Omapuriro okuza kovalese
Ongwaye Jesus tja hungira omambo wa David nge ri mEpsalme 22:1?
Ngunda Jesus e hiya ṱa, eye wa hungira omambo nge ri mu Mateus 27:46 ngu maye tja: “Ndjambi wandje, Ndjambi wandje, we Ndji esire tjike?” Jesus tja hungira omambo ngo, eye wa yenenisa omambo wa David nga tjangwa mEpsalme 22:1. (Mar. 15:34) Kanawa okumuna kutja Jesus wa hungira omambo ngo mena rokutja Jehova we mu hihamisa poo kaari nongamburiro yomasa mu Ye. Jesus aa tjiwa nawa kutja ongwaye tji ma sokuṱa nu we riyandjera okuṱa. (Mat. 16:21; 20:28) Eye wina aa tjiwa kutja Jehova kaa ‘sokumuyama’ moruveze rwonḓiro ye. (Job 1:10) Kunao, Jehova wa isa okutjevera Jesus kutja Jesus ma raise ouṱakame we, nandarire kutja onḓiro ye ya ri onḓeu.—Mar. 14:35, 36.
Ongwaye Jesus tja hungira omambo nge ri mEpsalme? Nandarire kutja katu tjiwa nawa kutja ongwaye tja hungira omambo ngo, matu katara komapu tjiva. *
Mokuhungira omambo ngo, hapo Jesus mape ya aa ṋunisa kutja Jehova ke nokumuyama konḓiro?Jesus aa hepa okusuta otjisuta tjonguturiro nokuhinombatero ya Jehova. Eye wa ri omundu wombinḓu nonyama nu aa hepa ‘okuṱira ovandu avehe.’—Hebr. 2:9.
Indu Jesus tja hungira omambo okuza mEpsalme ndo, hapo eye aa vanga kutja varwe ve ripurire kEpsalme arihe? Oruveze ndo, Ovajuda aave rihongo omapsalme omengi motjiuru. Indu tji va zuu ezeva rimwe mEpsalme, iho aatji tjiti kutja ve zemburuke Epsalme arihe. Andakuzu Jesus aa vanga okutjita nao, eye atja vatera Ovajuda ovemukongorere okuzemburuka omaprofetero omengi nge ri mEpsalme ndo, ohunga novitjitwa mbyaavi sokutjitwa komurungu wonḓiro ye. (Eps. 22:7, 8, 15, 16, 18, 24) Nu wina omazeva omasenina wEpsalme, ye tanga Jehova nu ye hungira kutja eye ongu ri ombara yaaruhe.—Eps. 22:27-31.
Hapo Jesus aa vanga okuraisa kutja ke nondjo, indu tja hungira omambo wa David? Komurungu wonḓiro ya Jesus, Otjira tjOvajuda tje mu pangura posyo nokumukuminina kutja wa yamburura Ndjambi. (Mat. 26:65, 66) Ombanguriro ndjo ya tjitwa mo hakahana, tji ya ri ouṱuku nu ve mu pangura nokuhina okukongorera ozoveta zoruveze ndwo. (Mat. 26:59; Mar. 14:56-59) Indu Jesus tja pura epuriro ndi, “Ndjambi wandje, Ndjambi wandje, we Ndji esire tjike?” eye wa raisa kutja katjitire otjiṋa otjivi, nu kapari epu rokutjita kutja ma zepewe.
Hapo Jesus aa zemburukisa varwe kutja David omutjange wEpsalme wina aa munu omauzeu, posi yokutja iho kaatji hee kutja Jehova kaari nonyuṋe mu ye? Epuriro ra David kari raisa kutja eye kaari nongamburiro mu Mukuru. Indu tja za nokupura epuriro ndo, eye wa raisa kutja u nongamburiro mu Jehova okuyama ovandu ve. Nu Jehova wa kayenda komurungu okumusera ondaya. (Eps. 22:23, 24, 27) Momuano otjingewo, nandarire Jesus ‘Omuna wa David,’ wa ri kehi yomihihamo ngunda e ri komuti wondatumisire, nu iho kaatji hee kutja Jehova kaari nonyuṋe mu ye.—Mat. 21:9.
Hapo Jesus aa raisa omuhihamwatima wokutja Jehova ke mu tjeverere mena rokuvanga kutja ma raise ouṱakame we? Kandja ri ondando ya Jehova kOmuna we okutatumisiwa nokuzepewa. Iho aatji sokutjitwa uriri kombunda ya indu Adam na Eva tji va pirukira Mukuru. Jesus katjitire ouvi, posi yokutja aa hepa okutatumisiwa nokuzepewa kutja ma zire Satan, nokuyandja otjisuta tjonguturiro okuranda imbi ovandu mbi va pandjara. (Mar. 8:31; 1 Petr. 2:21-24) Otjiṋa ho atja tji yenena okutjitwa uriri, indu Jehova tja isa okutjevera Jesus oruveze ndwo.
Hapo Jesus aa kondjo okuvatera ovemukongorere okuripurira kokutja ongwaye Jehova tja yandjera Omuna we okuzepewa momuano mbwo? * Jesus aa tjiwa kutja, onḓiro ye komuti wondatumisire otja omutjite wourunde mai putarisa ovengi. (1 Kor. 1:23) Indu ovemukongorere tji va yandja ombango kokutja ongwaye eye tjaa sokuṱa, owo atjave zuva nawa omaheero wonḓiro ye. (Gal. 3:13, 14) Owo atjave mu vara otjOmuyame wawo, nungwari kamu tjite wourunde.
Nandarire kutja omapu yeṋe Jesus nga hungirira omambo ngo, eye aa tjiwa kutja mokuṱa komuti wondatumisire ma tjiti ombango ya Jehova. Indu tja za nokuhungira omambo wEpsalme, Jesus wa tja: “Tja tjitwa tja yenene!” (Joh. 19:30; Luk. 22:37) Mena rokutja Jehova wa isa okuvatera Jesus oruveze orusupi ndwo, iho tja tjita kutja Jesus ma yenenise avihe mbya hindirwa kombanda yehi. Nu wina tje mu yandjera kutja ma yenenise avihe mbya tjangwa “mOmatwako wa Moses na mOmatjangwa wovaprofete na mOmapsalme.”—Luk. 24:44.
^ par. 2 Wina lesa oparagrafa 9 no 10 morupa ndwi “Matu rihongere ko ye komambo wa Jesus omasenina?” mokambo nga.
^ par. 4 Motjiungura tje tjokuzuvarisa, omapuriro Jesus ngaa pura poo oviṋa mbyaa hungire kaaruhe tjaavi raisa oumune we. Eye aa tjiti nao okuyandja oruveze kovemukongorere okuhungira oumune wawo.—Mar. 7:24-27; Joh. 6:1-5; lesa okambo kOruhungu, 15 ku Oktoba, 2010, omuk. 4-5.
