1. Ongwaye tji tu zira pozombongarero?

 ONGWAYE tji tu kara pozombongarero zombongo? Epu enenenene, okutanga Jehova. (Eps. 26:12; 111:1) Eṱe wina tu kara pozombongarero zombongo kokutja tu yenene okuyanḓiparisasana moruveze oruzeu ndwi. (1 Tes. 5:11) Indu tji matu ziri pozombongarero zombongo, eṱe tu yenenisa oviṋa vivari mbyo.

2. Oruṋe tji tu yenena okuzira pozombongarero?

² Eṱe tu yenena okuzira pozombongarero zetu otjivike atjihe. Otjotjihorera, komaandero wotjivike eṱe tu yenena okukara norupa momakonḓononeno wOruhungu. Pozombongarero zomokati kotjivike, eṱe tu yenena okuzira potupa twi Okupaha ovihuze mOmbeibela, Omakonḓononeno wOmbeibela wOmbongo, na potupa twarwe.

3. Ovikeṋa mbi mape ya avi tjiti kutja atu ha ziri, nu omomuano uṋe Ovaheberi 10:24, 25 mu mari tu vatere?

³ Eṱe atuhe tu vanga okutanga Jehova nokuyanḓiparisa ovakambure ovakwetu. Posi yokutja, mape ya ape kara oviṋa mbi mavi tjiti kutja i rire ouzeu kweṱe okuzira. Eṱe mape ya atu tira okuzira poo mape ya atu vanga okuyandja omaziriro povikando ovingi, posi yokutja ingwi ngu ma hongorere po a ha yenene okutupura indu tji twa yere eke. Ovikwaye mbi mavi yenene okutuvatera? Imbi omuapostele Paulus mbya tjanga kOvaheberi mavi yenene okutuvatera okumuna eziriro. Indu tja hungira ohunga nounanḓengu wokukara pozombongarero, eye wa  tja matu sokuyandja ombango ‘okupanḓiparisasana.’ (Lesa Ovaheberi 10:24, 25.) Indu tji matu tjiwa kutja varwe mave yenene okuyanḓiparisiwa i yongamburiro yetu, nandarire tji matu yandja eziriro esupi, eṱe katu kara nemuma tjinene. Nu indu tji tu ha ningirirwe potuingi okuzira, eṱe matu yenene okukara nondjoroka kutja varwe mombongo va yenene okuzira.—1 Petr. 3:8.

4. Omapu yeṋe yetatu ngu matu kahungirira ko morupa ndwi?

⁴ Morupa ndwi, rutenga matu kahungirira komuano mu matu yenene okuyanḓiparisasana mombongo onḓiṱi, mu mu notjivaro tjovandu ovaṱiṱi mbe yenena okuyandja omaziriro. Okuzambo, matu kahungirira komuano mu matu yenene okuyanḓiparisasana mombongo onene mu mu novandu ovengi mbe yera omake okuyandja omaziriro. Korusenina, matu kahungirira komuano mu matu yenene okuyanḓiparisa varwe noviṋa mbi matu hungire indu tji matu yandja omaziriro.

5. Matu yenene vi okuyanḓiparisasana indu tji tu he ri ovengi mombongarero?

⁵ Mombongo onḓiṱi, poo otjimbumba, kamu kara novandu ovengi mbe yenena okuzira. Povikando tjiva, omurumendu omukambure ngu ma hongorere po orupa ndwo, mape ya a hepa okuundja kutja pe kare omundu ngu ma yandja eziriro. Iho mape ya atji tjiti kutja ovakambure mombongo ave he rimunu okuyanḓiparisiwa. Mo yenene okutjita vi? Kara nonḓero yokuyera eke aruhe. Tji wa tjiti nao, ove mape ya o hingi varwe okukara norupa tjinene.

6-7. Ovikeṋa mbi mavi ku vatere kutja o ha uruma tjinene indu tji mo yandja eziriro?

