1. Otja tji pa kahururwa mOvaefese 6:10-13, omuano uṋe wapeke Jehova me raisa kutja u rikendera kweṱe? Kahurura.

OMUANO wapeke Jehova me raisa kutja u rikendera kovakarere ve, omokutuvatera okupirukira ovanavita na eṱe. Ovanavita na eṱe tjinene o Satan nozondemone ze. Jehova utu rakiza ohunga novanavita mba, nu u tupa imbi mbi matu hepa kutja tu ve pirukire. (Lesa Ovaefese 6:10-13.) Indu tjitwa yakura ombatero okuza ku Jehova nokuriyameka kuye okuura, matu toṋa mokupirukira Omudiaboli. Eṱe matu yenene okukara nongambiriro tjimuna yomuapostele Paulus. Eye wa tjanga kutja: “Ndjambi tje ri komunda wetu, owaṋi ngu me tu pirukire?”​—Rom. 8:31.

2. Matu katara kuye morupa ndwi?

² Otjovakriste vatjiri, eṱe katu yandja ombango tjinene ku Satan nozondemone. Eṱe tu yandja ombango tjinene kokurihonga ohunga na Jehova nokumukarera. (Eps. 25:5) Posi yokutja, eṱe tu hepa okutjiwa ohunga noviṋa Satan mbye tjita. Omena ratjike? Omena rokutja atu ha tjitwa ovineya i Satan. (2 Kor. 2:11) Morupa ndwi, matu katara komuano omunene Satan nozondemone mu ve kondja okupukisa ovandu. Nu wina matu katara komuano mu matu toṋa mokuvepirukira.

3-4. (a) Oundjai ovikwaye? (b) Okukambura moundjai kwa takavara pu pe ṱa pi?

³ Omuano omunene Satan nozondemone ze mu ve kondja okupukisa ovandu okupitira moundjai. Imba mbe ungurisa  oundjai ve tja ve tjiwa poo ve yenena okutjita oviṋa ovandu varwe mbi ve ha yenene okutjita poo okutjiwa. Otjotjihorera, tjiva ve tja ve tjiwa oruyaveze mokuungurisa omaukiro poo mokulesa ozonyose. Varwe ve tjita tjimuna owo ve hungira kuna imba mba ṱa. Tjiva ve ungurisa omiti, oundjai, poo okurova ovandu varwe. *

⁴ Okukambura moundjai kwa takavara pu pe ṱa pi? Omakonḓononeno nga tjitwa momahi 18 moLatin America na moCaribbean ya raisa kutja omundu 1 movandu 3 ve kambura moundjai, ourozi, poo okuvetera, nu ovengi vawo ve kambura kutja mo yenene okuhungira ku nozombepo zovaṱi. Omakonḓononeno warwe ya tjitwa momahi 18 wa Afrika. Omakonḓononeno ngo ya raisa kutja omundu 1 movandu 2 ve kambura moundjai. Kainatja kutja tu kara pi, eṱe matu sokuritjevera kozombepo zoundjai. Kombanda ya avihe, Satan u kondja okupukisa “ouye auhe.”​—Omavan. 12:9.

5. Jehova u noumune uṋe ohunga noundjai?

⁵ Jehova ‘oMukuru uatjiri.’ (Eps. 31:6, EEP) Hapo eye u noumune uṋe ohunga noundjai? Eye tjiri we u tonda! Jehova wa raera Ovaisrael kutja: “Ape ningi umwe ngu ma ningiririsa omuatje we omuzandu poo omukazona a rire ombunguhiro; nandarire ngu ma uku oviporoporo poo ngu ma vetere poo ngu ma serekarere noviraisiro poo ngu ma tjiti oundjai poo ngu ma sengi poo ngu ma ningire ombepo yovaṱi poo yomaukiro poo ngu ma kapura ovaṱi. Orondu auhe ngu ma tjiti oviṋa mbi, ma rire omuyaukise ku Muhona.” (Deut. 18:10-12) Ovakriste ndino kave ri kehi yOmatwako Jehova nga yandja kOvaisrael. Posi yokutja, eṱe matu tjiwa kutja oumune we ohunga noundjai ka wa runduruka.​—Mal. 3:6.

