1. Ondjingonekero iṋe ndji tuna yo?

TJIRI ondjingonekero onene okurira orupa rwombongo ya Jehova. Eṱe tu yorokera ohange yatjiri otja tji matu karere Jehova pu novakambure ovakwetu mombongo. Hapo ove u notjiungura tjiṋe mombongo?

2. Omasasanekero yeṋe omuapostele Paulus nga ungurisa motutuu twe tu tu ri mOmbeibela?

² Eṱe matu yenene okurihonga ovingi ohunga notjiungura tji tu natjo mombongo, okuza komasasanekero omuapostele Paulus nga ungurisa motutuu twe. Motutuu two, Paulus wa sasaneka ombongo ku norutu rwomundu. Eye wina wa sasaneka omundu auhe mombongo ku nouṋepo worutu.—Rom. 12:4-8; 1 Kor. 12:12-27; Ef. 4:16.

3. Omapu yeṋe yetatu ngu matu katara ko morupa ndwi?

³ Auhe wetu omunanḓengu mombongo ya Jehova. Nu ma yenene okutunga ombongo. Oviungura mbi mo ungura mombongo ovinanḓengu nu kavi notjiṋa nomuhoko, ehupo, onganda ku wa za, ombazu, poo omahongero woye. Morupa ndwi, matu katara komapu yetatu omananḓengu ngu matu rihongo okuza komasasanekero wa Paulus. Rutenga, matu ke rihonga kutja omena raye tji tu ri ovananḓengu mombongo ya Jehova. Otjitjavari, matu katara kutja ovikwaye mbi matu yenene okutjita indu tje ri ouzeu okuyenenisa omerizirira wetu mombongo. Nu otjitjatatu, matu ka hungirira kokutja ongwaye tji matu sokuyenenisa otjiungura Jehova tja yandja ku auhe wetu mombongo.

4. Ovaroma 12:4, 5, ma ri tu hongo tjike?

⁴ Otjiṋa otjitenga tji matu rihongo okuza komasasanekero wa Paulus matji hee kutja, atuhe tu notjiungura otjinanḓengu okuungura mombongo ya Jehova. Momasasanekero we, Paulus rutenga wa tja: “Eṱe tu nouṋepo ouingi morutu rumwe, nouṋepo auhe mbwi u noviungura pekepeke. Nu komuhingo tjingewo nangarire kutja oweṱe ovengi, oweṱe ovorutu rumwe mu Kristus, nu twa wanekwa kumwe otja ouṋepo pekepeke worutu rumwe.” (Rom. 12:4, 5) Paulus aa hee tjike? Nandarire kutja tu noviungura pekepeke mombongo, atuhe oweṱe ovananḓengu.

5. “Oviyandjewa” viṋe Jehova mbya yandja kombongo?

⁵ Tji mo ripura ohunga na imba mbe noviungura mombongo, ove ngahino mo ripura na imba mbe hongorera po ombongo. (1 Tes. 5:12; Hebr. 13:17) Otjingaperi kutja Jehova wa yandja “oviyandjewa kovandu” okuhongorera po ombongo ye, okupitira mu Kristus. (Ef. 4:8) “Oviyandjewa kovandu” mbi, vi kamburira mo ouṋepo wOrutu Orunane, ovavatere wOrutu Orunane, Ouṋepo wOkomiti yOrutavi rwOmberoo, ovatarere mbe varura ozombongo, imba mbe honga ozoskole pekepeke motjira tja Jehova, ovanene vombongo novavatere vombongo. Ovarumendu ovakambure avehe mbo va zikwa nombepo ondjapuke okutjevera ozonḓu za Jehova nokutunduuza ombongo.—1 Petr. 5:2, 3.

6. Otja 1 Ovatesalonika 2:6-8, ovarumendu ovakambure mba zikwa nombepo ondjapuke ve kondja okutjita tjike?

⁶ Ovarumendu ovakambure ve zikwa nombepo ondjapuke okuungura oviungura pekepeke. Tjimuna ouṋepo pekepeke worutu omake nozombaze tji u ungura kumwe okuyeta ouwa korutu aruhe, ovarumendu ovakambure mba zikwa nombepo ondjapuke wina ve ungura oukukutu okuyeta ouwa kombongo aihe. Owo kave kondjo okutangwa i varwe. Nungwari, owo ve kondja okutunduuza nokuyanḓiparisa ovakambure ovakwao. (Lesa 1 Ovatesalonika 2:6-8.) Eṱe tjiri tu nondangi ku Jehova okutupa ovarumendu ovakambure mbo mbe twapo ozonḓero za varwe komeho ya inḓa ozawo oveni.