⁶ Mo yenene okutjita vi indu tji u tira okuzira? Ovandu ovengi ve fula nao. Posi yokutja, kokutja u yenene okuyanḓiparisa ovakambure ovakweṋu, mo yenene okupaha omiano mbi mavi ku vatere kutja u ha uruma tjinene. Omomuano uṋe mu mo yenene okutjita nao?

⁷ Ove mape ya o paha ombatero okuza motupa twOruhungu tu twa pitisiwa rukuru. b Otjotjihorera, rirongerisa nawa. (Omiano 21:5) Indu tji wa tjiwa nawa epu ndi mari hungirirwa ko, mai rire oupupu okuyandja eziriro. Wina, yandja omaziriro omasupi. (Omiano 15:23; 17:27) Eziriro esupi ri tjita kutja o ha uruma tjinene. Eziriro esupi, nda zikamena komuhewo umwe poo vivari, mape ya a rire oupupu kovakambure ovakweṋu okuzuva nawa, pendje nokuyandja eziriro ere ndi nomapu omengi. Indu tji mo yandja eziriro esupi momambo woye omuini, ri raisa kutja ove we rirongerisa nawa, nu wa zuu nawa epu ndi mari hungirirwa ko.

8. Omomuano uṋe Jehova me vara ozongondjero zetu?

⁸ Posi ya tjike indu tji u kondja okuungurisa oumune mbwo, nu ngamba u uruma tjinene okuyandja eziriro rimwe poo yevari? Tjiwa kutja Jehova u nondangi kozongondjero zoye zokuyandja eziriro otja pu mo yenene. (Luk. 21:1-4) Jehova ka ningire kutja u tjite ovingi okukapita imbi mbi mo yenene okutjita. (Fil. 4:5) Rimanena okutjita imbi mbi mo yenene okutjita, twa po ondando, nu kumba kutja omutima woye u porimane. Poutenga, mape ya ondando ndjo a rire okuyandja eziriro rimwe esupi.

9. Ongwaye tji mape ya a rire ouzeu okuyandja eziriro mozombongo ozonene?

⁹ Indu ombongo yeṋu tji i novazuvarise ovengi, ove mape ya o munu ouzeu warwe. Mape ya ovakambure ovengi ve yera omake, nu iho  tji tjita kutja ove o ha ningirwa okuzira. Otjotjihorera, Danielle aruhe aa kara nondjoroka okuzira pozombongarero. c Eye u vara okuzira otjorupa rwomerikotameneno, nomuano wokuyanḓiparisa varwe, nomuano wokukurisa ongamburiro ye mu imbi Ombeibela mbi i honga. Posi yokutja, indu tja tjindira kombongo onene, eye kaa ziri aruhe, nu nandarire povikando tjiva kaa ningirwa okuzira pombongarero aihe. Eye wa tja: “Iho tje ndji kurungisa. Ami ee munu kutja ee kaere ondjingonekero yokuzira. Indu otjiṋa ho tji tja utu okutjitwa povikando ovingi, ove u uta okumuna kutja otjiṋa ho matji tjitirwa owina.”

10. Omomuano uṋe mu matu yenene okukondja kutja tu yandja omaziriro?

¹⁰ Hapo ove wa rora okurimuna mongaro ya Danielle? Tji pe ri nao, ove mape ya o yumbu ohama no utu okupuratena uriri. Nungwari, o isa okukondja okuzira. Mo yenene okutjita ye? Ove mape ya o rirongerisa omaziriro omengi pombongarero aihe. Indu tji u ha ningirirwe okuzira pomautiro wombongarero, ove ngunda mo yenene okuzira otja ombongarero tji mai kayenda. Otja tji mo rirongerisa kOmakonḓononeno wOkambo kOruhungu, ripurira komuano oparagrafa aihe mu mai hitasana nepu rorupa ndwo. Tji wa tjiti nao, ove mo yenene okukara neziriro ewa mehongwa ndo. Wina, mape ya o rirongerisa okuzira ozoparagrafa nḓu maze hungire ouatjiri wOmbeibela mbu ri ouzeu okukahurura. (1 Kor. 2:10) Omena raye? Mena rokutja mape ya ape kara ovandu ovaṱiṱi mbu mave ziri otupa two. Hapo mo tjiti vi indu tji wa ungurisa oumune mbwo, posi ya pa kapita ozombongarero tjiva nu ngunda ko ya pewa oruveze okuzira? Ove mape ya o raere omurumendu omukambure ngu ma hongorere po orupa ndwo komurungu yombongarero kutja mo vanga okuzira epuriro riṋe.

