1. Omena ratjike Jehova tja mema oviṋa?

PARI oruveze Jehova ndwa ri erike. Posi yokutja eye kee rimunu ourike. Jehova kaa hepa okukara pu nomundu kutja ma kare nondjoroka. Posi yokutja eye wina aa vanga kutja varwe ve kare nomuinyo nu ve yorokere ehupo. Orusuvero ondwa hinga Jehova okuuta okumema oviṋa.—Eps. 36:9; 1 Joh. 4:19.

2. Jesus novaengeli va ri noumune uṋe indu Jehova tja mema oviutwa?

² Rutenga, Jehova wa mema Omuna we Jesus otja omuungure wa pamwe na ye. Okuzambo wa “uta oviṋa avihe,” okupitira mOmuna we, tjimuna ovaengeli avehe. (Kol. 1:16) Jesus wa ri nondjoroka tjinene okuungura puna Ihe. (Omiano 8:30) Nu ovaengeli va ri nondjoroka wina. Owo opu vari indu Jehova nomuungure wa pamwe naye ngu ri Jesus, tji va mema eyuru nehi. Ovaengeli va raisa vi ondjoroka yawo? Owo va “ravaera nenyando indu ehi tji ra memwa” nu va kayenda komurungu okutanga Mukuru mena roviutwa avihe mbya mema nu tjinenenene ovandu. (Job 38:7; Omiano 8:31) Oviṋa avihe Jehova mbya mema vi raisa orusuvero nounongo we.—Eps. 104:24; Rom. 1:20.

3. Otja 1 Ovakorinte 15:21, 22, otjisuta tjonguturiro tja Jesus tje tu yetera ouwa waye?

³ Jehova aa vanga kutja ovandu ve hupe nga aruhe kombanda yehi. Posi yokutja Adam na Eva va pirukira Jehova, nu kunao owo kaave yenene okuhupa nga aruhe. Nu onḓiro otji ya tuurunga kozondekurona zawo. (Rom. 5:12) Hapo Jehova wa tjita  vi? Tjimanga eye wa paha omuano wokukutura ovandu. (Gen. 3:15) Jehova we ripura okuyandja Omuna we Jesus otjotjisuta tjonguturiro okukutura ovanatje va Adam na Eva kouvi nonḓiro. Nu okuzambo ma ka yandja omuinyo wa aruhe komundu auhe ngwa toorora okumukarera.—Joh. 3:16; Rom. 6:23; lesa 1 Ovakorinte 15:21, 22.

4. Omapuriro yeṋe ngu matu ka hungirira ko morupa ndwi?

⁴ Omakwizikiro wa Mukuru wokupendura ovaṱi ye tjita kutja tu pure omapuriro omengi. Tjimuna nga: Hapo ovaṱi mape ya ave pendurwa momuano uṋe? Mape ya atu zemburuka ovasuverwa vetu tji va kotorwa komuinyo rukwao? Omomiano viṋe ombendukiro mu mai tu yetere ondjoroka? Nu ombendukiro i tu honga tjike ohunga norusuvero, ounongo nomuretima wa Jehova? Nambano matu katara kepuriro arihe kourike waro.

5. Ongwaye tji matu sokuundjira ko kutja ovandu avehe kave nokupendurirwa tjimwe?

⁵ Indu Jehova tji ma pendura ovandu ovengi okupitira mOmuna we, eṱe mape ya atu undjire ko kutja kave nokupendurirwa tjimwe. Ongwaye tji matu tja nao? Mena rokutja tji pe riweza ovandu ovengi tjimanga kombanda yehi, mape ya ape kara ombambaukire. Nu oviṋa vya Jehova aruhe vi kayenda mongongorasaneno ombwa. Eye u tjiwa kutja oviṋa vi sokuungurwa momuano omuwa kutja ovandu ve hupe mohange. (1 Kor. 14:33) Jehova Mukuru wa raisa ounongo nomuretima indu tjaa ungura puna Jesus okurongerisa ehi kovandu okutura mo. Jesus wina ma karaisa ovikaṋena otjingevyo mOzombura Eyovi zOmananeno we, indu tji ma kaungura puna imba mba tuurunga oArmagedon okurongerisa ehi nawa ku imba mbu mave pendurwa.

