1. Mo yenene vi okutunga oupanga ouwa ku nomundu?

RUTENGA u hepa okukara popezu nomundu kutja u tunge oupanga ouwa ku na ye. Otja tji ma mu hungire kumwe nokuraerasana oumune weṋu, mu tunga oupanga ouwa. Posi yokutja povikando tjiva i rira ouzeu okutunga oupanga ouwa kuna Jesus. Omena ra tjike?

2. Otjikwaye otjitenga tji tji tjita kutja i rire ouzeu okurira epanga ra Jesus?

² Otjitenga, omena rokutja katu ya muna Jesus. Ovakriste veserewondo etenga va ri nouzeu otjingewo. Nu omuapostele Petrus wa tja: “Eṋe mwe Mu suvera, nandarire kutja kamuye Mu muna, nu mwa kambura mu Ye, nangarire kutja nai kamu nakumumuna nambano.” (1 Petr. 1:8) Kunao mo yenene okurira epanga ra Jesus nandarire kutja ko ye mu muna.

3. Otjikwaye otjitjavari tji tji tjita kutja i rire ouzeu okurira epanga ra Jesus?

³ Otjitjavari, omena rokutja katu yenene okuhungira kuna Jesus. Indu tji matu kumbu tu hungira kuna Jehova. Otjiperi kutja, tu kumba mena ra Jesus nungwari eṱe katu hungire kuna ye ongarate. Nu wina, Jesus ka vanga kutja tu kumbe ku ye. Omena ra tjike? Mena rokutja ongumbiro omuano womerikotameneno, nu Jehova erike ongwa pwa okurikotamenwa. (Mat. 4:10) Nandarire kutja pe ri nao, eṱe  matu yenene okuraisa orusuvero rwetu ku Jesus.

4. Otjikwaye otjitjatatu tji tji tjita kutja i rire ouzeu okurira epanga ra Jesus?

⁴ Otjitjatatu, omena rokutja Jesus u ri meyuru, nu eṱe kamaatu yenene okukara puna ye. Posi yokutja matu yenene okutjiwa ovingi ohunga na Jesus nandarire kutja katu yenene okukara puna ye. Matu katara komapu yane ngu maye tu vatere okutunga oupanga ouwa kuna ye. Rutenga matu konḓonona ounahepero wokutunga oupanga ouwa kuna Kristus.

5. Ongwaye tji matu sokurira omapanga wa Jesus? (Wina lesa ouwongo mbwi “ Okurira omapanga wa Jesus ku tjita kutja tu kare noupanga ouwa kuna Jehova” na inga “ Kara noumune ouwa ohunga notjiungura tja Jesus.”)

⁵ Eṱe matu sokurira omapanga wa Jesus kutja tu kare noupanga ouwa kuna Jehova. Ongwaye tji matu tja nao? Tara komapu yevari nga. Rutenga, Jesus wa raera ovahongewa ve kutja, “Tate omuini we mu suvera, eṋe tjinga amwe Ndji suvera.” (Joh. 16:27) Eye wina wa tja: “kape nomundu ngu ma i ku Tate nokuhinaami.” (Joh. 14:6) Okukondja okurira epanga ra Jehova nokuhinokutunga oupanga ouwa kuna Jesus ku ri tjimuna okukondja okuhita mondjuwo nokuhinokuhitira momuvero. Jesus wa ungurisa omasasanekero otjingewo indu tja tja: “owAmi omuvero wozonḓu.” (Joh. 10:7) Epu oritjavari Jesus aa horere kovikaṋena vya Ihe nawa. Eye wa raera ovahongewa ve kutja, “auhe ngwa munu Ami wa munu Tate.” (Joh. 14:9) Omuano omusemba wokutjiwa Jehova omokurihonga ohunga nehupo ra Jesus. Otja tji matu rihongo ohunga na Jesus, orusuvero rwetu ku ye maru kurire  ko. Nu otja orusuvero rwetu ku Jesus pu maru kuru, orusuvero rwetu ku Jehova opu maru kurire ko wina.

6. Epu riṋe rarwe mu matu sokukara noupanga kuna Jesus? Kahurura.

⁶ Matu sokukara noupanga ouwa kuna Jesus kokutja ozongumbiro zetu ze zuvirwe. Ihi matji hee kutja eṱe matu sokuraisa movitjitwa vyetu kutja tu kambura mu Jesus pendje nokukumba ‘mena re’ uriri. Eṱe matu sokutjiwa omuano Jehova me ungurisa Jesus indu tji ma zuvire ozongumbiro zetu. Jesus wa raera ovaapostele ve kutja, “atjihe tji mamu ningire mena randje, Ami me tji tjiti.” (Joh. 14:13) Nandarire kutja Jehova ongu zuva nokuzira ozongumbiro zetu, eye wa yandja ouvara ku Jesus okuyenenisa ombango ye. (Mat. 28:18) Kunao ngunda e hiya zira ozongumbiro zetu eye u tara kutja tu ungurisa erakiza Jesus nda yandja. Otjotjihorera, Jesus wa tja: “Tji mamu isire ovakweṋu ouvi mbu va tjiti ku eṋe, Iho ngu ri meyuru wina me mu isire. Nungwari tji mu hi nokuisira ovakweṋu, indino Iho kemee mu isire ko ouvi mbu mwa tjita.” (Mat. 6:14, 15) Tjiri ounahepero kweṱe okutjinda varwe momuano omuwa tjimuna Jehova na Jesus mu ve tu tjinda.

