1-2. Morupa ndwi matu katara ku ye?

HAPO ove u fula vi indu tji mo undju otjiṋa natji kambura orure okuvaza? Ove mo utu okurikenda? Omiano 13:12 ri tja: “Omaundjiro nge womba orure ye verisa omutima.” Hapo ove mo kara noumune uṋe indu tji wa zuu kutja pa ri nomapu omawa nga tjiti kutja otjiṋa ho atji ha vaza moruveze ndu wa ri amo undjire ko? Ove tji wa tjiwa nao, mape ya mo kara nomuretima wokuundja.

² Morupa ndwi matu katara komirari vyOmbeibela tjiva mbi mavi tu vatere ‘okuundja ku Ndjambi.’ (Mika 7:7) Okuzambo, matu kahungirira kozongaro mbari mu matu hepa okukara nomuretima wokuundja ku Jehova kutja me tu vatere. Korusenina, matu katara kozondaya nḓa kwizikirwa imba mbe nonḓero yokuundja ku ye.

3. Omurari mbu ri mOmiano 13:11 mau tu hongo tjike?

³ Omiano 13:11 ri notjihorera tji matji tu hongo ounanḓengu wokukara nomuretima. Oro ri tja: “Pu mo munu outumbe woye oupupu opu mo u pandjarisa tjimanga; pu mo u munu kouṱiṱiṱiṱi opu mau takavarere ko.” Ovikwaye mbi matu rihongo okuza kezeva ndi? Omundu onongo u tjita oviṋa nomuretima nu u muna ouwa mokutjita nao.

4. Ovikwaye mbi matu yenene okurihongera komurari mbu ri mOmiano 4:18?

⁴ Etjangwa rOmiano 4:18 ri tu raera kutja, “Ondjira mu mu ryanga omusemba i ri otja eyuva mokupita, ndi mari yere nga ondjerera aihe yaro tji ya hanyanya.” Omambo nga ye raisa oukahu kutja Jehova u vatera ovakarere ve okuzuva ondando ye kouṱiṱiṱiṱi. Ezeva ndi wina ri yenena okutuvatera okuzuva nawa omuano Omukriste me tjita omarundurukiro mehupo re nokutumbuka popezu na Jehova. Pe kambura oruveze komundu  okutumbuka popezu na Jehova. Indu tji twa konḓonona Ombeibela nawa na tu ṱakamisa omuhunga okuza kotjira tja Jehova, matu yenene okuraisa ovikaṋena tjimuna ovya Kristus. Eṱe wina matu yenene okutjiwa Mukuru nawa. Tara komuano Jesus ma sasaneka epu ndo.

5. Otjihorera tjiṋe Jesus tja yandja okuraisa kutja pe kambura oruveze komundu okutjita omarundurukiro?

⁵ Jesus wa ungurisa otjisasanekero okuraisa kutja ombuze yOuhona ndji tu zuvarisa i ri tjimuna ondwi ndji hapa kouṱiṱiṱiṱi momitima vya imba mba suvera ousemba. Eye wa tja: ‘Ozondwi ze pita naze hapa eye ngunda e hi nokutjiwa kutja avihe vya kayenda vi. Ehi orini ondi hapisa ozondwi, nozo aze eta ovikurya; rutenga a rire ehozu, tjazumba a rire omangura mozondjaṱu, nu, korusenina a rire ovikokotwa mbya papa nawa mozondjaṱu.’ (Mar. 4:27, 28) Hapo Jesus aa hee tjike? Eye aa hee kutja otja omuti tji u kambura orure okuhapa, omundu ngwa yakura ombuze yOuhona u kambura oruveze okutjita omarundurukiro mehupo re. Otjotjihorera, indu ovahongwa vetu vOmbeibela tji va tumbuka popezu na Jehova, tu uta okumuna omarundurukiro omengi mehupo rawo. (Ef. 4:22-24) Posi yokutja, eṱe matu sokuzemburuka kutja Jehova ongu tjita kutja ondwi i hape.—1 Kor. 3:7.

6-7. Ovikwaye mbi matu rihongo okuza komuano Jehova ma mema ehi?