6. Otja kOviungura 24:15, oouṋe mbu mave kara mokati ka imba mba pendurwa i Jehova?

 ⁶ Ma rire ounanḓengu tjinene ku imba mba tuurunga oArmagedon okuhonga imba mba pendurwa, ohunga nOuhona wa Mukuru nombango ye. Ongwaye? Mena rokutja otjingi tjovandu mba pendurwa mave rire orupa rwotjimbumba tjovandu imba ‘ovavi.’ (Lesa Oviungura 24:15.) Owo mave sokutjita omarundurukiro omengi kutja ve mune ouwa okuza motjisuta tjonguturiro tja Kristus nu ve hupe nga aruhe. Ripura uriri kutja ma rire oviungura mbi ṱapi okuhonga ovandu omangete omengi mbe hi nokutjiwa otjiṋa ohunga na Jehova. Hapo omundu auhe ma kara nomundu ngu me mu hongo, tjimuna tji tu tjita ndino? Nu hapo imba mba pendurwa mave hindwa kozombongo okukahongwa kutja ve honge imba mba pendurwa kombunda yawo? Iho ka tu nokutjiwa matu kamunina mbo. Posi yokutja, matu tjiwa kutja komaandero wOzombura Eyovi zOmananeno wa Kristus, “ehi mari ura nondjiviro ya Muhona.” (Jes. 11:9) Tjiri matu kara noviungura mbi ma vi tupe ondjoroka oure woruveze ndwo.

7. Ongwaye ovakarere va Mukuru tji mave sokukara notjari indu tji mave hongo imba mba pendurwa?

⁷ Moure wOzombura Eyovi zOmananeno wa Kristus, ovakarere va Jehova avehe mave sokukayenda komurungu okutjita omarundurukiro kutja ve tjate ku ye. Kunao ovakarere va Jehova avehe mbo mave kara notjari na imba mba pendurwa nu mave ve vatere okutjita omarundurukiro kutja ve yenene okupirukira omeripura novitjitwa ovivi, nokuhupa otja komirari vya Jehova. (1 Petr. 3:8) Otjiperi kutja imba mba pendurwa mave vanga okukara pu novakarere va Jehova mbe risusuparisa nu wina mbe kondja ‘okuungurira ondjamo yawo’ oveni.—Fil. 2:12.

8. Ongwaye tji mape ya atu zemburuka ovazamumwe nomapanga wetu nga pendurwa komuinyo?

⁸ Pe nomapu omengi ngu maye raisa kutja imba mbu mave yakura ovaṱi mave yenene okuzemburuka ovasuverwa vawo. Otjotjihorera, omuano Jehova ma pendura ovandu moruveze orukuru, u tu honga kutja ma kapendura ovandu otja kombuniko ndji va ri nayo, na momuano mbwaave hungire nokuripura, ousupi ngunda ave hiya ṱa. Zemburuka kutja Jesus wa sasaneka onḓiro ku nokurara ozomboṱu nu wa sasaneka ombendukiro ku nokupenduka mozomboṱu. (Mat. 9:18, 24; Joh. 11:11-13) Indu omundu tja zu nokupenduka mozomboṱu, ombunikiro ye nokuhungira kwe ka vi runduruka nu u zemburuka oviṋa mbya ri navyo mourizemburuka, ngunda e hiya rara. Tara kotjihorera tja Lasarus. Eye wa ṱa nu a kara oure womayuva yane meyendo, nu orutu rwe rwa uta okuzunḓaka. Posi yokutja, Jesus tje mu pendura, ovaṱena kwe ve mu zemburuka tjimanga, nu Lasarus we ve zemburuka wina.—Joh. 11:38-44; 12:1, 2.

9. Ongwaye imba mbu mave pendurwa tji ve hi nokukara nourizemburuka notutu otuhomonena?

⁹ Tara kepu oritjavari. Jehova wa kwizika kutja ka pe nomundu ngu ma hupu kehi youvara wa Kristus ngu ma tja: “eye wa vera.” (Jes. 33:24; Rom. 6:7) Kunao, imba mbu mave kapendurwa movakoke mave ka kara notutu otuveruke. Nungwari, owo kave nokurira ohomonena tjimanga kombunda yombendukiro. Mena rokutja tji va rire ohomonena tjimanga, ovazamumwe nomapanga kamaave ve zemburuka. Pe munika aayo ovandu avehe mave ri re ohomonena kouṱiṱiṱiṱi moure wOzombura Eyovi zOmananeno wa Kristus. Komaandero  wozombura eyovi, Jesus ma yarura Ouhona ku Ihe. Nu okuzambo Ouhona tja ndje wa yenenisa avihe Jehova mbyaa vanga, tjimuna okuyarura ovandu kouhomonena.—1 Kor. 15:25-28; Omavan. 20:1-3.

10. Hapo ombendukiro mape ya ai ku ṱunu vi?

¹⁰ Ripura uriri kutja mape kara vi tji mo hakaene novasuverwa woye rukwao. Hapo ondjoroka ndjo mape ya ai tjiti kutja u yore poo urire? Hapo ondjoroka ndjo mape ya ai tjiti kutja u tange Jehova nomaimburiro? Tjiri matu yenene okusuvera Tate wetu nOmuna we omusuverwa tjinene, kokutjita kutja pe kare ombendukiro.

