1. Kahurura kutja ovikwaye mbya tjitwa indu Jesus tja tjita otjihimise tje otjitenga?

 RIPURA nombura ndji 29 O.Z pomautiro wotjiungura tja Jesus tjokuzuvarisa. Jesus na ina Maria, novahongewa ve tjiva va ṋangwa komukandi moKana, okarongo ku ka ri komanene wa Nasaret. Maria wa ri epanga reṱunḓu ndo, nu pe munika tjimuna aa vatere nokuyandja ombango kovandu mba ṋangwa. Posi ya ngunda ve ri momukandi, omavinu ya manuka. Ngahino mena rokutja ovandu va ri ovengi. Nu otjiṋa ho mape ya atji eta ohoṋi keṱunḓu novakupasane. b Maria wa hakahana a i komuatje we nu atja: “Owo kave tji nomavinu.” (Joh. 2:1-3) Jesus wa tjita vi? Eye wa tjita otjihimise tjapeke mokutanaurira omeva ‘momavinu omawamawa.’—Joh. 2:9, 10.

2-3. (a) Jesus aa tjiti ovihimise viṋe? (b) Ouwa waye mbu matu munu indu tji matu konḓonona ovihimise Jesus mbya tjita?

² Jesus wa tjita ovihimise ovingi vyarwe motjiungura tje tjokuzuvarisa. c Eye wa ungurisa omasa we okuvatera ovandu ovengi. Otjotjihorera, eye wa parura ovarumendu 5 000 nu oruveze rwarwe a parura ovarumendu 4 000. Ovandu avehe kumwe mape ya va ri otjivarero tjokombanda yo-27 000 ku novakazendu novanatje mba ri mbo wina. (Mat. 14:15-21; 15:32-38) Povikando  mbyo, Jesus wina wa verura ovandu ovengi mba verere. (Mat. 14:14; 15:30, 31) Ripura uriri nomuano otjimbumba tjovandu mu tja temisirwe okumuna Jesus tji me ve verukisa nokuveparura.

³ Eṱe ndino matu yenene okurihongera ko ovingi okuza kovihimise Jesus mbya tjita. Morupa ndwi, matu kahungirira kutja omomuano uṋe ovihimise mbyo mu mavi kurisa ongamburiro yetu. Nu okuzambo, matu kakonḓonona omuano mu matu yenene okuhorera komerisusuparisiro notjari Jesus tjaa raisa indu tjaa tjiti ovihimise mbyo.

4. Ovihimise Jesus mbya tjita vi tu honga omapu nge kurisa ongamburiro yetu mu uṋe?

⁴ Ovihimise Jesus mbya tjita vi tu honga omapu nge kurisa ongamburiro yetu mu ye na wina mu Ihe. Omena rokutja, Jehova ongwa yandja omasa ku Jesus okutjita ovihimise mbyo. Oviungura 10:38 ri tu raera kutja: “Ndjambi tje mu [Jesus] twirisa nOmbepo Ondjapuke nomasa. Eye iya ryanga akuhe ama tjiti ouwa nama verukisa avehe mba ri kehi youvara waSatan, Ndjambi tjinga a ri puna Ye.” Zemburuka wina, kutja Jesus aa horere komeripura nongaro ya Ihe moviṋa avihe mbyaa hungire nokutjita, nu imbyo vi kamburira mo ovihimise mbya tjita. (Joh. 14:9) Ngatu tare komapu yetatu, ngu matu yenene okurihongera ko kovihimise Jesus mbya tjita.

5. Otjikeṋa tjaatji hingi Jesus okutjita ovihimise? (Mateus 20:30-34)

⁵ Epu etenga, Jesus na Ihe ve tu suvera tjinene. Indu Jesus tja ri kombanda yehi, eye wa raisa omuano mbwa suvera ovandu mokuungurisa omasa ye okuvatera imba mba ri mouzeu. Otjikando tjimwe, ovarumendu vevari mba poṱuparere ve mu ningira kutja me ve vatere. (Lesa Mateus 20:30-34.) Jesus “we ve ṱira ondjenda,” nu okuzambo e ve verukisa. Omambo nga “we ve ṱira ondjenda” mOtjigrike ye heya kutja okuṱotjari tjiri okuza komutima. Otjari otja iho, wina tja hinga Jesus okuraisa orusuvero kovandu mokuparura imba mba ṱire ondjara, nokuverukisa omundu ngwa verere omutjise wongana. (Mat. 15:32; Mar. 1:41) Eṱe tu nongamburiro kutja Jehova Mukuru “omunatjari,” nOmuna we ve tu suvera tjinene nu ve hihamwa indu ovandu tji mave munu omauzeu. (Luk. 1:78; 1 Petr. 5:7) Owo tjiri ve undja nonḓero okukaisa po omauzeu ayehe nge ṱuna kovandu.

