1. Omomiano viṋe mu matu yenene okuungura puna Jehova?

OMUUTE waavihe wa tara nu a munu kutja ovandu ovahahomonena mave yenene okuungura puna ye okuyenenisa ondando ye. Nandarire kutja ovandu ovanauvi, imba ovaṱakame avehe mave yenene okuungura puna Jehova eyuva arihe. Otjotjihorera, eṱe tu rira “ovaungure vapamwe vaNdjambi” tji matu zuvarisa ombuze ombwa yOuhona we nokuisapo ovandu ovahongewa. (1 Kor. 3:5-9) Hapo nao indjo ka ndjingonekero ya peke okuvarwa otjovandu vonḓengu yokombanda mokuungura puna ingwi Omunamasaehe nu Omuute waavihe, moviungura eye mbye vara kutja ovinanḓengu tjinene! Nu wina, okuzuvarisa nokuisapo ovandu ovahongewa ka mbi vi ri oviungura aviyerike mbi tu ungura puna Jehova. Orupa ndwi ma ru ṱunu komiano vyarwe mu matu yenene okuungura puna Jehova, mokuvatera omaṱunḓu wetu novakambure ovakwetu, mokusekirisa varwe, mokuvatera otjari na mokuneneparisa otjiungura tjetu ku Jehova.—Kol. 3:23.

2. Ongwaye tje he ri nawa okusasaneka imbi mbi tu ungurira Jehova kuna imbi ovakwetu mbi ve yenena okumuungurira?

² Otja tji matu ka konḓonona oviṋa mbi, ove o utu okusasaneka imbi mbi u yenena okuungurira Jehova kuna imbi ovakweṋu mbi ve  yenena okuungura. Zemburuka kutja ka tu nozombura zemwe, ka tu nouveruke umwe, nozongaro zemwe zehupo, nu ka tu nomasa nomasorero yemwe okuza komundu nga komundu. Omuapostele Paulus wa tja: “Auhe nge rinongonone otja komeritjindiro we omuini. Nu tja munu kutja ovitjitwa vye oviwa, eye ma yenene okurihivira vyo nokuhinokuvisasaneka na imbi vyomukwao.”—Gal. 6:4.

3. Ongwaye tji matu yenene okutja ingwi ngu ma tumbu eṱunḓu re ma ungura puna Mukuru?

³ Jehova u undjira kokutja ovakarere ve ve ṱakamise omaṱunḓu wawo. Otjotjihorera, ove mape ya u sokuungura kutja u vatere ovasuverwa voye nokamariva. Ovakazendu ovengi ve kara ponganda kutja ve tjevere ounatje wawo. Nu ovanatje mbu va rire ovanene mape ya ve sokuvatera ovanene vawo mbu va mana omasa. Nu imbi oviṋa ovinanḓengu tjinene. Embo ra Mukuru ri tja: “Nungwari omundu ngamwa tje hi nokuṱakamisa ovazamumwe na ye, nu tjinene imba ovonganda ye omuini, eye wa pataṋa ongamburiro youkriste, neye omuvi tjinene okukapita omuhakambura.” (1 Tim. 5:8) Ndovazu u nomerizirira tjimuna ngo, tjiri mape ya o ha kara noruveze oruingi motjiungura tjokuzuvarisa na vyarwe mombongo, tjimuna po tjovanga okutjita. O roro okurikenda! Jehova u tjaterwa tjinene indu ove tji mo hupisa eṱunḓu roye wina.—1 Kor. 10:31.

4. Ovanene mave twa po vi Ouhona wa Mukuru poruveze orutenga, nu okutjita nao ku eta ye?

⁴ Ovanene Ovakriste ve ungura puna Jehova mokutwapo Jehova poruveze orutenga mehupo rawo nu iho tji rira otjihorera otjiwa kovanatje vawo. Ovanatje mbe ku risiwa i ovanene mba raisa otjihorera otjiwa, ndino ve ungurira Jehova oruveze aruhe nandarire kokure nehi rawo. Tjiva ovahindwa; varwe ve karera koṋa ku ku nouhepe wovazuvarise; nu tjiva ve karera po Betel. Nu ihi tji ve twara kokure noveṱundu rawo. Posi yokutja, ovanene mba suvera Jehova nu mbu ve ri yandjerera ye tjiri, ve tunduuza ovanatje vawo okukaenda komurungu okukarera Jehova. Omena raye? Owo ve muna ondjoroka onene okuzuva kutja ovanatje vawo ve twa po Ouhona wa Mukuru poruveze orutenga. (3 Johanes 4) Mape ya kutja otjingi tjovanene mba ve ri tjimuna Hana, ngwa raera Jehova kutja eye me mu “yapurire” omuatje we omuzandu Samuel. Ovanene mba ve vara omaunguriro wa puna Jehova ngo otjondjingonekero onene. Owo kave noviṋa vyarwe mbi ve vanga.—1 Sam. 1:28.

