1-2. (a) Omomiano viṋe Satan ma pukisa ovandu? (b) Morupa ndwi matu katara ku ye?

SATAN, “ihe yovizeze avihe,” wa pukisa ovandu okuza koruveze rwa Adam na Eva. (Joh. 8:44) Tjiva vyovizeze vya Satan vi kamburira mo omahongero wovizeze ohunga nonḓiro, vyokutja ovandu ve kara nomuinyo kombunda yonḓiro. Ovitjitwa ovingi vyombazu novizerika vya zikamena komahongero wa Satan ngo. Kunao, ovakambure ovakwetu tjiva ve hepa ‘okurwira ongamburiro’ yawo nomasa indu umwe meṱunḓu rawo poo momaturiro wopopezu tja ṱu.​—Judas 3.

² Indu tji wa kuramenwa i yomarorero otja ingo, otjikeṋa tji matji yenene okukuvatera kutja u rire omuṱakame kouatjiri mbu u tjiwa ohunga nonḓiro okuza mOmbeibela? (Ef. 6:11) Ove mo yenene vi okuhuhumiṋa nokuyanḓiparisa omukambure omukweṋu ngu mape ya a kara kehi yoṋiṋikizire yokukara norupa movitjitwa mbi ha tjata ku Mukuru? Orupa ndwi maru kahurura omuano Jehova me tu vatera. Rutenga, matu katara kutja Ombeibela i tja vi ohunga nonḓiro.

3. Otjizeze otjitenga tja eta ye?

³ Ka ya ri ondando ya Mukuru kutja ovandu ve ṱe. Adam na Eva aave sokukara nonḓuviro ku Jehova kokutja ve hupe nga aruhe. Jehova we ve pa etwako epupu rokutja: “Posi yakomuti mbu yandja ondjiviro okutjiwa ouwa nouvi ko nokurya kovihape vyawo. Tji mo tjiti nao, mo ṱu.” (Gen. 2:16, 17) Nu okuzambo Satan wa tjita kutja pe kare ouzeu. Okupitira monyoka, eye wa tja ku Eva: “Kamambo! Indee uri, kamaamu ṱu!” Ouhumandu, Eva wa kambura motjizeze tjo na ri otjihape. Kombunda, omurumendu we wina wa rya kotjihape hi. (Gen. 3:4, 6) Kunao, ouvi nonḓiro otji vya tuurunga movandu avehe.​—Rom. 5:12.

4-5. Omomuano uṋe Satan me kayenda komurungu okupukisa ovandu?

 ⁴ Adam na Eva va ṱa, tjimuna Mukuru pa hungira. Posi yokutja Satan ngamba u kayenda komurungu okukora ovizeze ohunga nonḓiro. Eye wa uta okuhungira ovizeze vyarwe. Otjizeze tjimwe otjokutja orutu romundu ru koka, posi yokutja pe notjiṋa tjarwe morutu romundu tji tji kayenda komurungu okuhupa, ngahino momaturiro wozombepo. Ovizeze pekepeke otja imbyo vya pukisa ovandu ovengi nga ku ndino.​—1 Tim. 4:1.

⁵ Ongwaye ovandu ovengi tji ve kambura movizeze vya Satan? Omena rokutja Satan u tjiwa kutja ovandu kave vanga okukoka, kunao eye u ungurisa ondjivisiro ndjo okuvepukisa nayo. Mena rokutja twa memwa kutja tu hupe nga aruhe, eṱe katu vanga okukoka. (Omuzuv. 3:11) Eṱe tu vara onḓiro otjomunavita.​—1 Kor. 15:26.

6-7. (a) Hapo Satan wa toṋa mokutjita kutja ouatjiri ohunga nonḓiro au ha tjikwa? Kahurura. (b) Ouatjiri wOmbeibela u tu vatera vi kutja atu ha tira ovaṱi?