6. Mukuru wa yandja omasa waye ku Jesus?

⁶ Oritjavari, Mukuru wa yandja omasa ku Jesus okuzengurura omauzeu ayehe yovandu. Indu Jesus tjaa tjiti ovihimise, eye wa raisa kutja ma yenene okuzengurura omauzeu ayehe eṱe ngu tu hi nokuyenena okuzengurura oveni. Otjotjihorera, eye u nomasa wokutukutura koviṋa avihe mbi tu yetera omauzeu, tjimuna ouvi mbu twa rumata noviṋa avihe mbi za mouvi, mbi mavi kamburire mo omitjise nonḓiro. (Mat. 9:1-6; Rom. 5:12, 18, 19) Ovihimise mbya tjita vi raisa kutja eye ma yenene okuverukisa omitjise “omingi pekepeke” nokupendura ovaṱi. (Mat. 4:23; Joh. 11:43, 44) Eye wina, u nomasa wokuporimanisa ovivepo ovizeu nu ma yenene okukutura ovandu kozombembo ozohakohoke. (Mar. 4:37-39; Luk. 8:2) Tjiri otjihuhumiṋe okutjiwa kutja Jehova wa yandja omasa nge ṱa mbo kOmuna we.

7-8. (a) Ovihimise Jesus mbya tjiti vi tu pongamburiro yaye? (b) Otjihimise tjiṋe tji u vanga okukamuna mouye oupe?

⁷ Oritjatatu, eṱe matu yenene okukara nongamburiro okuura kutja omakwizikiro woviṋa oviwa Ouhona wa Mukuru mbu wa kwizika maye yenenisiwa. Ovihimise Jesus mbya tjita indu tja ri kombanda yehi vi tu honga kutja eye ma katjita nao mouye auhe mena  rokutja Ombara yOuhona wa Mukuru womeyuru. Ripura uriri kutja ouye mau sana pi kehi yomananeno ya Kristus. Eṱe matu kayorokera ouveruke ouwa, mena rokutja eye ma kaisa po omitjise avihe nomaungundipare ngu tu na wo. (Jes. 33:24; 35:5, 6; Omavan. 21:3, 4) Eṱe katu nokukaṱondjara rukwao poo okutjinda omaumba nge za moviṋa tjimuna ovivepo ovinaumba nomanyinganyingiro wehi. (Jes. 25:6; Mar. 4:41) Nu matu kara nondjoroka okukayakura ovasuverwa vetu mba ṱa tji mave pendurwa “momayendo wawo.” (Joh. 5:28, 29) Otjihimise tjiṋe tji u vanga okukamuna mouye oupe?

⁸ Indu Jesus tja tjiti ovihimise, eye wa raisa omerisusuparisiro notjari, mbi ri ovikaṋena mbi matu sokuhorera ko. Ngatu tare kovihorera vivari, amatu utire kotjihorera tjomukandi tji tja ri moKana.

9. Hapo Jesus wa tjita vi pomukandi? (Johanes 2:6-10)

⁹ Lesa Johanes 2:6-10. Indu omavinu tji ya manuka pomukandi, hapo Jesus a undjirwa ko okutjita otjiṋa? Kako. Kape nomaprofetero mOmbeibela nge hungira kutja Messias ma sokutjita otjihimise tjokutanaurira omeva momavinu. Ripura uriri kutja otjo fula vi indu omavinu tji ya manuka pomukandi woye. Jesus mape ya wa ṱotjari keṱunḓu ndo nu tjinenenene kovakupasane, nu eye kaa vanga kutja ve ṱohoṋi. Ku nao, eye wa tjita otjihimise tji tja tamunwa pomautiro worupa ndwi. Eye wa tanaura omeva wozolitera ape 390 momavinu omawa. Mape  ya wa ungura omavinu omengi kutja pe kare omavinu ngu mave yenene okuungurisa moruyaveze, poo nandarire ovakupasane mba ngu mave randisa kutja ve munine po otjimariva. Ripura uriri ondangi ovakupasane mbo ndji va ri na yo.

10. Omapu yeṋe tjiva omananḓengu nga tamunwa mu Johanes ekondwa 2? (Wina tara kotjiperendero.)

¹⁰ Ngatu tare komapu tjiva omananḓengu nga tamunwa mu Johanes ekondwa 2. Hapo wa munu kutja Jesus ke urisire omeva movindja? Eye wa raera ovakarere okuurisa ovindja nomeva moruveze rwokunanena ombango ku ye omuini. (Ezeva 6, 7) Nu kombunda yokutanaurira omeva momavinu omawa, Jesus ke na pa toora omavinu nga omuini okutwara komutye womariro. Nungwari, eye wa raera ovakarere okutjita nao. (Ezeva 8) Jesus ka toorere ekopi romavinu na yere meyuru komurungu wovandu mba ri mbo na tja, ‘Roreye omavinu omawa ami ngu mba ungura nga.’