⁶ Oviṋa avihe Jehova mbi ma tjiti, eye u toora oruveze okuviungura. Eye u tjita nao, kutja ma ete ohiviro kena re nokuvatera varwe. Otjotjihorera, tara komuano Jehova ma rongerisa ehi kouṱiṱiṱiṱi.

⁷ Indu Ombeibela tji mai hungire ohunga nomuano Jehova ma uta ehi, oyo i hungira komuano eye ma tya kutja “ounene wouye mau sokuṱeka pi” nomuano ma zikamisa ‘ozongunḓe ku kwa kuramena ehi newe raro rotjikoro.’ (Job 38:5, 6) Eye nandarire wa nongonona oviungura vye na munu kutja oviwa. (Gen. 1:10, 12) Ripura uriri kutja ovaengeli va ṱunwa vi indu tjaave tarere Jehova ama  ungura oviṋa pekepeke? Owo mape ya va ri nondjoroka tjinene, mena rokutja va “ravaera nenyando.” (Job 38:7) Hapo eṱe matu rihongere ko ye? Indu Jehova tja mema ehi, ozonyose noviutwa vyarwe avihe kwe mu kambura ozombura omayovi omengi. Posi yokutja, tja nongonona oviṋa avihe mbya ungura eye wa muna kutja “oviwa tjinene.”—Gen. 1:31.

8. Matu kahungirira ku ye nai?

⁸ Otja tji twa munu movihorera mbi twa hungirire ko, eṱe matu yenene okumuna omirari omingi mEmbo ra Mukuru mbi mavi ṋunisa ounahepero wokukara nomuretima. Eṱe nai matu katara kozongaro mbari mu matu hepa okuundja ku Jehova.

9. Ongaro iṋe imwe mu tu hepa okuundja ku Jehova?

⁹ Eṱe mape ya atu hepa okuundja eziriro kozongumbiro zetu. Indu tji twa kumbu ku Jehova okutupa omasa okutjinda omauzeu wetu poo okutuvatera okuisa oviṋa eye mbya tonda, eṱe mape ya atu munu kutja Jehova ma kambura orure okuzira ozongumbiro zetu. Ongwaye Jehova tje ha hakahanene po okuzira ozongumbiro zetu?

10. Ongwaye tji tu hepa okuundja nomuretima okumuna eziriro kozongumbiro zetu?

¹⁰ Jehova u puratena kozongumbiro zetu nombango aihe. (Eps. 65:2) Eye u vara ozongumbiro zetu otjotjiraisiro tjokutja tu nongamburiro mu ye. (Hebr. 11:6) Indu tji matu kumbu ku Jehova okupaha ombatero kutja tu tjate ku ye, eye u vanga okumuna ongondjero yetu yokuhupa otja kombango ye. (1 Joh. 3:22) Kunao indu tji twa ningire Jehova okutuvatera okuisa ozongaro nḓa tonda, eṱe matu hepa okukara nomuretima nokutjita avihe pu matu yenene okuisa ozongaro zetu ozombi. Jesus we tu vatera okumuna kutja ozongumbiro zetu tjiva kamaaze zirwa tjimanga. Eye wa tja: “Ningireye nu mamu pewa; paheye nu mamu munu; kongoreye nu mamu patururirwa, orondu auhe ngu ma ningire ma pewa, nu ngu ma paha ma munu, nu ngu ma kongora ma patururirwa.” (Mat. 7:7, 8) Indu tji twa kongorere omambo ngo na tu ‘panḓere pongumbiro,’ eṱe matu yenene okukara nongamburiro kutja Tate wetu womeyuru ma ziri ozongumbiro zetu.—Kol. 4:2.

