1. Oouṋe mba vatera okuzikamisa ombongo moFilipi?

OMUAPOSTELE Paulus, Silas, Lukas na Timoteus tji va vaza moFilipi tji tja hurirwe i yoRoma, owo va hakaena novandu ovengi mbaave vanga okutjiwa ohunga nOuhona wa Mukuru. Ovarumendu ovakambure 4 mba, va vatera okuzikamisa ombongo. Nu ovahongewa avehe mba va uta okuworongana pamwe ngahino po yomukazendu omukambure wena Lidia, ngwa suverere okusekirisa ovandu.—Oviung. 16:40.

2. Ombongo ndjo ya muna omauzeu yeṋe?

² Ombongo ombe ndji tjimanga ya muna omatokero. Satan wa tjita kutja ovandu mba tondere ouatjiri ve pirukire nomasa omazuvarisiro wa Paulus novazuvarise ovakwao. Paulus na Silas va kamburwa ave tonwa notuhongwe, nu ave paterwa mondeko. Owo tji va za nokupita mondeko va kavarura ovahongewa ovape nokukeveyanḓiparisa. Nu okuzambo Paulus, Silas na Timoteus va pita motjihuro ho, posi yokutja pe munika tjimuna Lukas wa sewa mo. Hapo ovakambure ovape mba nambano mave tjiti vi? Nombatero yombepo ya Jehova, ovakambure ovape mba va yenena okukayenda komurungu okumukarera noupatje. (Fil. 2:12) Tjiri Paulus wa ri nepu ewa okutjaterwa i wo!

3. Otja kOvafilipi 1:9-11, Paulus aa kumbire tjike?

³ Kombunda yozombura ape omurongo, Paulus wa tjanga orutuu kombongo moFilipi. Otja tji mo lese orutuu rwe mo yenene okumuna omuano Paulus ma suverere ovakambure ovakwao. Eye wa tja: “Ami mbi mu zera amuhe norusuvero Kristus Jesus ndwe mu suvera na rwo.” (Fil. 1:8) Eye we ve tjangera kutja ee ve kumbire. Nu wa ningira Jehova okuvevatera kutja orusuvero rwawo ru ryamene ko, kutja ve yandja ombango ku  imbi oviwaviwa, okurira ovakohoke, okuhina okuputarisa varwe, nokukayenda komurungu okuruka ovihape oviwa. Ndino eṱe wina matu yenene okurihongera ko ovingi komambo wa Paulus ngo. Kunao, ngatu lese imbi Paulus mbya tjanga kovakambura moFilipi. (Lesa Ovafilipi 1:9-11.) Okuzambo matu kahungirira komapu eye nga tamuna, nomuano mu matu yenene okuyeṱakamisa.

4. (a) Otja ku 1 Johanes 4:9, 10, omomuano uṋe Jehova meetu raisira orusuvero? (b) Matu sokusuvera Mukuru pu pe ṱa pi?

⁴ Jehova we tu raisira kutja we tu suvera tjinene mokuhinda Omuna we kombanda yehi okuṱira ouvi wetu. (Lesa 1 Johanes 4:9, 10.) Orusuvero Mukuru ndwe tu raisira ru tu hinga kutja tu mu suvere. (Rom. 5:8) Hapo matu sokusuvera Mukuru pu pe ṱa pi? Jesus wa zira epuriro ndo indu tjaa hungire ku nOmufarisei, eye wa tja: “Suvera Muhona Ndjambi woye nomutima woye auhe nomuinyo woye auhe nozondunge zoye azehe.” (Mat. 22:36, 37) Eṱe matu vanga okusuvera Mukuru nomutima wetu auhe. Nu matu vanga kutja orusuvero rwetu ku ye ru kurire ko eyuva arihe. Paulus wa raera ovakambure moFilipi kutja orusuvero rwawo nga ru “ryamene ko.” Hapo matu sokutjita vi kutja tu kurise orusuvero rwetu ku Mukuru?

5. Matu kurisa vi orusuvero rwetu ku Mukuru?

⁵ Eṱe matu sokutjiwa Mukuru kutja tu mu suvere. Ombeibela i tja: “Ingwi ngu ha suvere ka tjiwa Ndjambi, orondu Ndjambi tjinga e ri orusuvero.” (1 Joh. 4:8) Omuapostele Paulus wa raisa kutja orusuvero rwetu ku Mukuru maru kurire ko nomasa otja tji matu hara ‘ondjiviro nokukara nomutima omutarazu wakatjotjiri.’ (Fil. 1:9) Indu tji twa uta okurihonga Ombeibela eṱe twa uta okusuvera Jehova nandarire kutja kaa tu tjiwa oviṋa ovingi ohunga na ye. Otja tjaatu rihongo ovingi ohunga na Jehova orusuvero rwetu kuye otja ru kurire ko. Kunao, ounaṋdengu kweṱe okulesa Ombeibela yetu eyuva arihe nokuripurira ko oukoto ku imbi mbi twa lese!—Fil. 2:16.