5. Mo yenene vi okuvatera ovandu mombongo? (Tara kotjiperendero pomautiro worupa ndwi.)

⁵ Tji u hi nomerizirira omengi weṱundu, mape tjiti vi tji wa vatere ovakambure ovakweṋu mbe kondja novakurundu, novakurundu mba vera, poo imba mbe nouhepe? Ma rire nawa tji wa tara mombongo okupaha kutja ouṋe mbu mo yenene okuvatera. Mo yenene okukara pu nomukurundu kutja ingwi ngu mu tjevera aruhe ma yenene okukaungura oviṋa vyarwe. Poo mo yenene okuvetwaerera kombongarero yombongo, okukaranda ovihepwa vyawo, poo okuvehinga ku mave hepa okuyenda, poo nandarire okuriyandjera kutja ve ku hinde kostora tji mave hepa omundu, nokukatara ovavere konamiti. Mokutjita mbyo, mape ya o rire eziriro ra Jehova kongumbiro yomundu ngo.—Lesa 1 Ovakorinte 10:24.

6. Okurira omusekirise ku kamburira mo ye?

⁶ Ovaungure va pamwe na Njdambi ve tjiukirwa ko kusekirisa varwe. MOmatjangwa wOtjigrike, embo ndi “okusekirisa” ri heya “okuraisa otjari kovandu mbu hi nokutjiwa.” (Hebr. 13:2.) MEmbo ra Mukuru mu nomahungi nge tu honga okuraisa orusuvero ndo. (Gen. 18:1-5) Matu sokupaha omiano vyokuvatera varwe aruhe,  nandarire kutja ‘ovakamburiro ovakwetu’ poo indee.—Gal. 6:10.

7. Ongwaye tji matu sokuripurira kokusekirisa ovakambure mbe karera Jehova aruhe?

⁷ Mo ungura vi puna Mukuru mokusekirisa ovakambure ovakweṋu mbe ku varura ehi reṋu okumuvatera notjiungura tjokuzuvarisa? (Lesa 3 Johanes 5, 8.) Otuveze otja i to tu yandja oruveze ‘okuvaterasana mongamburiro.’ (Rom. 1:11, 12) Tara kotjihorera tja Olaf. Eye wa tja u zemburuka ombura imwe rukuru, mombongo ka mwa ri omundu ngwa yenene okusekirisa omutarere ngu varura ozombongo, ngwa ri omukombe. Olaf ngwa ri omutanda wa ningira ovanene ve mbe ha ri Ovahongonone va Jehova okusekirisa omutarere wombongo po ya wo. Owo va itavera posi yokutja va tja Olaf ma rara kotjisita. Tjiri otjiṋa hi tje mu yetera ouwa. Olaf wa tja: “Tjiri iho tja ri otjivike otjiwa omundu tji u hi nokuzemba! Ami nomutarere wombongo aa tu penduka rukuru nu aa tu kara nomahungi omawa tjinene periro romuhuka. Omatunduuziro ngu mba muna ya tjita kutja mbi ku rise onḓero yandje yokuungurira Jehova oruveze aruhe.” Oure wozombura 40, Olaf wa karera Jehova momiano omingi pekepeke.

8. Ongwaye tji matu sokuraisira varwe otjari nandarire kutja kotjirutenga kave nokuraisa ondangi? Kahurura.

⁸ Ove mo yenene okuraisa orusuvero kovandu mbu hi nokutjiwa momiano omingi nandarire kutja ka ve nokuraisa ondangi pomautiro. Tara kotjihorera hi. Ngunda ama hongo Ombeibela, omuzuvarise moSpain wa muna kutja omuhongewa we Yesica, ngwa za ko Ecuador, aa kara pokurira aruhe. Omuzuvarise ngwi we mu pura kutja u nouzeu wa ye. Yesica we mu serekarera oviṋa mbya tjita tja ri kehi ra wo, we mu raera kutja wa ri omusyona tjinene nga tje ha yenene okukara notjiṋa okurya oparukaze. Otjiṋa tja yenene okuyandja kokanatje ke ya ri omeva uriri. Yesica wa kondjisa okukerarisa ama kumbu ku Mukuru okuningira ombatero. Nu kombunda ya nao, Ovahongonone vevari ve ya po ye, posi yokutja Yesica ee ve nyengwa nu wa taura oumbo mbu ve mu pa. Nu arire tje ve rokohere na tja: “Imbi oo vikurya mbi ma mu vanga kutja mbi yandje kokanatje kandje?” Ovakambure mba va kondjisa okumutunduuza, nungwari ozongondjero zawo za ri mo nyee. Kombunda eyuva ndo, ovakambure mba va eta otjimbamba tjovikurya na ve twa pomurungu wondjuwo ye. Yesica wa ṱunwa tjinene tja muna omuano mbwa raisirwa otjari nu wa fula na vi kutja ka puratenene komuano Mukuru ma zuvira ongumbiro ye rutenga. Nai, eye we rimanena okukarera Jehova. Tjiri ongaro yawo ombwa ndjo ya eta ouwa!—Omuzuv. 11:1, 6.

