1. Auhe wetu ma sokutjita vi?

HAPO ove mape ya ovanga okutupuka motjirarakaneno tji mo tjiwa nawa kutja kaupupu okutupuka mu tjo, tjinenenene tji wa vera poo tji morimunu okuurwa? Kako kamaa pe ya. Posi yokutja omuapostele Paulus wa tja, Ovakriste avehe vatjiri ve ri motjikara tjomararakaneno. (Hebr. 12:1) Nu atuhe kutja oweṱe omitanda poo twa kurupa, kutja tu nomasa poo katu nomasa morutu, matu sokupanḓera po nga komaandero indu tji matu vanga okumuna ondjambi Jehova ndje tu kwizikira.​—Mat. 24:13.

2. Otja ku 2 Timoteus 4:7, 8, ongwaye Paulus tjaa yenene okuhungira noupaturuke?

² Paulus aa yenene okuhungira noupaturuke mena rokutja wa yenena ‘okutoṋa motjikara tjotjirarakaneno.’ (Lesa 2 Timoteus 4:7, 8.) Paulus aa hungire ohunga notjikara tjomararakaneno tjiṋe?

3. Paulus aa hungire ohunga notjikara tjomararakaneno tjiṋe?

³ Povikando tjiva Paulus aa honga ovandu mokutjanga ohunga noviṋa mbyaavi ungurisiwa momanyando nga ri mu Grike otjikuru. (1 Kor. 9:25-27; 2 Tim. 2:5) Nu povikando aa sasaneke ehupo rOmukriste ku nokutupuka motjirarakaneno. (1 Kor. 9:24; Gal. 2:2; Fil. 2:16) Omundu u uta okutupuka “motjirarakaneno” hi indu tje riyandja omuini ku Jehova na papitisiwa. (1 Petr. 3:21) Eye u konda omukoka indu Jehova tje mu pe ondjambi yomuinyo waaruhe.​—Mat. 25:31-34, 46; 2 Tim. 4:8.

4. Morupa ndwi matu katara kuye?

⁴ Pe novikwaye tjiva mbya sana pokati kokutupuka otjikara  tjomuinyo omure nokuhupa otjOmukriste? Pe noviṋa tjiva mbya sana. Nga tu tare koviṋa vitatu mbi. Otjitenga, matu hepa okukongorera omirari omisemba, otjitjavari matu sokuyandja ombango kutja tu mane otjikara, nu otjitjatatu matu sokukayenda komurungu okutupuka otjikara nandarire kehi yomauzeu.

5. Omuhunga uṋe mbu matu sokukongorera nu omena ra tjike?

⁵ Kutja omutupuke ma mune ondjambi ye, eye ma sokukongorera omirari mbya tuwa po i omuhongore wotjitjitwa ho. Momuano otjingewo, eṱe tji matu vanga okukamuna ondjambi yomuinyo waaruhe matu sokukongorera omirari omisemba Omukriste mbi ma sokukongorera. (Oviung. 20:24; 1 Petr. 2:21) Posi yokutja, Satan na imba mbe mu kongorera ve vanga kutja tu kayende komurungu okukara “noruwano na wo.” (1 Petr. 4:4) Owo ve nyekerera omuano mbu tu hupa nokutja omuano wawo wokuhupa ombu ri omusemba nu u yeta onguturiro. Nungwari imbo kauatjiri.​—2 Petr. 2:19.

6. Ove we rihongo tjike okuza kotjihorera tja Brian?

⁶ Ovandu avehe mbe kongorera ouye wa Satan, moruveze rwopopezu mave munu kutja omuano wokuhupa mbo ka u ve etere ongutukiro nungwari u ve twara kutja ve rire ovakarere va Satan nokuhonaparerwa po i yozonḓuma zawo oveni. (Rom. 6:16) Tara kotjihorera tja Brian. Ovanene ve aave mu tunduuza okuhupa otja komirari vyOmbeibela. Posi yokutja indu tja ri omutanda, eye aa munu kutja ondjira ndjo kai nokumuyetera ondjoroka. Brian wa tya kutja maka hupa puna imba mbe kongorera ouye wa Satan. Eye wa tja: “Ami mba muna kutja ongutukiro ndjee vanga ya tjita kutja mbi iririre okuungurisa ovipurukise. Nu otja oruveze tjaaru kayenda ee ungurisa ovipurukise nomeva wamururu momuano omuvi nu ongaro yandje yomeritjindiro ya ri ombi. Oure wozombura kaaṋi mba uta okuungurisa ovipurukise vyarwe ovinaumba tjinene nu ya ri ouzeu kwami okupoka ku vyo. . . . Ami mba uta okurandisa ovipurukise okurihupisa omuini.” Korusenina Brian wa uta okuhupa otja komirari vya Jehova. Eye wa rundurura ehupo re nu a papitisiwa mombura ndji 2001. Eye nai u nondjoroka yatjiri nu u hupa otja komirari vya Jehova. *