6. Otja ku 1 Johanes 4:11, 20, 21 omomuano uṋe mu matu yenene okuraisa orusuvero?

⁶ Orusuvero rwa Mukuru kweṱe ru tu hinga kutja tu suvere ovakambure ovakwetu wina. (Lesa 1 Johanes 4:11, 20, 21.) Mena rokutja tu karera Jehova nu tu kondja okuhorera kovikaṋena vye oviwa, eṱe mape ya atu munu kutja okusuvera ovakambura ovakwetu otjiṋa otjipupu okutjita. Nu tu horera ku Jesus ngwe tu raisira orusuvero rwapeke mokuyandja omuinyo we mena retu. Povikando tjiva, mape ya ai rire ouzeu kweṱe okuṱakamisa erakiza rokusuvera ovakwetu. Ngatu tare ku imbi mbya tjitwa mombongo yOvafilipi.

7. Matu rihongo tjike keronga Paulus nda yandja ku Evodia na Sintike?

⁷ Evodia na Sintike vari ovakazendu ovakambure mbaave “ungura tjinene” pu nomuapostele Paulus. Posi yokutja owo mape ya va pitasana oumune nu kavari omapanga rukwao. Paulus tjaa tjanga orutuu kombongo ovakazendu ovakambure mbo mu vari, eye wa tamuna omana wawo morutuu rwe ndo, nu we ve ronga kutja “ve kare nomutima umwe.” (Fil. 4:2, 3) Paulus wina wa muna kutja ounaṋdengu okuraera ombongo aihe okutja ngave tjite “avihe nokuhinakuunauna poo okunyamukura.” (Fil. 2:14) Nokuhina omakeyakeyero, eronga ra Paulus ndo tjiri ra vatera ovakazendu ovaṱakame mbo novakambure avehe mombongo okusuverasana.

8. Ovikwaye mbi tjita kutja atu ha raisa orusuvero kovakambure ovakwetu, nu ovikwaye mbi mavi yenene okutuvatera?

⁸ Tjimuna Evodia na Sintike povikando i  rira ouzeu kweṱe okuraisa orusuvero kovakambure ovakwetu mena rokutja tu yandja ombango koviṋa ovivi mbi va tjiti. Atuhe tu tjita ozondataiziro eyuva arihe. Nu tji twa yandja ombango kozondataiziro zovakwetu, ma rire ouzeu kweṱe okuvesuvera. Otjotjihorera omukambure omukwetu tja zembi okuvatera okukohorora Etuwo rOmerikotameneno, otjiṋa ho mape ya a tji tu pindikisa. Eṱe tji twa utu okuzemburuka ozondataiziro azehe omukambure omukwetu nḓa tjita, otjiṋa hi matji tu pindikisire ko nu ai rire ouzeu kweṱe okumuraisira orusuvero. Indu tji u ri mongaro otja indjo ma rire nawa okutjiwa kutja Jehova u muna ozondataiziro zetu atuhe, na wina inḓa zovakambure ovakwetu. Nandarire kutja tu tjita ozondataiziro eye we tu suvera atuhe. Kunao, matu sokuhorera korusuvero rwa Jehova nokuyandja ombango kovikaṋena oviwa vyovakambure ovakwetu. Tji matu kondjo nomasa okusuvera ovakambure ovakwetu tu kurisa ombwaneno mokati ketu.—Fil. 2:1, 2.

9. Ovikwaye tjiva “mbi ri oviwaviwa” Paulus mbya tamuna morutuu rwe kOvakriste moFilipi?

⁹ Ombepo ondjapuke ya hinga Paulus okuraera Ovakriste moFilipi na wina Ovakriste avehe “okutoorora imbi mbi ri oviwaviwa.” (Fil. 1:10) Oviṋa oviwaviwa poo ovinanḓengu vi kamburira mo okuyapura ena ra Jehova, okuyenenisa ondando ye, nokueta ohange nombwaneno mombongo. (Mat. 6:9, 10; Joh. 13:35) Oviṋa mbi tji vi ri ovinanḓengu mehupo retu tu raisa kutja twa suvera Jehova.

