Mongaro otja indjo, indu omurumendu tja kupu rukwao, ouṋepo wombongo mau sokuvara kutja orukupo indwi orutenga rwa teka. Nu mave sokuvara orukupo indwi orupe otjoruyakurwa. Tji matu vanga okuzuva nawa kutja ongwaye tji pe ri nao, ngatu tare ku imbi Jesus mbya hungira ohunga nokuteya orukupo nokukupa rukwao.

Mu Mateus 19:9, Jesus wa hungirira kepu ariyerike ndi yandjera omundu okuteya orukupo. Eye wa tja: “Omurumendu ngu ma isa omukazendu we potjiṋa tji tji he ri oruvakiro na kupu omukazendu warwe, eye ma katuka orukupo.” Okuza komambo wa Jesus, eṱe matu rihongo kutja (1) oruvakiro eepu ariyerike mOmatjangwa ndi yandjera omundu okuteya orukupo, nu (2) omurumendu tja teya orukupo ku nomukazendu we ngunda ape hi ya tjitwa oruvakiro na kupu omundu warwe, eye ma katuka orukupo. a

Hapo omambo wa Jesus maye hee kutja omurumendu ngwa tjiti oruvakiro na teya orukupo ku nomukazendu we, ma yenene okukupa rukwao otja kOmatjangwa? Kako kaaruhe. Indu omurumendu tja katuka orukupo, omukazendu we ngu u hi nondjo, ma yenene okutya kutja ma isire omurumendu we poo indee. Indu omukazendu tja panḓa okuisira omurumendu we, nu ave teya orukupo kotjiveta, owo aveyevari va kuturwa okukupa rukwao indu omateyero wawo worukupo tji ya yakurwa kotjiveta.

Munda imbwi owarwe, omukazendu ngu hi nondjo mape ya a vanga okukara pu nomurumendu we morukupo. Nu mape ya a raere omurumendu we kutja eye ma vanga okumuisira. Posi yokutja, mape tjitwa tjike indu omurumendu ngwa katuka orukupo ngwi, tja nakaura onḓero yomukazendu we yokuvanga okumuisira, neye a tye ku ye omuini kutja ma teya orukupo? Mena rokutja omukazendu u nonḓero yokuisira omurumendu we nokukayenda komurungu okukara morukupo, omurumendu kamaa yenene okukupa rukwao otja komirari vyOmatjangwa. Indu eye tja tye okukupa omundu warwe, nandarire kutja otja kOmatjangwa ke nokuyandjerwa okutjita nao, okutja eye wa katuka orukupo rukwao. Nu ovanene vombongo mave sokuzika Okomiti Ombangure rukwao okuṱuna kouvi mbwa tjiti.—1 Kor. 5:1, 2; 6:9, 10.

Hapo ouṋepo mombongo mau kara noumune uṋe ohunga norukupo indwi orutenga na indwi orupe, indu omurumendu ngu u ha sokukupa omukazendu warwe otja komirari vyOmatjangwa, tja kupu rukwao? Otja komirari vyOmatjangwa, orukupo indwi orutenga ngunda maru kayende komurungu poo indee? Hapo omukazendu omuhinandjo ngunda ma yenene okutya okuisira omurumendu we, poo okutya okuhinokumuisira? Orukupo orupe ndo, mape ya aru varwa otjomakatukiro worukupo?

Morukapitaveze, ouṋepo wombongo aau vara orukupo orupe otjomakatukiro worukupo, ndoovazu omukazendu omuhinandjo u nomuinyo, ke ya kupwa rukwao, nu wina ke nondjo yokutjita oruvakiro. Posi yokutja Jesus ke na pa tamuna ingwi omuhinandjo, indu tjaa hungire ohunga nokuteya orukupo nokukupa rukwao. Nungwari eye wa kahurura kutja omurumendu ngwa teya orukupo pu pe he ri otja kOmatjangwa,  na kupu omundu warwe, ma katuka orukupo. Jesus wa tja okuteya orukupo nokukupa rukwao, ku ri tjimuna okukatuka orukupo. Mongaro otja indjo, orukupo indwi orutenga maru teka.