7. Otja ku Mateus 7:13, 14, ozondjira zeṋe mbari nḓu matu sokutoorora?

⁷ Tjiri otjiṋa otjinanḓengu kweṱe okutoorora ondjira ndji ri osemba. Satan u vanga  kutja auhe wetu ma ise okutupuka mondjira okasina ndji “twara komuinyo,” nu tu tupuke mondjira indji ombaranga ovandu ovengi mouye mu ve tupuka. Ondjira ndjo ombupu nu mu ryangera ovandu ovengi. Posi yokutja i “twara kombandjarero.” (Lesa Mateus 7:13, 14.) Kutja tu kare mondjira osemba nokutja atu ha pukisiwa i imba mbe ha kongorere omirari vya Jehova, eṱe matu sokukara nongamburiro mu Jehova nokupuratena ku ye.

8. Ovikwaye omutupuke mbye tjita indu tja putara?

⁸ Ovatupuke motjirarakaneno tjomuinyo omure ve yandja ombango kondjira ndji ri komurungu wawo kokutja ave ha putara. Posi yokutja, owo mape ya wina ave putarisiwa i omutupuke warwe poo ave putara oveni. Indu tji va u, owo ve sekama nu ave kayenda komurungu okutupuka. Owo kave yandja ombango tjinene kutja ouṋe ngwe ve putarisa, nungwari ve yandja ombango kokukonda omukoka nondjambi ndji mave munu tji va taara.

9. Matu sokutjita vi indu tji twa putara?

⁹ Motjirarakaneno tjetu, eṱe wina mape ya atu putara povikando ovingi, mokutataiza moviṋa mbi matu hungire nokutjita. Poo ovatupuke ovakwetu mape ya ave tjiti ozondataiziro nḓu maze tu hihamisa. Iho tjiri matu sokuundjira ko. Atuhe kaweṱe ohomonena, nu tu tupuka mondjira okasina ndji twara komuinyo. Otjiperi kutja povikando tjiva auhe wetu ma putarisa omukwao. Paulus opazokutja eṱe mape ya atu kara “nombiri” novakwetu povikando tjiva. (Kol. 3:13) Posi yokutja atu yandja ombango ku imbi mbye tu putarisa, nungwari ngatu yandje ombango kondjambi ndji matu kamuna tji twa panḓere po. Indu tji twa putara, ngatu sekame nu tu kayende komurungu okutupuka. Indu tji twa pindike nu atu ha vanga okukayenda komurungu okukarera Jehova, eṱe kamaatu kondo omukoka nokumuna ondjambi yetu. Nu wina, mape ya atu tjiti kutja i rire ouzeu ku varwe okukarera Jehova nondjoroka poo okutupuka mondjira okasina ndji twara komuinyo.

10. Otjikwaye tji matu yenene okutjita kutja atu ha “putarisa” varwe?

¹⁰ Omuano warwe mu matu yenene ‘okuhinokuputarisa’  ovakambure ovakwetu omokuveyandjera okutjita oviṋa kombango yawo tje ri ohepero pendje nokuvanga kutja ve tjite oviṋa otja kombango yetu. (Rom. 14:13, 19-21; 1 Kor. 8:9, 13) Momuano mbo, eṱe katu ri tjimuna ovatupuke motjirarakaneno kaaṋi. Nandarire kutja ve tupuka pamwe motjirarakaneno, omutupuke auhe u kondja kutja ma taare nu ma mune ondjambi. Ovatupuke mbo ve ripurira ku wo oveni uriri. Kunao mape ya ave kondjo okuundura ovatupuke varwe kokutja ve kare komurungu. Posi yokutja eṱe katu kondjo okutaarasana. (Gal. 5:26; 6:4) Ondando yetu oyokukondja okuvatera ovengi okukonda omukoka puna eṱe nu ve mune ondjambi yomuinyo. Kunao tu kondja okuṱakamisa eronga ra Paulus rokutja, “Amu tara ku imbi ovyeṋu porwavyo, nungwari tareye ku imbi ovyovakweṋu wina.”​—Fil. 2:4.