10. Ovikwaye mbi matu sokutjita kutja tu rire ovakohoke?

¹⁰ Paulus wina wa tja, matu sokurira “ovakohoke.” Ihi katji he kutja matu sokurira ohomonena mena rokutja eṱe kamaatu rire ovakohoke tjimuna Jehova Mukuru. Posi yokutja, Jehova u tu vara otjovakohoke indu tji matu kondjo pu matu yenene okukurisa orusuvero rwetu nokuyandja ombango ku imbi mbi ri oviwaviwa. Omuano umwe mu matu yenene okuraisa orusuvero, omokukondja kutja atu ha putarisa varwe.

11. Ongwaye tji tu ha sokuputarisa varwe?

¹¹ Tjiri matu sokuyandja ombango tjinene kerakiza rokuhina okuputarisa varwe. Hapo omomuano uṋe mu matu yenene okuputarisa varwe? Omanyando ngu matu toorora, ozombanda nḓu matu rihwikike, poo oviungura mbi matu toorora mape ya avi putarisa varwe. Oviṋa mbi matu tjiti mbyo, mape ya avi ha rire oviṋa ovivi. Posi yokutja ozondando zetu tji maze ṱunu komeritjiviro womomutima ya varwe nokuveputarisa iho matji rire otjiṋa otjivi. Jesus wa tja itja i rira nawa komundu indu ewe enene rotjikweyero tji ra kutwa mo sengo ye, na ṱomwinisiwa mourekoto womeva kokuvare pokuputarisa ovakambure ovakwao!—Mat. 18:6.

12. Matu rihongo tjike kotjihorera tjovakupasane 2 ovakandjira?

¹² Tara komuano ovakupasane 2 mu va ṱakamisa erakiza ra Jesus. Owo aave karere mombongo pu novakupasane varwe 2 mba papitisiwa oupe nu mbe kurira meṱuṋdu oviṋa ovingi mu vi hina aavi yandjerwa. Ovakupasane ovape mba aave munu kutja Omukriste ka sokutarera omuvi oparukaze nandarire kutja ombwa. Owo va urumine indu tji va zuva kutja ovakupasane ovakandjira va katarerere omuvi. Okuzambo ovakupasane ovakandjira mbo va isa okuyenda kozomuvi nga ovahongewa ovape mba tji va rongerisa omeritjiviro wawo womomutima okuyenena okuhaṋa pokati kouwa nouvi. (Hebr. 5:14) Momuano mbo, ovakupasane ovakandjira mba va raisa  movitjitwa vyawo kutja va suvera ovakambure ovakwao mbo tjiri, nungwari ka mokuhungira uriri.—Rom. 14:19-21; 1 Joh. 3:18.

13. Omomuano uṋe mu matu yenene okutjita kutja omundu ma tjite ouvi?

¹³ Omuano warwe mu matu yenene okuputarisa varwe omokutjita kutja ve tjite ouvi. Iho mape ya atji tjitwa vi? Tara kotjihorera hi. Kombunda yoruveze orure omuhongwa wOmbeibela wa yenena okuritjaera kotjikariha. Eye wa muna kutja ma sokuisa otjikariha. Nu wa tjita omarundurukiro omengi mehupo re na papitisiwa. Eyuva rimwe omurumendu omukambure we mu ṋanga komeerowapamwe ne mupe otjikariha na tja: “Ove nambano oove Omukriste nu u nombepo ya Jehova. Otjikaṋena tjimwe tjombepo ondjapuke omeritjaerero. Indu tji u nomeritjaerero, ove mo yenene okunwa kaṱiṱi uriri.” Tjiri ma rire otjiṋa otjihihamise omuhongwa wOmbeibela ngwi tja puratene keronga ndo na utu okunwa otjikariha rukwao nokuhina omeritjaerero.

14. Ozombongarero zetu zombongo ze tu vatera vi okuṱakamisa omambo nge ri mOvafilipi 1:10?

¹⁴ Ozombongarero zetu zombongo ze tu vatera okuṱakamisa omambo nge ri mOvafilipi 1:10 momiano omingi. Omuano omutenga, oviṋa mbi tu kahungirira ko pozombongarero zombongo vi tu raisira kutja ovikwaye mbi ri ovinanḓengu ku Jehova. Outjavari, tu rihonga omuano mu matu yenene okuṱakamisa oviṋa mbi matu rihongo kutja tu rire ovakohoke. Outjatatu, eṱe tu pandiparisasana “morusuvero na moviungura oviwa.” (Hebr. 10:24, 25) Indu ovakambure ovakwetu tji mave  tu tunduuza, orusuvero rwetu ku Mukuru na kuwo ru kurira ko. Nu orusuvero ndo ru tjita kutja tu kondje pu matu yenene kutja atu ha putarisa ovakambure ovakwetu.