9, 10. (a) Oruṋe momakuruhungi wOmbeibela paa pe heperwa ovandu okuvatera? (b) Ovikwaye tjiva ovarumendu mombongo mbi ve vatere na vyo?

⁹ Mekuruhungi rOvaisrael, popengi aa pe hepa ovandu ovavatere. (Eks. 36:2; 1 Ekuruh. 29:5; Neh. 11:2) Ndino, ove wina u nomiano omingi mbi mo yenene okuvatera mokuungurisa oruveze roye, oviungurisiwa vyoye, nondjiviro ndji u na yo kutja u vatere ovakambure ovakweṋu. Indu tji wa tjiti nao mo kara nondjoroka tjinene nu mo serwa ozondaya okuza ku Jehova kokuriyandjera omuini.

¹⁰ Embo ra Mukuru ri tunduuza ovarumendu mombongo okuungura puna Jehova mokukara nomerizirira mombongo nokurira ovanene vombongo. (1 Tim. 3:1, 8, 9; 1 Petr. 5:2, 3) Imba mbe tji ta nao owo ve vanga okuvatera varwe okukurisa oupanga wawo kuna Jehova na moviṋa vyarwe. (Oviung. 6:1-4) Omunene wombongo wa rora okukuningira kutja u vare ovandu mombongo poo okuvatera nokuyandja omambo, otuveze ku maku sokukazuvarisiwa, omaṱunino woviṋa, poo noviṋa vyarwe? Imba mbe vatera noviṋa mbyo mave ku raere ondjoroka ndji ve muna mokuvatera varwe.

11. Omukazendu umwe wa muna ouwa wa ye moupanga mbwa tjita indu tja ri morupa romatungiro?

 ¹¹ Imbo mbe vatera noviṋa tjimuna omatungiro ve muna omapanga omape. Tara kotjihorera tja Margie, omukazendu omukambure ngwa vatera nomatungiro womatuwo womerikotameneno oure wozombura 18. Oure wozombura nḓa, eye wa vatera omitanda tjiva mokuvepa omahongero ngo. Eye wa muna kutja imbwi omuano omuwa wokutunduuzasane mongamburiro. (Rom. 1:12) Indu tja muna omatokero mehupo re, Margie wa tunduuzwa i omapanga we nga muna moviungura vyomatungiro mbyo. Hapo ove wa rora okukara moviungura vyomatungiro? Ma rire nawa tji wa vatere notjiungura tjorive kutja konounongo poo una wo.

12. Ove mo yenene vi okuvatera imba mba wirwa i oumba?

¹² Indu tji pa kara oumba, ovandu va Mukuru ve kara noruveze okuungura puna Mukuru mokuvatera ovakambure ovakwao momiano pekepeke. Otjotjihorera, owo ve yandja ovimariva okuvatera na vyo imba mba wirwa i omaumba. (Joh. 13:34, 35; Oviung. 11:27-30) Otjiṋa tjarwe matu yenene okuvatera okukohorora omatuwo poo okutungurura. Ondjuwo ya Gabriela, omukazendu omukambure ngwa za ko Poland, ya nyonwa i omupupo omuzeu, indu ovakambure ovakwao tji ve ya okumuvatera eye wa yoroka tjinene. “Hi nokuvanga okuhungira ohunga noviṋa mbi mba pandjara, oviṋa mbyo omawini uriri,” eye wa tja nao. “Nungwari, me vanga okumuraera ohunga noviṋa mbi mba muna. Otjitjitwa hi tje ndji huhumiṋa kutja okurira orupa rOvakriste mombongo ondjingonekero ya peke nu wina ku yeta ondjoroka ya peke.” Ovengi mbe muna ombatero okuza komaumba ngu ve muna ve tja ve tunduuzwa tjinene. Nu imba mbe ungura puna Jehova mokuyandja ombatero pu mai heperwa, ve kara nohange momuinyo.—Lesa Oviungura 20:35; 2 Ovakorinte 9:6, 7.