11. Otja komambo wa Jesus nge ri mu Johanes 5:28, 29, maku katjitwa tjike ku imba mbe nonḓuviro komirari vya Mukuru?

¹¹ Ripura uriri nondjoroka imba mba pendurwa ndji mave kara nayo, indu tji mave hukura omundu omukuru nave utu okuhupa otja komirari vya Mukuru omisemba. Imba mbu mave tjiti omarundurukiro ngo, mave yandjerwa okukahupa nga aruhe moparadisa. Nu imba mbu mave pirukire Jehova kave nokuyandjerwa okukahupa moparadisa.—Jes. 65:20; lesa Johanes 5:28, 29.

12. Omomuano uṋe imba mbu mave kara kombanda yehi mu mave serwa ondaya i Jehova?

¹² Ovakarere va Mukuru avehe mbe ri kehi yOuhona we mave kamuna ouatjiri mbu ri mOmiano 10:22, mbu mau tja: “Ondaya ya Muhona ondji ku tumbisa; ongondjero yoviungura kai ku wezire ko otjiṋa.” Nombatero yombepo ya Jehova, ovakarere va Mukuru kouṱiṱiṱiṱi mave rire ohomonena tjimuna Kristus. (Joh. 13:15-17; Ef. 4:23, 24) Nu wina eyuva arihe otutu twawo matu rire otuveruke, nu mave rire ovandu ovasemba. Tjiri indwo maru rire oruveze oruwa. (Job 33:25) Hapo okuripurira ko oukoto kombendukiro maku ku vatere vi nai?

13. Omomuano uṋe Epsalme 139:1-4, mu ri raisa kutja Jehova u tu tjiwa nawa, nu ombendukiro mai ṋunisa vi otjiṋa ho?

¹³ Otja tji twa hungirire ko rukuru, Jehova ma kapendura ovandu nourizemburuka novikaṋena vyoundu mbi vari navyo. Ripura uriri kutja iho matji hee tjike. Jehova we ku suvera tjinene nu u tjiwa nokuzemburuka omeripura, oumune, omambo novitjitwa vyoye. Indu tji ma sokukupendura, eye ma yenene okukotora ourizemburuka, ongaro novitjitwa vyoye oupupu. Ombara David aa tjiwa kutja Jehova u tjiwa auhe wetu nawa. (Lesa Epsalme 139:1-4.) Okutjiwa kutja Jehova u tu tjiwa nawa ku tu ṱuna vi?

14. Oumune uṋe mbu matu sokukara nawo, indu tji matu ripurire komuano Jehova me tu tjiwa?

¹⁴ Indu tji twe ripurire ko oukoto komuano Jehova mbwe tu tjiwa nawa, eṱe ka tu sokurikenda. Omena ratjike? Zemburuka kutja Jehova tjiri u rikendera eṱe. Eye u vara auhe wetu otjotjiṋa otjihuze ku ye. Eye u zemburuka oviṋa avihe mbi tu ṱuna mehupo retu. Tjiri iho otjiyanḓiparise. Eṱe atu roro okurimuna ourike. Jehova aruhe uri puna eṱe nu u vanga okutuvatera.—2 Ekuruh. 16:9.

15. Omomuano uṋe ombendukiro mui raisa ounongo wa Jehova?

¹⁵ Ovanavita ve yenena okutirisa ovandu nonḓiro mokuveṋiṋikiza kutja ve tjite oviṋa mbi ve hi nokuvanga. Ovandu mbe ri kehi youvara wa Satan ve tirisa ovandu nonḓiro kutja ve horore omapanga wawo poo ve tjite oviṋa mbi ve ha sokutjita. Posi yokutja  owo kamaave twa mo emuma mweṱe. Matu tjiwa kutja ovanavita na eṱe tji ve tu zepa, Jehova me tu kotora komuinyo. (Omavan. 2:10) Kape notjiṋa tji matji tu tjaere okukarera Jehova. (Rom. 8:35-39) Jehova wa raisa kutja eye onongo tjiri, indu tje tupa omaundjiro wombendukiro. Mena ranao eṱe katu mumapara, indu imba mbe yandja oruvara ku Satan tji mave tu tirisa nonḓiro, mokuvanga kutja tu tjite oviṋa mbi mave vanga. Wina otjiṋa ho tji tu yanḓiparisa tjinene kutja tu rire ovaṱakame ku Jehova.

16. Omapuriro yeṋe ngu mo sokuripura omuini, nu omaziriro maye ku vatere vi okutjiwa kutja u nongamburiro ndji ṱa pi mu Jehova?