11. Ovafilipi 2:4 mari tu tunduuza okutjita tjike?

¹¹ Lesa Ovafilipi 2:4. Nombatero yombepo ondjapuke, omuapostele Paulus wa tunduuza Ovakriste okuyandja ombango kozonḓero zavarwe. Matu yenene vi okuungurira komatunduuziro ngo pozombongarero zombongo? Indu tji matu zemburuka kutja ovakwetu, tjimuna eṱe, mave vanga okukara norupa.

12. Omomuano uṋe mu matu yenene okupanḓiparisa varwe pozombongarero zombongo? (Wina tara kotjiperendero.)

 ¹² Ripurira ku imbi. Ove tji mo hungire ku nomapanga woye, hapo ove otjo hungira tjinene kutja owo ave ha kara norupa? Kako. Ove otjo vanga kutja owo ve kare norupa mehungi. Momuano tjingewo, pozombongarero zombongo tu vanga kutja ovengi ve yandje eziriro. Momuano umwe omuwa mu matu yenene okupanḓiparisa ovakambure ovakwetu, eendu tji matu ve yandjere okuraisa ongamburiro mu imbi mbi mave ziri. (1 Kor. 10:24) Ngatu tare omuano mu matu yenene okutjita nao.

13. Matu yenene okuvatera vi varwe kutja ve yenene okukara norupa mokuyandja omaziriro?

¹³ Omuano umwe, matu yenene okuyandja omaziriro omasupi kutja tu yandjere varwe okukara norupa. Ovanene vombongo na varwe mbe nondjiviro mave yenene okurira otjihorera. Nandarire kutja mo yandja eziriro esupi, kondja kutja o ha yandja omapu omengi. Indu tji wa yandja omapu ayehe moparagrafa, mape kasewa oviṱiṱi ku varwe okuhungira. Otjotjihorera, pe nomapu yevari nga yandjwa moparagrafa ndji. Epu etenga, okuyandja omaziriro omasupi, nepu oritjavari, okukondja okuhinokuyandja omapu omengi. Indu tji wa ṋangwa omutenga okuyandja eziriro moparagrafa ndji, kondja okuzirira kepu rimwe uriri.

14. Otjikwaye tji matu sokuungurisa indu tji matu tye kutja matu yere omake wetu povikando vingapi? (Wina tara kotjiperendero.)

¹⁴ Ungurisa ounongo indu tji mo tye kutja mo ziri ovikando vingapi. Indu tji matu yere omake wetu tjinene, matu ṋiṋikiza omundu ngu ma hongorere po orupa ndwo kokutja me tu yandjere okuzira, ngunda varwe ave hi ya muna oruveze. Iho mape ya atji tjiti kutja varwe ave ha vanga okuzira.—Omuzuv. 3:7.

15. (a) Matu sokutjita vi indu tji tu ha perwe oruveze rwokuzira? (b) Omundu ngu ma hongorere po orupa ndwo ma yenene vi okuripurira kovandu avehe? (Tara kokawongo nga “ Indu tji mo hongorere po.”)

