1. Atuhe tu vanga kutja ovazamumwe vetu ve tjite vi?

OMUKAZENDU omukambure wena Pauline * wa tja: “Okuza koruveze ndu mbe rihonga ouatjiri, ami ee vanga kutja omundu auhe meṱunḓu randje ma kakare puna ami mOparadisa. Tjinenenene ami ee vanga kutja omurumendu wandje, Wayne, nomuatje wandje omuzandu okuuta okukarera Jehova puna ami.” Hapo u novazamumwe mbe ha karere Jehova? Tjimuna Pauline, ove mape ya u vanga kutja ovazamumwe voye ve karere Jehova puna ove.

2. Omapuriro yeṋe ngu matu kahungirira ko morupa ndwi?

² Eṱe kamaatu yenene okuṋiṋikiza ovazamumwe vetu okuyakura ombuze ombwa, posi yokutja matu yenene okuvetunduuza okuripurira kombuze yOmbeibela nokuiyakura. (2 Tim. 3:14, 15) Ongwaye tji twa sokuzuvarisa kovazamumwe vetu? Ongwaye tji twa sokukondja okuzuva nawa oumune wawo? Matu vatere vi ovazamumwe vetu okusuvera Jehova tjimuna eṱe? Nu omomuano uṋe ovakambure ovakwetu mombongo yetu mu mave yenene okutuvatera?

3. Otja 2 Petrus 3:9, ongwaye tji tu sokuzuvarisa kovazamumwe vetu?

³ Moruveze orusupi, Jehova ma eta omaandero kouye mbwi. “Imba mba toororerwa omuinyo waaruhe” ombu mave hupu. (Oviung. 13:48) Tu ungurisa oruveze nomasa wetu okuzuvarisa kovandu mbu tu hi nokutjiwa momaturiro wetu, kunao eṱe wina tu vanga okuzuvarisa kovazamumwe vetu kokutja ve yenene okukarera Jehova puna eṱe. Tate wetu worusuvero Jehova, ka “vanga kutja omundu nangarire umwe a yandekwe, nungwari tjinga  e vanga kutja avehe ve ritanaure komauvi wawo.”—Lesa 2 Petrus 3:9.

4. Ondataiziro iṋe ndji mape ya atu tjiti indu tji matu zuvarisa kovazamumwe vetu?

⁴ Eṱe tu sokuzemburuka kutja pe nomuano omuwa nomuano omuvi wokuzuvarisa ombuze yondjamo. Otjotjihorera, mape ya atu hungire momuano omuwa tji matu zuvarisa kovandu mbu tu hi nokutjiwa, posi yokutja tji matu zuvarisa kovazamumwe vetu mape ya atu hungire nokuhinokuripura.

5. Ovikwaye mbi twa sokuripurira ko ngunda atu hiya zuvarisa kovazamumwe vetu?

⁵ Tji twe ripura notjikando otjitenga tji twa zuvarisa kovazamumwe vetu, mape ya tu zera kutja andakuzu twa zuvarisa momuano warwe. Omuapostele Paulus wa ronga Ovakriste, na tja: “Omambo weṋu aruhe ngaye rire omananyuṋe nomatjate; nu mu tjiwe okuyandja eziriro esemba komundu auhe.” (Kol. 4:5, 6) Onawa kweṱe okuzemburuka omambo ngo, tji matu hungire ku novazamumwe vetu. Tji tu ha tjitire nao, matu yenene okuvepindikisa nokutjita kutja ave ha puratene kweṱe.

6-7. Yandja otjihorera tjokutja ongwaye tje ri ounahepero kOvakriste okukondja okuzuva nawa ovakwao mbu va kupasana nu mbe ha karere Jehova.

⁶ Kondja okuzuva nawa. Pauline, ngwa tamunwa rukuru wa tja: “Rutenga, ee vanga okuhungira ku nomurumendu wandje ohunga na Mukuru nOmbeibela uriri. Eṱe kaatu hungire ohunga noviṋa ‘vyarwe’ mehupo.” Posi yokutja, Wayne omurumendu wa Pauline, kaa tjiwa ovingi ohunga nOmbeibela nu kaa zu nawa oviṋa Pauline mbyaa hungire. Eye aa munu kutja Pauline ee ripurire kongamburiro ye uriri. Eye ee rikende kutja omukazendu we wa ri motjimbumba otjinaumba tjaa tji mu pukisa.

