1-2. Ovikwaye mbi matu sokutjita ngunda amatu undju ouye oupe?

 EṰE tu nondangi momakwizikiro wa Jehova wokuisa po ouye mbwi nokueta ouye ousemba. (2 Petr. 3:13) Nandarire kutja katu nokutjiwa kutja oruṋe ouye oupe tji mau ya, oviṋa mbi tjitwa mouye vi raisa kutja katu nokuhepa okuundja orure.—Mat. 24:32-34, 36; Oviung. 1:7.

² Nandarire kutja twa kara orure mouatjiri, eṱe atuhe tu sokukurisa ongamburiro yetu momakwizikiro ngo. Omena raye? Mena rokutja ongamburiro ndje kura mai yenene okungundipara. Omuapostele Paulus wa tja ongamburiro ndja ngundipara ‘ouvi mbwa kakatera ku eṱe oupupu.’ (Hebr. 12:1) Okutjita kutja ongamburiro yetu ai ha ngundipara tu sokuripura oukoto ohunga noviṋa mbi mavi raisa kutja ouye oupe mau ya.—Hebr. 11:1.

3. Matu katara ku ye morupa ndwi?

³ Morupa ndwi, matu katara komiano vitatu mu matu yenene okukurisa ongamburiro yetu momakwizikiro wa Jehova wouye oupe: (1) okuripurira ko oukoto ohunga notjisuta tjonguturiro, (2) okuripura ohunga nomasa wa Jehova (3) nokutjita oviṋa mbi tu nanena popezu na Jehova. Okuzambo matu katara komuano ombuze ya Jehova ku Habakuk mu i yenena okukurisa ongamburiro yetu ndino. Rutenga, matu katara kozongaro nḓu tu tuurunga nai, nḓe hepa ongamburiro yomasa momakwizikiro wa Jehova wouye oupe mbu mau ya.

 OZONGARO NḒE HEPA ONGAMBURIRO YOMASA

4. Omikambo viṋe mbi hepa ongamburiro yomasa?

⁴ Eyuva arihe tu toora omikambo mbi hepa ongamburiro yomasa. Otjotjihorera, tu toora omikambo mbi kamburira mo oupanga, omanyando, omahongero, orukupo, ovanatje, noviungura. Ma rire nawa okuripura oveni kutja: ‘Ozondando zandje ze raisa kutja ouye mbwi kau karerere nu tjimanga mau pingenwa i youye wa Mukuru oupe? Poo ami mbi tjita imbi mbi tjitwa i imba mbe kambura kutja kamaave hupu nga ko nga aruhe?’ (Mat. 6:19, 20; Luk. 12:16-21) Eṱe matu yenene okutoora omikambo mbi ri vyo indu tji twe kurisa ongamburiro yetu kutja ouye oupe u ri popezu.

5-6. Ongwaye tji matu hepa ongamburiro yomasa motuveze twouzeu? Yandja otjihorera.

⁵ Eṱe wina tu muna omarorero nge hepa ongamburiro yomasa. Eṱe mape ya atu tatumisiwa, atu vere omutjise omuzeu poo ape ya oviṋa vyarwe mbi mavi tjiti kutja tu we momuinyo. Rutenga, mape ya atu munu kutja matu yenene okutjinda ouzeu wetu. Posi ya, omauzeu otja ingo potuingi ye toora orure. Ku nao, matu hepa ongamburiro yomasa okuyetjinda nokukayenda komurungu okukarera Jehova nondjoroka.—Rom. 12:12; 1 Petr. 1:6, 7.

⁶ Indu tji tu ri momauzeu, mape ya atu munu kutja ouye wa Jehova oupe kamaau ya. Hapo ihi matji hee kutja ongamburiro yetu ya ngundipara? Kako katjiperi. Tara kotjihorera. Mokati kombepera yomasa mape ya atu ripura kutja oruveze rwoupyu kamaaru ya. Posi ya, oruveze rwoupyu okuya maru ya. Momuano otjingewo, tji twa momuinyo, mape atu munu kutja ouye oupe kamaau ya. Nungwari, indu tji tu nongamburiro yomasa, matu tjiwa kutja omakwizikiro wa Mukuru maye yenenisiwa. (Eps. 94:3, 14, 15; Hebr. 6:17-19) Tji tu nongamburiro ndjo, matu yenene okukayenda komurungu okutwa po omerikotameneno wa Jehova poruveze orutenga mehupo retu.

