingonekero ku eṱe okuhorera ku Jesus, mokuvatera  ovandu okutjiwa nokukarera Jehova, Mukuru ngu yandja onguturiro. (Mat. 28:19, 20) Nu ihi katjiungura otjipupu, nu tji nomatokero omengi. Momahi tjiva, ovandu ovengi kave raisa onḓero, nu tjiva ve raisa onyengo. Epuriro ndi matu sokuripura oveni orondi rokutja, ‘Hapo ami me yenene okuungurisa ouyara wandje okuyandja oruvara kotjiungura tjOuhona tjokuzuvarisa?’

14, 15. Ovakarere va Jehova va toorera ko omikambo viṋe kotjiungura tjokuzuvarisa? (Tara kotjiperendero pomautiro worupa ndwi.)

¹⁴ Tjiri otjitunduuze okumuna kutja tjiva va muna ounanḓengu wotjiungura tjetu, nu va hendurura oviṋa mehupo rawo, kutja ve kare norupa okuura motjiungura tjokuzuvarisa. (1 Kor. 9:19, 23) Tjiva vawo ve karera mehi rawo, varwe va ya komahi warwe ku ku nouhepe wovazuvarise. Otja komakonḓononeno, mozombura 5 nḓa kapita, otjivaro tjovakandjira ovakarerere tje kurira ko nga tji va rira ovakandjira ape vokombanda 1 100 000. Nu ku riweza ovazuvarise varwe vokombanda yomangete 250 000 mouye auhe. Imbwi tjiri omuano omuwa wokuraisa kutja, tu ungurisa onguturiro yetu okukarera Jehova!​—Eps. 110:3.

¹⁵ Otjikwaye tji tja vatera ovakambure mba okuungurisa ouyara wawo nounongo? Ngatu tare kotjihorera tja John na Judith, mba ungurira Jehova momahi pekepeke, mozombura 30 nḓa kapita. Indu Oskole yOviungura vyOvakandjira tji ya uta mombura ndji 1977, owo ve zemburuka omuano mu va tunduuzwa okuriyandjera oveni okuyenda kehi rarwe, nokukavatera ku ku nouhepe wovazuvarise. Kutja ve yandje ombango kondando yawo ndji, John wa tja, eye wa rundurura oviungura vye povikando ovingi, kutja ve kare nehupo ndi hi noviṋa ovingi. Nu indu tji ve ya mehi rarwe, owo va muna kutja okukumba ku Jehova nokuṱaṱera ku ye, kwe ve vatera okutjinda omauzeu ngu va muna, tjimuna ouzeu wokurihonga eraka epe, okuiririra ombazu ombe, nokuiririra omuinyo weyuru worukondwa ndo. Hapo otjiungura tjawo ku Jehova ozombura azehe nḓo tje ve ṱuna vi? John wa tja: “Ami tjiri mbi muna kutja mba ri motjiungura otjisembasemba. Jehova wa rira omundu watjiri kwami, otja Tate omunarusuvero. Nai mbi zuva nawa omambo nge ri mu Jakobus 4:8, nge tja: ‘Tumbukeye ku Ndjambi, nEye ma tumbuka ku eṋe.’ Ami tjiri mba muna ondando yatjiri mehupo, nu ihi ootjiṋa tjee paha.”

16. Ovengi mbe ha yenene okuungurira Jehova oruveze aruhe, va ungurisa vi ouyara wawo nounongo?

¹⁶ Ovandu ovengi kave yenene okuungurira Jehova oruveze aruhe tjimuna John na Judith. Nungwari ozongaro zawo ze ve yandjera okumukarera oruveze orusupi uriri. Posi yokutja, ovengi ve riyandjera okuvatera okutunga otuveze twomerikotameneno mouye auhe. Otjotjihorera, indu Omberoo ohongora tjaa i tungwa moWarwick, tja New York, ovakambure ape 27 000, ve riyandjera okukavatera noviungura ngo, oure wovivike 2 nga kombura 1 poo kombanda yanao. Otjingi tjawo va isa ehupo rawo, okukavatera ngo. Imbi tjiri ovihorera oviwa vyokuungurisa ouyara mbu va pewa, okutanga nokuyozika Jehova, Mukuru ngu yandja onguturiro!

17. Ovandu mbe ungurisa ouyara wawo momuano omusemba, ve nomaundjiro waye omawa?

¹⁷ Tjiri tu nondangi tjinene kutja twa tjiwa Jehova, nokutja matu yenene okuyorokera onguturiro ndji twa muna momerikotameneno wouatjiri. Nga rire ondando yetu okuraisa momikambo mbi matu toora, kutja tu nondangi konguturiro ndji twa pewa. Kunao, ngatu ungurise ouyara wetu mbwi nawa, noruveze mbu u tu pa okukarera Jehova. Indu tji twa tjiti nao, eṱe matu kara nomaundjiro nozondaya ozengi Jehova nḓe tu kwizikira, indu omaprofetero nga tji maye yenenisiwa: Oviutwa “eyuva rimwe mavi kuturwa koukarere wokutja atjihe tji yanda, nokutja mavi kara norupa monguturiro onandjozikiro yovanatje va Ndjambi.”​—Rom. 8:21.