1-2. Jesus aa hee tjike indu tja hungira omambo nge ri mu Johanes 4:35, 36?

JESUS aa tuurunga momahi womakunino tjaaye utu okuhapa. (Joh. 4:3-6) Aape sokukapita omieze vine omakondero ngunda aye hiye ya. Mape ya Jesus wa hungira otjiṋa rumwe tji tjari otjikumise indu tja tja: “Tareye nawa komahi womakunino; ovikunwa vya hapa nu vi ri pokukondwa!” (Lesa Johanes 4:35, 36.) Hapo eye aa hee tjike?

² Mape ya Jesus aa hee okuwonga ovandu nungwari kavikunwa. Ngatu tare kutja ousupi kombunda yanao kwa tjitwa tjike. Nandarire kutja Ovajuda kaave wana nOvasamaria, Jesus wa zuvarisa komukazendu Omusamaria neye wa puratena. Otjiperi kutja ngunda Jesus ama hungire omahi womakunino ngeri “pokukondwa!” otjimbumba tjOvasamaria mba zuva ohunga na Jesus momukazendu ngo ve ya kuye okuyekurihonga ovingi. (Joh. 4:9, 39-42) Omukonḓonone umwe wOmbeibela wa tja nai ohunga notjitjitwa hi: “Onḓero ndja raisiwa i yovandu mbo . . . ya ri tjimuna ovikunwa mbi ri pokukondwa.”

3. Indu tji mo vara ovandu otja Jesus tjeeve vara mo rire vi omuzuvarise omusemba?

³ Hapo u raisa ongaro iṋe kovandu ku u zuvarisa ko ombuze ombwa? Hapo ove u ve vara otja ovikunwa mbi ri pokukondwa? Ndovazu peri nao, ove mo tjiti oviṋa vitatu mbi. Rutenga ove mo zuvarisa noupatje. Oruveze rwomakondero rwa rire orusupi notji pe hina oruveze rukwao. Otjitjavari, ove mo kara nondjoroka indu tji mo munu ovandu tji mave puratene kombuze ombwa. Ombeibela ma i tja: ‘Ovandu otji ve yorokera omakondero.’ (Jes. 9:3) Nu otjitjatatu ove mo utu okumuna omundu auhe otjomundu ngu ma yenene okurira omuhongewa wa Jesus, kunao ove mo rundurura omuano woye wokuzuvarisa kutja u nane ombango yawo.

4. Matu rihongo tjike okuza komuapostele Paulus morupa ndwi?

 ⁴ Tjiva vovahongewa va Jesus mape ya aave ripura kutja Ovasamaria kamaave ka rira ovahongewa va Jesus, posi yokutja Jesus kee ripura nao. Nungwari eye eeve vara otja mbu mave yenene okurira ovahongewa ve. Eṱe wina matu hepa okuvara ovandu mbe ri morukondwa mu tu zuvarisa otja mbu mave yenene okurira ovahongewa va Kristus. Omuapostele Paulus wa twapo otjihorera otjiwa kweṱe tji twa sokukongorera. Matu rihongo tjike okuza kuye? Morupa ndwi eṱe matu ka hungirira (1) komuano eye me rihonga ozongamburiro za imba eye kaa zuvarisa, (2) okutjiwa ozonḓero zawo, (3) nokuvevara otja mbu mave yenene okurira ovahongewa va Jesus.

5. Ongwaye Paulus tjaa yenene okutjiwa oumune wa imba mbaave puratene kuye mondjuwo yomawongarero wombongo?

⁵ Paulus potuingi aa zuvarisa mondjuwo yomawongarero wombongo yOvajuda. Otjotjihorera mondjuwo yomawongarero wombongo ndja ri mOtesalonika, ‘mOmasabata yetatu okukongorerasana eye aa kapatasana Omatjangwa nOvajuda.’ (Oviung. 17:1, 2) Paulus mape ya wa ri nongamburiro mu ye omuini indu tjaa zuvarisa mondjuwo yomawongarero wombongo. Eye we kurisiwa otjOmujuda. (Oviung. 26:4, 5) Paulus wa ri omuzamumwe wOvajuda kunao otjaa yenene okuzuvarisa kuwo noupatje.​—Fil. 3:4, 5.

