PE NOTJIṊA mombongo tji u vanga okuungura, posi yokutja tji u ha yenene okuungura nai? Ngahino omerizirira omundu warwe nge na wo. Poo otjiungura ove tjoungura poo omeziririra ngu wa ri na wo rukuru. Nungwari, ozombura, ouveruke, okuhina ovimariva ovisemba, poo omerizirira weṱunḓu vi yenena okutjita kutja o ha ungura ovingi rukwao. Poo mena romarundurukiro motjira, ove mape ya wa isa okuungura otjiungura tjoungura oruveze orure. Nandarire kutja patjitwa tjike, ove mape ya outu okurimuna kutja ko nokuungura oviṋa avihe mbi mo vanga okutjita motjira tja Mukuru. Mozongaro otja inḓo, mape ya ou momuinyo. Otjikwaye tji matji yenene okutuvatera kutja atu hau momuinyo poo okukara nomapindi? Mo yenene vi okukara nondjoroka?

Matu rihongo otjiṋa otjinanḓengu kotjihorera tja Johanes Omupapitise, tjokutja matu yenene vi okukara nondjoroka. Johanes aa yorokere omerizirira omawa posi yokutja mape ya kaa undjire ko kutja mape tjitwa tjike mehupo re. Eye wa zuvarisa ohunga na Jesus ape oure wombura nu mape ya wa ri motjovakamburwa oure woruveze orure kombanda yanao. Nu nandarire nao Johanes wa kayenda komurungu okukara nondjoroka oure womuinyo we. Otjikwaye tji tje mu vatera? Nu eṱe matu yenene vi okukara nondjoroka nandarire indu tji tu nomuhihamwatima?

Moruteṋi 29 O.Z., Johanes wa uta otjiungura tje tjapewa i Jehova, indu tjaa rongerisa ovandu komeero wa Messias. Eye wa tja: “Ritanaureye komauvi weṋu, ouhona womayuru tjinga awa tumbuka!” (Mat. 3:2; Luk. 1:12-17) Ovandu ovengi va puratena. Kunao ovandu ovengi aave zu kokure okuyekupuratena kombuze ndji, nu ovengi ve ritanaura nave papitisiwa. Johanes wa yandja erakiza kovanane vozongamburiro mbaave rimunu tjimuna owo ombe ri ovasemba pu varwe, kutja mave pangurwa tji ve hi nokurundurura ongaro yawo. (Mat. 3:5-12) Johanes wa tjita otjiṋa otjinanḓengu motjiungura tje tjokuzuvarisa, indu tja papitisa Jesus mokuṋi tji yari 29 O.Z. Okuzambo Johanes wa raera ovandu kutja ve kongorere Jesus ngu ri Messias omukwizikwa.—Joh. 1:32-37.

Jesus wa tja:“Johanes Omupapitise omunene povandu ngamwa avehe mba kwatwa kombanda yehi.” (Mat. 11:11) Johanes wa yorokera ozondaya nḓa muna. Tjimuna Johanes ovandu ovengi  ndino va muna ozondaya ozengi. Tara kotjihorera tjomurumendu omukambure wena Terry. Eye nomukazendu we Sandra, va ungurira Jehova oruveze aruhe oure wozombura zokombanda 50. Terry wa tja: “Ami ee ungura oviungura ovingi oviwa. Ami ee karere otjomukandjira, poBetel, omukandjira wapeke, omutarere ngu varura ozombongo, omutarere wotukondwa, nu nai mbi karera otjomukandjira wapeke rukwao.” Eṱe tu kara nondjoroka okukara nomerizirira posi yokutja otja tji matu rihongo okuza kotjihorera tja Johanes, okukara nondjoroka ku hepa ozongondjero indu ozongaro zetu tji za runduruka.

Johanes Omupapitise wa kayenda komurungu okukara nondjoroka, mena rokutja eye wa ri nondangi komerizirira nga ri nawo. Tara kotjihorera. Kombunda yombapitisimo ya Jesus, ovakongorere va Johanes va rira ovaṱiṱi, nu imbo va Jesus aave ririre ko ovengi. Ovahongewa va Johanes aave rikendere otjiṋa hi, nu ve ya kuye ave tja: “Tara, Eye nambano ma papitisa wina, novandu avehe mave i ku ye!” (Joh. 3:26) Johanes wa zira na tja: “Omuvareke ongu ri omuini womuvarekwa, nungwari epanga romuvareke nda kurama mbo amari puratene, oro mari nyanda omutima tjinene tji ra zuu eraka romuvareke. Ami opu mba zu okukara nondjoroka onene tjinene.” (Joh. 3:29) Johanes kee risasaneke kuna Jesus nu eye wina kaa munu kutja otjiungura tje katjari nonḓengu, mena rokutja otjiungura tja Jesus tja ri otjinahepero pu itjo tje. Kunao Johanes wa kara nondjoroka mena rokutja eye wa kayenda komurungu okurivara otja “epanga romuvareke.”

Ongaro ya Johanes ye mu vatera okukara nondjoroka nandarire kutja otjiungura tje ka tja ri otjipupu. Johanes wa ri Omunasirei okuza kongwatero ye nu kunao eye kaa yandjerwa okunwa omavinu. (Luk. 1:15) Jesus wa tja: “Johanes tje ya, we ritjaera kovikurya na komavinu,” eye aa hee omuano Johanes maa hupu. Jesus novahongewa ve kava ri kehi yoruyano rOvanasirei, owo aave hupu tjimuna ovandu varwe uriri. (Mat. 11:18, 19) Nu wina Johanes katjitire ovihimise nu eye aa tjiwa kutja ovahongewa va Jesus nandarire tjiva mbaave mu kongorere aave tjiti ovihimise. (Mat. 10:1; Joh. 10:41) Pendje nokuripura ohunga nombangu ndja ri pokati kovakongorere ve na imbo va Jesus, eye wa kakatera kotjiungura Jehova tje mupa.

