1-2. Ongwaye Jesus tja kurungisirwe momuinyo?

MEYUVA re esenina otjomundu, Jesus wa kurungisirwe momuinyo. Kamanga eye aa sokumuna ondatumisire ombi nokuzepewa momake wovarunde. Posi yokutja Jesus kee rikende mena rokutja ma ka ṱa uriri. Nungwari eye wa suverere Ihe nomasa nu aa vanga okumuyorokisa. Jesus aa tjiwa kutja tja kara omuṱakame kehi yomarorero ngu ma kamuna, eye ma yapura ena ra Jehova. Jesus wina wa suverere ovandu, eye aa tjiwa kutja oruyaveze rwovandu okukahupa nga aruhe maru zu mouṱakame we ku Jehova nga konḓiro ye.

² Nandarire kutja Jesus wa ri kehi yozombameno eye aa yenene okukara nohange. Eye wa raera ovaapostele, na tja: “Ohange yandje me yandja ku eṋe.” (Joh. 14:27) Jesus wa ri “nohange ya Ndjambi,” oupore mbu za mokukara noupanga wapeke kuna Jehova. Ohange ndjo ya vatera Jesus kutja ehe rikende.​—Fil. 4:6, 7.

3. Morupa ndwi matu katara ku tjike?

³ Kape na umwe wetu ngu maa kamuna oṋiṋikizire Jesus ndja muna, posi yokutja avehe mbe kongorera Jesus mave munu omauzeu. (Mat. 16:24, 25; Joh. 15:20) Tjimuna Jesus, povikando tjiva tu kara nomerikendero. Matu sokutjita tjike kutja atu he rikende tjinene nokupandjara ohange momuinyo? Ngatu tare koviṋa 3 Jesus mbya tjita motjiungura tje tjokuzuvarisa kombanda yehi, nu tu tare kutja matu yenene vi okumuhorera tji tu ri kehi yomauzeu.

4. Yandja ovihorera tjiva okuraisa kutja Jesus aa kumbu tjinene meyuva re esenina komanda yehi, otja 1 Ovatesalonika 5:17.

⁴ Lesa 1 Ovatesalonika 5:17. Jesus wa kumba tjinene meyuva re esenina kombanda yehi. Indu tja raisira ovahongewa ve kutja ve sokuzemburuka vi onḓiro ye, eye wa kumbira omboroto notjinwino. (1 Kor. 11:23-25) Ngunda ave hi ya zapo poruveze pu va tjitira opaska, eye wa kumba pu novahongewa ve. (Joh. 17:1-26) Indu eye novahongewa ve tji va vaza pOndundu yOmiṋinga ongurova ndjo, eye wa kumba povikando ovingi. (Mat. 26:36-39, 42, 44) Omambo omasenina Jesus nga hungira ngunda e hi ya ṱa, yari ongumbiro. (Luk. 23:46) Jesus wa kumba ku Jehova ohunga noviṋa avihe mbya tjitwa meyuva esenina romuinyo we.

5. Ongwaye ouvanḓe wovaapostele tji wa ngundiparere?

⁵ Epu rimwe nda vatera Jesus okutuurunga omauzeu we ya ri mena rokutja eye ee riyameka ku Ihe mongumbiro. Posi yokutja, ovaapostele kave na pu va panḓera pokukumba ongurova ndjo. Mena ranao, owo kavari nouvanḓe tji va muna omarorero. (Mat. 26:40, 41, 43, 45, 56) Tji tu ri kehi yomauzeu matu yenene okurira ovaṱakame indu tji twa horere kotjihorera tja Jesus ‘tjokukumba’ aruhe. Matu yenene okukumbira tjike?

6. Ongamburiro mai tu vatere vi okukara nohange?

⁶ Matu yenene okukumba kutja Jehova ‘metu wezire ko ongamburiro.’ (Luk. 17:5; Joh. 14:1) Eṱe tu hepa ongamburiro mena rokutja Satan ma roro ovandu avehe mbe kongorera Jesus. (Luk. 22:31) Omomuano uṋe ongamburiro mu mai yenene okutuvatera okukara nohange nandarire tji twa wirwa i yomauzeu  ngu ma ye kongorerasana? Indu tjitwa kondjo pu matu yenene okutuurunga omauzeu, ongamburiro ndji tu nayo mu Jehova mai tu hingi kutja atu he rikende tjinene mena rokutja matu tjiwa kutja Eye me tu vatere moruveze ndu ri ro. Mena rokutja tu nongamburiro kutja Jehova ma tjindi ongaro mu tu ri nawa pu eṱe, tu kara nohange momuinyo.​—1 Petr. 5:6, 7.