7. Ouṋe ngu ma munu ouwa motjisuta tja Jesus tjonguturiro?

⁷ Imba mbe noupanga ouwa kuna Jesus ombu mave munu ouwa motjisuta tje tjonguturiro. Eṱe matu tjiwa vi? Jesus wa tja eye ‘ma yandja omuinyo we komapanga we.’ (Joh. 15:13) Ovandu ovaṱakame mba ri ko, ngunda Jesus e hiye ya kombanda yehi mave ke rihonga ohunga na ye nokumusuvera. Ovandu tjiva tjimuna Abraham, Sara, Moses na Rahab mave kapendurwa, posi yokutja ovakarere va Jehova ovaṱakame mbo mave hepa okutunga oupanga kuna Jesus kokutja ve kamune omuinyo waaruhe.​—Joh. 17:3; Oviung. 24:15; Hebr. 11:8-12, 24-26, 31.

8-9. Otja ku Johanes 15:4, 5, oupanga wetu kuna Jesus u tu hinga okutjita vi, nu ongwaye otjiṋa ho tji tji ri otjinanḓengu?

⁸ Eṱe tu nondjoroka okuungura pamwe na Jesus motjiungura tjokuhonga nokuzuvarisa ombuze ombwa yOuhona. Jesus tja ri kombanda yehi, eye wa ri omuhonge. Nu okuza indu tja yaruka keyuru, Jesus otjotjiuru tjombongo u kayenda komurungu okuhongorera po otjiungura tjokuhonga nokuzuvarisa. Eye u muna nu u vara ozongondjero zoye zokuvatera ovandu otja pu mo yenene kutja ve mu tjiwe nokutjiwa Ihe. Otjiperi kutja, Jehova na Jesus ombu mave yenene okutuvatera okuyenenisa otjiungura ho.​—Lesa Johanes 15:4, 5.

⁹ Embo ra Mukuru ri tu honga oukahu kutja matu sokukara norusuvero na Jesus kutja tu yorokise omutima wa Jehova. Ngatu tare koviṋa vine mbi matu yenene okutjita kutja tu rire omapanga wa Jesus.

10. Otjikeṋa rutenga tji matu sokutjita kutja tu tunge oupanga wetu kuna Jesus?

¹⁰ (1) Tjiwa Jesus nawa. Eṱe matu yenene okutjita nao mokulesa omambo wOmbeibela nga, Mateus, Markus, Lukas na Johanes. Tji matu ripurire ko oukoto koviṋa mbi ri mOmbeibela ohunga nehupo ra Jesus matu utu okutenga nokusuvera Jesus mena roviṋa oviwa mbya tjitira ovandu. Otjotjihorera, nandarire kutja eye wa ri Omuhongore wawo, eye kaa tjindi ovahongewa ve otjovakarere. Nungwari eeve raere oumune we. (Joh. 15:15) Owo tji ve ri moruhoze Jesus  wina aa ṱoruhoze. (Joh. 11:32-36) Nandarire ovanavita na ye aave munu kutja imba mba yakura ombuze ye aave rire omapanga we. (Mat. 11:19) Indu tji matu horere komuano Jesus maa tjindi ovahongewa ve, oupanga wetu kuna varwe u kurira ko, tu kara nondjoroka nu orusuvero rwetu ku Kristus nondangi vi kurira ko.

11. Otjikeṋa otjitjavari tji matu sokutjita okutunga oupanga kuna Jesus, nu ongwaye okutjita nao tje ri ohepero?

¹¹ (2) Horera komeripura novitjitwa vya Jesus. Tji twa tjiwa Jesus nawa nu atu horere komuano mbwee ripura, oupanga wetu kuna ye ma u kurire ko. (1 Kor. 2:16) Matu horere vi ku Jesus? Tara kotjihorera hi. Jesus ee ripurire tjinene kokuvatera varwe pendje nokuripurira kuye omuini. (Mat. 20:28; Rom. 15:1-3) Mena rokutja, ee ripura nao eye wa ri nomeriyandjerero nu aa isire varwe. Oviṋa ovandu mbi va hungire ohunga na ye kaavi mu pindikisa tjimanga. (Joh. 1:46, 47) Nu kaa tjindi omundu warwe navi mena rondataiziro ndja tjita rukuru. (1 Tim. 1:12-14) Jesus wa tja: “Tji mwa suverasana, indino avehe otji mave tjiwa kutja oweṋe ovahongewa vandje.” (Joh. 13:35) Ripura omuini kutja, “Hapo mbi kongorera otjihorera tja Jesus nokukondja pu me yenene okukara nohange novakambure ovakwetu?”