11. Matu rihongere ko ye kotjihimise tja Jesus?

¹¹ Matu yenene okurihonga tjike okuza kotjihimise tja Jesus indu tja tanaura omeva momavinu? Eṱe matu yenene okurihongera ko omerisusuparisiro. Jesus ke na pe ritongamisira otjihimise ho, nu nandarire ke na pe ritongamisira oviṋa mbya tjita. Nungwari, eye nomerisusuparisiro wa kara pokuyandja ohiviro nondjozikiro ku Ihe. (Joh. 5:19, 30; 8:28) Indu tji twa horere ku Jesus mokukara nomerisusuparisiro, eṱe kamaatu ritongamisire oviṋa mbi matu tjiti. Kainatja kutja matu ungura tjike motjiungura tja Jehova eṱe katu sokuritongamisa, nungwari matu sokuyandja ohiviro aihe ku Mukuru wetu omuwa, ngwe tu pa ondjingonekero yokumukarera. (Jer. 9:23, 24) Ngatu kayende komurungu okumupa ohiviro ndje mu pwire. Kombanda yaavihe, kape notjiṋa ngamwa tji matu yenenisa nokuhinombatero ya Jehova.—1 Kor. 1:26-31.

12. Omomuano uṋe warwe mu matu yenene okuhorera komerisusuparisiro wa Jesus? Yandja otjihorera.

¹² Ngatu tare komuano warwe mu matu yenene okuhorera komerisusuparisiro wa Jesus. Tara kotjihorera hi. Omunene wombongo wa ungurisa oruveze rwe oruingi okuvatera omuvatere wombongo okurirongerisa kehungi re etenga. Mena rokutja omunene wombongo we mu vatera, omukambure omukwetu omutanda wa yandja ehungi ewa nda tjita kutja ombongo i tjaterwe. Kombunda yombongarero, omundu umwe we ya komunene wombongo na tja: ‘Mbuti rive wa yandja ehungi ewa.’ Hapo omunene wombongo ma hepa okutja: ‘Ii, posi ya mba ungurisa oruveze oruingi okumuvatera’? Poo mape ya nomerisusuparisiro a tja: ‘Ii, wa yandja ehungi ewa. Tjiri, we ndji tjatere.’ Indu tji tu ri overisusuparise, eṱe katu hepa okutangwa mena roviṋa oviwa mbi tu tjitira varwe. Eṱe tu kara nohange mena rokutja tu tjiwa kutja Jehova u muna nu u vara imbi mbi twa tjiti. (Sasaneka Mateus 6:2-4; Hebr. 13:16) Tjiri tu tjata ku Jehova indu tji matu horere ku Jesus mokuraisa omerisusuparisiro.—1 Petr. 5:6.

13. Jesus wa muna ye popezu notjihuro Nain, neye wa tjita tjike? (Lukas 7:11-15)

¹³ Lesa Lukas 7:11-15. Ripura notjitjitwa tji tja tjitwa oruveze Jesus tja zuvarisa. Eye wa ya koNain, otjihuro moGalilea tji tji he ri kokure na Sunem, oruveze omuprofete Elisa ma pendura omuzandona womukazendu, ozombura ape 900 komurungu wanao. (2 Ozomb. 4:32-37) Indu Jesus tje ya popezu nomuvero wotjihuro, eye wa muna ovandu amave piti motjihuro okukapaka. Indjo tjiri ya ri ongaro onḓeu, mena rokutja omukazendu omuhepundu wa zepaisa omuatje we erike. Posi yokutja, omukazendu omuhepundu ngwa ri moruhoze ngwi kaa ri erike, eye wa ri pu notjimbumba tjovandu okuza motjihuro. Jesus wa tjaera ovandu  okukapaka, neye wa tjita otjihimise mokupendura omuatje omuzandu womukazendu ngwa ri moruhoze. Indjo ya ri ombendukiro ondenga yozombendukiro ndatu za Jesus nḓa tamunwa mOmaevangeli.