7. Ozondaya zeṋe imba mbe ungurira Jehova oruveze aruhe nḓu ve muna?

⁷ Tjiva mombongo mape ya ave zikwa okukarera otjovahindwa, ovakandjira vapeke poo ovakandjira woruveze aruhe. Otjiperi kutja, ovakambure ovakwetu mouye va tjita kutja otjiungura tjokuzuvarisa nokukaisapo ovandu ovahongewa, tji rire otjiungura tjoruveze aruhe mehupo rawo. Mena rokutja va toora omukambo mbwo, owo va vatera ovengi okurira ovahongewa va Jesus Kristus. Nandarire kutja ovazuvarise voruveze aruhe mbo kave noviṋa ovingi mehupo rawo, Jehova u ve wezira ko ovingi oviwa. (Mar. 10:29, 30) Eṱe tjiri twa suvera ovakambure ovakwetu mbo nu tu nondangi kutja owo orupa rwombongo.

8. Ongwaye omuzuvarise auhe wombuze ombwa tje ri omunanḓengu ku Jehova?

⁸ Hapo ovarumendu ovakambure mba zikwa nombepo ondjapuke na imba mbe ri motjiungura tjokuzuvarisa oruveze aruhe, ombe noviungura mombongo uriri? Kako katjiperi. Omuzuvarise auhe wombuze ombwa omunanḓengu ku Mukuru na kombongo. (Rom. 10:15; 1 Kor. 3:6-9) Iho omena rokutja okukaisapo ovandu ovahongewa va Muhona wetu Jesus Kristus, ootjiungura tjimwe otjinanḓengu tjinene mombongo. (Mat. 28:19, 20; 1 Tim. 2:4) Avehe mombongo, kutja va papitisiwa poo ovazuvarise mbe hiya papitisiwa, ve kondja okuungura otjiungura otjinanḓengu ho.—Mat. 24:14.

9. Ongwaye ovakazendu ovakambure tji ve ri ovananḓengu kweṱe?

 ⁹ Jehova wa yandja ondjozikiro kovakazendu ovakambure mokuvepa oviungura ovinanḓengu mombongo. Eye u vara ovakazendu mba kupwa, mbe novanatje, ovahepundu na imba ovakombe mbe mu karera nouṱakame. Omatjangwa ye hungira ohunga novakazendu ovengi wovihorera oviwa nu mbaave tjata ku Mukuru. Owo ovihorera oviwa vyovandu mba raisa ounongo, ongamburiro, oupyuke, ouvanḓe, ouharupu noviungura oviwa. (Luk. 8:2, 3; Oviung. 16:14, 15; Rom. 16:3, 6; Fil. 4:3; Hebr. 11:11, 31, 35) Eṱe tjiri tu nondangi ku Jehova okukara novakazendu ovakambure mbe novikaṋena oviwa tjimuna mbyo, mozombongo zetu.

10. Ongwaye ovakambure ovakurundu tji ve ri ovananḓengu kweṱe?

¹⁰ Eṱe wina tu nondjoroka okukara novakurundu ovengi mombongo. Mozombongo tjiva mu novakambure ovakurundu mba karera Jehova nouṱakame oure womuinyo wawo. Nu tjiva kave ya kara orure mouatjiri. Kainatja kutja va kara orure ndu ṱapi mouatjiri, ovakurundu vetu mbo mape ya ave kondjo nomauzeu womitjise pekepeke mbi yetwa i youkurundu. Nu omauzeu ngo mape ya aye tjiti kutja ave ha ungura ovingi mombongo na motjiungura tjokuzuvarisa. Posi yokutja, ovakambure ovakurundu mbo ve kondja pu mave yenene motjiungura tjokuzuvarisa, nu ve ungurisa omasa wawo okutunduuza nokuhonga varwe. Nu eṱe tu rihongera kondjiviro yawo. Tjiri owo ovananḓengu ku Jehova na kweṱe wina.—Omiano 16:31.

11-12. Omomuano uṋe omitanda mombongo yeṋu mu vi ku yanḓiparisa?

¹¹ Ripura wina nomitanda mbi ri mombongo. Owo ve muna omauzeu omengi otja tji mave kuru mouye mbu honaparerwa po i Satan Omudiaboli nomahongero we omavi. (1 Joh. 5:19) Nungwari, tji matu munu omitanda tji mavi yandja omaziriro wawo pozombongarero zombongo, tji vi norupa motjiungura tjokuzuvarisa na indu tji mavi rwire ongamburiro yawo nouvanḓe, iho tji tu yanḓiparisa. Tjiri omitanda vi noviungura ovinanḓengu mombongo ya Jehova.—Eps. 8:2.

