1-2. Omomuano uṋe mu matu yenene okuyata mozondambo za Jesus? Yandja otjihorera.

NGATU tje mwe rinana otjotjimbumba mokuti okutirise kweheke nu ku mu hi nokutjiwa. Nu komurungu ku nomundu ngu me mu hongorere po. Otja tji ma kayenda ma isa ozondambo ze kongotwe kutja mu yate mo. Omumuhongorere nambano kamuna okumumuna otja tji mamu kayenda. Hapo mape ya a mu uruma? Kako. Mena rokutja eṋe novakweṋu varwe mamu yenene okuyata mozondambo zomumuhongorere.

² Ouye ourunde mu tu hupa ndino u ri tjimuna okukayenda mokuti okutirise, nu Ovakriste vatjiri ve ri tjimuna otjimbumba ho. Eṱe tu nondangi kutja Jehova we tu pa omutuhongorere omusemba, Omuna we Jesus Kristus, ngu matu yenene okuyata mozondambo ze. (1 Petr. 2:21) Momatorokero yemwe wOmbeibela, Petrus wa sasaneka Jesus ku nomuhongore. Tjimuna omuhongore tji ma isa ozondambo ze kongotwe, Jesus wina otja isa ozondambo ze kongotwe kokutja tu yate mu zo. Ngatu tare komapuriro yetatu nga: Hapo okuyata mozondambo za Jesus ku heya tjike? Omena raye tji matu sokuyata mozondambo ze? Nu omomiano viṋe mu matu yenene okutjita nao?

3. Okuyata mozondambo zomundu ku heya tjike?

³ Hapo okuyata mozondambo zomundu ku heya tjike? MOmbeibela embo ndi “ryanga” povikando ri heya omuano omundu me hupa. (Gen. 6:9; Omiano 4:26) Otjihorera omundu tji ma raisa mape ya atji sasanekwa nozondambo omundu nḓe isa kongotwe tji ma kayenda. Kunao okuyata mozondambo zomundu ku heya okuhorera ku ye.

4. Okuyata mozondambo za Jesus ku heya tjike?

 ⁴ Nu hapo okuyata mozondambo za Jesus ku heya tjike? Ousupi, ku heya okuhorera ku ye. MEtjangwa ku kwa zikamene orupa ndwi, omuapostele Petrus wa tanga otjihorera otjiwa tjonḓaro orure Jesus tja raisa indu tja tuurunga ondatumisire. Nungwari, pe novihorera vyarwe ovingi mbi matu yenene okuhorera ku Jesus. (1 Petr. 2:18-25) Oviṋa avihe Jesus mbya hungira na mbya tjita, otjihorera otjiwa kweṱe okuhorera ko.

5. Hapo ovandu mbe he ri ohomonena mape ya ave horere ku Jesus ngu ri ohomonena? Kahurura.

⁵ Hapo matu yenene okuhorera ku Jesus nandarire kutja kaweṱe ohomonena? Ii, matu yenene. Tjiwa kutja Petrus we riyarikaṋa kweṱe kutja tu “yate mozondambo” za Jesus, nandarire kutja kaweṱe ohomonena. Indu tji matu kongorere ozondambo ze nongengezero nokukondjo pu matu yenene nandarire kutja kaweṱe ohomonena, eṱe matu raisa kutja tu nonḓuviro komambo womuapostle Johanes nga: ‘Matu sokukara nongaro ohamukwao na indji oya Jesus Kristus.’—1 Joh. 2:6.

6-7. Omena raye tji matu yenene okutja, okuyata mozondambo za Jesus maku yenene okutjita kutja oupanga wetu na Jehova u kurire ko?

⁶ Indu tji matu yata mozondambo za Jesus oupanga wetu na Jehova u kurira ko. Omena raye tji matu tja nao? Otjitenga, Jesus wa twapo otjihorera otjiwa tjokuhupa momuano wokuyorokisa Mukuru. (Joh. 8:29) Kunao okuyata mozondambo za Jesus ku yorokisa Jehova. Nu eṱe tu nongamburiro kutja Tate wetu womeyuru ma tumbuka popezu na imba mbe kondja oukukutu okurira omapanga we.—Jak. 4:8.