⁶ Nandarire kutja Satan u tjita ozongondjero okupukisa ovandu, ouatjiri ohunga nonḓiro kauhorekerwe. Mouatjiri, ovandu ovengi nai ve tjiwa nu ve zuvarisa imbi Ombeibela mbi i honga ohunga nongaro nomaundjiro wovaṱi. (Omuzuv. 9:5, 10; Oviung. 24:15) Okutjiwa ouatjiri mbwi ku tu huhumiṋa nokutuvatera kutja atu ha kara nomburuma poo omakeyakeyero ohunga nokutja pe tjitwa tjike indu omundu tja ṱu. Otjotjihorera, ovakarere va Jehova kave tira ovaṱi, nu kave tira kutja pe notjiṋa otjivi tji matji tjitwa indu ovasuverwa vawo tji va ṱu. Eṱe tu tjiwa kutja owo kave nomuinyo nu kape notjiṋa tji mave tjiti okuhihamisa ovandu. Owo ve ri tjimuna va rara ozomboṱu. (Joh. 11:11-14) Eṱe wina matu tjiwa kutja ovaṱi kave na tji mave tjiwa ohunga nomakayendero woruveze. Kunao mombendukiro, nandarire imba mba ṱa oure wozombura ozengi mave munu oruveze ndwi otjotjiṋa tji tja hakahana uriri, tjimuna mombapaiziro yeho.

⁷ Ove tjiri moitavere kutja ouatjiri ohunga nongaro yovaṱi ya kahuruwa nawa nu oupupu okuzuva. Ouatjiri mbwi wa panguka kovizeze vya Satan mbye pukisa navyo ovandu! Ovizeze mbi wina vya eta ondjambu kOmuute wetu. Okutuvatera kutja tu zuve nawa onyoneno Satan ndja tjita, eṱe matu katara komapuriro nga: Omomuano uṋe ovizeze vya Satan mu vya yamburura Jehova? Omomuano uṋe ovizeze mbi mu vya tjita kutja ovandu ve ute okumuna kutja ka hepero okukara nongamburiro motjisuta tjonguturiro tja Kristus? Omomuano uṋe ovizeze mbi mu vya tjita kutja ovandu ve mune omihihamo nomauzeu omengi?

8. Otja tji pa raisiwa mu Jeremia 19:5, omomuano uṋe ovizeze vya Satan ohunga novaṱi mu vi yamburura Jehova?

⁸ Ovizeze vya Satan ohunga novaṱi vi yamburura Jehova. Ovizeze mbyo vi kamburira mo omahongero wokutja ovaṱi ve kapya motjovasengwa. Omahongero otja ingo ye yamburura Mukuru! Omomuano uṋe? Omahongero otja ingo ye tjita kutja ovandu ve kambure kutja Mukuru worusuvero u novikaṋena vimwe tji muna vyOmudiaboli. (1 Joh. 4:8) Ove u noumune uṋe ohunga notjiṋa hi? Nu tjinenenene, otjiṋa hi tji ṱuna vi ku Jehova? Kombanda yaavihe, Eye wa tonda omiano avihe vyozondjito zoutwe.​—Lesa Jeremia 19:5.

9. Ovizeze vya Satan vi ṱuna vi kongamburiro yovandu motjisuta tjonguturiro tja Kristus, otja tji pa raisiwa mu Johanes 3:16 na 15:13?

⁹ Ovizeze vya Satan ohunga novaṱi vi tjita kutja ovandu ve ute okumuna kutja ka hepero okukara nongamburiro motjisuta tjonguturiro tja Kristus. (Mat. 20:28) Otjizeze tjarwe tja Satan otjo hi tjokutja ovandu ve nomuinyo poo ombepo ndji ha koka. Andakuzu imbo ouatjiri, ovandu avehe atja ve hupa nga aruhe. Ndovazu pe ri nao, Kristus katja hepa okuyandja omuinyo we otjonguturiro kweṱe kokutja tu ka mune omuinyo waaruhe. Zemburuka kutja ombunguhiro ya Kristus otjiraisiro tjorusuvero orunenenene ndwa raisiwa kovandu. (Lesa Johanes 3:16; 15:13.) Ripura uriri kutja Jehova nOmuna we ve hihamwa pu pe ṱa pi ohunga nomahongero nge tjita kutja ovandu ave ha kara nongamburiro mounanḓengu wotjiyandjewa hi!