6. (a) Satan u ungurisa vi oundjai okuhihamisa nawo ovandu? (b) Otja kOmuzuvarise 9:5, ovaṱi ve ri mongaro iṋe?

⁶ Jehova we tu rakiza okukara kokure noundjai, mena rokutja ma tjiwa kutja Satan u ungurisa oundjai okuhihamisa nawo ovandu. Eye u ungurisa oundjai okuhandjaura otjizeze tjokutja ovaṱi ve hupa komurungu momaturiro wozombepo. (Lesa Omuzuvarise 9:5.) Satan wina u ungurisa oundjai okutirisa ovandu nokuveṱizira kokure na Jehova. Ondando ya Satan oyokutjita kutja ovandu mbe ungurisa oundjai ve kambure mozombepo ozohakohoke nḓo pendje nokukambura mu Jehova.

7. Jehova u tu raera ye?

⁷ Otja tji pa hungirwa rukuru, kutja atu ha pukisiwa i Satan nozondemone ze, Jehova u tu raera kutja matu hepa okutjiwa ye. Ngatu tare komiano tjiva mbi matu yenene okutjita kutja tu rwise Satan nozondemone ze.

8. (a) Omuano uṋe umwe mu matu yenene okupirukira ozombepo ozohakohoke? (b) Epsalme 146:4 ri tjiukisa vi ovizeze vya Satan ohunga novaṱi?

⁸ Lesa nokuripurira ko oukoto kEmbo ra Mukuru. Imbwi omuano umwe eṱe mu matu yenene okupirukira ovizeze ozombepo ozohakohoke mbi ze handjaura. Embo ra Mukuru ri ri tjimuna engaruvyo ndi konda ovizeze Satan mbye handjaura. (Ef. 6:17) Otjotjihorera,  Embo ra Mukuru ri raisa kutja ovaṱi kave yenene okuhungira ku novandu. (Lesa Epsalme 146:4.) Wina ri tu zemburukisa kutja oJehova erike ngu yenena okutjiwa oruyaveze nawa. (Jes. 45:21; 46:10) Indu tji matu lese Embo ra Mukuru nokuripurira ko oukoto eyuva arihe, eṱe matu rirongerisa okunakaura ovizeze vya Satan mbye vanga kutja tu kambure mo.

9. Tu nakaura ovitjitwa viṋe vyoundjai?

⁹ Okara norupa moviṋa mbi notjiṋa noundjai. Otjovakriste vatjiri, eṱe katu kara norupa moviṋa mbi tjama noundjai. Otjotjihorera, eṱe katu i kovandu mbe nozombepo zokuvetera poo ozonganga zovazozu poo okukondja okuhungira ku novaṱi momiano vyarwe. Otja tji twa hungirire ko morupa ndwa kapita, tu kondja okukara kokure novitjitwa vyombazu mbi tjitwa pozonḓiro mbya zikamena kongamburiro yokutja ovaṱi ve nomuinyo. Nu wina katu ungurisa omalesero wozonyose poo ozombuke okupaha okutjiwa ohunga noruyaveze. (Jes. 8:19) Matu tjiwa kutja oviṋa mbi avihe ovinaumba tjinene, nu mavi yenene okutuhakaenisa kuna Satan nozondemone.

10-11. (a) Tjiva meserewondo etenga va tjita vi indu tji ve rihonga ouatjiri? (b) Otja 1 Ovakorinte 10:21, ongwaye tji tu sokuhorera kovihorera vyOvakriste ovakuru, nu matu yenene vi okutjita nao?

¹⁰ Imbirahi oviṋa avihe mbi notjiṋa noundjai. Ovandu tjiva mba turire moEfese meserewondo etenga vari norupa moundjai. Indu tji ve rihonga ouatjiri, owo va hakahana okutjita omarundurukiro. “Otjingi tjaimba mba tjitire oundjai va woronganisa omambo wawo nave ye nyosire momurungu wovandu.” (Oviung. 19:19) Owo va kondja nomasa okupirukira ozombepo ozohakohoke. Omambo ngu vari nawo ohunga noundjai ya kosa ovimariva ovingi. Pendje nokurandisa omambo ngo ku varwe, owo ve ye nyona. Tjinene owo aave ripurire kokuyorokisa Jehova, nungwari kaave ripurire konḓengu yotjimariva tjomambo ngo.

