1. Ovikwaye Jehova mbye muna movakarere ve?

JEHOVA MUKURU “u nonyuṋe motjiwaṋa tje.” (Eps. 149:4) Ihi tjiri tji tu pa ondjoroka. Jehova u muna ovikaṋena vyetu oviwa, eye u muna kutja matu yenene okurira ovandu ovawa nu u tu vatera kutja tu rire omapanga we. Indu tji twa karerere ovaṱakame ku ye, eye ma tumbuka popezu na eṱe nga aruhe.—Joh. 6:44.

2. Ongwaye tje ri ouzeu ku tjiva okumuna kutja Jehova we ve suvera?

² Tjiva mape ya ave tja: ‘Mbi tjiwa kutja Jehova wa suvera ovandu ve otjotjimbumba, posi yokutja me yenene vi okutjiwa kutja Jehova we ndji suvera kourike wandje?’ Otjikwaye tji mape ya atji tjiti kutja omundu ma pure epuriro ndo? Oksana, * ngwa munine ouzeu indu tja ri omuṱiṱi, wa tja: “Ami mba ri nondjoroka indu tji mba papitisiwa na indu tji mba rira omukandjira. Posi yokutja kombunda yozombura 15, ami mba uta okuzemburuka oviṋa ovivi mbya tjitwa kwami indu tji mba ri omuṱiṱi. Ami mba uta okuripura kutja Jehova kaari nonyuṋe mwami rukwao, nokutja kawami omunanḓengu okusuverwa i ye.” Omukazendu omukandjira wena Yua, ngwa munine ouzeu indu tja ri omuṱiṱi wa tja: “Ami mba yandja omuinyo wandje ku Jehova mena rokutja ee vanga okuyorokisa omutima we. Posi yokutja ee munu kutja eye kamaa roro okundjisuvera.”

3. Matu kahungirira kuye morupa ndwi?

³ Tjimuna ovakazendu vevari ovakambure mba tamunwa, ove wa suvera Jehova tjinene posi yokutja ngahino u kara nomakeyakeyero kutja eye we ku suvera. Ongwaye tji mo sokukara nongamburiro yokutja eye tjiri u rikendera kove? Ovikwaye mbi mavi ku vatere indu tji u kara nomeripura wokutja Jehova kee ku suvera? Ngatu katare komaziriro womapuriro ngo.

4. Ongwaye tje ri oumba okukeyakeya kutja Jehova we tu suvera?

⁴ Indu tji tu nongamburiro kutja Jehova we tu suvera, eṱe matu kondjo pu matu yenene okumukarera nandarire indu tje ri ouzeu okutjita nao. Posi yokutja, indu tji matu keyakeya kutja Mukuru u rikendera kweṱe, eṱe tu rira ‘ovingundi.’ (Omiano 24:10) Nu tji matu ripura kutja Mukuru kee tu suvera, kamaatu yenene okurwisa Satan.—Ef. 6:16.

5. Ovikwaye mbya tjitwa kovakambure tjiva mbaave munu kutja Mukuru kee ve suvera?

⁵ Ovakambure tjiva va uta okuripura kutja Jehova kee ve suvera nu ke rikendere ku wo. Kunao, va ngundipara mongamburiro. Omunene wombongo wena James wa tja: “Ami ee karere poBetel nokuyorokera otjiungura tjokuzuvarisa mombongo yeraka rarwe. Posi yokutja povikando ee ripura kutja, hapo Jehova u nondjoroka na imbi mbi mbi mu ungurira. Nu nandarire oruveze rumwe ee ripura kutja, hapo Jehova aa puratene kozongumbiro zandje.” Omukazendu omukambure wena Eva, wina ngu karera Jehova oruveze aruhe, wa tja: “Ami mbe rihonga kutja kanawa okuripura kutja Jehova kee tu suvera, mena rokutja ku ṱuna komerikotameneno wetu ku ye. Nu ku tjita kutja tu ise okuungurira Jehova nokupandjara ondjoroka yokumukarera.” Omunene wombongo wena Michael ngu ri omukandjira woruveze aruhe, wa tja: “Indu tji u muna kutja Mukuru ke rikendere kove, ihi tji tjita kutja u kare kokure naye.”