⁷ Pauline wa muna kutja aa kara tjinene pu novakambure ovakwao pozombongarero  zombongo, motjiungura tjokuzuvarisa na pomeerowapamwe nu nandarire ozongurova na mozonavyeka. Eye wa tja: “Povikando tjiva Wayne tji me ya ponganda kaa pe kara omundu, mena ranao eye ee rimunu ourike.” Otjingaperi kutja Wayne aa hihamenwa i yomukazendu we nomuatje we omuzandu. Eye kaa tjiwa ovandu mbaari puna ye, nu aa munu kutja omapanga omape womukazendu we ongaari omananḓengu tjinene pu ye. Kunao Wayne we mu tirisa kutja ma teya orukupo. Andakuzu oove Pauline, ovikwaye tjiva mbyo tjo tjita kokutja u kondje okuzuva nawa ongaro mu u ri?

8. Otja ku 1 Petrus 3:1, 2, ovikwaye mbi mavi yenene okuṱuna ovazamumwe vetu tjinene?

⁸ Raisa otjihorera otjiwa. Potuingi oviṋa mbi tu tjita vi ṱuna kovazamumwe vetu tjinene, poviṋa mbi tu hungira. (Lesa 1 Petrus 3:1, 2.) Pauline wa muna ouatjiri momambo ngo. Eye wa tja: “Ami ee tjiwa kutja Wayne we tu suvera nu kaa vanga okuteya orukupo. Posi yokutja omurumendu wandje tje ndji raera kuja ma vanga okuteya orukupo, ami mba muna kutja mbi sokuuta okuungura oviṋa otja Jehova pe vanga. Ami mba muna kutja me hepa okuraisa otjihorera otjiwa, pendje nokuhungira tjinene.” Pauline wa isa okuṋiṋikiza Wayne okuhungira ohunga nOmbeibela, na utu okuhungira ohunga noviṋa vyarwe mehupo kuna ye. Wayne wa muna kutja omukazendu we wa rira omundu wohange, nu omuatje wawo omuzandu wa rira omuatje wonḓuviro. (Omiano 31:18, 27, 28) Wayne tja muna omuano ombuze yOmbeibela mu ya ṱuna eṱunḓu re, eye we ripurira ko na utu okupuratena kombuze okuza mEmbo ra Mukuru.—1 Kor. 7:12-14, 16.

9. Ongwaye tji twa sokukayenda komurungu okuvatera ovazamumwe vetu?

⁹ Kayende komurungu okuvatera ovazamumwe voye. Jehova u tu raisira otjihorera  tjokutjita nao. Eye u “kara” pokuyandja oruveze kovandu okuyakura ombuze ombwa nokukamuna omuinyo waaruhe. (Jer. 44:4) Nu omuapostele Paulus wa raera Timoteus okukayenda komurungu okuvatera varwe. Ongwaye tje mu raera nao? Mena rokutja mokutjita nao, eye me riyama omuini na imba mbu mave puratene ku ye. (1 Tim. 4:16) Eṱe twa suvera ovazamumwe vetu, kunao tu vanga kutja ve tjiwe ouatjiri mbu ri mEmbo ra Mukuru. Omambo nomeritjindiro wa Pauline kombunda ya ṱuna keṱunḓu re momuano omuwa. Eye nai u nondjoroka okukarera Jehova pu nomurumendu we. Owo aveyevari ovakandjira, nu Wayne omunene wombongo.