7. Omeripura yeṋe ngu matu sokunakaura?

⁷ Eṱe wina tu hepa ongamburiro yomasa kutja tu kayende komurungu notjiungura tjomazuvarisiro. Ovandu ovengi ku tu zuvarisa “ombuze ombwa” ohunga nouye oupe mbu mau ya, ve muna kutja oruroto ndu hi na maaru yenenisiwa. (Mat. 24:14; Esek. 33:32) Eṱe ngatu ṱakamise okukeyakeya mu imbi Jehova mbye tu honga tjimuna owo tji ve tjita. Kutja otjiṋa ho atji ha tjitwa, ngatu kayende komurungu okukurisa ongamburiro yetu. Ngatu tare komiano vitatu mu matu yenene okutjita nao.

RIPURIRA KO OUKOTO KOTJISUTA TJONGUTURIRO

8-9. Okuripura oukoto ohunga notjisuta tjonguturiro maku kurisa vi ongamburiro yetu?

⁸ Omuano umwe mu matu yenene okupamisa ongamburiro yetu, eendu tji matu ripurire ko oukoto kotjisuta tjonguturiro. Otjisuta tjonguturiro tji tu pa ongamburiro kutja omakwizikiro wa Mukuru maye yenenisiwa. Indu tji twe ripurire ko oukoto kutja omena raye otjisuta tjonguturiro tji tja yandjwa nokutja tji kamburira mo ye, matu kurisa ongamburiro yetu kutja omakwizikiro wa Mukuru womuinyo waaruhe mouye ouwa tjiri maye yenenisiwa. Omena raye tji matu tja nao?

⁹ Hapo otjisuta tjonguturiro tji kamburira mo ye? Jehova wa hinda Omuna we omukwatwaerike ngwa ri omundu wopopezu tjinene na ye, okuza keyuru okuyekukwatwa otjomundu ohomonena. Tja ri kombanda yehi, Jesus wa muna omauzeu pekepeke. Eye wa tatumisiwa na ṱu onḓiro ohihamise. Tjiri Jehova wa suta otjisuta tjokombanda. Mukuru wetu worusuvero katja yandjera Omuatje we kutja ma hihamisiwe nokuṱa kutja tu kare nehupo ewa oure woruveze orusupi uriri. (Joh. 3:16;  1 Petr. 1:18, 19) Mena rokutja Jehova we tu pa Omuatje we omuingona okutuvatera, Eye ma katjita kutja tu yenene okuhupa nga aruhe mouye oupe.

RIPURIRA KOMASA WA JEHOVA

10. Otja kOvaefese 3:20, Jehova u yenena okutjita tjike?

¹⁰ Omuano omutjavari wokukurisa ongamburiro yetu, okuripurira komasa wa Jehova. Eye u nomasa okutjita oviṋa avihe mbya kwizika. Ovandu ovengi ndino ve muna kutja omuinyo waaruhe mouye oupe katjiṋa tji matji yenene okutjitwa kweṱe. Posi ya, Jehova u kwizika oviṋa ovandu mbi ve hi na maave yenene okutjita. Eye ma yenene okutjita nao mena rokutja eye oMukuru Omunamasaayehe. (Job 42:2; Mar. 10:27) Nu eye tji ma kwizike oviṋa ovihimise, eṱe katu kumisiwa i yomakwizikiro we ngo.—Lesa Ovaefese 3:20.

11. Yandja otjihorera tjimwe tjomakwizikiro wa Mukuru omahimise. (Tara kokawongo nga “ Omakwizikiro tjiva omahimise nga yenenisiwa.”)

¹¹ Ripurira koviṋa Jehova mbya kwizikira ovakarere ve morukapitaveze mbyaavi munika aayo kamaavi yenene okutjitwa. Eye wa raera Abraham na Sara kutja mave yenene okumuna omuatje omuzandu mozombura zawo zoukurundu. (Gen. 17:15-17) Eye wina wa raera Abraham kutja ozondekurona ze maze pewa ehi ra Kanaan. Oure wozombura ozengi indu Ovaisrael mba ri ozondekurona za Abraham tji va ri ovahuurwa moEngipte, aape munika aayo omakwizikiro ngo kamaaye rire ouatjiri. Posi yokutja ya rira ouatjiri. Kombunda, Jehova wa raisa kutja Elisabet ma yenene okumuna omuatje, nandarire kutja eye wa kurupire. Eye wina wa raera Maria ngwa ri omusuko ngu hi ya hakaena ku nomurumendu kutja ma panduka Omuna wa Mukuru. Ihi aatji sokuyenenisa omakwizikiro Jehova nga tjita ozombura ozengi nḓa kapita, motjikunino tja Eden.—Gen. 3:15.