 ¹¹ Matu horere vi kovihorera vyOvakriste veserewondo etenga? Ma rire ounongo okuimbirahi oviṋa avihe mbi notjiṋa noundjai. Imbi vi kamburira mo ozongoho, nozongoze nḓe kutwa movanatje poo movandu ovanene okutjaera ozombepo ozohakohoke.​—Lesa 1 Ovakorinte 10:21.

12. Omapuriro yeṋe ngu matu sokuripura oveni ohunga nomanyando?

¹² Konḓonona omanayando woye nawa. Ripura omuini kutja: ‘Hapo mbi lesa omambo poo otupa morungovi tu tu notjiṋa noundjai? Tjike nomizumbi mbi mbi puratena, ozomuvi nozoprograma motivii nḓu mbi tarera, poo omahore wozovidio ngu mbi nyanda? Hapo omanyando ngu mbi nyanda ye norupa noundjai? Hapo omanyando yandje ye kamburira mo oviruru mbi sepa ombinḓu yovandu (vampires), oviruru mbi ryovandu (zombies), poo oundjai? Vi raisa tjimuna oviṋa vyoundjai kavinaumba?’ Otjingaperi kutja kamanyando ayehe ngu tu tarera poo ngu tu lesa tji ye kara noundjai. Indu tji mokonḓonona omanyando woye, rimanena okutoora ozondando nḓu maze ku vatere okukara kokure noviṋa Jehova mbya tonda. Eṱe matu vanga okutjita pu matu yenene “okukara nomeritjiviro womorukoro omakohoke” komurungu wa Ndjambi.​—Oviung. 24:16. *

13. Ovikwaye mbi tu ha sokuhandjaura?

¹³ Amu handjaura omahungi ohunga nozondemone. Matu sokuhorera kotjihorera tja Jesus. (1 Petr. 2:21) Ngunda Jesus e hi ye ya kombanda yehi, eye wa turire meyuru, nu a tjiwa ovingi ohunga na Satan nozondemone. Posi yokutja ka serekarere kutja ozombepo ozohakohoke nḓo aze tjiti ye. Jesus aa vanga okuhonga ovandu ohunga na Jehova, nu kaa  vanga okuyandja ombango ku Satan. Matu yenene okuhorera ku Jesus mo ku hi nokuhandjaura omahungi ohunga nozondemone. Posi yokutja, tu raisa momambo wetu kutja ‘omutima wetu wa pendurirwa okuzuvarisa ombuze ombwa,’ ndji ri, ouatjiri.​—Eps. 45:1.

14-15. (a) Ongwaye tji tu ha sokutira ozombepo ozohakohoke? (b) Oviraisiro viṋe mbi raisa kutja Jehova u tjevera ovandu ve ndino?

¹⁴ Ourumisiwa i yozombepo ozohakohoke. Mouye mbwi ndino, oviṋa ovivi mape ya avi tjitwa kweṱe. Omaumba, okuvera poo onḓiro vi yenena okuya ngunda atu hinokuundjira ko. Posi yokutja katu sere okumuna kutja ozombepo ozohamunika onḓe ri kongotwe yomauzeu wetu. Ombeibela i kahurura kutja “oruveze rwokumuna ouhumandu” ru ya ku avehe. (Omuzuv. 9:11) Jehova wa raisa kutja u nomasa tjinene okukapita ozondemone. Otjotjihorera, Mukuru kena pa yandjera Satan okuzepa Job. (Job 2:6) Moruveze rwa Moses, Jehova wa raisa kutja u nomasa okukapita ovapristeri vaEngipte mbaave tjiti oundjai. (Eks. 8:18; 9:11) Nu kombunda Jehova wa yandja ouyara ku Jesus kombanda ya Satan nozondemone, kunao Jesus we ve ramba meyuru okuya kehi. Moruyaveze rwopopezu, owo mave paterwa morutjiva rwokehi yehi, pu ve hina maave hihamisa ovandu.​—Omavan. 12:9; 20:2, 3.