10. Ovizeze Satan mbya kora ohunga nonḓiro vya etera vi ovandu okumuna omihihamo nomauzeu omengi?

¹⁰ Ovizeze vya Satan vya tjita kutja ovandu ve mune omihihamo nomauzeu omengi. Ovanene mbe ri kehi yomihihamo vyokuzepaisa omuatje wawo, peya ave raerwa kutja Mukuru ongwa zepa, nga hino ma karire omuengeli meyuru. Hapo ovizeze vya Satan mbi vi ve huhumiṋa poo vi wezira ko omihihamo? Ovandu ve ungurisa omahongero wovizeze wokukapya motjovasengwa otjomuano mbu yakurwa i Mukuru, na wina okunyosa ovandu mbu mave pirukire omahongero wokereka komuti wondatumisire. Otja kembo ndi Spanish Inquisition, ovandu tjiva mbaa ri nomerizirira wokutatumisa varwe aave kambura kutja ovandu mbu mave pirukire omahongero wawo “mave sokurora kutja otjovasengwa tjinyosa vi,” kokutja ve ritanaure komauvi wawo ngunda ave hiya koka, nokutja ave ha kapya motjovasengwa. Momahi tjiva, ovandu ve rikotamena kovaṱi, okuvepa ondjozikiro, poo okupaha otjiwa. Varwe ve vanga okuveraisira ouwa kokutja ave ha munu otjipo. Ouhumandu, ovizeze vya Satan mbyo kavi yeta omahuhumiṋino yatjiri. Nungwari, vi eta ozongendo poo nandarire okutira.

11. Omomuano uṋe omaṱunḓu poo omapanga wetu mu mave kondjo okutuṋiṋikiza kokutja tu pirukire Embo ra Mukuru?

¹¹ Orusuvero rwetu ku Mukuru na kEmbo re vi tu pa omasa kutja tu rire ovaṱakame ku Jehova, nandarire indu omaṱunḓu poo omapanga wetu tji mave tuṋiṋikiza okukara norupa movitjitwa mbi ha zikamene komatjangwa, nu mbi norupa novaṱi. Owo mape ya ave tu ṱisa ohoṋi mokutja katuna orusuvero poo ondengero komundu ngwa ṱu. Poo mape ya ave tja ongaro yetu mai tjiti kutja omuṱi ma yete ovihuha kovandu momuano umwe poo omukwao. Hapo eṱe matu yenene vi okurwira ouatjiri wOmbeibela? Tara komuano ove mu mo yenene okuṱakamisa omirari vyOmbeibela mbi.

12. Ovitjitwa viṋe ohunga novaṱi mbi ha zikamene komatjangwa?

¹² Rimanena ‘okuhaṋika’ novitjitwa poo otuzo tu tu ha zikamene komatjangwa.  (2 Kor. 6:17) Motjiwaṋa tjOvacaribbean, ovengi ve kambura kutja omundu tja koka u kotoka “otjiruru” okutatumisa imba mbaave mu tjindi navi. Embo rimwe ri tja: “Oviruru” peya avi yeta “oumba momaturiro wovandu.” MoAfrika ovandu ve kutjira ovispili mondjuwo yomuṱi nu ave tanaura oviperendero vye okutara momira, otja kombazu yawo. Omena ratjike? Tjiva ve tja ovaṱi kave sokurimuna oveni! Otjovakarere va Jehova, eṱe katu kambura movizeze otja imbyo poo movitjitwa mbi tunduuza ovizeze vya Satan!​—1 Kor. 10:21, 22.