7. We ri hongere tjike komambo wa Robert?

⁷ Ongumbiro i tu vatera kutja tu kare nohange momuinyo nandarire kutja tu ri kehi yomauzeu. Ngatu tare kotjihorera tja Robert, omunene wombongo omuṱakame ngu ri motjiwondo 80. Eye wa tja: “Eronga ndi ri mOvafilipi 4:6, 7 re ndji vatera kutja mbi yenene okutjinda omauzeu wandje. Mba ri nouzeu wovimariva. Nu oure woruveze orusupi mba pandjarere ondjingonekero yokurira omunene wombongo.” Otjikwaye tji tja vatera Robert okukara nohange momuinyo? Eye wa tja: “Indu tji mba utu okurikenda mbi kumba tjimanga. Mbi muna kutja tji mba kumbu tjinene nu okuza komutima tjiri, mbi kara nohange momuinyo.”

8. Otja tji pa tamunwa mu Johanes 8:29, ongwaye Jesus tjaari nohange momuinyo?

⁸ Lesa Johanes 8:29. Nandarire kehi yondatumisire, Jesus wa ri nohange momuinyo mena rokutja aa tjiwa kutja ma yorokisa Ihe. Eye wa ri omuṱakame, indu tjaari ouzeu kuye okutjita nao. Eye wa suverere Ihe tjinene nu okumukarera kwa ri otjiṋa otjinanḓengu tjinene mehupo re. Ngunda Jesus e hiye ya kombanda yehi, eye wa ri “omuungure onongo” puna Mukuru. (Omiano 8:30) Nu tjaari kombanda  yehi, eye aa hongo varwe ohunga na Ihe noupyuke. (Mat. 6:9; Joh. 5:17) Otjiungura tjo tje mu etera ondjoroka onene.​—Joh. 4:34-36.

9. Ongwaye tji tu kara nohange momuinyo indu tji tu ri motjiungura tjokuzuvarisa?

⁹ Eṱe matu yenene okuhorera ku Jesus indu tji tu nonḓuviro ku Jehova ‘nu aruhe tji matu ungurire Muhona nokuhaurwa.’ (1 Kor. 15:58) Indu tji matu ‘panḓere’ pokuzuvarisa, tu kara noumune ouwa ohunga nomauzeu wetu. (Oviung. 18:5) Otjotjihorera, motjiungura tjokuzuvarisa potuingi tu hakaena ku novandu mbe muna omauzeu omengi pu eṱe. Posi yokutja, indu tji ve rihongo okusuvera Jehova nokuungurisa omaronga we mehupo rawo, owo ve tjita omarundurukiro nu ve kara nondjoroka onyingi. Aruhe tji matu munu omarundurukiro ngo, tu kara nongamburiro yomasa kutja Jehova metu ṱakamisa. Nu ongamburiro ndjo i tu vatera kutja tu kare nohange momuinyo. Omukazendu omukambure ngwe rimunu kutja ke nonḓengu nu ngwa ri nozombameno, wa muna kutja imbo ouatjiri. Eye wa tja: “Indu tji mbi ri motjiungura tjokuzuvarisa, ami mbi yenena okuritjaera komeripuriro ngo nu mbi kara nondjoroka. Mbi muna kutja tji mbi ri motjiungura tjokuzuvarisa, mbi ri muna popezu tjinene na Jehova.”

