Ehungi raMateus ohunga nongwatero nomautiro wehupo raJesus ra panguka ku indi oraLukas mena rokutja omutjange auhe aa yandja ombango komeripura novitjitwa vyomundu warwe.

Ehungi raMateus ri yandja ombango kovitjitwa mbi mavi tjama na Josef. Oro ri serekarera ongaro Josef ndja raisa rutenga tja zuva kutja Maria otjingundi, noruroto rwe omuengeli me mu kahururira ongaro ma ri nomuano ma toorera omikambo komuhunga mbwa pewa i omuengeli. (Mat. 1:19-25) Ehungi raMateus ri kayenda komurungu okuserekarera ohunga noruroto rwaJosef ma raerwa i omuengeli kutja nga taurire koEngipte, nomatauriro we pu neṱunḓu re. Wina ra kahurura oruroto rwe omuengeli me mu raera kutja nga yaruke kehi raIsrael, nomayarukiro we nondyero ye yokutura moNasaret pu neṱunḓu re. (Mat. 2:13, 14, 19-23) Momakondwa yevari omatenga wEvangeli raMateus, ena raJosef ra tamunwa povikando 13, posi yokutja indi oraMaria ra tamunwa povikando 8 uriri.

Nungwari ehungi raLukas ri yandja ombango tjinene ku Maria. Oro ri hungira ohunga na Maria ngwa varurwa i omuengeli Gabriel, na indu tja kavarura omuzamumwe we Elisabet, nomuano Maria ma tanga Jehova. (Luk. 1:26-56) Lukas wina wa tamuna omambo waSimeon ku Maria ohunga nomuano Jesus mu ma kamuna ouzeu. Nandarire mehungi ohunga neṱunḓu re tji ra ya kOndjuwo ondjapuke yaMuhona indu Jesus tja ri nozombura 12, Lukas wa tjanga omambo waMaria nu kawonga owaJosef. Lukas wa weza kutja Maria wa ṱunwa tjinene i ovitjitwa avihe mbi. (Luk. 2:19, 34, 35, 48, 51) Momakondwa yevari omatenga wEvangeli raLukas, ena raMaria ra tamunwa povikando 15, posi yokutja indi oraJosef ra tamunwa povikando 5 uriri. Okutja Mateus wa kahurura ovingi ohunga nozongendo novitjitwa vyaJosef, ngunda Lukas a yandja ondjivisiro onyingi ohunga notjiungura tjaMaria novitjitwa vye.

Omuze Jesus ma kwatwa wina wa tamunwa momuano mbwa panguka mOmaevangeli yevari nga. Mateus wa tamuna omuze Josef ma kwatwa na raisa kutja Jesus, otjomuzandu waJosef, ongwa ri nousemba wokurumata ouvara waDavid. Omena ratjike? Mena rokutja Josef wa ri ondekurona yOmbara David okupitira momuzandu waDavid wena Salomo. (Mat. 1:6, 16) Lukas wa tamuna eṱunḓu Maria ma kwatwa na raisa kutja Jesus ongu nousemba wokurumata ouvara waDavid. Eye tjiri wa ri ‘Omuna ngwa kwatwa otja ondekurona yaDavid.’ (Rom. 1:3) Omena ratjike? Mena rokutja Maria wa ri ondekurona yOmbara David okupitira momuzandu waDavid wena Natan. (Luk. 3:31) Nu hapo ongwaye Lukas tje ha tamunine Maria otjomusuko waHeli, ngwa ri ihe? Mena rokutja ondeto yomana wovandu potuingi aai kara nomana wovarumendu meṱunḓu ndo uriri. Okutja indu Lukas tja tamuna Josef nemu kahurura otjomuzandu waHeli, ovandu va yakura kutja aa hee kutja Josef wa ri omuzandu omukwe waHeli.—Luk. 3:23.

Ondeto yorukwato rweṱunḓu raJesus mEvangeli raMateus noraLukas i raisa kutja Jesus ongu ri Messias Mukuru ngwa kwizika. Otjiraisiro tjokutja Jesus wa ri ondekurona yOmbara David tja ri otjikahu nawa, nga Ovafarisei nOvasaduke tjaave ha yenene okupataṋisa. Omakahururiro waMateus na inga owaLukas ohunga nomuze Jesus ma kwatwa omananḓengu kongamburiro yetu, nu ye tu pa ongamburiro kutja omakwizikiro warwe Mukuru nga tjita wina maye yenenisiwa.