¹⁵ Indu ovazuvarise ovengi tji mave yere  omake wawo morupa ndwo, eṱe mape ya atu ha pewa oruveze okuzira otja pu matu vanga. Povikando, omundu ngu ma hongorere po orupa ndwo, mape ya ehe tu pe oruveze okuzira oparukaze. Iho mape ya atji tu wisa momuinyo, posi ya katu sokupindika indu tji tu ha perwe oruveze okuzira.—Omuzuv. 7:9.

16. Omomuano uṋe mu matu yenene okuyanḓiparisa imba mba ziri?

¹⁶ Indu tji u ha munine oruveze okuzira otja pu mo vanga, ma rire nawa indu tji wa puratene komaziriro wavarwe nu kombunda yombongarero o ve tanga komaziriro ngu va yandja. Indu tji wa tjiti nao, mape ya o yanḓiparisa ovakambure ovakweṋu tjimuna indu tji mo yandja eziriro. (Omiano 10:21) Okutanga varwe, omuano warwe mbu matu yenene okuyanḓiparisasana.

17. (a) Ovanene mave yenene okuvatera vi ovanatje vawo okurirongerisa omaziriro omawa? (b) Okuza kokavidio, omapu yeṋe yane ngu matu sokutara ko, indu tji matu rirongerisa okuyandja eziriro? (Wina tara komambo wokehi.)

¹⁷ Omomuano uṋe mu matu yenene okuyanḓiparisasana tji tu ri pozombongarero? Tji u ri omunene, vatera ovanatje voye okurirongerisa omaziriro otja kozombura zawo. (Mat. 21:16) Povikando tjiva, oviṋa tjimuna omauzeu motukupo, poo ozongaro zomeritjindiro tji mavi hungirwa morupa ndwo, mape ya ape kara oparagrafa imwe poo mbari omuatje ndji  ma yenene okuzirira ko. Nu wina vatera ovanatje voye okuzuva kutja kaaruhe tji mave pewa oruveze okuzira, indu tji va yere eke. Indu tji we ve kahururire nao, matji vatere ovanatje voye kutja ave ha u momuinyo indu varwe tji va toororwa okuzira.—1 Tim. 6:18. d

18. Matu nakaura vi okuyandja ombango kweṱe oveni indu tji matu yandja omaziriro? (Omiano 27:2)

¹⁸ Eṱe atuhe matu yenene okurirongerisa omaziriro omayanḓiparise ngu maye yandja ondjozikiro ku Jehova nokuyanḓiparisa ovakambure ovakwetu. (Omiano 25:11) Nandarire kutja povikando tjiva tu yandja omaziriro ohunga noviṋa mbya tjitwa kweṱe, tu sokukondja kokutja atu ha hungire tjinene ohunga na eṱe oveni. (Lesa Omiano 27:2; 2 Kor. 10:18) Nungwari, tu kondja tjinene okuyandja ombango ku Jehova, Embo re, novakarere ve. (Omavan. 4:11) Otjingaperi kutja indu epuriro ndi ri moparagrafa tji mari tu ningire kokutja tu hungire ohunga na eṱe oveni, onawa okutjita nao. Pe notjihorera moparagrafa ndji mai kongorere mba.

19. (a) Hapo matu munu ouwa waye indu tji matu ripurire kovandu avehe pozombongarero zombongo? (Ovaroma 1:11, 12) (b) Hapo ove omuini otjikwaye tji tji ku tjatera ohunga nokuzira pozombongarero zombongo?

¹⁹ Nandarire kutja kape nozoveta zokuyandja omaziriro, eṱe atuhe tu sokukondja oukukutu okuyanḓiparisasana. Ihi matji hee kutja mape ya o hepa okuzira povikando ovingi. Poo ihi mape ya atji hee kutja tu sokukowa momaziriro ngu twa yandja, nokukara nondjoroka kutja varwe ve yenene okuzira wina. Indu tji matu ripurire kozonḓero zavarwe pozombongarero zombongo, iho matji tjiti kutja “atuhe pamwe tu vaterasane.”—Lesa Ovaroma 1:11, 12.