1. Ovakarere va Mukuru avehe ve vanga okutjita ye, nu omena ratjike? (Tara kotjiperendero tjokombanda yokambo nga.)

KRISTUS JESUS wa rakiza ovemukongorere na tja: “Otji mwa sokuyenda koviwaṋa avihe ngamwa akuhe mu kaise po ovandu ovahongewa vandje.” (Mat. 28:19) Ovakarere va Mukuru avehe ovaṱakame ve vanga okurihonga kutja mave ‘yenenisa’ vi otjiungura tjokuzuvarisa nawa, tji va pewa okutjita. (2 Tim. 4:5) Kombanda yanao, otjiungura hi otjinanḓengu tjinene, nu tji nohakahana, kombanda yoviungura vyarwe mbi tu na vyo mehupo. Nungwari, mape ya ai rire ouzeu okuungurisa oruveze rwetu motjiungura tjokuzuvarisa otja pu matu vanga.

2. Omauzeu waye ngu tu muna indu tji matu vanga okuyenenisa otjiungura tjetu tjokuzuvarisa nawa?

² Pe noviṋa vyarwe ovinanḓengu mbi hepa oruveze nomasa wetu. Eṱe mape ya tu hepa okuungura oviungura mbi kambura ozoiri ozengi kokutja tu kare novimariva mbya yenene kovihepwa vyetu na imbi vyomaṱunḓu wetu. Nu mape ya tu kondja nomerizirira warwe meṱunḓu, ouvere, ozombameno, nomihihamo mbi etwa i oukurundu. Hapo matu yenenisa vi otjiungura tjetu tjokuzuvarisa nawa nandarire tji tu ri kehi yomauzeu otja inga?

3. Omambo wa Jesus nge ri mu Mateus 13:23 maye tu hongo tjike?

³ Indu ozongaro zetu tji ze hi nokutuyandjera okuungura oruveze oruingi motjiungura tja Jehova, atu yandjere kutja otjiṋa hi tji tu teye ombango. Jesus aa tjiwa kutja atuhe kamaatu ruku ovihape vyOuhona mbi ṱeki pamwe. (Lesa Mateus 13:23.) Indu tji matu ungura pu matu yenene motjiungura tja Jehova, eye tjiri u nondangi koviṋa avihe mbyo. (Hebr. 6:10-12) Momuano warwe, ongaro mu tu ri mape ya ai tjiti kutja tu mune kutja matu yenene okuungura ovingi. Morupa ndwi, matu katara komiano mu matu yenene okutjita kutja otjiungura tjokuzuvarisa tji rire otjiṋa otjitenga mehupo  retu, nokutja matu yenene vi okukara nehupo ndi hi noviṋa ovingi, nu matu rire vi ovazuvarise novahonge ovawa. Rutenga, hapo okuyenenisa otjiungura tjetu tjokuzuvarisa nawa maku hee tjike?

4. Okuyenenisa otjiungura tjokuzuvarisa nawa ku heya tjike?

⁴ Okuyenenisa otjiungura tjetu tjokuzuvarisa nawa maku hee kutja eṱe matu sokuzuvarisa nokuhonga otja pu matu yenene. Posi yokutja ka ku kamburire mo oruveze ndu matu ungurisa mokuzuvarisa uriri. Otjiṋa otjinanḓengu ku Jehova otjo hi tjokutja ongwaye tji tu zuvarisa. Mena rokutja twa suvera Jehova novakwetu, tu ungura nomuinyo wetu auhe motjiungura tjokuzuvarisa. * (Mar. 12:30, 31; Kol. 3:23) Okukarera Mukuru nomuinyo wetu auhe ku heya okuriyandja oveni nokuungurisa omasa wetu otja pu matu yenene motjiungura tje. Indu tji twa tjiwa kutja tjiri ondjingonekero yapeke kweṱe okuzuvarisa, tu kondja okuhungira ohunga nombuze ombwa kovandu ovengi otja pu matu yenene.

5-6. Yandja otjihorera tjokutja omomuano uṋe omundu ngu hina oruveze ndwa yenene, mu ma yenene okutwapo otjiungura tjokuzuvarisa otjotjiṋa otjitenga mehupo re.

⁵ Ripura nomurumendu omutanda ngwa suvera okunyanda otjiketara. Eye tjiri u kara nenyando okunyanda omizumbi tja munu oruveze rwokutjita nao. Nu kombunda, eye wa muna oviungura vyokunyanda otjiketara monavyeka pokastora ku ke randisa okosiva. Posi yokutja, eye kaa munu ovimariva mbya yenene okuranda oviṋa mbi ma hepa. Eye wa uta okurandisa postora yovikurya okuza kOmandaha nga kOritjatano. Nandarire kutja oruveze rwe oruingi aa randisa postora yovikurya, okunyanda omizumbi ootjiṋa tja suverere tjinene . Eye aa zeri okukurisa ondjiviro ye momizumbi nokurira omunyande womizumbi aruhe. Nandarire kutja wa ri nomeripura ngo, eye aa paha omiano vyokunyanda omizumbi, nandarire oruveze orusupi uriri.

