MOZOMBURA nḓa kapita, mokati kOvahongonone va Jehova mouye auhe, mwa zikwa ovarumendu ovengi otjovanene vombongo novavatere vombongo. Tjinangara oove umwe wovarumendu ovakambure mbo, tu nongamburiro kutja tjiri u nondjoroka kotjiungura otjipe tji wa pewa hi.

Otjiperi kutja, mape ya u nemuma poo ozongendo. Omunene wombongo omutanda, wena Jason wa tja: “Indu tji mba zikwa otjomunene wombongo, ee munu kutja mbi nomerizirira omengi ngu maye ndji undju.” Moses na Jeremia wina va ri nemuma, indu Jehova tje ve pa otjiungura otjipe. (Eks. 4:10; Jer. 1:6) Tjinangara u noumune otjingewo, mo yenene vi okurundurura oumune mbo, nokukayenda komurungu motjiungura tjoye? Ngatu tare kotjihorera tjomuhongewa wena Timoteus.​—Oviung. 16:1-3.

Indu omuapostele Paulus tja ningira Timoteus kutja ve kaungure pamwe, Timoteus mape ya wa ri notjiwondo tjozombura 20. Mena rokutja Timoteus wa ri omuṱiṱi, mape ya kaa ri nongamburiro mu ye omuini pomautiro, nu mape ya aa keyakeya okuungura otjiungura tje otjipe. (1 Tim. 4:11, 12; 2 Tim. 1:1, 2, 7) Posi yokutja, ozombura 10 kombunda yanao, Paulus wa yenena okuraera ombongo yOvafilipi omambo nga: “Tje ri ombango ya Muhona Jesus, ami me hindi Timoteus ku eṋe tjimanga . . . Eye erike ongu nomutima umwe otja ami.”​—Fil. 2:19, 20.

Otjikeṋa tji tja tjita kutja Timoteus ma rire omunene wombongo omusemba nao? Ngatu tare koviṋa 6 mbi matu yenene okurihongera ku Timoteus.

1. Eye tjiri ee rikendere kovandu. Paulus wa tja nai kovakambure moFilipi: Timoteus “tjiri, ongu rikendera eṋe.” (Fil. 2:20) Timoteus wa ri nonḓero novandu. Eye tjiri aa vanga kutja owo ve tumbuke popezu na Jehova, nu wa kondja nomasa okuvevatera.

Atu kara otjomuhinge wombesi ngu rikendera kokuvaza moruveze pomakurameno wozombesi, posiya ngu he rikendere kovandu mbu ma toora. Omunene wombongo wena William, ngwa karera otjomunene wombongo oure wozombura 20, wa tja nai ku imba mba zikwa oupe: “Suvera ovakambure ovakweṋu. Nu yandja ombango kovihepwa vyawo, moruveze rokuyandja ombango tjinene komuano oviṋa mu vya sokutjitwa.”

2. Otjiungura tja Jehova otji tja ri otjiṋa otjitenga mehupo re. Paulus wa sasaneka otjihorera tja Timoteus kuna imbi vyovandu varwe, na tja: “Avehe varwe ve rikendera imbi ovyonḓero yawo oveni uriri, nu kave rikendere imbi vya Jesus Kristus.” (Fil. 2:21) Paulus wa muna kutja ovakambure moRoma, eye kaa tjangere orutuu rwe, aave rikendere ku imbi ovyozonḓero zawo oveni tjinene. Owo kaave kondjo nomasa okuungura otjiungura tjokuzuvarisa. Posi yokutja Timoteus ka ri nao! Indu tji pa ri otuveze tokuhandjaura ombuze ombwa, eye wa raisa ongaro tjimuna oya Jesaja, ngwa tja: “Owami ngwi, ndji hinda!”​—Jes. 6:8.

Mo yenene vi okuyandja ombango koviṋa vyoye omuini, nokuhina okuzemba oviungura Jehova mbye ku pa? Otjitenga, tjita kutja oviṋa ovinanḓengu tjinene, vi rire ovitenga mehupo roye. Paulus wa tja: “Kokutja mu sore okutoorora imbi mbi ri oviwaviwa.” (Fil. 1:10) Oviṋa ovinanḓengu ku Mukuru, ngavi rire ovinanḓengu kove wina. Otjitjavari, hendurura oviṋa mbi hi nohepero mehupo roye. Isamo oviṋa mbi kambura oruveze nomasa woye, mehupo roye. Paulus wa tunduuza Timoteus nomambo nga: “Taurira ozonḓuma  zoumutanda, nu u ramangere ousemba nongamburiro norusuvero nohange.”​—2 Tim. 2:22.

3. Eye aa ungura oukukutu motjiungura tja Mukuru. Otjomuano wokuzemburukisa Ovafilipi, Paulus wa tja: “Neṋe mamu tjiwa nawa kutja Timoteus omupyuke, nokutja eṱe na ye, otja omuatje na ihe, twa ungura pamwe okuzuvarisa indji Ombuze Ombwa.” (Fil. 2:22) Timoteus kena pa ri omundu wotjirweyo. Eye aa ungura oukukutu okuvatera Paulus, nu ihi tja tjita kutja oupanga wawo u rire oupame.