10. We ri hongere kotjike komambo wa Brenda?

¹⁰ Tara kotjihorera tjomukazendu omukambure wena Brenda. Eye nomuatje we omukazona, va vera omutjise omuzeu. Brenda u ungurisa okatemba okukayenda nu u nomasa omaṱiṱi morutu. Povikando tjiva eye u zuvarisa okuza kondjuwo nga kondjuwo tji ma yenene, nungwari povikando ovingi u zuvarisa okupitira mokutjanga otutuu. Eye wa tja: “Indu tji mba yakura kutja omutjise wandje kama u veruka mouye mbwi, otji mba uta okuyandja ombango tjinene kotjiungura tjandje tjokuzuvarisa. Okuzuvarisa, tjiri, kutjita kutja e he ripurire komerikendero wandje. Ihi tji tjita kutja mbi yandje ombango kokuvatera ovandu mbu mbi hakaena nawo okuza kondjuwo nga kondjuwo poo motutuu. Nu tji me zuvarisa, aruhe mbi ripura ohunga nomaundjiro woruyaveze.”

11-13. (a) Ovaapostele novandu varwe va raisa vi kutja owo omapanga wa Jesus yatjiri? (b) Omapanga wa Jesus ye mu vatera vi?

¹¹ Oruveze aruhe Jesus ndaa zuvarisa, ovaapostele ovaṱakame vari omapanga wa Jesus yatjiri. Owo va ri tjimuna omapanga nga tamunwa mOmiano, ndi ma ri tja: “Owo omaṱakame povazamumwe.” (Omiano 18:24) Omapanga otja ingo ya ri omananḓengu ku Jesus. Eye tjaa zuvarisa kapena umwe wovazamumwe ve mba kamburire mu ye. (Joh. 7:3-5) Nu oruveze rumwe, ovazamumwe ve aave munu kutja eye wa vera oviyozo. (Mar. 3:21) Mena ranao, komurungu yonḓiro ye, Jesus aa yenene okuhungira kovaapostele ve ovaṱakame omambo nga: “Oweṋe mba aruhe mbu mwa kara po momarorero wandje.”​—Luk. 22:28.

¹² Ovaapostele povikando tjiva aave pindikisa Jesus, posi yokutja eye kaa yandja ombango kozondataiziro zawo, nungwari aa tara komuano owo mu va ri nongamburiro mu ye. (Mat. 26:40; Mar. 10:13, 14; Joh. 6:66-69) Ongurova osenina ngunda Jesus e hiya ṱa, eye wa raera ovarumendu ovaṱakame mba omambo nga: “Ami me mu tja oweṋe omapanga wandje tjinga ambe mu raera omambo aehe ngu mba zuva mu Tate.” (Joh. 15:15) Omapanga wa Jesus tjiri ye mu yanḓiparisa tjinene. Ombatero ndji ve mu pa motjiungura tjokuzuvarisa ya tjita kutja Jesus ma kare nondjoroka tjinene.​—Luk. 10:17, 21.

¹³ Jesus wina wa ri nomapanga warwe, ovarumendu novakazendu, mbaave mu vatere  motjiungura tjokuzuvarisa nokumuvatera momiano vyarwe. Tjiva aave mu ṋanga pozoyawo okuyekurya pamwe. (Luk. 10:38-42; Joh. 12:1, 2) Varwe aave toora ouyenda puna Jesus nokuhaṋasana oviṋa vyawo kuna ye. (Luk. 8:3) Jesus wa ri nomapanga omawa nga ye vanga okumuvatera mena rokutja aave tjiwa kutja eye wina meve vatere. Eye ee ve tjitire oviṋa oviwa posi yokutja kaundjire ko ovingi kuwo. Nandarire kutja Jesus wa ri ohomonena, eye wa ri nondangi komuano omapanga we mu ve mu vatera nandarire kutja owo kava ri ohomonena. Nu owo tjiri ve mu vatera okukara nohange momuinyo.

14-15. Matu yenene vi okutjita omapanga omawa, nu owo mave yenene vi okutuvatera?