11. Omutupuke motjirarakaneno u yandja ombango ku ye, nu omena ra tjike?

¹¹ Pendje nokuyandja ombango kondjira ndji mave tupuka mo, ovatupuke motjirarakaneno wina ve yandja ombango kokukonda omukoka. Nandarire tji ve hi nokumuna omukoka nomeho wawo, owo ve yenena okuripura nomuano mu mave kondo omukoka nokumuna ondjambi yawo. Indu tji mave ripurire kondjambi ndji mave kamuna ku ve tunduuza.

12. Jehova we tu kwizikira tjike?

¹² Jehova we tu kwizikira kutja me tupe omuinyo waaruhe, kutja omeyuru poo omoparadisa kombanda yehi, motjirarakaneno tji tu tupuka. Ombeibela i tu kahururira ondjambi ndji matu kamuna, kokutja tu yenene okuripurira komuano ehupo retu mu ma ri karira ewa. Tji matu ripurire koruyaveze Mukuru ndwe tu kwizikira, ku tu vatera kutja tu panḓere po.

13. Ovikwaye mbi tu navyo ovatupuke wotjikara mbi ve hina vyo?

¹³ Ovatupuke moGrike mbaave kara norupa motjirarakaneno aave sokutuurunga omauzeu tjimuna omihihamo nokuurwa. Nungwari, kutja ve tuurunge aatji zu komerikuturisiro worutu nomasa wawo oveni. Tjimuna ovatupuke mbo, eṱe wina tu pewa omahongero nge tu vatera kutja tu sokutupuka vi motjirarakaneno tjetu. Posi yokutja eṱe tu muna ouwa okukapita ovatupuke mbo. Jehova u tupa omasa ngu matu hepa. Indu tji twa ṱaṱere ku ye, eye we tu kwizikira okutupa omasa nokutuhonga wina.​—1 Petr. 5:10.

14. Omomuano uṋe 2 Ovakorinte 12:9, 10, mu ma ri tu vatere okutuurunga omauzeu?

¹⁴ Paulus aa sokutjinda omauzeu omengi. Kombanda yanao eye wa tatumisiwa nokuyambururwa i varwe nu povikando tjiva ee rimunu oungundipare nu aa sokutjinda “okuiya monyama.” (2 Kor. 12:7) Posi yokutja Paulus kaa munu kutja ma sokuisa okukarera Jehova mena romauzeu nga muna, nungwari eye wa muna kutja indwo ooruveze orusemba rokuṱaṱera ku Jehova. (Lesa 2 Ovakorinte 12:9, 10.) Mena rokutja Paulus wa ri noumune mbo Jehova we mu vatera okutuurunga omauzeu we ngo.

15. Matu munu ouwa wa ye tji twa horere ku Paulus?

¹⁵ Eṱe wina mape ya atu yambururwa poo atu tatumisiwa mena rongamburiro yetu. Nu wina mape ya atu kara nouveruke oungundi poo atu tjindi omauzeu. Posi yokutja tji twa horere ku Paulus omauzeu ngamwa ngu matu munu maye tjiti kutja tu mune ondjamo ya Jehova.

16. Mo yenene okutjita vi, nandarire kutja wa vera?

¹⁶ Hapo ove u kara momara poo u ri mokatemba? Ozongoro nomeho woye vya  ngundipara? Ndovazu pe rinao, ove mo yenene okukarera Jehova puna imba omitanda nu mbe ri ovaveruke? Tjiri ove mo yenene. Ovakurundu ovengi na imba mba vera ve tupuka motjirarakaneno tjomuinyo. Owo kamaave yenenisa otjiungura ho nomasa wawo oveni. Nungwari ve isa omasa ku Jehova mokupuratena ozombongarero zombongo okupitira mozongoze poo ouyendjezewa. Nu owo ve zuvarisa kozonganga, ozonesa na kovazamumwe vawo.

17. Jehova u noumune uṋe na imba mbe noungundipare morutu?

¹⁷ Indu tji u hi nokuyenena okuungurira Jehova otja pu mo vanga, o rihahiza nokuripura kutja ko nokuyenena okutuurunga omaandero wouye mbwi. Jehova we ku suvera mena rongamburiro yoye mu ye na koviṋa avihe mbi we mu ungurira morukapitaveze. Ove nai mo hepa ombatero ye tjinene, nu eye ke nokukwesa ko. (Eps. 9:10) Nungwari eye ma tumbuka popezu na ove. Tara ku imbi omukazendu omukambure ngwa kondja nouvere ouzeu mbya hungira. “Otja ouvere wandje pu u ririra ko ouvi, u tjita kutja irire ouzeu kwami okuzuvarisa ku varwe. Ami me tjiwa kutja ozongondjero zandje nandarire kutja ozonḓiṱi ze yorokisa Jehova nu iho tji ndji pa ondjoroka.” Indu tji wa u momuinyo zemburuka kutja ka ove erike. Ripura notjihorera tja Paulus nomambo we omatunduuze nga: “Nopu me zu okukara nenyando moungundi, . . . orondu tji mba ngundipara, indino owami omunamasa.”​—2 Kor. 12:10.