14. Omapu yeṋe tjiva omananḓengu nge ri mehungi ndi ri mu Lukas ekondwa 7? (Wina tara kotjiperendero.)

¹⁴ Tara komapu tjiva omananḓengu nge ri mehongwa ndi ri mu Lukas ekondwa 7. Ove wa munu kutja Jesus wa “muna” omukazendu ngwa ri moruhoze nu okuzambo “we mu ṱira ondjenda”? (Ezeva 13) Ngahino Jesus we mu muna ma riri otja tjaa kayenda meṋe yorurova rwomuatje we, nu we mu ṱira ondjenda. Jesus ke na pa raisa ondjenda uriri komukazendu ngwi, nungwari we mu raisira otjari. Mape ya eye wa hungira ku na ye neraka etarazu na tja: “O riri!” Nu okuzambo, eye wa tjita otjiṋa okumuvatera. Eye wa pendura omuatje ne “mu yandja ku ina.”—Ezeva 14, 15.

15. Ovikwaye mbi matu rihongo okuza kotjihimise tja Jesus?

¹⁵ Matu rihongere ko tjike kotjihimise tja Jesus indu tja pendura omuatje womuhepundu? Matu rihongo kutja matu hepa okuraisa otjari ku imba mbe ri moruhoze. Otjingaperi kutja eṱe kamaatu yenene okupendura ovaṱi tjimuna Jesus. Posi ya matu yenene okuraisa otjari ku imba mbe ri moruhoze mokuyandja ombango ku wo, tjimuna Jesus. Eṱe matu yenene okuraisa otjari mokuhungira nokutjita oviṋa mbi mavi ve vatere nokuvehuhumiṋa. d (Omiano 17:17; 2 Kor. 1:3, 4; 1 Petr. 3:8) Omambo omasupi novitjitwa oviwa nandarire kutja oviṱiṱi, mavi yenene okuveyanḓiparisa nokuvehuhumiṋa tjinene.

16. Otja tji pa raisiwa motjiperendero, ovikwaye mbi mo rihongo okuza kotjihorera tjomukazendu ngwa zepaisa omuatje we katjisupi?

¹⁶ Tara kotjihorera. Ozombura tjiva nḓa kapita ngunda amave imbura eimburiro pombongarero yombongo, omukazendu omukambure wa muna omukazendu ngwa ri popezu na ye ama riri. Eimburiro ndo aari tamuna omaundjiro wombendukiro, nomukazendu ngo wa zepaisa omuatje we omukazona katjisupi. Ku nao, omukazendu omukambure wa ya komukazendu  ngo ne mu handa nu ave imbura pamwe eimburiro ndo nga komaandero. Omukazendu ngo wa tja: “Ami tjiri mba muna orusuvero rwovakambure ovakwetu.” Eye wa ri nondangi tjinene kutja wa ya kombongarero yombongo. Eye wa tja: “PEtuwo rOmerikotameneno opu tu muna ombatero.” Eṱe matu yenene okukara nongamburiro kutja Jehova u muna nu u vara nandarire oviṋa oviṱiṱi mbi tu tjita okuraisa otjari ku imba mbe ri moruhoze nu “mbe rihahiza.”—Eps. 34:18.

17. Twe rihongo ye morupa ndwi?

¹⁷ Eṱe matu yenene okuyanḓiparisiwa tjinene indu tji twa konḓonona omahungi nge ri mOmbeibela ohunga novihimise vya Jesus. Oyo ye tu honga kutja Jehova na Jesus ve tu suvera tjinene nokutja Jesus u nomasa okuzengurura omauzeu ayehe wovandu. Nu matu yenene okukara nongamburiro momakwizikiro ngu maye yenenisiwa moruveze rwatjimanga, indu Ouhona wa Mukuru tji wa utu okuhonapara kombanda yehi. Indu tji matu konḓonona omahungi ngo, matu yenene okuripurira ko oukoto komiano mu matu yenene okuhorera kovikaṋena vya Jesus. Ove mo yenene okutjita omakonḓononeno woye omuini poo Omakonḓononeno wEṱunḓu ngu maye yandja ombango kovihimise vya Jesus vyarwe. Tara kutja ovikwaye mbi mo yenene okurihonga, nu okuzambo raera varwe oviṋa mbi we rihongo. Ove mo yenene okukara nomahungi omengi omayanḓiparise indu tji wa tjiti nao.—Rom. 1:11, 12.

18. Matu kahungirira ku ye morupa ndu maru kongorere ko?

¹⁸ Kuṱa komaandero wotjiungura tje tjokuzuvarisa, Jesus wa tjita otjihimise tje otjitjatatu notjisenina tjombendukiro. Posi ya, iho tja pangukire mena rokutja eye wa pendura epanga re nda suverere nu ozongaro za pangukire. Ovikwaye mbi matu yenene okurihonga okuza kotjihimise hi? Nu omomuano uṋe matu yenene okupamisa ongamburiro yetu momaundjiro wombendukiro? Orupa ndu maru kongorere ko maru kazira omapuriro ngo.