6. Ovandu mba mba ri moAtene potuveze twomarandero aave panguka vi ku imba Paulus kaa zuvarisa mondjuwo yomawongarero wombongo?

⁶ Kombunda ya indu Paulus tja ṋiṋikiziwa i yovatatumise okutaura okuza moTesalonika na Berea eye wa ka vaza koAtene. Nu rukwao, “Eye otja kara nombatasaneno mondjuwo yomawongarero wombongo kuna Ovajuda nOvagrike, mba ri nondira ku Ndjambi.” (Oviung. 17:17) Posi yokutja Paulus tjaa zuvarisa potuveze twomarandero ovapuratene ve, va pangukire ku imba mba ri mondjuwo yomawongarero wombongo. Mokati kaimba mbaave puratene kuye mwa ri ozonongo zouye na varwe ovanavisenginina mbaave munu kutja ombuze ya Paulus “omahongero omape.” Owo va tja nai kuye: “Oviṋa tjiva mbi matu ku zuu amo hungire, eṱe katu vi i.”​—Oviung. 17:18-20.

7. Otja kOviungura 17:22, 23, Paulus wa rundurura vi omuano we wokuhonga?

⁷ Lesa Oviungura 17:22, 23. Paulus kena pa zuvarisa ombuze ye kovanavisenginina moAtene momuano otjinge wo mbwi mbwa zuvarisa kOvajuda mondjuwo yomawongarero wombongo. Paulus mape ya ee ripurire ku imbi ovandu moAtene maave kambura mo. Eye wa konḓonona nawa avihe mbya ri ongondoroka naye na tjiwa avihe ohunga nozongamburiro zawo. Indu Paulus tjaa hongo ovandu mba ouatjiri okuza  mOmatjangwa, eye wa uta noviṋa mbi mavi i kumwe nomatjangwa nu mbi mave yenene okuyakura. Omukonḓonone umwe wOmbeibela wa tja: “Eye otjOmujuda Omukriste wa muna kutja Ovagrike ovahaidena kaave rikotamene ku Mukuru watjiri wOvajuda nOvakriste, posi yokutja eye aa kondjo okuraisa kutja Mukuru ngwi ngu ma hungirire ko mouatjiri ka Mukuru ngu hi nokutjiukwa i yovaAtene.” Kunao Paulus wa ri nonḓero okurundurura omuano we wokuhonga. Eye wa raera ovaAtene kutja ombuze ye yaza “Ku Ndjambi ngu he iwe,” ingwi ngu ve kondja okurikotamena ko. Nandarire kutja ovanavisenginina mbo ka va ri nondjiviro yOmatjangwa, Paulus ke ripurire kutja owo kamaave ka rira Ovakriste. Moruveze rwa nao eye eeve vara otjovikunwa mbya hapa mbi ri pokukondwa neye wa rundurura omuano we mbwaa hongo ombuze ombwa.

8. (a) Otjikeṋa tji matji yenene okukuvatera okutjiwa oviṋa ovandu momaturiro mu u zuvarisa mu ve kambura? (b) Indu omundu tja tja ami mbi nongamburiro yandje omuini hapo mape ya o tjiti vi?

⁸ Kara neho etwe tjimuna Paulus. Tara koviṋa mbi mavi ku vatere okutjiwa kutja ovandu momaturiro mu u zuvarisa ve kambura mu ye. Hapo omunionganda wa hareka vi ondjuwo ye? Hapo omuano mbwe rizara, ena re, nandarire omuano mbwe hungira vi raisa kutja eye uri kongamburiro iṋe? Porumwe we ku raere kutja u nongamburiro ye omuini. Indu iho tji tja tjitwa komukandjira wapeke wena Flutura, eye wa tja: “Ami hi yere okuṋiṋikiza ongamburiro yandje move, nungwari mbe ya okuhungira kuna ove ohunga nepu ndi . . . ”