⁶ Momuano otjingewo mbo, ove mape ya kutja ko yenene okuungura ozoiri ozengi motjiungura tjokuzuvarisa otja pu mo zeri. Posi yokutja, iho otjiṋa tji wa suvera okutjita. Ove u kondja pu mo yenene okukurisa ondjiviro yoye kutja u ṱune komitima vyovandu nombuze ombwa. Mena rokutja u nomerizirira omengi, ove mape ya oripura kutja  omomuano uṋe mu mo yenene okutwapo otjiungura tjokuzuvarisa otjotjiṋa otjitenga mehupo roye.

7-8. Omomuano uṋe mu matu horere koumune wa Jesus ohunga notjiungura tjokuzuvarisa?

⁷ Jesus we tu raisira otjihorera tjapeke tjokutja matu sokukara noumune uṋe ohunga notjiungura tjokuzuvarisa. Okuhungira ohunga nOuhona wa Mukuru ya ri otjiṋa otjinanḓengu tjinene mehupo ra Jesus . (Joh. 4:34, 35) Eye aa kawondja ozokilometa ozengi okukazuvarisa kovandu ovengi otja pu ma yenene. Eye aruhe aa paha omiano vyokuhungira ku novandu pozoyawo poo poṋa apehe pa vaza po ovandu. Otjiungura tjokuzuvarisa tja ri otjiṋa otjitenga mehupo ra Jesus.

⁸ Eṱe matu yenene okuhorera ku Kristus mokupaha omiano vyokuhungira ku novandu ohunga nombuze ombwa moiri noruveze ndu ri ro. Tu kara nonḓero yokuisa oviṋa mbi twa suvera kutja tu kare norupa motjiungura tjokuzuvarisa. (Mar. 6:31-34; 1 Petr. 2:21) Tjiva mombongo ve yenena okukarera otjovakandjira vapeke, voruveze aruhe, poo ovakandjira ovavatere. Varwe ve rihonga okuhungira eraka rarwe, poo okutjindira koruveze ku ku nouhepe wovazuvarise. Nungwari, otjiungura otjingi tjokuzuvarisa tji ungurwa i ovazuvarise mbe ha yenene okurira ovakandjira, posi yokutja mbe kondja pu mave yenene okupita motjiungura tjokuzuvarisa. Kainatja kutja tu ungura ovingi motjiungura tjokuzuvarisa poo tu ungura ozoiri ozonḓiṱi uriri, Jehova ke tu ningire okuungura ovingi kombanda yanao. Eye u vanga kutja tu kare nondjoroka motjiungura tje indu tji matu tjivisa “evangeli roujere ua Mukuru omunauṋingandu.”​—1 Tim. 1:11, EEP; Deut. 30:11.

9. (a) Omomuano uṋe Paulus ma twapo otjiungura tjokuzuvarisa poruveze orutenga nandarire kutja aa ungura? (b) Oviungura 28:16, 30, 31 ri raisa ye ohunga nongaro ya Paulus kotjiungura tje tjokuzuvarisa?

⁹ Omuapostele Paulus we tu raisira otjihorera otjiwa mokutwapo otjiungura tjokuzuvarisa otjotjiṋa otjitenga mehupo re. Indu tja ri moKorinte mouyenda we outjavari otjomuhindwa, eye wa ri novimariva oviṱiṱi nu aa hepa okuungura ozotenda. Posi yokutja, okuungura ozotenda kaya ri otjiṋa otjinanḓengu tjinene ku Paulus. Eye aa ungura otjiungura hi kokutja me rihupise ngunda e ri motjiungura tjokuzuvarisa, nokutja ovakambure moKorinte ave ha ungurisa ‘ondjambi’ yawo okumuhupisa. (2 Kor. 11:7) Nandarire kutja Paulus aa hepa okuungura oviungura, eye wa kayenda komurungu okutwapo otjiungura tjokuzuvarisa otjotjiṋa otjitenga mehupo re, nu aa zuvarisa mEsabata arihe. Kombunda, ongaro ye tji ya runduruka Paulus aa yandja ombango kokuzuvarisa. Eye “wa panḓera pokuzuvarisa embo ra Ndjambi ama hongonona kutja Jesus ongu ri Kristus.” (Oviung. 18:3-5; 2 Kor. 11:9) Nu kombunda, oure wozombura 2 Paulus tja ri moRoma pu nomurwe wovita okumutjevera poṋa pa turire indu tjakamburirwe, eye aa zuvarisa kovandu avehe mbaave ya okumuvarura nu aa tjanga otutuu. (Lesa Oviungura 28:16, 30, 31.) Paulus kaa yandjere otjiṋa ngamwa okumupora kotjiungura tjokuzuvarisa. Eye wa tja: “Ndjambi motjari tje we tu pa otjiungura tjoukarere hi. Opu twa sokuungura nokuhaurwa.” (2 Kor. 4:1) Tjimuna Paulus, nandarire kutja oviungura mbi tu ungura vi kambura oruveze rwetu oruingi, eṱe matu yenene okutwapo otjiungura tjOuhona otjotjiṋa otjitenga mehupo.