6. Hapo matu sokutjita vi indu tji twa utu okuripura kutja Mukuru kee tu suvera?

⁶ Ovihorera mbyo mavi raisa omuano ongamburiro yetu mu mai yenene okuṱunwa momuano omuvi, indu tji twa utu okuripura kutja Mukuru kee tu suvera. Posi yokutja, hapo matu sokutjita vi indu tji tu nomeripura otja ingo? Eṱe matu sokuhakahana okuyenakaura. Ningira Jehova kutja me ku pe ‘ohange ya Ndjambi ndji ṱakamisa omitima vyetu nouripura wetu’ kokutja i ku vatere okurundurura “omeripura” omavi ngo. (Eps. 139:23; Fil. 4:6, 7) Nu zemburuka kutja, kaove erike ngu nomeripura otja ingo. Ovakambure ovaṱakame varwe, wina ve kondja nomeripura omavi. Nandarire ovakarere va Jehova worukapitaveze aave sokurwisa omeripura ngo. Ngatu tare ku imbi mbi matu yenene okurihonga okuza kotjihorera tjomuapostele Paulus.

7. Omauzeu yeṋe Paulus nga muna?

⁷ Hapo ove povikando tjiva u muna kutja u nomerizirira omengi, nu ouzeu okuyeyenenisa? Indu tji pe ri nao, ove mo yenene okuzuva nawa ongaro Paulus ma ri. Eye kee rikendere ombongo imwe uriri, nungwari ee rikendere “ozombongo azehe.” (2 Kor. 11:23-28) Hapo ove u nomutjise kaaṋi mbu tjita kutja o ha kara nondjoroka? Paulus wa ri ‘nokuiya monyama,’ okuiya ndi mape ya ra ri omutjise kaaṋi nu eye mbwa vanga kutja u zepo. (2 Kor. 12:7-10) Hapo ove povikando u wa momuinyo mena rozondataiziro nḓu u tjita? Paulus wina wa ri mongaro otja indjo. Eye we ri isana omuini kutja “owami omundu ngu mba ningisa ondjenda,” mena rokutja kaari oupupu ku ye aruhe okutjita imbi mbi ri ovisemba.—Rom. 7:21-24.

8. Otjikwaye tji tja vatera Paulus okutjinda omauzeu we?

⁸ Nandarire kutja Paulus wa ri kehi yomauzeu aehe ngo, eye wa kayenda komurungu okukarera Jehova. Otjikwaye tji tje mu pa omasa okutjita nao? Nandarire kutja aa tjiwa kutja kahomonena, eye wa ri nongamburiro okuura motjisuta tjonguturiro. Nu wina aa tjiwa omakwizikiro Jesus nga tjita wokutja, ‘auhe ngu ma kambura mu Ye ma . . . kara nomuinyo waaruhe.’ (Joh. 3:16; Rom. 6:23) Otjingaperi kutja Paulus wa ri umwe wa imba mba ri nongamburiro motjisuta tjonguturiro. Eye aa tjiwa kutja Jehova u ri kamwaha okuisira omundu ngamwa auhe, nandarire imba mba tjiti ouvi ounene nave ritanaura.—Eps. 86:5.

9. Matu rihongo tjike okuza komambo wa Paulus nge ri mOvagalate 2:20?

⁹ Paulus wina wa ri nongamburiro kutja Mukuru we mu suvera nomasa, mena rokutja aa tjiwa kutja eye wa hinda Jesus okumuṱira. (Lesa Ovagalate 2:20.) Tara komambo omayanḓiparise eye nga hungira komaandero wezeva ndo. Paulus wa tja: ‘Omuna wa Ndjambi, we ndji suverere nu we riyandjera ami omuinyo we.’ Paulus kaa munu kutja eye omundu omuvi nokutja Mukuru kamaa yenene okumusuvera. Kunao, eye kaari nomeripura wokutja, ‘Me tjiwa kutja Jehova wa suvera ovakambure ovakwetu, posi yokutja eye kamaa yenene okundjisuvera.’ Paulus wa zemburukisa Ovakriste moRoma kutja, ‘Kristus we tu ṱira ngunda atu ri ovanauvi!’ (Rom. 5:8) Tjiri kape notjiṋa tji matji tjaere Jehova okutusuvera.