12. Otjikeṋa otjitjatatu tji matu sokutjita okutunga oupanga kuna Jesus, nu omomuano uṋe mu matu yenene okutjita nao?

¹² (3) Yandja oruvara kovatwirisiwa. Indu tji matu yandja oruvara kovatwirisiwa Jesus u vara otjiṋa ho otja otjiṋa tji matji tjitwa kuye. (Mat. 25:34-40) Omuano umwe omunanḓengu tjinene mokuyandja oruvara kovatwirisiwa omokuzuvarisa ombuze yOuhona nokukaisapo ovandu ovahongewa otja Jesus pa rakiza. (Mat. 28:19, 20; Oviung. 10:42) Nombatero ‘yozonḓu zarwe’ ovatwirisiwa ve yenenisa otjiungura tjokuzuvarisa tji tji tjitwa mouye auhe nai. (Joh. 10:16) Indu tji u ri orupa rozonḓu zarwe nu tji u kara motjiungura tjokuzuvarisa aruhe, ove u raisa orusuvero rwoye kovatwirisiwa na ku Jesus wina.

13. Omomuano uṋe mu matu ungurisa erakiza ra Jesus ndi ri mu Lukas 16:9?

¹³ Eṱe wina tu kurisa oupanga wetu kuna Jehova na Jesus indu tji matu yandja otjimariva tjouharupu okuyandja oruvara koviungura mbi ve hongorera po. (Lesa Lukas 16:9.) Otjotjihorera, tu yandja ohambwarakaṋa koviungura vyouye auhe, nu oviyandjewa mbyo vi ungurisiwa okuvatera otjiungura tjokuzuvarisa kotuveze twokokure, okutunga Omatuwo wOmerikotameneno nomatuwo warwe nokuvatera imba mba wirwa i yomaumba. Eṱe wina matu yenene okuyandja oruyameto okuvatera ovihepwa vyombongo nokuvatera imba mbu matu tjiwa kutja mave hepa ombatero. (Omiano 19:17) Imbi oomiano mu matu yenene okuyandja oruvara kovatwirisiwa.

14. Otja kOvaefese 4:15, 16, otjikeṋa otjitjaine tji matu sokutjita okutunga oupanga kuna Jesus?

¹⁴ (4) Yandja oruvara kondyero ndja tuwa pewa i yotjira tja Jehova. Eṱe tu kara noupanga ouwa kuna Jesus otjotjiuru tjombongo indu tji matu ungura kumwe na imba mba zikwa okututjevera. (Lesa Ovaefese 4:15, 16.) Otjotjihorera, eṱe tu kondja pu matu yenene okuungurisa Etuwo rOmerikotameneno momuano omuwa. Kunao, ozombongo tjiva za wanekwa okurira ombongo imwe nu omaturiro mu ze zuvarisa ya rundururwa. Nu momuano mbwo otjira tja Jehova tja pwika ovimariva ovingi vyouharupu.  Mena rotjiṋa ho ovazuvarise tjiva aave sokuiririra ongaro yawo ombe ndjo. Ovazuvarise ovaṱakame mbo mape ya va karera mombongo kaaṋi oure woruveze orure nu mape ya va kara noupanga wopopezu ku novakambure ovakwao mozombongo nḓo. Posi yokutja nai owo ve ningirwa okukarera mozombongo pekepeke. Jesus tjiri u kara nondjoroka indu tji ma munu ovakarere ovaṱakame mbo tji mave yandja oruvara kondyero ndjo.

15. Oupanga wetu kuna Jesus moruyaveze ma u kurire ko vi?

¹⁵ Imba mba twirisiwa nombepo ondjapuke ve nomaundjiro wokukahupa puna Jesus nga aruhe meyuru nokukahonapara puna ye mOuhona wa Mukuru. Owo tjiri mave kamuna Jesus, mave kahungira kuna ye nokukara puna ye. (Joh. 14:2, 3) Imba mbe nomaundjiro wokukahupa kombanda yehi Jesus wina me vepe orusuvero. Nandarire kutja owo kave nokumuna Jesus, mave rire omapanga omawa kuna ye otja tji mave yorokere ehupo nda kwizikwa i Jehova na Jesus.—Jes. 9:6, 7.

16. Okurira epanga ra Jesus ma ku tu vatere vi?

¹⁶ Eṱe matu munu ozondaya ozengi, indu tji twa rire omapanga wa Jesus. Otjotjihorera, tu muna ouwa nombatero morusuvero rwe. Nu tu nomaundjiro wokukahupa nga aruhe. Tjinenenene oupanga wetu kuna Jesus u tjita kutja tu kare noupanga wopopezu kuna Ihe Jehova. Tjiri ondjingonekero onene okuisanewa omapanga wa Jesus.