11. Ovaheberi 4:16 mari tu vatere vi indu tji matu munu kutja ozongumbiro zetu kaze nokuzirwa tjimanga?

¹¹ Nandarire kutja matu munu kutja Jehova ma toora orure okuzira ongumbiro yetu, eye wa kwizika okuzira ozongumbiro zetu “moruveze orusemba.” (Lesa Ovaheberi 4:16.) Kunao, eṱe katu sokuyandja ondjo ku Jehova indu tje ha zirire ozongumbiro zetu tjimanga. Otjotjihorera, ovengi va kumba oure wozombura ozengi kutja Ouhona wa Mukuru u ye okuisa po ouye ourunde mbwi. Nandarire Jesus wa tja eṱe ngatu kumbe kutja Ouhona wa Mukuru u ye. (Mat. 6:10) Posi yokutja, kaunongo indu omundu tji ma yandjere ongamburiro ye mu Mukuru okungundipara mena rokutja omaandero kaye ere indu ovandu tjaave undjire ko. (Hab. 2:3; Mat. 24:44) Eṱe matu raisa ounongo indu tji matu undju ku Jehova, nokukara nongamburiro kutja ma zuvire ozongumbiro zetu. Omaandero maye ya moruveze orusemba, Jehova tjinga a toorora rukuru “eyuva ndo na indji oiri.” Nu indwo maru rire oruveze orusemba ku avehe.—Mat. 24:36; 2 Petr. 3:15.

12. Omuretima wetu mape ya au rorwa momuano uṋe?

¹² Eṱe matu hepa okukara nomuretima indu tji matu tjindwa navi. Ovandu potuingi ve tjinda varwe navi mena rozombura zawo, omuhoko ku vaza, ombazu yawo poo mena rehi ku vaza. Nu varwe wina ve tjindwa navi  mena rokutja va remana poo kave ri nawa mourizemburuka. Ovahongonone va Jehova ovengi ve tjindwa navi mena rongamburiro yawo. Indu tji matu tjindwa navi eṱe matu sokuzemburuka omambo wa Jesus. Eye wa tja: “Ingwi ngu ma panḓere po nga komaandero, ma yamwa.” (Mat. 24:13) Hapo ove mo sokutjita vi indu tji wa tjiwa kutja omukambure mombongo wa tjiti ouvi ounene? Indu ovanene vombongo tji va tjiwa ohunga notjiṋa ho, hapo ove mo kara nomuretima nongamburiro kutja owo mave zengurura otjiṋa ho otja komirari vya Jehova? Hapo ovanene vombongo ve sokutjita vi indu omundu tja tjiti ouvi ounene?

13. Hapo Jehova u vanga kutja ovanene vombongo ve tjite vi indu omundu tja tjiti ouvi ounene?

¹³ Indu ovanene vombongo tji va tjiwa kutja omundu mombongo wa tjiti ouvi ounene, owo ve kumba nokuningira “ounongo mbu za kOmbanda,” kutja ve yenene okutjiwa oumune wa Jehova ohunga notjiṋa ho. (Jak. 3:17) Ondando yawo oyokukondja ‘okutanaura omunauvi kondjira ye youvi.’ (Jak. 5:19, 20) Owo wina ve kondja pu mave yenene okutjevera ombongo nokuhuhumiṋa imba mba hihamisiwa. (2 Kor. 1:3, 4) Indu ovanene vombongo tji va tjiwa kutja omundu wa tjiti ouvi ounene, owo rutenga mave sokutjiwa ouatjiri auhe. Nu mape ya okutjita nao a ku kambura orure. Okuzambo owo ve kumba nokuyandja omaronga okuza kOmatjangwa nave vyura ingwi ngwa tjiti ouvi “osemba.” (Jer. 30:11) Nandarire kutja ovanene vombongo kave toora orure tjinene okutjita ondando, owo wina kave hakahanene po okutjita nao. Indu owo tji va kongorere omirari vya Jehova, iho tji tjita kutja auhe mombongo ma kare nondjoroka. Nandarire indu ovanene vombongo tji va ṱaṱere ku Jehova nave kongorere omirari avihe mbi mave sokutjita, imba mba ṱunwa i yovitjitwa vya ingwi ngwa tjiti ouvi mape ya ave kayenda komurungu okuhihamisiwa i yotjiṋa ho. Tji u ri mongaro otja indjo, hapo ove mo tjiti vi kutja o ha hihamisiwa i yotjiṋa ho tjinene?