12. Josua 23:14 na Jesaja 55:10, 11 ye tu raera ouatjiri uṋe ohunga nomasa wa Jehova?

¹² Tji matu ripura ohunga nomakwizikiro wa Jehova nga tjita nomuano me ye yenenisa, matu yenene okuzuva kutja Jehova u nomasa omanene. Momuano mbwo, ongamburiro yetu momakwizikiro we wouye oupe mai yenene okuharera ko omasa. (Lesa Josua 23:14; Jesaja 55:10, 11.) Iho tji tu rongerisa kutja tu vatere varwe okuzuva nawa kutja omakwizikiro wouye oupe karuroto uriri. Jehova omuini wa tja nai ohunga neyuru epe nehi epe: “Omambo nga, owo tjinga aye ri omauatjiri nomaṱakame.”—Omavan. 21:1, 5.

TJITA OVIṊA MBI MAVI KU NANENE POPEZU NA JEHOVA

13. Omomuano uṋe ozombongarero zombongo mu ze kurisa ongamburiro yetu? Kahurura.

¹³ Omuano outjatatu mu matu kurisa ongamburiro yetu, omokuungurisa oruveze rwetu moviṋa mbi mavi tu nanene popezu na Jehova. Otjotjihorera, tara komuano ozombongarero zombongo mu ze tu etera ouwa. Anna, ngwa ungura ozombura ozengi motjiungura tjokuzuvarisa wa tja: “Ozombongarero zombongo ze ndji vatera kutja mbi kure mongamburiro. Nandarire omuyandje wehungi tje hi nokuhonga nawa, poo okuhungira oviṋa ovipe, ami aruhe mbi zuva otjiṋa tji tji tjita kutja mbi zuve Ombeibela nawa. Iho tji kurisa ongamburiro yandje.” b Ongamburiro yetu i kurira ko indu tji matu puratene komaziriro omayanḓiparise wovakambure ovakwetu pozombongarero zombongo.—Rom. 1:11, 12; 10:17.

14. Otjiungura tjokuzuvarisa tji kurisa vi ongamburiro yetu?

¹⁴ Eṱe wina tu kurisa ongamburiro yetu indu tji tu norupa motjiungura tjokuzuvarisa. (Hebr. 10:23) Barbara, ngwa karera Jehova kombanda yozombura 70, wa tja: “Ami aruhe  mbi vara otjiungura tjokuzuvarisa otjotjiṋa tji tji kurisa ongamburiro. Otja tji me hungire ku na varwe ohunga nomakwizikiro wa Jehova omawa, ongamburiro yandje opu i kurira ko.”

15. Omakonḓononeno wetu oveni wOmbeibela ye kurisa vi ongamburiro yetu? (Wina tara koviperendero.)

¹⁵ Omakonḓononeno wetu oveni wOmbeibela ootjiṋa tjarwe tji tji kurisa ongamburiro yetu. Susan wa tja tji mu vatera tjinene indu tja tye komurungu woruveze kutja me rihongo ye. Eye wa tja: “Osondaha ami mbi rirongerisa okambo kOruhungu kotjivike tji matji kongorere ko. Omandaha nOritjavari ami mbi rirongerisa kombongarero yomokati kotjivike. Komayuva nga sewa ko, ami mbi tjita omakonḓononeno wandje omuini wOmbeibela.” Mena rokutja eye u ungura oukukutu okukongorera omerihongero we otja pomayuva nga twa po, Susan u kayenda komurungu okukurisa ongamburiro ye. Irene, ngwa karera pomberoo ohongora oure wozombura ozengi wa tja, okurihonga omaprofetero wOmbeibela ku kurisa ongamburiro ye. Eye wa tja: “Otjiṋa otjihimise kwami okumuna kutja omaprofetero wa Jehova ye yenenisiwa mondja.” c

“OVYO, TJIRI, MAVI YENENISIWA”