10. Matu rihongo tjike okuza kOvaroma 8:38, 39?

 ¹⁰ Lesa Ovaroma 8:38, 39. Paulus aa tjiwa kutja Mukuru we tu suvera tjinene. Eye wa tjanga kutja kape notjiṋa “tji matji yenene okutupora korusuvero rwa Ndjambi.” Paulus aa tjiwa kutja Jehova wa raisa omuretima kotjiwaṋa tjOvaisrael. Eye wina aa tjiwa omuano Jehova me mu raisira otjari. Momambo warwe Paulus aa tja, ‘Tjinangara Jehova wa hinda Omuna we okuyekuṱira ami, okutja oukahu kutja eye we ndji suvera.’—Rom. 8:32.    

11. Ongwaye Paulus tja ri nongamburiro kutja Mukuru we mu suvera, nandarire kutja wa tjita oviṋa ovivi mbya tamunwa mu 1 Timoteus 1:12-15?

¹¹ Lesa 1 Timoteus 1:12-15. Mape ya ya ri ouzeu ku Paulus indu tjee ripura ohunga noviṋa mbya tjita ngunda e hi ya rira Omukriste. Kunao, katjikumise indu tje ri isana kutja omunauvi “tjinene pu avehe.” Ngunda Paulus e he rihonga ouatjiri eye aa tatumisa Ovakriste movihuro pekepeke, okupatera tjiva motjavakamburwa nokuyandja oruvara kotjombanguriro kutja ve zepewe. (Oviung. 26:10, 11) Ripura uriri kutja Paulus atja kara mongaro iṋe, indu tja hakaene ku nOmukriste omutanda wovanene mba zepewa mena re. Paulus wa ri nomuhihamwatima ku imbi mbya tjita, posi yokutja aa tjiwa kutja kamaa rundurura imbi mbya tjitwa. Eye aa tjiwa kutja Kristus we mu ṱira, nu nongamburiro wa tja: “Motjari tja Ndjambi ami mba tjitwa otja tjinga ambi ri nai.” (1 Kor. 15:3, 10) Hapo matu rihongo tjike? Mo sokukara nongamburiro kutja Kristus wa ṱira ove, nu wa tjita kutja u yenene okukara noupanga wopopezu kuna Jehova. (Oviung. 3:19) Oviṋa ovinanḓengu ku Mukuru ovyombi mbi matu tjiti nai na moruyaveze, nungwari kazondataiziro nḓu twa tjita morukapitaveze, kutja twa ri Ovahongonone va Jehova oruveze ndo poo indee.—Jes. 1:18.

12. Omomuano uṋe omambo nge ri mu 1 Johanes 3:19, 20 mu maye tu vatere indu tji matu rimunu okuhinonḓengu poo okurimuna kutja kamaatu suverwa?

 ¹² Indu tji mo ripura ohunga nokutja Jesus wa ṱira omauvi woye, ove mape ya omunu kutja, ‘Ami tjiri hi ya pwira otjiyandjewa ho.’ Ongwaye tji mape ya omunu nao? Omutima wetu mape ya au tu pukisa mokutjita kutja tu rimune okuhinonḓengu poo okurimuna kutja kamaatu suverwa. (Lesa 1 Johanes 3:19, 20.) Indu tji twa utu okuripura nao, eṱe matu sokuzemburuka kutja “Ndjambi omunene pomeritjiviro wetu womorukoro.” Nandarire tji matu munu kutja Jehova kee tu suvera poo ke nokutuisira, Tate wetu womeyuru ngunda we tu suvera nu me tu isire. Eṱe matu sokukara nongamburiro kutja Jehova we tu suvera. Kutja tu tjite nao, matu hepa okukonḓonona Embo re aruhe, okukumba ku ye aruhe nokutjita oruveze okukara pu novakarere ve ovaṱakame. Ongwaye tje ri ounanḓengu okutjita oviṋa mbyo?

13. Omomiano viṋe okukonḓonona Embo ra Mukuru mu ma ri tu vatere? (Wina lesa okaongo nga “ Omuano Embo ra Mukuru mu re ve vatera.”)