Eṱe wina tji twa vara otjiungura tjetu otjotjiṋa otjihuze matu kara nondjoroka. Terry, ngwa tamunwa rukuru wa tja: “Ami ee yandja ombango kotjiungura atjihe tje pewa.” Indu eye tji me ripura ohunga nokukarera Jehova oruveze aruhe, eye wa tja: “Ami hi nomuhihamwatima posi yokutja mbi zemburuka oviṋa oviwa uriri.”

Eṱe matu yenene okukara nondjoroka tjinene tji matu ripura ohunga notjiungura atjihe poo omerizirira ngu tu nawo otjoviṋa vyapeke. Ondjingonekero yapeke okurira “ovaungure vapamwe va Ndjambi.” (1 Kor. 3:9) Otjiṋa otjihuze aruhe matji karere otjihuze indu tji mo tji tjevere nawa. Momuano otjingewo eṱe matu kara nondjoroka, indu tji matu kayenda komurungu okuripura ohunga nokutja ondjingonekero yapeke okuungura pamwe na Jehova. Eṱe katu sokusasaneka ozongondjero zetu kuna inḓo zovandu varwe. Katu sokumuna kutja otjiungura Jehova tje tupe katjinonḓengu pu itjo tjovandu varwe.—Gal. 6:4.

Johanes mape ya aa tjiwa kutja otjiungura tje tjokuzuvarisa katji nokukayenda komurungu oure woruveze orure, posi yokutja kaa undjire ko kutja mape ya atji hakahana okuyanda. (Joh. 3:30) Ozombura 30 O.Z., kombunda yomieze 6 indu tja za nokupapitisa Jesus, Johanes wa paterwa motjovakamburwa i yOmbara Herodes. Nu nandarire nao Johanes wa kayenda komurungu okuzuvarisa. (Mar. 6:17-20) Hapo otjikwaye tjaa tji sokumuvatera okukara nondjoroka kehi yomarundurukiro ngo? Eye ee ripurire koviṋa mbya ri ovinahepero ku Jehova.

Ngunda Johanes ee ri motjovakamburwa eye aa zuu ondjivisiro ohunga notjiungura tja Jesus tjokuzuvarisa kutja aatji ririre ko otjinene. (Mat. 11:2; Luk. 7:18) Johanes wa ri nongamburiro okuura kutja Jesus ongu ri Messias, posi yokutja eye mape ya ee ripura kutja Jesus ma yenenisa vi  Omatjangwa aehe ohunga na Messias. Mena rokutja Messias aa sokurira ombara, Johanes ee ripura omuini kutja, hapo Jesus ma rire ombara tjimanga? Eye mape ya a pitisiwa motjovakamburwa? Johanes aa vanga okuzuva nawa ohunga noviṋa Jesus mbi ma katjita. Kunao eye wa hinda ovahongewa ve 2 okukapura Jesus epuriro ndi: “Hapo oOve ngwi ngu kwa za mo ya, poo ingee ngatu undje warwe?” (Luk. 7:19) Indu tji va kotoka, Johanes aa puratene nombango owo tjaave hungire kutja Jesus wa tjiti ovihimise. Nu we ve hinda okukaraera Johanes kutja, “ovapoṱu nambano mave munu, oviṱeṱu mavi kawondja, imba mba vera omutjise wongana va kohororwa, ozomboro nambano maze zuu, ovaṱi mave pendurwa movakoke, nOmbuze Ombwa mai zuvarisiwa kovasyona.”—Luk. 7:20-22.

Johanes tjiri wa yanḓiparisiwa i yombuze ndjo. Oyo ya raisa kutja Jesus aa yenenisa omaprofetero wa Messias. Nandarire kutja Jesus kena pa yenena okupitisa Johanes motjovakamburwa, Johanes aa tjiwa kutja otjiungura tje tjokuzuvarisa ka tja ri omungandjo. Nandarire kutja wari mozongaro nḓo eye wari nondjoroka.

Tjimuna Johanes, tji twa yandja ombango kokukarera Jehova matu yenene okutuurunga nondjoroka nomuretima. (Kol. 1:9-11) Eṱe matu yenene okutjita nao indu tji matu lese Ombeibela, nokuripurira ko oukoto koviṋa mbi matu lese, nokurizemburukisa kutja otjiungura tjetu atjihe tji matu ungurire Jehova kamungandjo. (1 Kor. 15:58) Sandra wa tja: “Okulesa ekondwa rOmbeibela eyuva arihe kwe ndji vatera okutumbuka popezu na Jehova. Ku ndji vatera okuyandja ombango ku Jehova nu ka kwami omuini.” Tji twa yandja ombango koviungura ovakambure ovakwetu mbi ve ungurira Jehova, maku tu vatere kutja atu he ripurire kweṱe oveni. Sandra wa tja: “Oprograma ndji o-JW Broadcasting^® ndji pitisiwa omueze auhe i tu vatera okukara popezu notjira nu wina i tu vatera okukara nondjoroka motjiungura tjetu.”

Oruveze orusupi Johanes omupapitise ndaa zuvarisa, eye aa zuvarisa “mombepo na momasa otja omuprofete Elia,” nu tjimuna Elia eye “wa ri omundu otja eṱe.” (Luk. 1:17; Jak. 5:17) Tji twa raisa ondangi otja Johanes nokuyandja ombango kokukarera Jehova, eṱe wina matu yenene okukara nondjoroka motjiungura tjetu tjOuhona, nandarire kutja pa tjitwa tjike.