¹⁴ Omapanga omawa yetu vatera kutja tu rire ovaṱakame ku Jehova. Nu omuano umwe omusemba wokutjita omapanga omawa, eendu ove tji wa rire epanga ewa. (Mat. 7:12) Otjotjihorera, Ombeibela i tu tunduuza kutja tu ungurise oruveze rwetu nomasa wetu okuvatera varwe, nu tjinenenene “okuvatera ovasyona.” (Ef. 4:28) Mape ya oripura nomundu ngu ri mombongo yoye ngu mo yenene okumuvatera? Ove mape ya orandere omukambure ngu ha yenene okupita mondjiwo mena roukurundu poo ouvere, oviṋa mbi ma hepa? Poo mape ya oyandja ovikurya keṱunḓu ndi nouzeu wotjimariva? Hapo ove tji u tjiwa okuungurisa orungovi ndwi jw.org/hz noprograma ndji JW Library^®, ove mo yenene okuvatera ovandu mombongo yoye okumuna ovihuze mbi vazewa mo? Indu tji matu yandja ombango okuvatera varwe eṱe mape ya atu kara nondjoroka.​—Oviung. 20:35.

 ¹⁵ Omapanga wetu maye yenene okutuvatera indu tji tu nomauzeu, nu maye tupe omasa okukara nohange momuinyo. Tjimuna Elihu tja puratena ku Job indu tja hungire ohunga nomauzeu we, omapanga wetu maye yenene okutuvatera indu tji matu hungire kuna wo. (Job 32:4) Eṱe katu sokundjira ko kutja omapanga wetu yetu raere kutja ngatu tjite vi, posi yokutja matu rire ozonongo tji twa puratene komirari vyOmbeibela. (Omiano 15:22) Tjimuna Ombara David tja yakura ombatero nomerisusuparisiro okuza komapanga we, eṱe wina matu sokukara nomerisusuparisiro natu yakura ombatero okuza komapanga wetu tji tu ri mouhepe. (2 Sam. 17:27-29) Tjiri, omapanga omawa otja ingo otjiyandjewa okuza ku Jehova.​—Jak. 1:17.

16. Otjikwaye atjiyerike tji matu hepa kutja tu kare nohange otja ketjangwa rOvafilipi 4:6, 7? Kahurura.

¹⁶ Lesa Ovafilipi 4:6, 7. Ongwaye Jehova tje tu raera kutja matu yenene okumuna ohange ye okupitira “mu Kristus Jesus”? Omena rokutja matu yenene okumuna ohange ndji karerera, ohange ndjo mai ṱakamisa omitima vyetu nouripura, indu tji matu zuu nawa nokukara nongamburiro morupa Jesus nde naro mondando ya Jehova. Otjotjihorera, okupitira motjisuta tjonguturiro tja Jesus, omauvi wetu ayehe maye yenene okuisirwa. (1 Joh. 2:12) Tji matu ripurire kotjiṋa tjo, tu muna omahuhumiṋino! Otja Ombara yOuhona wa Mukuru, Jesus ma isapo omauzeu ngu tu muna mena ra Satan nouye we mbwi. (Jes. 65:17; 1 Joh. 3:8; Omavan. 21:3, 4) Tjiri otjiṋa tjo tji tu pa omaundjiro omawa! Nandarire kutja Jesus wetu pa otjiungura otjizeu, eye u ri puna eṱe okutupa omasa momayuva omasenina nga wouye mbwi. (Mat. 28:19, 20) Otjiṋa tjo tji tupa ouvanḓe! Onguturiro, omaundjiro, nouvanḓe, imbi ooviṋa tjiva ovinahepero mbi matu hepa kutja tu kare nohange.

17. (a) Omukriste ma yenene vi okukara nohange momuinyo? (b) Otja tji pa kwizikwa mu Johanes 16:33, eṱe matu yenene okutjita tjike?

¹⁷ Hapo mo yenene vi okukara nohange momuinyo nandarire kehi yomauzeu omengi? Ove mo yenene okuhorera koviṋa Jesus mbya tjiti. Rutenga, kumba nu panḓera pokukumba nandarire kutja pa tjitwa ye. Otjitjavari, kara nonḓuviro ku Jehova nu zuvarisa noupyuke nandarire tje ri ouzeu okutjita nao. Otjitjatatu, tji u ri kehi yomauzeu paha ombatero komapanga woye kutja ye ku vatere. Ohange ya Mukuru mai tjevere omutima woye nouripura. Nu tjimuna Jesus, ove mo yenene okutoṋa momauzeu woye.​—Lesa Johanes 16:33.