10. Ongwaye tji tu hepa okukara nomuretima?

¹⁰ Kara nomuretima. Tji twa uta okuraisa onḓuviro ku Mukuru eṱe twa tjita omarundurukiro mehupo na mongamburiro yetu. Nu mape ya irira ouzeu kovazamumwe vetu okuyakura omarundurukiro nga. Owo ve muna kutja katu norupa momazemburukiro wovitjitwa vyozongamburiro na movitjitwa vyohoromende puna wo rukwao. Pomautiro ovazamumwe vetu tjiva mape ya ave tu pindikire. (Mat. 10:35, 36) Posi yokutja eṱe katu sokumuna kutja owo kamaave rundurura ongaro yawo. Tji twa isa okuvevatera okuzuva ongamburiro yetu nawa, ku ri tjimuna twe ve pangura kutja owo kava pwira okukamuna omuinyo waaruhe. Jehova kee tupa ouyara wokupangura nungwari ouyara mbo wa yandja ku Jesus. (Joh. 5:22) Tji tu nomuretima, ovazamumwe vetu mape ya ave kara nonḓero yokupuratena kombuze yetu.—Lesa okaongo nga, “ Ungurisa orungovi rwetu okuhonga.”

11-13. Ove mo rihongere tjike komuano Alice ma tjinda ovanene ve?

¹¹ Raisa omutima omuwa posi yokutja rira onongo. (Omiano 15:2) Ngatu tare kotjihorera tja Alice. Eye we rihonga ohunga na Jehova tjaa kara kokure novanene ve, mbe hina aave kambura mu Mukuru nu mba ri norupa moviṋa vyohoromende tjinene. Eye wa muna kutja u sokuveraera tjimanga ohunga noviṋa oviwa mbye rihongo. Alice wa tja: “Tji wa kambura orure okuraera oveṱunḓu roye ohunga nongamburiro yoye noviṋa mbi u tjita, owo mave pindike tjinene.” Eye aa kondjo okupaha omapu ngu mape ya aye nana ombango yovanene ve, tjimuna orusuvero. Okuzambo ee ve tjangere otutuu okuveraisira oumune wOmbeibela ohunga nomapu ngo, nokupura oumune wawo. (1 Kor. 13:1-13) Eye wa tja okuhepa kovanene ve kokumukurisa nokumutjevera, nu we ve hindira oviyandjewa. Eye tja karyangera ovanene ve, aa vatere ina otja pu ma yenene. Pomautiro, ovanene va Alice ka va ri nohange indu eye tje ve raera ohunga nongamburiro ye ombe.

¹² Alice tjaari ponganda pu novanene ve, eye aa lese Ombeibela ye eyuva arihe. Eye wa tja: “Otjiṋa hi tja vatera mama okuzuva nawa omuano Ombeibela mu iri onanḓengu kwami.” Nungwari, tate wa Alice wa tya okurihonga Ombeibela kutja ma yenene okuzuva nawa kutja ongwaye omuatje we tja rundurura oumune we. Nu wina aa paha otjipo mOmbeibela. Alice wa tja: “Ami mbe mu pa Ombeibela nu mbe mu tjangera mo otjiṋa.” Kwa kongorera tjike? Tate wa Alice ka munine otjipo mEmbo ra Mukuru, nungwari wa ṱunwa tjinene i yoviṋa mbya lese.

¹³ Tu sokuraisa omutima omuwa nokurira ozonongo nandarire kehi yomauzeu. (1 Kor. 4:12) Otjotjihorera, Alice wa tuurunga omapirukiro okuza ku ina. Eye wa tja: “Indu tji mba papitisiwa, mama we ndji raera kutja owami ‘omuatje omuvi.’” Alice wa tjita vi? Eye wa tja: “Hina mba isa okuhungira ohunga nongamburiro yandje, posi yokutja mbe mu kahururira nawa nondengero kutja ami mba tye okurira umwe wOvahongonone va Jehova nu hi nokurundurura ondando yandje ndjo. Mba kondja okuraisira mama kutja tjiri mbe mu suvera.  Atuyevari twa rira nu e mu zikire eriro ewa. Okuzambo mama wa yakura kutja Ombeibela tjiri aai tjiti kutja mbi rire omundu omuwa.”