Motjira tja Jehova mu noviungura ovingi ndino. Nu oviungura mbyo vi tu pa enyando, nu vi yenena okutuyeta popezu novakambure ovakwetu. Okutja kondja kutja i rire ondando yoye aruhe, ‘okuungurira Muhona nokuhaurwa.’​—1 Kor. 15:58.

4. Eye wa ṱakamisa oviṋa mbyee rihonga. Paulus wa tja ku Timoteus: “Ove we ndji kongorera momahongero na momeritjindiro wandje na monduri yongarero yandje; nu wa yandja ombakatwi kongamburiro yandje nouretima wandje norusuvero rwandje nonḓaro orure yandje.” (2 Tim. 3:10) Mena rokutja Timoteus aa ṱakamisa oviṋa mbyee rihongo, eye wa yenena okupewa omerizirira omanene.​—1 Kor. 4:17.

U nomundu omunene ngu nondjiviro onyingi pove, ngo tjo vanga okuhorera ko? Tji u hina ye, ongwaye tji u hina okupaha umwe? Omurumendu omukambure wena Tom, ngwa karera otjomunene wombongo oruveze orure, wa tja: “Omunene wombongo wa raisa onḓero mu ami nu we ndji pa omahongero omawa tjinene. Ami aruhe ee pura ondunge ku ye nu ee ṱakamisa ondunge aihe ndje ndji pe. Ihi tje ndji vatera okuuta okuhara ongamburiro mu ami omuini.”

5. Eye ee rihongo omuini. Paulus wa tunduuza Timoteus na tja: “Rira omupyuke mongarero yoviungura vya Ndjambi.” (1 Tim. 4:7) Omutupuke wotjikara mape ya a kara nomundu ngu u mu rongerisa, posi yokutja eye wina u hepa okurirongerisa omuini. Paulus wa raera Timoteus na tja: “Panḓera pokulesera ovandu Omatjangwa nokuzuvarisa nokuhonga. . . . Ripurira oviṋa mbi nu u zikame mu vyo, kokutja omaryameno woye komurungu ye munike kovandu avehe.”​—1 Tim. 4:13-15.

Ove wina mo sokukayenda komurungu okukurisa ondjiviro yoye. Rira omukonḓonone omuwa wEmbo ra Mukuru, nu kondja okutjiwa oviṋa avihe ovipe motjira tja Jehova. Wina o kara nongamburiro tjinene move omuini, ngahino mokuuta okuripura kutja u nondjiviro onyingi tjinene, nokutja mo yenene okutjinda ongaro ngamwa aihe nokuhina okutjita omakonḓononeno. Horera ku Timoteus, nu “ritjevera omuini nu wina u tjevere omahongero woye.”​—1 Tim. 4:16.

6. Eye wa ṱaṱera kombepo ya Jehova ondjapuke. Indu Paulus tje ripurira kotjiungura tja Timoteus tjokuzuvarisa, eye wa tja: “Ṱakamisa oviṋa oviwa mbi mbi wa pewa. Vi ṱakamisa momasa wOmbepo Ondjapuke ndja tura mu eṱe.” (2 Tim. 1:14) Timoteus aa hepa okuṱaṱera kombepo ya Mukuru ondjapuke, kutja ma yenene okuṱakamisa otjiungura tje tjokuzuvarisa.

Omurumendu omukambure wena Donald, ngwa karera otjomunene wombongo oure wozombura ozengi wa tja: “Ovarumendu mba zikwa okuhongorera po ombongo, ve sokuvara oupanga wawo kuna Mukuru otjotjiṋa otjinanḓengu tjinene. Imba mbu mave tjiti nao, ‘mave harere ko omasa.’ Tji va ningire ombepo ondjapuke mongumbiro, nave ṱakamisa ovihape vyayo, owo mave rire ondaya yatjiri kovakambure ovakwao.”—Eps. 84:7; 1 Petr. 4:11.

Otjiyanḓiparise tjiri okumuna ovarumendu ovakambure ovengi mba zikwa oupe, otja ove, nu mbe ungurisiwa i Jehova. Jason ngwa tamunwa pomautiro, wa tja: “Moruveze aruhe tji mba ri omunene wombongo, ami mbe rihonga ovingi nu ihi tje kurisa ongamburiro yandje mu ami omuini. Nai tjiri mbi nondjoroka motjiungura tjandje hi, nu mbi tji vara otjondjingonekero onene!”

Ove hapo mo yandjere Jehova okukayenda komurungu okukuungurisa? Kondja okurihongera ku Timoteus. Nu tji wa tjiti nao, ove wina mo rire ondaya kovakarere va Mukuru.