18. Ouzeu uṋe tjiva mbu ve muna?

¹⁸ Tjiva mbe ri motjirarakaneno tjomuinyo ve muna omatokero warwe. Owo ve tjinda omauzeu varwe ngu ve ha yenene okuyetjiwa poo okuyemuna. Otjotjihorera, owo ve tjinda ozombameno poo omerikendero omengi momuinyo. Ongwaye ovakarere va Jehova mbo tji ve muna ouzeu ounene mbo? Omena rokutja omundu tja teka poo tje ri mokatemba, irira oupupu kovandu okuvatera mena rokutja mave munu ouzeu womundu ngo. Posi yokutja, imba mbe nouzeu momuinyo poo mourizemburuka mape ya ave ha munika kutja ve nouzeu. Ovandu mape ya ave ha raisa orusuvero notjari tji mave hepa, posi yokutja ongaro yawo iri tjimwe na indji yomundu ngwa teka.

19. Matu rihongo tjike okuza kotjihorera tja Mefiboset?

¹⁹ Indu tji u noungundipare kaaṋi nu tji u muna kutja ovandu kave ku zuu nawa, otjihorera tja Mefiboset matji ku yanḓiparisa. (2 Sam. 4:4) Eye aa sokutjinda ouremane nu Ombara David ye mu pangura posyo. Ka ya ri ondjo ya Mefiboset kutja ma remane. Posi yokutja kayandjere ombango koviṋa ovivi mbya  tjitwa ku ye, nungwari wa tara ku imbi oviwa mehupo re. Eye wa ri nondangi koviṋa oviwa David mbye mu tjitira. (2 Sam. 9:6-10) Kunao David tje mu pangura posyo, eye wa tara kongaro aihe ndja yeta otjiṋa ho. Mefiboset kena pa yandjera kutja ondataiziro ya David i mu pindikise. Nu eye kayandjere ondjo ku Jehova ku imbi David mbya tjita. Mefiboset aa yandja ombango ku imbi mbyaa yenene okutjita kutja ma yandje oruvara kombara ndja zikwa i Jehova. (2 Sam. 16:1-4; 19:24-30) Jehova wa yandjera kutja otjihorera tje tji tjangwe mEmbo re kombwiro yetu.​—Rom. 15:4.

20. Omerikendero mape ya ye ṱuna vi kovandu tjiva, nu otjikwaye tji matji yenene okuvevatera?

²⁰ Mena rozombameno, ovakambure tjiva ve vanga okurikarera mena rokutira ovandu. Mape ya irira ouzeu ku wo okukara mokati kovandu ovengi, posi yokutja owo ve kayenda komurungu okukara pozombongarero zombongo, pomaworonganeno worukondwa nowotukondwa. Nu irira ouzeu okuhungira ku novandu mbu ve hi nokutjiwa posi yokutja owo ve hungira kuna varwe tji mave zuvarisa. Tji u ri mongaro otja indjo tjiwa kutja ka ove erike. Ovandu ovengi ve ri mongaro otjingeyo. Zemburuka kutja Jehova u nondjoroka nozongondjero zoye azehe nḓu u tjita. Okuhinokurihahiza koye ku raisa kutja Eye u ku sera ondaya nu u kupa omasa ngu mo hepa. * (Fil. 4:6, 7; 1 Petr. 5:7) Indu tji u karera Jehova kehi youngundipare kaaṋi, tjiwa kutja u mu yorokisa.

21. Atuhe matu yenene okutjita vi nombatero ya Jehova?

²¹ Pe nombangu pokati kotjikara tji matu tjiwa na ihi Paulus tjaa hungirire ko. Moruveze rwa Paulus, omundu umwe uriri ongwaa taara ondjambi motjikara. Nungwari, omundu auhe ngwa ṱakama nga komaandero ma munu ondjambi yomuinyo waaruhe. (Joh. 3:16) Nu ovatupuke motjikara ve sokukara notutu otukutuke notuveruke, kutja ve taare. Posi yokutja, ovengi vetu ve noungundipare morutu nungwari ngamba ve panḓera. (2 Kor. 4:16) Nombatero ya Jehova eṱe matu tupuka otjikara ho nga komaandero.