¹⁵ Tu muna oviraisiro ovingi kutja Jehova u tjevera ovandu ve ndino. Ripurira ku ihi: Eṱe tu zuvarisa nokuhonga ouatjiri mouye auhe. (Mat. 28:19, 20) Mena ranao, tu horora oviungura ovivi vyOmudiaboli. Otjingapari kutja Satan, andakuzu u yenena, a tja tjaera ovingura vyetu avihe posi yokutja ka yenene. Okutja katu sere okutira ozombepo ozohakohoke. Matu tjiwa kutja ‘Muhona u tjevera ovandu kombanda youye auhe okuyandja omasa ku imba mbe ri ovaṱakame mu Ye.’ (2 Ekuruh. 16:9) Eṱe tji tu ri ovaṱakame ku Jehova, ozondemone kana ze tu etere omihihamo omikarere.

16-17. Yandja otjihorera tjouvanḓe mbu heperwa po okupirukira ozombepo ozohakohoke.

¹⁶ Ku hepa ouvanḓe okupirukira ozombepo ozohakohoke, nu tjinenenene indu omapanga  poo ovazamumwe vetu tji mave tu pirukire mena rokutja mave tira kutja mape ya oviṋa ovivi avi tjitwa kweṱe. Posi yokutja Jehova u sera ondaya ku imba mbe raisa ouvanḓe mbo. Ngatu tare kotjihorera tjomukambure omukwetu wena Erica, ngwa tura moGhana. Erica wa ri nozombura 21 tja yakura omerihongero wOmbeibela. Mena rokutja ihe wa ri omupristeri ngu ungurisa oundjai, eye aa undjirwa ko okukara norupa movitjitwa vyombazu mbi notjiṋa noundjai, mbyaa vi kamburire mo okurya onyama ndja punguhirwa oomukuru ihe kee rikotamene ko. Indu Erica tja panḓa okukara norupa, ovazamumwe ve va muna kutja ma yamburura oomukuru wawo. Eṱunḓu re aa ri kambura kutja oomukuru wawo mave ve vere.

¹⁷ Eṱunḓu ra Erica ra kondja okumuṋiṋikiza kutja ma kongorere ombazu ndjo, posi yokutja eye wa panḓa nandarire kutja aape he kutja eye ma sokutjinda ponganda. Ovakambure tjiva ve mu yakura okukara puna ye. Kunao, Jehova wa sera Erica neṱunḓu re epe ondaya, ovakambure mbaari tjimuna omarumbi novangu ve. (Mar. 10:29, 30) Nu nandarire kutja ovazamumwe ve ve mu paṱana nokunyosa omitwaro vye, Erica wa ri omuṱakame ku Jehova, eye wa papitisiwa, nu nai u karera otjomukandjira omukarerere. Eye ka tira ozondemone. Erica wa tja nai ohunga neṱunḓu re: “Eyuva arihe mbi kumba kutja eṱunḓu randje ri mune ouwa nongutukiro ndji za mokukarera Mukuru wetu worusuvero.”

18. Indu tji twa kambura mu Jehova, matu munu ozondaya zeṋe?

¹⁸ Kauhe wetu ngu ma rorwa mongamburiro momuano otjingewo. Posi yokutja auhe wetu ma hepa okupirukira ozombepo ozohakohoke nokukambura mu Jehova. Tjitwa tjiti nao matu munu ozondaya ozengi nu kamaatu pukisiwa i Satan. Nu katu yandjere okutira ozondemone ku tu tjaere okukarera Jehova. Kombanda ya avihe matu pamisa oupanga wetu kuna Jehova. Omupostele Jakobus wa tja: “Notji mamu sokuriwisa kehi ya Ndjambi; pirukireye Satan, neye ma tupuka a zu po pu eṋe. Tumbukeye ku Ndjambi, nEye ma tumbuka ku eṋe.”​—Jak. 4:7, 8.