 ¹² Posi yokutja ouzeu kovakambure ovakwetu tjiva okumuna kutja mave yenene okuungurisiwa mombongo. Otjikeṋa tji matji vatere auhe wetu okumuna kutja ma yenene okuungurisiwa mombongo? Indjo tu tare kepu ndo.

13-14. Ongwaye tjiva tji mape ya ave munu kutja owo ka vananḓengu mombongo?

¹³ Epu oritjavari momasasanekero wa Paulus ri tjita kutja tu ripure ohunga nouzeu ovandu ovengi mbu ve muna ndino. Irira ouzeu kovandu ovengi okurimuna kutja ovananḓengu mombongo. Paulus wa tja: “Ndakuzu ombaze mai tja: ‘Ami tjinga ambi he ri eke otjinga ambi he ri okaṋepo korutu,’ indu oyo mai isa okurira okaṋepo korutu are? Ndakuzu okutwi maku tja: ‘Ami tjinga ambi he ri eho, otjinga ambi he ri okaṋepo korutu,’ indu okwo maku isa okurira okaṋepo korutu are?” (1 Kor. 12:15, 16) Paulus aa vanga okutuhonga tjike?

¹⁴ Indu tji we risasaneke kuna varwe mombongo, ove mape ya o utu okumuna kutja ka ove omunanḓengu mombongo. Tjiva mombongo mape ya ave rire ovahonge ovawa, ovaworonganise ovawa poo ovayanḓiparise ovawa wovakwao. Mape ya o munu kutja owo ovaungure ovawa pove. Iho matji raisa kutja oove omurisusuparise. (Fil. 2:3) Posi yokutja ṱakamisa. Indu aruhe tji u risasaneka kuna imba mbe ungura oviungura vyawo nawa, ove mape ya o rihahiza. Mape ya o utu okumuna kutja oviungura vyoye ka vi nonḓengu mombongo tjimuna Paulus tja heya. Otjikeṋa tji matji ku vatere okuhina okukara noumune mbwo?

15. Otja 1 Ovakorinte 12:4-11, otjikeṋa tji matu sokuzemburuka ohunga notjiyandjewa atjihe tji mape ya atu kara natjo?

¹⁵ Ripura nepu ndi, okupitira mombepo ondjapuke Jehova wa yandja oviyandjewa vyokutjita ovihimise kOvakriste tjiva veserewondo etenga, nungwari Omukriste auhe wa pewa otjiyandjewa tje peke. (Lesa 1 Ovakorinte 12:4-11.) Posi yokutja Omukriste auhe wa ri omunanḓengu. Ndino, ka tu hingwa i  yombepo ondjapuke okutjita ovihimise. Posi yokutja ombepo ondjapuke ngunda i tu hongorera. Eṱe atuhe katji tu noviyandjewa vimwe, posi yokutja oweṱe ovananḓengu ku Jehova.

16. Erakiza riṋe okuza komuapostele Paulus ndi matu sokukongorera?

¹⁶ Pendje nokurisasaneka ku nOvakriste ovakwetu, matu hepa okukongorera erakiza nda tjangwa i yomuapostele Paulus. Eye wa tja: “Auhe nge rinongonone otja komeritjindiro we omuini. Nu tja munu kutja ovitjitwa vye oviwa, eye ma yenene okurihivira vyo nokuhinokuvisasaneka na imbi vyomukwao.”—Gal. 6:4.

17. Ouwa wa ye mbu matu munu tji twa kongorere erakiza ra Paulus?

¹⁷ Indu tji twa kongorere erakiza nda tjangwa i Paulus nokukonḓonona ovitjitwa vyetu, eṱe mape ya atu utu okutjiwa kutja matu yenene okuungura oviṋa varwe mbi ve hi nokuyenena okutjita. Otjotjihorera, omunene wombongo mape ya a ha rire omuyandje omuwa womahungi, posi yokutja a rire omuzuvarise omuwa. Poo mape ya a ha rire omuworonganise omuwa tjimuna ovanene vombongo varwe, posi yokutja mape ya a tjiukwa otjomurise worusuvero ovazuvarise ku ve yenena okukapaha ko ombatero. Poo mape ya a rire omusekirise omuwa. (Hebr. 13:2, 16) Indu tji twa tjiwa oviṋa mbi matu yenene okutjita, tu kara nondjoroka kombatero ndji matu yenene okuyandja kombongo. Nu kamaatu kara neruru ku novakambure ovakwetu tji ve noviyandjewa mbya panguka ku imbi ovyetu.