9. Ovikwaye mbi moyenene okuungurisa ku novandu mbe kambura mu Mukuru?

⁹ Omapu yeṋe ngu mo yenene okuhungira ku novandu mbe kambura mu Mukuru? Kondja okutara koviṋa oumune weṋu mu mawii kumwe. Eye mape ya u rikotamena ku Mukuru umwe uriri, mape ya u kambura kutja Jesus onguri omukuture wovandu, poo rumwe u kambura kutja tu hupa mouye ourunde mbwi mbu ma u yanda tjimanga. Ungurisa omapu ngu mu noumune umwe okuzuvarisa ombuze yOmbeibela ku ye momuano mbu mau mu nana ombango.

10. Otjikeṋa tji matu sokukondja okutjita nu omena raye?

¹⁰ Tjiwa kutja ovandu mape ya ave ha kara nongamburiro moviṋa avihe ongamburiro yawo mbi i honga. Nandarire tji wa zu nokutjiwa kutja omundu ngo uri kongamburiro iṋe kondja okutjiwa kutja eye omuini u kambura mu ye. Omukandjira wapeke wena David moAustralia wa tja: “Ovandu ovengi nai ve waneka omahongero wovandu ku nozongamburiro zawo.” Donalta ngu ri moAlbania wa tja: “Tjiva mbu tu hakaena ve tja ve ri kongamburiro kaaṋi, nu kombunda ve ka raisa kutja owo kave kambura mu Mukuru oparukaze.” Nu omurumendu omukambure omuhindwa ngu ri moArgentina wa tja, ovandu tjiva ve kambura mu Mukuru vetatu umwe, posi ya mape ya ave ha kambura kutja Ihe nOmuna nombepo  ondjapuke o Mukuru umwe. “Indu tji mba zemburuka kutja omundu ngu twa hungire kumwe mape ya aha kambura oviṋa avihe ongamburiro ye mbi i honga, irira oupupu kwami okuhungirira koviṋa oumune wetu mu mawii kumwe.” Kunao kondja okutjiwa oviṋa ovandu mu ve kambura tjiri. Tjazumba tjimuna Paulus otji mo yenene okurira ‘oviṋa avihe Ku avehe.’​—1 Kor. 9:19-23.

11. Otja kOviungura 14:14-17, Paulus wa nana vi ombango yovandu mba tura moListra okupuratena kombuze ye?

¹¹ Lesa Oviungura 14:14-17. Paulus wa muna imbi mbyaavi nana ombango yovapuratene ve, tjazumba arire ka rundururire omahongero we. Otjotjihorera otjimbumba eye kaa hungire moListra tjari nondjiviro onḓiṱi ohunga nOmatjangwa. Kunao Paulus aa hungire momuano owo maave yenene okuzuva. Eye wa hungirira komakondero omawa wovikunwa nomuano mu mave yenene okuyorokera ehupo. Eye aa ungurisa omambo novihorera ovapuratene ve mbyaave yenene okuzuva nawa.

12. Mo yenene vi okutjiwa oviṋa mbi nana ombango yomundu kokutja u rundururire ko omahongero woye?

¹² Tjiwa ozonḓero zovandu momaturiro mu u zuvarisa kokutja u rundurure omuano woye wokuzuvarisa. Mo yenene okutjiwa vi oviṋa mbi nana ombango yomundu indu tji mo yendere omaturiro we? Zemburuka okukara neho etwe. Ngatu tje eye ma ungura motjikunino, ma lese embo, ma ungura otjihauto poo ma ungura ngamwa otjiungura tjarwe. Tji mape yenene utira ehungi roye koviṋa eye mbi ma ungura. (Joh. 4:7) Nandarire ozombanda omundu nḓa zara ze hungira ovingi ohunga naye, porumwe ze raisa kutja omungehoko, u ungura tjike, poo otjira tjiṋe tjomanyando tja suvera. Gustavo wa tja: “Ami mba uta ehungi ku nomurumendu wozombura 19 ngwa ri nombanda yokotjari ku kwa perenderwe omuimbure omutjiukwa. Ami mbe mu pura ohunga nombanda ndjo nu eye we ndji raera kutja ongwaye tja suvera omuimbure ngo. Nu ehungi ra kaeta omerihongero wOmbeibela neye nai iumwe wovakambure ovakwetu.”