13. Okuriyandjera okuvatera otjari ku kurisa vi orusuvero rwetu ku Jehova? Yandja otjihorera.

¹³ Stephanie novakambure ovakwao varwe va kara nondjoroka okuungura puna Mukuru mokuvatera ovakambure ovakwao mbe ya moUnited States otjovataure. Owo va vatera okumuna  ozondjuwo nokuzeṱunisa komaṱunḓu nga za motuveze mu mwa ri ovita. “Eṱe twa ṱunwa i ondjoroka ndji va ri nayo nomuano mbwa ve raisa ondangi korusuvero rovakambure ovakwao ouye ongondoroka,” Stephanie wa tja nao. “Omaṱunḓu ngo ye muna kutja eṱe twe ve vatera, nungwari mouatjiri, owo o mbe tu vatera tjinene.” Eye wa weza nomambo ngo, “Orusuvero, ombwaneno, ongamburiro, nomuano mbu twa ṱaṱera ku Jehova tjiri vye kurisa orusuvero rwetu ku Jehova, nu vye tu vatera okukara nondangi ku avihe mbi twa muna mokupitira motjira tja Jehova.”

14, 15. (a) Omuprofete Jesaja wa ri nombepo iṋe? (b) Ovazuvarise vOuhona mave horere vi ku Jesaja ndino?

¹⁴ Hapo ove mo vanga okuungurira Jehova oruveze aruhe? Mape ya rumwe otjindire koṋa kwarwe ku maku hepa ovaungure ovengi motjira tja Jehova? Otjiperi kutja ovakarere va Mukuru kave hepa okuyenda kokure nokozoyao okuraisa otjari tja wo. Posi yokutja ozongaro zovakambure tjiva ze ve yandjera okukavatera kokure nozoyawo. Owo ve na oumune tji muna imbwi owomuprofete Jesaja. Mokuzira epuriro ra Jehova ndi: “Hi hinde aṋi? Owaṋi ngu ma rire omutumwa wetu?” eye wa zira kutja: “Owami ngwi, ndji hinda!” (Jes. 6:8) Hapo ove u nonḓero otjingeyo? Nu hapo pe nouhepe wa ye?

¹⁵ Ohunga notjiungura tjokuzuvarisa nokuisapo ovandu ovahongewa, Jesus wa tja: “Omakondero vari omengi, nungwari imba ovaungure ombe hi nanḓengu. Nambano kumbeye komuini womakondero kutja a tume ovaungure ve kawonge omakondero we.” (Mat. 9:37, 38) Mape tjiti vi tji wa ka vatera koṋa ku maku hepa ovazuvarise, nandarire otjomukandjira? Poo tji wa tunduuza omundu warwe okutjita nao? Ovakambure ovengi va muna kutja omuano omusemba wokuraisa orusuvero ku Mukuru na ku varwe okurira ovakandjira motuveze poo motukondwa mu mu heperwa ovaungure ovengi. U nomiano vyarwe mbi mo munu kutja mo yenene okuneneparisa otjiungura tjoye? Muna ondjoroka onene mokutjita nao.

16, 17. Ovikwaye vyarwe mbi ri po tji mo vanga okuneneparisa otjiungura tjoye ku Jehova?

¹⁶ Ove mo riyandjere okuvatera po Betel poo okuvatera nomatungiro, nandarire otjomuvatere woruveze orusupi uriri? Pe kara ouhepe wovandu aruhe mbu mave yenene okukarera Jehova akuhe ku va hindwa noviungura ngamwa mbi va pewa. Imbi vi kamburira mo otjiungura tji matji hepa okuungurwa poruveze ndo, nandarire kutja ve nondjiviro motjiungura ho poo ve nondjiviro mu tjarwe. Nandarire nao, Jehova u nondangi kovandu mbe riyandjera oveni okukavatera akuhe ku ku nouhepe.—Eps. 110:3.

¹⁷ Hapo ove u nonḓero yokupewa omahongero yokomurungu kokutja u ungurire Jehova momuano omusemba? Tji pe ri nao, ove mo yenene okuyenda Oskole yOvazuvarise vOuhona. Oskole ndji i yandja omahongero kovakambure mbe noupanga ouwa kuna Jehova nu mbe mu ungurira oruveze aruhe, kokutja ve kurise onḓero yawo motjiungura tjokuzuvarisa. Imba mbe ritjangisa koskole ndjo mave sokuyenena okuyakura otjiungura ngamwa atjihe tji va pewa kombunda yokumana oskole ndjo. Ove mape ya okara nonḓero yokuneneparisa otjiungura tjoye okupitira moskole ndjo?—1 Kor. 9:23.

18. Mo munu ouwa wa ye mokuungura puna Jehova aruhe?

¹⁸ Otjovandu va Jehova, eṱe tu nonḓero yokurira ozondjandje, nu ku ri raisa indu tji matu raisa ouwa, otjari, norusuvero nokuripurira ku varwe eyuva arihe. Indu tji twa tjiti nai, matu kara nondjoroka, nohange, nouṋingandu. (Gal. 5:22, 23) Kainatja kutja ongaro yoye yehupo i ri vi, ove mo kara nondjoroka okuhorera ku Jehova okurira ondjandje nokurira omuungure omuwa wa Jehova!—Omiano 3:9, 10.