13. Ove mo sokutjita vi, indu tji mokeyakeya ohunga novitjitwa vyombazu kaaṋi, otja tji pa tamunwa mu Jakobus 1:5?

¹³ Indu tji mokeyakeya ohunga novitjitwa vyombazu kaaṋi, ningira ounongo ku Jehova mongumbiro. (Lesa Jakobus 1:5.) Nu okuzambo tjita omakonḓononeno momambo wetu. Tje ri ohepero, ningira ombatero kovanene vombongo mombongo yeṋu. Owo kamaave ku raere kutja tjita vi, posi yokutja mave ku vatere okumuna omirari vyOmbeibela, tjimuna imbi mbya hungirwa mba. Tji mo tjiti oviṋa mbi, morongerisa ‘ozondunge’ zoye nu ozo maze ku vatere “okupangura pokati kouwa nouvi.”​—Hebr. 5:14.

14. Omomiano viṋe mu tu hina okurira ombutarisiro ku varwe?

¹⁴ “Avihe mbi vi tjiteye kohiviro ya Ndjambi. Kareye nongarero, ndji hi nakueta ombutarisiro.” (1 Kor. 10:31, 32) Indu tji matu sokutoorora kutja matu sokukara norupa movitjitwa vyombazuu, eṱe matu sokuripurira komeritjiviro wa varwe womomutima, tjinene Ovakriste ovakwetu. Eṱe kamaatu vanga okuputarisa varwe! (Mar. 9:42) Nu wina, katu nokuvanga okupindikisa imba mbe he ri Ovahongonone va Jehova. Orusuvero maru tu hingi okuhungira ku nawo momuano wondengero, mbu mau yeta ohiviro ku Jehova. Eṱe kamaatu vanga okuposa ku novandu poo okukwekurura ozombazu zawo. Zemburuka kutja, orusuvero otjiṋa otjinanḓengu! Tji matu raisa orusuvero momuano omuwa nu wondengero, eṱe mape ya atu rundurura ongaro yovetupirukire.

15-16. (a) Ongwaye tje ri ounongo okuraera varwe ongamburiro yoye? Yandja otjihorera. (b) Matu rihongere koye komambo wa Paulus nge ri mOvaroma 1:16?

¹⁵ Tjita kutja ovandu momaturiro woye ve tjiwe kutja oove umwe wOvahongonone va Jehova. (Jes. 43:10) Omundu meṱunḓu roye tja ṱu, ovazamumwe voye novararanganda mape ya ave pindike tjinene ove tji u hi nokukara norupa movitjitwa vyombazu kaaṋi. Posi  yokutja ma rire oupupu okutjinda ongaro ndjo indu tji we ve raere komurungu woruveze ohunga nongamburiro yoye. Francisco, ngwa tura moMozambique, wa tja: “Indu omukazendu wandje, Carolina, na ami tji twe rihonga ouatjiri, twa raera eṱunḓu retu kutja katu nokurikotamena kovaṱi rukwao. Ondando yetu ndjo ya rorwa indu erumbi ra Carolina tja ṱa. Otja kombazu, orurova romuṱi aa ru sokukohwa. Nu okuzambo omuzamumwe wopopezu aa sokurara omayuva 3 poruveze pu pa yumbwa omeva yomuṱi. Ovitjitwa vyombazu mbi aa vi sokutjita kutja ombepo yomuṱi i yende nawa mohange. Ovazamumwe va Carolina aave undjire ko kutja eye arire ngu matjiti oviṋa mbi.”

¹⁶ Francisco nomukazendu we va tjita vi? Francisco wa tja: “Mena rokutja twa suvera Jehova nu tu vanga okumuyorokisa, eṱe katu karere norupa movitjitwa vyombazu mbi. Ovazamumwe va Carolina va pindikire tjinene. Owo ve tu kuminina okuhinondengero komuṱi nu wina va tja kave nokuuhara amave tu ryangere poo okutuvatera rukwao. Mena rokutja twe ve kahururira rukuru ongamburiro yetu, eṱe kaatu hepa okuhungira ku nawo ngunda ava pindike. Ovazamumwe vetu tjiva nandarire va ri munda wetu a mave tja twe ve kahururira rukuru ongamburiro yetu. Otja oruveze tjaa ru kayenda, omazenge wovazamumwe va Carolina ya wa pehi, nu eṱe twa yenena okutjita ohange. Tjiva nandarire veya poyetu okuningira omambo nga zikamena kOmbeibela.” Mena rokutja matu tjiwa imbi Ombiebela mbi i honga ohunga novaṱi, atu roro okuṱohoṋi okurira ovaṱakame.​—Lesa Ovaroma 1:16.