13. Hapo mo yenene vi okuyandja omahongero wOmbeibela momuano mbu ma u nana ombango?

¹³ Indu tji wa utu omerihongero wOmbeibela  ku nomundu tjita kutja ye mu nane ombango, mu raisira omuano omerihongero nga mu ma ye mu vatere. (Joh. 4:13-15) Otjotjihorera omukazendu omukambure wena Poppy, wa ningirwa okuhita mondjuwo yomukazendu ngwaa raisa ombango. Indu Poppy tja muna osertifikata kekuma rondjuwo ndjaai raisa kutja omukazendu ngwi wa ri omiṱiri koskole yomahongero wokombanda, eye wa tja, eṱe wina tu honga ovandu okupitira mOmbeibela na pozombongarero zetu. Omukazendu ngwi wa yakura omahongero wOmbeibela, wa ya kombongarero yombongo eyuva nda kongorera ko na kakara pomaworonganeno worukondwa kombunda ya nao. Nu eye wa papitisiwa kombunda yombura imwe. Ripura omuini kutja, ‘hapo ovandu mbu mbi ka varura ve raisa ombango mu ye? Hapo me yenene okuhandjaura omerihongero wetu wOmbeibela momuano mbu ma u nana ombango yawo?’

14. Hapo ove mo yenene vi okurundurura omahongero wOmbeibela otja komuhongwa auhe?

¹⁴ Indu tji wa utu okuhonga omundu Ombeibela, rirongerisa nawa korupa aruhe ndu ma mu ka konḓonona amo ripurire kozonḓero ze azehe. Indu tji mo rirongerisa ripurira komatjangwa ngu mo ka lesa, kozovidio nḓu mo ka raisa na koviperendero mbi mo ka ungurisa okukaseturura ouatjiri wOmbeibela. Ripura omuini kutja, ‘Otjikeṋa tji matji nana ombango nu tji matji ṱunu komutima womuhongwa ngo?’ (Omiano 16:23) Omukazendu moAlbania, ngwee rihongo ku nomukandjira wena Flora wa tja nai, “Ami hi nokuyakura omahongero wokutja ku nombendukiro.” Flora kena pa ṋiṋikiza omukazendu ngo okuyakura omahongero ngo tjimanga. Flora wa tja, “ami ee munu kutja eye rutenga ma sokutjiwa Mukuru ngwa kwizika ombendukiro ngunda ehiya kambura kutja ku nombendukiro.” Okuza koruveze ndo pomahongero aehe, Flora aa ṋunisa orusuvero rwa Jehova, ounongo nomasa we. Kombunda omuhongwa we wa uta okukara nongamburiro mombendukiro. Eye nai Omuhongonone wa Jehova omupyuke.

15. Otja kOviungura 17:16-18, ongaro iṋe ombi Paulus ndja muna moGrike otjikuru nongwaye tja kayenda komurungu okuzuvarisa kovandu moAtene?

¹⁵ Lesa Oviungura 17:16-18. Nandarire kutja ovandu moAtene aave rikotamene koomukuru wovisenginina, aave tjiti oruvakiro nokukambura mounongo wovandu mbe ha tjiwa Mukuru, Paulus kena pa isa okuzuvarisa kuwo nandarire kutja aave mu yamburura. Paulus omuini wa rira Omukriste nandarire kutja ‘aa teturura, aa tatumisa nokuyamburura’ ovakarere va Mukuru. (1 Tim. 1:13) Tjimuna Jesus tjaa kambura kutja Paulus ma yenene okurira omuhongewa we, Paulus otjaa kambura kutja ovandu moAtene mave yenene okurira ovahongewa va Jesus. Nongamburiro ye ndjo ka yari omungandjo.​—Oviung. 9:13-15; 17:34.

16-17. Otjikeṋa tji matji raisa kutja ovandu avehe mave yenene okurira ovahongewa va Kristus? Yandja otjihorera.