⁷ Otjitjavari, Jesus aa horere ku Ihe moviṋa avihe. Kunao Jesus opa zokutja, “Auhe ngwa munu Ami wa munu Tate.” (Joh. 14:9) Matu yenene okuhorera kovikaṋena vya Jesus  nomuano mbwaa tjindi varwe. Otjotjihorera, eye wa ṱondjenda nomundu ngwa verere ongana, wa raisa otjari ku imba mba zepaisa ovasuverwa vawo na komukazendu ngwa verere orwandara tjinene. Indu tji matu horere ku Jesus, eṱe wina tu horera ku Jehova. (Mar. 1:40, 41; 5:25-34; Joh. 11:33-35). Otja tji matu horere kovikaṋena vya Jehova opu matu kara noupanga ouwa kuna ye.

8. Kahurura kutja okuyata mozondambo za Jesus maku tu vatere vi ‘okutoṋa’ ouye.

⁸ Indu tji matu yata mozondambo za Jesus, eṱe kamaatu yandjere ouye ourunde mbwi okutupora ku Jehova. Ongurova ya Jesus osenina kombanda yehi eye wa yenena okutja: “Ami ouye mba toṋa!” (Joh. 16:33) Eye aa hee kutja kayandjerere omeripura, ozondando novitjitwa vyovandu mouye okumuṱuna. Jesus kazembire ondando ndja hindirwa kombanda yehi, yokuhongonona ouatjiri ohunga na Jehova. Hapo tjike na eṱe? Pe noviṋa ovingi mouye mbwi mbi mavi yenene okutupora komerikotameneno wetu ku Jehova. Posi yokutja, tjimuna Jesus, indu tji twa yandja ombango kokukarera Jehova, eṱe wina matu “toṋa” ouye.—1 Joh. 5:5.

9. Ovikwaye mbi matu sokutjita kutja tu kare mondjira ndji twara komuinyo waaruhe?

⁹ Indu tji matu yata mozondambo za Jesus, eṱe matu yenene okukahupa nga aruhe. Omurumendu omutanda omutumbe tja pura kutja ovikwaye mbi ma hepa okutjita kutja ma kamune omuinyo waaruhe, Jesus wa tja: ‘Ndji kongorera.’ (Mat. 19:16-21) Jesus wa hungira kOvajuda tjiva mbe hina aave kambura kutja eye ongu ri Kristus, na tja: “Ozonḓu zandje . . . ze Ndji kongorera. Me ze pe omuinyo waaruhe.” (Joh. 10:24-29) Nu Jesus wa raera Nikodemus, ngwa ri okaṋepo kotjira tjOvajuda nu ngwaa vanga okutjiwa ovingi ohunga nomahongero we, kutja imba mbe “kambura mu Ye” mave ‘kara nomuinyo waaruhe.’ (Joh. 3:16) Eṱe tu raisa ongamburiro yetu mu Jesus mokuṱakamisa imbi mbyaa hongo nokuhorera kovitjitwa vye. Indu tji twa tjiti nao, eṱe matu kara mondjira ndji twara komuinyo waaruhe.—Mat. 7:14.

10. ‘Okutjiwa’ Jesus nawa ku kamburira mo ye? (Johanes 17:3)

¹⁰ Eṱe matu sokutjiwa Jesus nawa ngunda atu hi ya yata mozondambo ze. (Lesa Johanes 17:3.) ‘Okutjiwa’ Jesus otjiṋa tji matu sokukayenda komurungu okutjita. Eṱe matu sokurihonga ovingi ohunga novikaṋena vye, ouripura we nongaro ye yomeritjindiro. Kainatja kutja twa kara orure ndu ṱa pi mouatjiri eṱe matu sokukayenda komurungu okutjiwa Jehova nOmuna we.

11. Omaevangeli nga Mateus, Markus, Lukas na Johanes ye hungira ohunga natjike?

¹¹ Kutja tu tjiwe Omuna we, Jehova wa tjita kutja Omaevangeli yane ye rire orupa rwOmbeibela. Omaevangeli yane nga ye hungira ohunga nehupo notjiungura tjokuzuvarisa tja  Jesus. Omambo ngo ye tu raera ohunga noviṋa Jesus mbya hungira, mbya tjita nokutja wa ri noumune uṋe. Owo wina ye tu vatera ‘okuripurira’ kotjihorera tja Jesus. (Hebr. 12:3) Kunao, indu tji matu konḓonona Omaevangeli ngo ku tu vatera kutja tu tjiwe Jesus nawa. Nu mena ranao, matu yenene okuyata mozondambo ze.

12. Ovikwaye mbi matu yenene okutjita kutja tu rihonge ovingi okuza mOmaevangeli?

¹² Kutja tu rihonge ovingi okuza kOmaevangeli, pe noviṋa vyarwe mbi matu yenene okutjita pendje nokulesa uriri. Eṱe matu sokutwapo oruveze okuyekonḓonona nawa nokuripurira ko oukoto. (Sasaneka na Josua 1:8) Ngatu katare komapu yevari ngu maye yenene okutuvatera okuripurira ko oukoto nokuṱakamisa imbi mbi matu lese okuza mOmaevangeli.