14. Ongwaye tji tu ha sokuyandjera ovazamumwe vetu okurundurura ondando yetu yokukarera Jehova?

¹⁴ Mape ya aku kambura oruveze kovazamumwe vetu okuzuva nawa kutja ounanḓengu pu pe ṱa pi kweṱe okukarera Jehova. Otjotjihorera, Alice tja toora omukambo wokurira omukandjira pokukerihonga oviṋa ovanene ve mbyaave vanga, ina wa rira rukwao. Posi yokutja Alice ka rundururire ondando ye ndjo. Eye wa tja: “Tji wa yandjere oveṱunḓu roye okurundurura ondando yoye motjiṋa tjimwe, owo mape ya ave kondjo okurundurura ondando yoye moviṋa vyarwe wina. Posi yokutja mape ya tjiva meṱunḓu roye ave puratene kove, tji mo raisa ongaro ombwa nokurira onongo.” Iho tja tjitwa ku Alice. Ovanene ve aveyevari nai ovakandjira, nu ihe omunene wombongo.

15. Otja ku Mateus 5:14-16 na 1 Petrus 2:12, omomuano uṋe ‘oviungura oviwa’ vya varwe mu mavi yenene okuvatera ovazamumwe vetu?

¹⁵ Jehova u ungurisa “oviṋa oviwa” ovakarere ve mbi ve tjita okuyeta ovandu popezu na ye. (Lesa Mateus 5:14-16; 1 Petrus 2:12.) Tji wa kupa poo tji wa kupwa i yomundu ngu he ri umwe wOvahongonone va Jehova, hapo eye wa rora okuhakaena ku novakambure ovakweṋu mombongo yoye? Pauline ngwa tamunwa rukuru wa ṋanga ovakambure ovakwao koye, kokutja omurumendu we Wayne, ma yenene okuvetjiwa. Wayne u zemburuka omuano omurumendu umwe omukambure me mu vatera okumuna kutja Ovahongonone va Jehova ovandu mbe ri vi. Wayne wa tja: “Omurumendu omukambure ngo wa kambura eyuva rimwe okuhinokuyenda koviungura kutja ma yenene  okutarera ehore rotjimbeere puna ami. Ami mbe ripura kutja, ‘eye omundu tjimuna ovandu varwe uriri!’”

16. Ongwaye tji matu sokuṋanga ovazamumwe vetu kozombongarero zombongo?

¹⁶ Omuano umwe omuwa mu matu yenene okuvatera ovazamumwe vetu, okuveṋanga okuya puna eṱe kozombongarero zombongo. (1 Kor. 14:24, 25) Ombongarero yombongo ondenga Wayne ndja ya ko ya ri meyuva romazemburukiro wonḓiro ya Jesus, mena rokutja ya ri kombunda yoviungura vye nu ya ri osupi. Eye wa tja: “Ami hi nokuzemburuka nawa kutja ehungi ra ri ohunga na tjike, posi yokutja mba ṱunwa i yongaro yovandu. Owo ve ndji yakura nawa mokundjikorisa nokundjipa omake. Ami mba muna kutja tjiri owo ovandu vomitima omiwa.” Ovakupasane 2 aave raisa orusuvero rwapeke ku Pauline, mokumuvatera nomuatje we omuzandu pozombongarero zombongo na motjiungura tjokuzuvarisa. Wayne tja tya okuzuva nawa ohunga nongamburiro ya Pauline, wa ningira omurumendu ngo okurihonga Ombeibela kuna ye.

17. Ongwaye tji tu ha sokuripa ondjo, nu ongwaye tji tu ha sokumuna kutja ovazamumwe vetu kamaave yakura ouatjiri?

¹⁷ Eṱe tu zera kutja ovazamumwe vetu ve karere Jehova puna eṱe. Nungwari, nandarire kutja tu kondja tjinene okuvevatera okurira ovakarere va Mukuru, owo mape ya ave ha yakura ouatjiri. Tji pa kara nao, katu sokuripa ondjo mena romukambo owo mbu va toora. Eṱe katu ṋiṋikiza omundu okuyakura ongamburiro yetu. Posi yokutja indu ovazamumwe voye tji va munu ondjoroka ove ndji u nayo mokukarera Jehova, iho mape ya atji ve ṱunu tjinene. Ve kumbira. Hungira momuano omuwa. Nu o isa okukondja okuvevatera! (Oviung. 20:20) Kara nongamburiro kutja Jehova me ku sere ondaya kozongondjero zoye. Nu ovazamumwe voye tji va torora okupuratena kove, owo mave kayamwa!