10-11. Indu tji twa vera, omomiano viṋe mu matu yenenisa nawa otjiungura tjetu tjokuzuvarisa?

¹⁰ Tji tu ha yenene okuzuvarisa okuza kondjuwo nga kondjuwo otja pu matu vanga mena roukurundu poo mena rouveruke wetu, pe nomiano vyarwe mu matu yenene okuzuvarisa. Ovakriste veserewondo etenga aave kondjo pu mave yenene okuzuvarisa kovandu koṋa akuhe. Owo aave zuvarisa okuza kondjuwo nga kondjuwo, momivanda vyotjihuro, na ‘ku novakapite.’ (Oviung. 17:17; 20:20) Indu tji tu ha yenene okukayenda omikato omire, eṱe mape ya atu haama potuveze pu pe kapitira ovandu. Poo mape ya atu  zuvarisa ngunda atu he ri motjiungura tjokuzuvarisa, nokutjanga otutuu, poo okuzuvarisa mongoze. Ovazuvarise mbe ha yenene okuzuvarisa okuza kondjuwo nga kondjuwo mena rouveruke poo omauzeu warwe, ve muna ondjoroka mokuzuvarisa momiano vyarwe mbyo.

¹¹ Nandarire kutja ka ove omuveruke pu pe ṱa pi, ove mo yenene okuyenenisa nawa otjiungura tjoye tjokuzuvarisa. Tara rukwao kotjihorera tjomuapostele Paulus. Eye wa tja: “Omasa nge kapita avihe ye za mu Ndjambi, nu kaye zu mu eṱe.” (2 Kor 4:7) Paulus aa hepa omasa ngo indu tjaaverere mouyenda we otjomuhindwa. Eye wa kahurura kOvagalate, na tja: “Eṋe mamu zemburuka tji mbe mu zuvarisirire korutenga indji Ombuze Ombwa. Moruveze ndwo ami mba verere.” (Gal. 4:13) Momuano otjingewo mbo, ouvere woye mape ya au tjiti kutja u kare noruveze rokuzuvarisa ombuze ombwa ku varwe tjimuna ozonganga, ozonesa, novandu varwe mbe ku vatera. Indu ovazuvarise tji va kavarura ozonganda zawo ovandu otja imbo tjandje ve ri koviungura.

12. Eho roye tji ri ri “nawa” maku hee tjike?

¹² Jesus wa tja: “Eho oro emunine rorutu. Eho roye tji ri ri nawa, orutu rwoye aruhe maru kara mondjerera.” (Mat. 6:22) Eye a hee tjike? Eye a hee kutja eṱe matu sokukara nehupo ndi hi noviṋa ovingi poo okuyandja ombango kotjiṋa tjimwe poo ondando imwe, nokuhinokupukisiwa poo okupandjara ombango yetu. Jesus wa raisa otjihorera otjiwa mokuyandja ombango kotjiungura tjokuzuvarisa, nu wa honga ovahongewa ve okuyandja ombango aruhe kokukarera Jehova nOuhona we. Eṱe tu horera ku Jesus mokutjita kutja otjiungura tjokuzuvarisa tji rire otjiṋa otjitenga  mehupo retu, nu ‘rutengatenga tu paha ouhona wa Ndjambi na indji ombango Ye.’​—Mat. 6:33.

13. Otjikwaye tji matji tu vatere kutja tu yandje ombango kotjiungura tjokuzuvarisa?

¹³ Omuano umwe mu matu yenene okuyandja ombango kotjiungura tjokuzuvarisa omokuungurisa oruveze oruṱiṱi moviṋa mbi he ri ovinanḓengu, kokutja tu yenene okukara noruveze oruingi okuvatera varwe okutjiwa nokusuvera Jehova. * Otjotjihorera, hapo eṱe matu yenene okurundurura ozoiri zetu zoviungura kokutja tu kare noruveze oruingi motjiungura tjokuzuvarisa mokati kotjivike? Hapo matu yenene okuungurisa oruveze oruṱiṱi uriri moviṋa vyomanyando?