13. Omomuano uṋe mu mo yenene okutjita kutja ehungi ohunga na Jesus ri rire enamuinyo?

¹³ Otjitenga, tjita kutja ehungi ohunga na Jesus ri rire enamuinyo. Ripura tjimuna mo munu, mo zuu nu imbi mbi mavi tjitwa mavi ku ṱunu. Okutuvatera okutjita nao, eṱe matu hepa okutjita omakonḓononeno moviungurisiwa mbi twa pewa i otjira tja Jehova. Konḓonona kutja ovikwaye mbya tjitwa komurungu na kombunda yorupa ndu mo lese. Paha ondjivisiro ohunga novandu notuveze tu twa tamunwa mehongwa ndwo. Sasaneka imbi mbi mo konḓonona mEvangeli ndo kuna imbi mbya tjangwa mOmaevangeli yarwe. Povikando tjiva omutjange u hungirira kepu enanḓengu ndi he ri mOmaevangeli inga owarwe.

14-15. Ovikwaye mbi matu sokutjita okuṱakamisa imbi mbi twe rihongo mOmaevangeli?

¹⁴ Otjitjavari, ṱakamisa oviṋa mbi mo rihongo mehupo roye. (Joh. 13:17) Kombunda yokukonḓonona ehungi, ripura omuini kutja, ‘Hapo pe notjiṋa tji me yenene okuṱakamisa mehupo randje okuza kehungi ndi? Omomuano uṋe mu me yenene okuungurisa ehungi ndi okuvatera varwe?’ Ripura nomundu ngu mo tjiwa, nu okuzambo momuano omuwa u haṋasane oviṋa mbi we rihongo kuna ye.

¹⁵ Ngatu tare kotjihorera tji matji tu vatere okuṱakamisa omapu yevari ngo. Matu katara  komuhepundu omusyona ngwa munikwa i Jesus mondjuwo ondjapuke ya Muhona.

16. Lesa Markus 12:41, nu u hungirire ku imbi mbya tjitwa mEtjangwa ndo.

¹⁶ Tjita kutja ehungi ri rire enamuinyo. (Lesa Markus 12:41.) Ripurira ku imbi mbyaa tjitwa. Tji ya ri 11 ku Nisan ombura ndji 33 O.Z., Jesus aa sokuṱa kombunda yomayuva omaṱiṱi. Jesus wa ungurisa oruveze rwe oruingi eyuva ndo okuzuvarisa pondjuwo ondjapuke. Posi yokutja ovanane vozongamburiro aave mu pirukire. Komurungu wanao, tjiva aave mu pura kutja oviṋa mbye tjita u tjita mouvara wa tjike. Varwe aave kondjo okumupura omapuriro omazeu ngaave munu kutja ke nokuyenena okuzira. (Mar. 11:27-33; 12:13-34) Okuzambo Jesus wa ya korupa rwarwe rwondjuwo ondjapuke ya Muhona. Ngunda e ri mbo, eye wa muna otjiwongero tjovimariva. Kunao, mape ya wa ri poruveze ndwaaru isanewa kutja orumbo rwovakazendu. Eye wa haamene nu aa tarere ovandu tji mave yumbu ovimariva motjiwongero. Nu wa muna ovatumbe ovengi amave yumbu ovimariva ovingi. Mape ya kutja eye wa ri popezu okuyenena okuzuva orurokoho rwozosenda nḓaaze yumbwa motjiwongero tjovimariva.   

17. Omuhepundu omusyona ngwa tamunwa mu Markus 12:42 wa tjita tjike?

¹⁷ Lesa Markus 12:42. Kombunda yanao, Jesus wa muna omukazendu. Eye wa ri “omukazendu omuhepundu omusyona tjinene.” (Luk. 21:2) Ehupo re ra ri ezeu nu mape ya kaari novimariva mbya yenene okuranda oviṋa mbyaa hepa. Mena rokuhina okuvanga okumunikwa, eye wa yumba oumariva uvari mbu mape ya kau tjitire orurokoho. Jesus aa tjiwa kutja wa yumbu ovimariva vingapi motjiwongero. Eye wa yumba ozolepta mbari, mbwaari oumariva wonḓengu yokehi oruveze ndwo. Oumariva mbwo nandarire kaau yenene okuranda ondjandja imwe, ku ka ri okazera kombiriha tjinene.   