16. Omena raye omambo Jehova nga hungira ku Habakuk tji ye notjiṋa na eṱe ndino? (Ovaheberi 10:36, 37)

¹⁶ Ovakarere va Jehova tjiva va undja omaandero wouye mbwi oure woruveze orure. Ovandu tjiva ve muna kutja omaandero wouye ye kambura orure okuya. Jehova wa hungirira koumune mbwo indu tja hungira komuprofete Habakuk kutja: “Tjanga vyo, orondu ingee oruveze karuye ya ovyo mu mavi yenenisiwa. Nungwari oruveze maru ya tjimanga, nu imbi Ami mbi me ku raisire mavi yenenisiwa. Mape munika aayo ovyo mavi wombo okuya, nungwari vi undja uri; ovyo, tjiri, mavi yenenisiwa nu kavi nokuwombisiwa.” (Hab. 2:3) Hapo Mukuru wa hungira omambo ngo okuyanḓiparisa Habakuk erike? Poo omambo we ye notjiṋa  na eṱe ndino? Jehova wa hinga omuapostele Paulus okutjanga omambo ngo kOvakriste, mbe undja ouye oupe nonḓero. (Lesa Ovaheberi 10:36, 37.) Eṱe tjiri tu tjiwa kutja omakwizikiro wa Jehova maye yenenisiwa, nandarire kutja ye munika aayo maye wombo. ‘Owo, tjiri, maye yenenisiwa nu kaye nokuwombisiwa.’

17. Omukazendu omukambure umwe wa ṱakamisa vi eronga Jehova nda yandja ku Habakuk?

¹⁷ Oure wozombura ozengi, ovakarere va Jehova va ṱakamisa erakiza ra Jehova ndi tja: “Nungwari vi undja uri.” Otjotjihorera, Louise wa uta okukarera Jehova mombura ndji 1939. Eye wa tja: “Oruveze ndwo ami ee munu kutja Armagedon mai ya ngunda ambi hi ya mana oskole yandje yokombanda. Iho katji tjitirwe. Otja ozombura tjaaze kayenda, okulesa omahungi nge ri mOmbeibela ohunga novakarere va Jehova mba undjire ku ye okuyenenisa omakwizikiro we, ye ndji vatera kutja mbi undje ku Jehova okuyenenisa omakwizikiro we. Mba lesa ohunga na Noa, Abraham, Josef na varwe mba undja oruveze orure kokutja ve mune ondjambi yawo okuza ku Jehova. Okukara nongamburiro kutja omakwizikiro maye yenenisiwa kwa vatera varwe na ami okukambura kutja ouye oupe u ri popezu.” Ovengi varwe mba karera Jehova oruveze orure ve noumune otjingewo.

18. Okutara koviutwa maku kurisa vi ongamburiro yetu mouye oupe mbu mau ya?

¹⁸ Otjingaperi kutja ouye oupe ngunda kau ye ya. Nungwari ripura noviṋa mbi tu muna tjimuna ozonyose, omiti, ovinamuinyo novandu. Kape nomundu ngu ma keyakeya kutja oviṋa avihe mbi oku vi ri, nandarire kutja pa ri oruveze ovyo ndu vi ha ri ko. Ovyo oku vi ri mena rokutja Jehova ongwe vi mema. (Gen. 1:1, 26, 27) Mukuru wetu wa kwizika kutja ma meme ouye oupe wina. Eye ma yenenisa omakwizikiro ngo. Mouye oupe ovandu mave kayorokera omuinyo waaruhe nomberukiro ombwa. Eṱe matu yenene okukara nongamburiro kutja ouye oupe mau ya moruveze Mukuru ndwa twa po.—Jes. 65:17; Omavan. 21:3, 4.

19. Omomiano viṋe mu mo yenene okukurisa ongamburiro yoye?

¹⁹ Nai ungurisa oruveze ndu u na ro okukurisa ongamburiro yoye. Raisa ondangi kotjisuta tjonguturiro. Ripurira komasa wa Jehova. Tjita oviṋa mbi mavi tjiti kutja u tumbuke popezu na Jehova. Tji wa tjiti nao mo rire umwe vaimba ‘mbe nongamburiro nomuretima, kutja mave karumata imbi Ndjambi mbya kwizika.’—Hebr. 6:11, 12; Rom. 5:5.