14. Ovakupasane va tjita omarundurukiro waye kokutja ve kare noruveze oruingi motjiungura tjokuzuvarisa?

¹⁴ Omunene wombongo Elias, nomukazendu we va tjita nao. Eye wa tja: “Eṱe kaatu yenene okurira ovakandjira oruveze ndo, posi yokutja pa ri noviṋa mbya tu yenene okutjita kutja tu kare motjiungura tjokuzuvarisa oruveze oruingi. Kunao eṱe twa uta okutjita omarundurukiro moviṋa oviṱiṱi kutja tu kare noruveze oruingi rokuzuvarisa. Otjotjihorera, eṱe twa uta okuungurisa ovimariva oviṱiṱi uriri, nu wina twa muna kutja aatu ungurisa oruveze oruingi momanyando, kunao twa yarura omanyando wetu ombunda. Nu twa ningira ovahona vetu okurundurura omayuva wetu wokuungura kokutja tu kare noruveze oruingi rokuzuvarisa. Mena ranao, eṱe twa yenena okukara norupa momazuvarisiro wongurova, okuhonga ovahongewa ovengi vOmbeibela, na wina okukara norupa momazuvarisiro womokati kotjivike povikando 2 momueze. Okutjita nao kwe tu etera ondjoroka!”

15-16. 1 Timoteus 4:13, 15, mari tu vatere vi okurira ovazuvarise ovawa? (Wina lesa okawongo nga “ Ozondando nḓu maze ndji vatere okuyenenisa otjiungura tjandje tjokuzuvarisa nawa.”)

¹⁵ Omuano warwe mu matu yenenisa otjiungura  tjetu tjokuzuvarisa nawa omokurira ovazuvarise novahonge ovawa. Ovandu mbu ve ungura otjiungura kaaṋi ve hepa okuhongwa aruhe kokutja ve kare nounongo nondjiviro ombwa. Imbwi wina ouatjiri ohunga novazuvarise vOuhona. Eṱe wina tu hepa okukayenda komurungu okurihonga okurira ovazuvarise ovawa motjiungura tjokuzuvarisa.​—Omiano 1:5; lesa 1 Timoteus 4:13, 15.

¹⁶ Hapo eṱe matu yenene vi okukayenda komurungu okurihonga okurira ovazuvarise ovawa? Eendu tji twa yandja ombango komaronga ngu tu muna pozombongarero zomokati kotjivike. Ozombongarero nḓa ze tu pa omahongero omasemba nge tu vatera okupwisa omahongero wetu motjiungura tjokuzuvarisa. Tjimuna, indu omuhaamise wombongarero tja yandja eronga kovahongwa mbe norupa, eṱe matu yenene okurihonga oviṋa mbi mavi tu vatere motjiungura tjokuzuvarisa. Matu yenene okungurisa ondjiviro ndji, indu tji matu haṋasana ombuze ombwa ku nomundu. Eṱe matu yenene okuningira omutarere wotjimbumba tjokuzuvarisa ombatero, poo atu mu ningire okuungura ku na ye motjiungura tjokuzuvarisa, poo atu ningire omuzuvarise ngu nondjiviro ombwa, omukandjira, poo omutarere worukondwa. Otja tji ma tu ungurisa nawa Oviungurisiwa vyetu vyOkuhonga, matu kara nondjoroka tjinene motjiungura tjokuzuvarisa nokuhonga.

17. Ouwa waye mbu mo munu tji wa yenenisa otjiungura tjoye tjokuzuvarisa nawa?

¹⁷ Tjiri ondjingonekero onene kutja Jehova u tu yandjera kutja tu rire “ovaungure vapamwe” na ye! (1 Kor. 3:9) Indu tji wa ‘toorora imbi mbi ri oviwaviwa’ nokuyandja ombango kotjiungura tjokuzuvarisa, ove mo ‘karere Muhona nenyando.’ (Fil. 1:10; Eps. 100:2) Otja umwe wovakarere va Mukuru, ove mo yenene okukara nongamburiro yokutja eye me ku pe omasa ngu mo hepa kokutja u yenenise otjiungura tjokuzuvarisa, nandarire kehi yomauzeu ngu mape ya okara na yo. (2 Kor. 4:1, 7; 6:4) Nandarire kutja ongaro mu u ri mai ku yandjere okukara norupa oruṱiṱi poo orunene motjiungura tjokuzuvarisa, ove mo “yenene okurihivira vyo” indu ove tji mo ungura otjiungura tjokuzuvarisa nomutima woye auhe. (Gal. 6:4) Indu tji wa yenenisa otjiungura tjoye tjokuzuvarisa, ove u raisa kutja wa suvera Jehova novandu varwe. “Orondu tji wa tjiti nai, indino mo riyama omuini na imba mbu mave puratene kove.”​—1 Tim. 4:16.