18. Otja ku Markus 12:43, 44, Jesus wa tja vi ohunga nomuhepundu ngwa yumba oumariva uvari wongoporo?

¹⁸ Lesa Markus 12:43, 44. Jesus tjiri wa temisiwa i yomuhepundu ngwi. Kunao, eye wa isana ovahongewa ve ne ve raisire omuhepundu ngwi, na tja: “Omuhepundu omusyona ngwi wa yumbu ovingi motjiwongero povandu avehe.” Nu wina wa tja: “Orondu ovandu avehe va yumbu okuza mu imbi mbi va hupisa moutumbe wawo, nungwari ingwi omuhepundu omusyona wa yumbu ihi tja isa mouhepe we, ouṋa we auhe, ohupiro ye aihe.” Indu omukazendu omukambure ngwi tja yumba oumariva we ousenina, eye wa ri nongamburiro kutja Jehova me mu tjevere.—Eps. 26:3.

19. Ovikwaye ovinanḓengu mbi matu yenene okurihongera komambo wa Jesus ohunga nomuhepundu omusyona?

¹⁹ Ṱakamisa oviṋa mbi mo rihongo mehupo roye. Ripura omuini kutja, ‘Ovikwaye mbi me yenene okurihonga okuza komambo wa Jesus ohunga nomuhepundu omusyona?’ Ripura ohunga nomuhepundu ngwo. Eye mape ya aa vanga okuyandja ovingi ku Jehova. Posi yokutja, wa yandja avihe mbya ri navyo ku Jehova. Nu Jesus aa tjiwa kutja oumariva omukazendu mbwa yandja wa ri ounanḓengu ku Jehova. Imba matu rihongo otjiṋa otjinanḓengu tjokutja, indu tji matu yandja okuza komutima Jehova u tjaterwa. (Mat. 22:37; Kol. 3:23) Nu wina u tjaterwa indu tji matu kondjo okumuungurira pu matu yenene. Omurari mbwo u kamburira mo oruveze nomasa ngu tu ungurisa okurikotamena ku ye, tjimuna okupita motjiungura tjokuzuvarisa nokukara pozombongarero zombongo.

20. Omomuano uṋe mu mo yenene okuṱakamisa oviṋa mbi we rihongo ohunga nomukazendu omuhepundu? Yandja otjihorera.

 ²⁰ Omomuano uṋe mu mo yenene okuṱakamisa oviṋa mbi we rihongo ohunga nomukazendu omuhepundu? Kondja okuripura ohunga novandu mbu mape ya ave yanḓiparisiwa, indu tji we ve zemburukisa kutja Jehova u nondjoroka na imbi mbi mave yenene okumutjitira. Otjotjihorera, mo tjiwa omukazendu omunene motjiwondo ngu hi nouveruke ouwa poo ngwa ngundipara morutu, nu ngu rimuna ondjo mena rokutja kayenene okuungura ovingi motjiungura tjokuzuvarisa? Poo mo tjiwa omurumendu omukambure ngwa wa momuinyo mena rokutja kayenene okukara pozombongarero azehe zombongo, mena romutjise omuzeu mbwe nawo? Vatera ovandu mbe ri nao mokuhungira “omambo omawa nomatunge.” (Ef. 4:29) Ve raera oviṋa oviyanḓiparise mbi we rihongo okuza kehungi romukazendu omuhepundu omusyona. Omambo woye ngo maye ve zemburukisa kutja Jehova u nonyuṋe indu tji twe mu ungurire otja pu matu yenene. (Omiano 15:23; 1 Tes. 5:11) Indu tji mo tanga varwe mena rokutja ve ungurira Jehova otja pu mave yenene, ove mo yata mozondambo za Jesus.

21. Ove we rimanene okutjita vi?

²¹ Tjiri tu nondangi kutja Omaevangeli ye hungira oviṋa ovingi ohunga nehupo ra Jesus, mena rokutja ye tu vatera kutja tu mu horere nokuyata mozondambo ze. Ma rire nawa tji wa konḓonona Omaevangeli ngo kove omuini poo pomerikotameneno weṋu weṱunḓu. Ngatu zemburuke kutja indu tji matu vanga okumuna ouwa momakonḓononeno wetu, eṱe matu hepa okutjita ehongwa ndo ri rire enamuinyo nokuṱakamisa oviṋa mbi twe rihongo mehupo retu. Eṱe matu hepa okuhorera kovitjitwa vya Jesus, nu wina matu hepa okupuratena ku imbi mbya hungira. Morupa ndu maru kongorere ko, matu katara komambo Jesus nga hungira ngunda e hiya ṱa.