¹³ Konḓonona Embo ra Mukuru eyuva arihe. Tji wa tjiti nao ove mo rihongo ohunga novikaṋena vya Jehova ovingi oviwa. Nu maku ku vatere okutjiwa kutja we ku suvera. Okuripurira ko oukoto kEmbo ra Mukuru eyuva arihe, maku ku vatere okukara nomeripura omawa, “nokukuna ongarero osemba” mouripura na momutima woye. (2 Tim. 3:16) Omunene wombongo wena Kevin ngwee rimunu okuhinonḓengu, wa tja: “Okulesa nokuripurira ko oukoto kEpsalme 103 kwe ndji vatera kutja mbi rundurure omuano wandje wokuripura, nokutjiwa kutja Jehova u noumune uṋe ohunga na ami.” Eva, ngwa tamunwa rukuru, wa tja: “Komaandero weyuva ami mbi ripura ohunga na imbi mbi ri ovinanḓengu ku Jehova. Okutjita nao, ku ndji pa ohange momuinyo nokukurisa ongamburiro yandje.”

14. Okukumba maku tu vatere vi?

¹⁴ Kumba nokuhaisa ko. (1 Tes. 5:17) Indu tji mo vanga okutjita oupanga ku nomundu, ove mo sokuhungira kuna ye aruhe nokumuraera oumune woye. Eṱe wina matu sokutjita nao kuna Jehova. Indu tji matu raere Jehova oumune nozongendo zetu, eṱe tu raisa kutja tu nongamburiro mu ye, nu matu tjiwa kutja eye we tu suvera. (Eps. 94:17-19; 1 Joh. 5:14, 15) Yua, ngwa tamunwa rukuru, wa tja: “Indu tji me kumbu, ami hi raere Jehova ohunga noviṋa mbya tjitwa kwami eyuva ndo uriri. Nungwari, mbi mu raera omeripura wandje omakoto. Kouṱiṱiṱiṱi, mba uta okumuna kutja Jehova ke ri otjomunane wongetjefa onene, nungwari oIhe ngwa suvera ovanatje ve tjinene.”—Lesa okaongo nga “ Hapo embo ndo wa lesa?”

15. Omomuano uṋe Jehova me tu raisira kutja u nonḓero mweṱe?

 ¹⁵ Kara pu nomapanga omawa. Owo oviyandjewa okuza ku Jehova. (Jak. 1:17) Tate wetu womeyuru u raisa onḓero mweṱe mokutupa ovakambure ovakwetu mbe tu ‘raisira orusuvero’ aruhe. (Omiano 17:17) Morutuu rwe kOvakriste moKolose, Paulus wa tamuna omana wOvakriste tjiva mbe mu vatera, mokutja owo va ‘tarareka omutima we tjinene.’ (Kol. 4:10, 11) Nandarire Jesus Kristus aa hepa ombatero, nu eye wa ri nondangi komuano ovaengeli novandu mu ve mu vatera.—Luk. 22:28, 43.

16. Omomuano uṋe omapanga omawa mu maye yenene okutuvatera okutumbuka popezu na Jehova?

¹⁶ Hapo ove u paha nokuyakura ombatero okuza komapanga woye mombongo? Indu tji matu raere omauzeu wetu komapanga wetu mbe noupanga ouwa kuna Jehova, kaku raisa kutja oweṱe ovingundi mongamburiro nungwari ondjeverero kweṱe. Tara ku imbi James, ngwa tamunwa rukuru mbya hungira, eye wa tja: “Okukara nomapanga omawa, kwe ndji vatera tjinene. Indu tji mbi nomeripura omavi, omapanga wandje ye ndji puratena nomuretima nokundjiraera kutja ve ndji suvera. Indu tji mave tjiti nao, ku ndji raisira kutja Jehova we ndji suvera nu u rikendera kwami.” Tjiri ounanḓengu kweṱe okukara noupanga ouwa ku novakambure ovakwetu.

17-18. Matu sokupuratena ku uṋe, nu omena raye?

¹⁷ Satan u vanga kutja tu yumbe ohama mokutjita imbi mbi ri ovisemba. Nu u vanga kutja tu mune kutja Jehova kee tu suvera nu kaweṱe ovananḓengu okuyamwa i ye. Posi yokutja, otja tji twe rihongo imbo kawatjiri.

¹⁸ Jehova we ku suvera nu eye we ku ingoneka. Indu tji wa puratene ku ye, ove mo “kara morusuvero rwe” nga aruhe tjimuna Jesus. (Joh. 15:10) Kunao, o puratene ku Satan poo komutima woye indu tji mau ku wovisa kutja Jehova kee ku suvera. Nungwari puratena ku Jehova, ngu muna ouwa mu auhe wetu. Kara nongamburiro kutja “Muhona u nonyuṋe motjiwaṋa tje,” nu u nonyuṋe move wina.