¹⁶ Meserewondo etenga ovandu avehe va rira ovahongewa va Jesus. Indu Paulus tja tjanga orutuu kOvakriste mba turire motjihuro hi oKorinte mehi ra Grike, eye wa tja ovakambure tjiva mombongo ndjo va ri ovakatuke voveta nu aave hupu ehupo ehakohoke. Nu wa tja: “Nu tjiva veṋu wina va ri ohamukwao novandu mba. Nungwari mwa kohororwa komauvi.” (1 Kor. 6:9-11) Hapo ove otjomuna kutja ovandu mbo mave yenene okurundurura ongaro yawo nokurira ovahongewa va Jesus?

¹⁷ Ndino, ovandu ovengi ve nonḓero yokutjita omarundurukiro ngu ma ye heperwa po kutja ve rire ovahongewa va Jesus. Otjotjihorera, moAustralia, omukandjira wapeke wena Yukina we rihonga kutja ovandu avehe mave yenene okuyakura ombuze yOmbeibela. Eyuva rimwe poruveze romarandero eye wa muna omukazendu omutanda ngwa ri noutetuu morutu nu ngwa zarere ozombanda ozohara. Yukina wa tja: “Ami rutenga ee ivaiva, nu kombunda mba uta  okuhungira kuna ye. Ami mba muna kutja eye wa ri nonḓero mOmbeibela nu outetuu we tjiva wa ri nomazeva okuza kOmapsalme.” Omukazendu ngo wa uta okurihonga Ombeibela nokuya kozombongarero zombongo. *

18. Ongwaye tji tu ha sokupangura ovandu?

¹⁸ Hapo Jesus aa munu kutja omahi womakunino ye ri pokukondwa mena rokutja aa undjire ko ovandu ovengi okumukongorera? Kako, ka tjiperi. Omatjangwa ya hunganeka kutja ovandu ovaṱiṱi uriri mbu mave kambura mu ye. (Joh. 12:37, 38) Nu Jesus aa yenene okumuna imbi mbiri momitima vyovandu. (Mat. 9:4) Nandarire kutja aa yandja ombango kovandu ovaṱiṱi mbaave kambura muye, eye aa zuvarisa noupyuke kovandu avehe. Eṱe katu yenene okutjiwa mbi ri momitima vyovandu kunao otji tu ha sokupangura ovandu mbe ri momaturiro mu tu zuvarisa poo omundu kourike we. Nungwari, vara ovandu otja mbu mave yenene okurira ovahongewa va Jesus. Marc, omuhindwa ngwa tura mo Burkina Faso wa tja: “Ovandu mbee munu kutja mave kayenda komurungu okurihonga Ombeibela potuingi aave isa okurihonga. Posi yokutja ovandu mbee nangarasi mave isa okurihonga ombaave kayenda komurungu. Kunao ami mbe rihonga kutja ma rire nawa okuyandjera ombepo ya Jehova okutuhongorera.”

19. Ovandu mbe ri momaturiro mu tu zuvarisira matu sokuvevara vi?

¹⁹ Otjikando otjitenga mape ya o munu kutja ovandu ovengi mbe ri momaturiro mu u zuvarisira kave ri tjimuna ovikunwa mbi ri pokukondwa. Posi yokutja zemburuka imbi Jesus mbya hungira kovahongewa ve. Omahi womakunino ya hapa nowo ye ri pokukondwa. Ovandu ve yenena okurunduruka nu mave yenene okurira ovahongewa va Kristus. Jehova u kambura kutja ovandu mbe ri momaturiro mu tu zuvarisira mave yenene okurira ovahongewa va Jesus nu u ve vara otja “ovihuze.” (Hag. 2:7) Indu tji matu vara ovandu otja Jehova na Jesus, matu yenene okurihonga ohunga nozongaro zawo noviṋa mbi ve tjatera. Eṱe katu nokuvevara otja ovandu vozonganda, nungwari matu yenene okuvevara otja mbu mave yenene okurira ovakambure ovakwetu.