17. Otjikwaye tji matji yenene okutuvatera okurira epanga ratjiri komukambure omukwetu ngwa zepaisa?

¹⁷ Omukambure omukwetu tja ṱirwa, eṱe tu sokukondja nomasa okurira ‘epanga . . . , nerumbi moruveze rwombamisiro.’ (Omiano 17:17) Matu yenene vi okurira “epanga” ratjiri, tjinenene indu omukambure omukwetu tji ma ṋiṋikiziwa okukara norupa movitjitwa vyombazu mbi ha zikamene komatjangwa? Ngatu tare komirari vyOmbeibela 2 mbi mavi yenene okutuvatera okuhuhumiṋa ingwi ngu ri moruhoze.

18. Ongwaye Jesus tja rira, nu matu rihongere kotjike kotjihorera tje?

¹⁸ ‘Riree pamwe novarire.’ (Rom. 12:15) Mape ya a rire otjiṋa otjizeu okutjiwa kutja ngo  tje vi komundu ngwa zepaisa. Nungwari tji ve tu munu amatu riri mave munu kutja tjiri tu rikendera wo. Maria, Marta na varwe va rira indu omuṱena kwawo omusuverwa nepanga rawo Lasarus tja ṱa, nu wina ngwa ri epanga ra Jesus. Kombunda yomayuva 4 Jesus tja vaza mbo eye wina “wa rira,” nandarire kutja a tjiwa kutja ma pendura Lasarus. (Joh. 11:17, 33-35) Omahoze Jesus nga rira ya raisa kutja Jehova wa ri noumune uṋe ohunga nonḓiro ya Lasurus. Nu eṱunḓu ra yenena okumuna kutja Jesus we ve suvera tjinene, nu otjiṋa hi tja huhumiṋa Maria na Marta. Momuano otjingewo, indu ovakambure ovakwetu tji va munu kutja twe ve suvera nu tu rikendera wo, owo ve tjiwa kutja kawo aveyerike nungwari ve nomapanga okuveyanḓiparisa.

19. Indu tji matu huhumiṋa omukambure omukwetu ngwa ṱirwa omomiano viṋe mu matu yenene okuungurisa omambo nge ri mOmuzuvarise 3:7?

¹⁹ “Oruveze rwokumwina norwokuhungira.” (Omuzuv. 3:7) Omuano warwe mu mo yenene okuhuhumiṋa omukambure omukweṋu eendu tji wa rire omupuratene omuwa. Yandjera kutja omukambure omukweṋu ma hungire imbi mbi ri momutima we, nu o pindikisiwa i ‘yomambo omandandi’ ngu ma hungire. (Job 6:2, 3) Eye mape ya u ri kehi yoṋiṋikizire okuza kovazamumwe ve mbe he ri Ovahongonone va Jehova. Kunao kumba puna ye. Riheka ku ingwi “ngu u zuvira ozongumbiro” kutja me mu pe omasa nouripura ouwa. (Eps. 65:2) Tji mape yenene, lesa Ombeibela puna ye. Poo lesa orupa momambo wetu ndi ma ri hitasana nongaro ndje ri mo, tjimuna ehungi romundu ndi ma ri mu pe omasa.

20. Morupa ndu maru kongorere ko matu kahungirira ku ye?

²⁰ Tjiri ondjingonekero onene okutjiwa ouatjiri ohunga novaṱi nomaundjiro omawa ngu maye undju imba mbe ri momayendo! (Joh. 5:28, 29) Kunao, momambo novitjitwa, ngatu rwire omahongero wOmbeibela nouvanḓe nokuhaṋasana kuna varwe, oruveze aruhe ndu twa munu. Morupa ndu maru kongorere ko matu katara komuano warwe Satan me kondja okuṱizira ovandu monḓorera mokuungurisa oundjai. Wina matu katara kutja ongwaye tji matu sokukara kokure novitjitwa nomanyando nge tjama nozondemone.