15. Okuurisiwa “novihape vyousemba” ku heya tjike?

¹⁵ Paulus wa kumba nomasa kutja ovakambure moFilipi ve ‘urisirwe novihape vyousemba.’ (Fil. 1:11) Tjiri ‘ovihape vyousemba’ mbi aavi kamburire mo orusuvero rwawo ku Jehova novakarere ve. Nu wina aa ku kamburire mo okuhungira ku varwe ohunga nongamburiro yawo mu Jesus nomaundjiro wawo omawa. Ovafilipi 2:15 ri ungurisa otjihorera tjarwe tjokutja owo mave sokurira otja “ozonyose nḓe yerisa evaverwa ouṱuku.” Iho matji hitasana ku nomambo wa Jesus nga hungira kovahongewa ve kutja, owo “ondjerera youye.” (Mat. 5:14-16) Eye wina we ve rakiza kutja ve “kaise po ovandu ovahongewa” nu wa tja owo mave rire ‘ovemuhongonone . . . nga komaandero wehi.’ (Mat. 28:18-20; Oviung. 1:8) Eṱe tu ruka ‘ovihape vyousemba’ indu tji matu ungura oukukutu motjiungura otjinanḓengu ho.

16. Otja kOvafilipi 1:12-14, omomuano uṋe mu matu yenene okuyera tjimuna ozonyose nandarire kehi yozongaro ozonḓeu? (Tara kotjiperendero kombanda yokambo nga.)

¹⁶ Nandarire kutja tu ri mozongaro nḓa sana pi, matu yenene okuyera tjimuna ozonyose. Povikando tjiva, ozongaro nḓe tjita kutja irire ouzeu kweṱe okuzuvarisa mape ya aze tjiti kutja tu yenene okuzuvarisa. Otjotjihorera, omuapostele Paulus wa ri omukamburwa woponganda moRoma indu tja tjanga orutuu kovakambure moFilipi. Nandarire kutja Paulus wa pandekerwe eye wa kayenda komurungu okuzuvarisa kovemutjevere na imba mba veya okumuryangera. Eye wa zuvarisa noupatje  kehi yozongaro nḓa nu ihi tja tjita kutja ovakambure ovakwao ve kare nongamburiro nouvanḓe “okuzuvarisa Ombuze ya Ndjambi komeho nokuhinemuma.”—Lesa Ovafilipi 1:12-14; 4:22.

17. Omomuano uṋe ovakambure tjiva moruveze rwetu mu va kayenda komurungu okuzuvarisa nandarire tjaari ouzeu kuwo okutjita nao?

¹⁷ Ovakambure ovengi ve raisa ouvaṋde tjimuna Paulus. Owo va tura momahi mu ve ha yandjerwa okuzuvarisa oparukaze, kunao ve paha omiano vyarwe okuzuvarisa ombuze ombwa. (Mat. 10:16-20) Mehi rimwe, omutarere worukondwa wa raera ovazuvarise kutja ve zuvarise komihoko vyawo, kovararanganda, ovandu mbu ve hita pamwe oskole, mbu ve ungura pamwe novatjiwasane. Kombunda yozombura 2 uriri otjivarero tjozombongo morukondwa ndo tje kurira ko. Eṱe mape ya twa tura mehi mu tu yandjerwa okuzuvarisa. Nungwari, eṱe matu yenene okurihongera ko oviṋa ovinanḓengu kovihorera vyovakambure ovakwetu mbo. Indu tji twa kondjo okuzuvarisa kovandu avehe Jehova me tupe omasa nomasorero wokukayenda komurungu okuzuvarisa nandarire indu tje ri ouzeu kweṱe okutjita nao.—Fil. 2:13.

18. Ove we rimanene okutjita tjike?

¹⁸ Tjinenenene moruveze ndwi, eṱe ngatu rimanene okuṱakamisa eronga ra Paulus nda tjanga morutuu kovakambure moFilipi. Eṱe matu sokuyandja ombango ku imbi mbiri oviwaviwa, okurira ovakohoke, okukondja okuhinokuputarisa varwe, nokuruka ovihape vyousemba. Kunao, orusuvero rwetu maru ryamene ko nu atu yandja ohiviro ku Tate wetu Jehova.