¹⁶ Indu ovanavita na Jehova tji mave ku tirisa nonḓiro, hapo ove mo kara nongamburiro kutja eye me ke ku pendura? Mo yenene okutjiwa vi? Ripura omuini kutja, ‘Hapo oviṋa mbi mbi tjita eyuva arihe vi raisa kutja mbi nongamburiro mu Jehova?’ (Luk. 16:10) Epuriro rarwe mape ya a ri rire ndi, ‘Hapo omuano mu mbi ungurisa oruveze nomawini wandje u raisa kutja mbi nongamburiro momakwizikiro wa Jehova wokutja me ndji vatere tji mba twapo Ouhona we poruveze orutenga mehupo?’ (Mat. 6:31-33) Indu eziriro roye tji ri ri o ii, mo raisa kutja u nongamburiro mu Jehova nu omarorero ngamwa aehe tji ye ku wire mo kara a we rirongere.—Omiano 3:5, 6.

17. (a) Ombendukiro i raisa vi kutja Jehova u nomuretima? (b) Matu raisa vi ondangi komuretima wa Jehova?

¹⁷ Jehova wa tya rukuru kutja oruṋe tji me ya okuyandeka ouye ourunde mbwi. (Mat. 24:36) Eye kamaa toora omukambo komurungu woruveze, mena romuretima we. Nu u nonḓero okupendura ovaṱi, posi yokutja eye ngunda u nomuretima. (Job 14:14, 15) Jehova u undja oruveze orusemba ndu me ke ve pendura komuinyo. (Joh. 5:28) Tjiri eṱe tu nomapu omawa okuraisa ondangi komuretima wa Jehova. Nu mena romuretima we, eṱe atuhe twapewa oruveze ‘okuritanaura komauvi’ wetu. (2 Petr. 3:9) Jehova u vanga kutja ovandu ovengi ve ka hupe nga aruhe. Kunao matu sokuraisa ondangi komuretima we. Omomuano uṋe? Omokukondja pu matu yenene okupaha imba ‘mbe nomitima omiwa okukamuna omuinyo wa aruhe,’ nokuvevatera okusuvera Jehova nokumukarera. (Oviung. 13:48, NW) Nu owo wina mave munu ouwa komuretima wa Jehova, tjimuna eṱe.

18. Ongwaye tji twa sokukara nomuretima na varwe?

 ¹⁸ Jehova ma undju nomuretima nga komaandero wozombura eyovi a maa undjire ko kutja tu rire ohomonena. Ngunda oruveze ndwo a ru hiye ya, Jehova u ri kamwaha okutuisira omauvi wetu. Kunao eṱe matu sokuhorera komuretima we nokutara kovikaṋena oviwa vya varwe. Tara kotjihorera tjomukazendu omukambure ngwa ri nomurumendu ngwa isa okuyenda kozombongarero zombongo mena romutjise wombameno mbwa ri nawo. Eye wa tja: “Tjiri tja ri otjiṋa otjihihamise kwami. Ehupo retu ra runduruka atu hi nokuundjira ko, nu kaatu yenene okutjita avihe otja kondando yetu.” Nandarire kehi yomauzeu aehe ngo omukazendu omukambure ngo wa raisa omuretima. Eye we riyameka ku Jehova nokuhina okurihahiza. Tjimuna Jehova, eye aa tara ku imbi oviwa omurumendu we mbyaa yenene okutjita. Eye wa tja: “Omurumendu wandje u novikaṋena oviwa, nu u kondja pu ma yenene kouṱiṱiṱiṱi kutja ma veruke.” Tjiri ounanḓengu tjinene okukara nomuretima kuna imba veṱunḓu retu poo mombongo mbe kondja okutuurunga omauzeu.

19. Eṱe matu sokurimanena okutjita ye?

¹⁹ Jesus novaengeli va ri nondjoroka indu ehi tji ra memwa. Posi yokutja ripura uriri nondjoroka ndji mave kara nayo indu ehi tji re ura novandu ohomonena, mba suvera Jehova nu mbe mu karera. Ripura uriri nondjoroka imba mbu mave kanana meyuru puna Kristus ndji mave kara nayo, indu tji mave munu ovandu tji mave yorokere omananeno wawo kombanda yehi. (Omavan. 4:4, 9-11; 5:9, 10) Nu ripura uriri nondjoroka ndji mo kara nayo indu omihihamo, omitjise nonḓiro tji vi he ri po rukwao. (Omavan. 21:4) Ngunda oruveze ndwo aru hiye ya, rimanena okuhorera korusuvero rwa Iho, ounongo nomuretima we. Indu tji wa tjiti nao, ove mo kara nondjoroka nandarire kehi yomauzeu ngu mo munu. (Jak. 1:2-4) Tjiri tu nondangi komakwizikiro wa Jehova wokutja, “ovandu avehe . . . mave penduka movakoke.”—Oviung. 24:15.