Indu omurumendu tja teya orukupo ku nomukazendu we na kupu warwe, okutja omukazendu we ingwi omutenga ngu ri omuhinandjo, ke nokuyenena okupaha okumuisira rukwao. Ku nao, eye ke nokuhepa okuripa ouzeu wokutya kutja ma isire, poo ma nakaura omurumendu ngwa ri owe ngo. Nu wina kainatja kutja ingwi omuhinandjo wa ṱu, wa kupwa rukwao, poo wa tjiti oruvakiro, iho katji nokurundurura oumune wombongo ohunga norukupo indwi orupe. b

Motjihorera tji twa hungirire ko rukuru, omurumendu wa katuka orukupo, nowo ave teya orukupo. Nu hapo mape tjitwa tjike indu omurumendu tje ha katukire orukupo, posi yokutja a teya orukupo na kupu omundu warwe? Poo mape tjitwa tjike indu omurumendu tje ha tjitire oruvakiro komurungu wokuteya orukupo, posi yokutja a tjiti oruvakiro kombunda yokuteya orukupo, na kupu omukazendu warwe nandarire kutja omukazendu we ingwi omutenga wa ri nonḓero yokumuisira? Movihorera aviyevari mbi, okuteya orukupo nokukupa rukwao, okwo ku ku ri okukatuka orukupo, ku yandisa orukupo indwi orutenga. Otja kotjiveta, orukupo indwi orupe, oruyakurwa. Okambo kOruhungu kOtjiingirisa 15 ku Novemba, kombura ndji 1979, pomukuma 32 ka kahurura nai: “Nambano eye u ri morukupo orupe, nu kamaa yenene okuyandisa orukupo ndwo na yaruka komukazendu we ingwi omutenga ngwa kupire. Okuteya orukupo, nokukatuka orukupo, nokukupa omundu warwe rukwao, kwa tjita kutja orukupo indwi orutenga ru teke.”

Omarundurukiro nga momazuviro wetu, kaye nokuheya kutja Ovakriste ve sokuripura kutja orukupo katjiṋa otjiyapuke rukwao, poo kutja omakatukiro worukupo kaurunde ounene rukwao. Indu omurumendu tja teya orukupo ku nomukazendu we pu pe he ri otja kOmatjangwa, na kupu omundu warwe ngunda e ha sokutjita nao otja kOmatjangwa, ovanene vombongo mave sokuzikamisa Okomiti Ombangure, mena rokutja eye wa katuka orukupo. (Indu omukazendu ngwa kupwa oupe tje ri Omukriste, eye wina ma sokuyetwa komurungu wOkomiti Ombangure, mena rokutja eye wina wa katuka orukupo.) Nandarire kutja orukupo orupe karu nokuvarwa otja omakatukiro worukupo, omurumendu kamaa yenene okupewa omerizirira mombongo oure wozombura ozengi. Nu wina ngandu ovandu varwe tji va isa okuhihamwa omutima mena roviṋa ovivi mbya tjita morukapitaveze, poo nga tji va isa okumuna kutja eye ke ya pwa okupewa ondengero. Ngunda ovanene vombongo ave hi ya yandja omerizirira ku ye mombongo, owo wina mave sokuripura kutja omukazendu ngwa kupire, nu mape ya ngwa tjindwa navi oruveze ndwo, nai u ri mongaro iṋe. Nokutja ovanatje mape ya mba isiwa ave ri ovaṱiṱi indu eye tja teya orukupo, nai ve ri mongaro iṋe.—Mal. 2:14-16.

Mena romauzeu omanene nge za mokuteya orukupo momuano mbu ha yandjerwa mOmatjangwa nokukupa omundu warwe, onawa Ovakriste okuhorera ku Jehova, nokuvara orukupo otjotjiṋa otjiyapuke.—Omuzuv. 5:4, 5; Hebr. 13:4.