18. Omomuano uṋe mu matu yenene okurira ovazuvarise ovawa?

¹⁸ Kainatja kutja tu ungura otjiungura tjiṋe mombongo, atuhe matu sokukara nonḓero yokuungura otjiungura tje nawa. Jehova u yandja omahongero omawa okupitira motjira tje, ngu maye tu vatere okuungura oviungura vyetu nawa. Otjotjihorera, pombongarero yetu yomokati kotjivike tu rongerisiwa okurira ovazuvarise ovawa. Hapo ove u kondja okuungurisa omahongero ngu u muna ngo?

19. Ove mo yenene vi okuyenda kOskole yOvazuvarise vOuhona?

¹⁹ Okuyenda kOskole yOvazuvarise vOuhona omahongero warwe ngu tu muna. Imba mbu mave yenene okuyenda koskole ndjo, ovakambure mbe karera Jehova oruveze aruhe motjiungura tjokuzuvarisa nu mbe nozombura zopokati 23 no 65. Mape ya o munu kutja ove ko nokuyenena. Pendje yokutjanga ondeto yoviṋa mbi mavi ku tjaere okuhinokuyenda, tjanga ondeto yomapu wokutja ongwaye tji mo vanga okuyenda. Nu okuzambo ripura poo tjanga oviṋa mbi mo sokutjita, kutja u yenene okutjita omaningiriro. Tji mo ungura oukukutu nombatero ya Jehova, ove mape ya o yenene okutjita oviṋa mbyaavi munika ouzeu okutjita.

20. Matu rihongo tjike okuza kOvaroma 12:6-8?

²⁰ Epu oritjatatu ndi matu rihongo okuza komasasanekero wa Paulus ri ri mOvaroma 12:6-8. (Lesa.) Paulus rukwao imba wa raisa kutja omundu auhe mombongo u notjiyandjewa tje. Posi yokutja eye nai ma ṋunisa kutja tu sokuungurisa otjiyandjewa atjihe tji tuna tjo okutunduuza nokuyanḓiparisa ombongo.

21-22. Matu rihongo tjike okuza ku Robert na Felice?

²¹ Tara kotjihorera tjomurumendu omukambure wena Robert. * Indu eye tja za nokukarera mehi rarwe, wa pewa otjiungura tjokukaungura po Betel mehi re omuini. Nandarire kutja ovarumendu ovakambure ve mu raera kutja otjiungura otjipe tja pewa ka mena rokutja  wa tjita otjiṋa otjivi. Eye wa tja: “Oure womieze omingi mba pandjarere ondjoroka yandje mena rokutja ee munu kutja hi ungurire nawa otjiungura tji mba ri natjo. Povikando tjiva ee vanga okuisa okuungura po Betel.” Hapo eye wa kara vi nondjoroka rukwao? Omunene wombongo omukwao we mu zemburukisa kutja Jehova u tu honga motjiungura ngamwa atjihe, kokutja tu yenene okurira ovaungure ovawa motjiungura mu tu ri. Robert wa kamuna kutja ma sokuisa okuripura noviṋa mbya kapita nu ma yandje ombango ku imbi mbi ma yenene okuungura nai.

²² Mbuti Felice Episcopo wa ri mongaro otjingeyo. Mombura ndji 1956 eye nomukazendu we va mana poskole ya Gilead nu eye wa ka ri ra omutarere worukondwa moBolivia. Mombura ndji 1964 va muna omuatje omuzandu. Felice wa tja: “Tjiri ya ri ouzeu kweṱe okuisa otjiungura tji twa suvera. Nu ami mba wire momuinyo oure wombura imwe. Nungwari nombatero ya Jehova ami mba rundurura ongaro yandje nu mba uta okuripurira komerizirira wandje otjomunene.” Hapo u rimuna tjimuna Robert poo Felice? Hapo u wa momuinyo mena rokutja ko nomerizirira ngu wa ri nawo rukuru? Indu tji pe ri nao, ma rire nawa tji wa yandja ombango ku imbi mbi mo yenene okutjita nai kokutja u ungurire Jehova novakambure ovakweṋu. Kayende komurungu okuungurisa oviyandjewa nondjiviro yoye okuvatera varwe, nu ove mo munu ondjoroka otja pu mo tungu ombongo.

23. Eṱe matu sokukara noruveze okutjita vi, nu morupa ndu maru kongorere ko matu katara kepu riṋe?

²³ Auhe wetu omunanḓengu ku Jehova. Jehova u vanga kutja tu rire orupa rweṱunḓu re. Indu tji twe ripurire ku imbi mbi matu yenene okutjita nu atu ungura oukukutu okuvatera ovakambure ovakwetu, mape ya atu rimunu kutja oweṱe ovananḓengu mombongo. Nu hapo ovakwetu mombongo tu ve vara vi? Matu raisa vi orusuvero nondengero ku wo? Morupa ndu maru kongorere ko, matu katara kepu enanḓengu ndo.