14. Otjihorera tjiṋe mOmbeibela tji matji yenene okukuhuhumiṋa indu tji wa hihamisiwa i yomukambure mombongo?

¹⁴ Hapo ove wa rora okuhihamisiwa nomasa i yomukambure mombongo? Ove mo yenene okumuna ovihorera oviwa mEmbo ra Mukuru, mbi tu honga omuano mu matu  yenene okuundja ku Jehova okuṱuna oviṋa. Otjotjihorera, nandarire kutja Josef wa tjindwa navi i yomarumbi we omuini, eye kayandjerere kutja ongaro yawo ndjo i tjite kutja ma rire omundu ngwa pindika. Nungwari, Josef wa kayenda komurungu okukarera Jehova nu mena romuretima nonḓaro orure ye, Jehova we mu sera ondaya. (Gen. 39:21) Otja oruveze tjaaru kayenda, Josef wa yenena okuisira imba mbe mu hihamisa nu wa muna omuano Jehova me mu sera ondaya. (Gen. 45:5) Tjimuna Josef, eṱe tu muna omahuhumiṋino indu tji matu tumbuka popezu na Jehova nokuundja ku ye okuṱuna ouhasemba mbwa tjitwa ku eṱe moruveze ndu ri rwo.—Eps. 7:17; 73:28.

15. Ovikwaye mbya vatera omukazendu omukambure okutuurunga ouhasemba mbwa tjitwa ku ye nokukara nohange momuinyo?

¹⁵ Otjingaperi kutja atuhe tu hihamwa indu tji twa tjindwa navi momuano umwe poo omukwao, nandarire kutja oviṋa mbya tjitwa ku eṱe kavivi tjinene tjimuna imbi mbya tjitwa ku Josef. Indu tji tu nouzeu ku nomundu, nandarire omundu ngu ha karere Jehova, eṱe matu munu ouwa indu tji twa ṱakamisa omirari vyOmbeibela. (Fil. 2:3, 4) Tara kotjihorera hi. Omukazendu omukambure wa hihamwa tjinene indu tja zuva kutja omukazendu warwe ngu ve ungura pamwe aa hungire oviṋa ovivi mbi he ri ouatjiri ohunga na ye kuna varwe. Moruveze rwokutoora omazenge tjimanga, omukazendu omukambure ngwo we ripurira kotjihorera tja Jesus. Indu Jesus tjaa yambururwa eye kazirire ko nembo rondjambu. (1 Petr. 2:21, 23) Otjihorera tja Jesus tje mu vatera kutja a ha ka purisa omukazendu ngwo. Kombunda, eye wa ka zuva kutja omukazendu ngwaave ungura pamwe ngwo, wa verere tjinene nu wa ri nombameno momuinyo. Omukazendu omukambure wa kamuna kutja omukazendu ngwo omambo ngo ke ye hungirire owina. Kunao, omukazendu omukambure ngwo wa ri nohange kutja wa yenena okutuurunga ouhasemba mbwa tjitwa ku ye mbwo nomuretima.

16. Ovikwaye mbi mavi yenene okutuhuhumiṋa tji matu tjindwa navi? (1 Petrus 3:12)

¹⁶ Indu tji u muna ouzeu mena rouhasemba poo mena romapu warwe kaaṋi, zemburuka kutja Jehova u ri popezu na “imba mbe noruhoze.” (Eps. 34:18) Eye we ku suvera mena  rokutja u mu raera omerikendero woye nu u nomuretima. (Eps. 55:22) Eye ongu ri omupangure omusemba, nu u muna oviṋa avihe mbi tjitwa kombanda yehi. (Lesa 1 Petrus 3:12.) Kunao, indu tji u nomauzeu ngu u hi nakuyenena okuzengurura zemburuka kutja onawa okuundja ku Jehova.

17. Ovikwaye Jehova mbye tu kwizikira okutjita mu Jesaja 30:18?

¹⁷ Moruveze rwatjimanga Tate wetu womeyuru me tu sere ondaya okupitira mOuhona we. Jesaja 30:18 ri tja: “Muhona ma undju okumuṱira otjari. Eye me rirongerere okumuṱira ondjenda, orondu Muhona Eye ongu ri Ndjambi ngu tjita ousemba. Ovaṋingandu imba mbe riyameka ku Ye.” Imba mbe undja ku Jehova mave munu ozondaya ozengi nai na mouye oupe mbu mau ya.

18. Ozondaya zeṋe nḓu matu kamuna?

¹⁸ Indu ovakarere va Mukuru tji va hiti mouye oupe, owo kave nakukamuna omauzeu ngu ve muna nai rukwao. Ouhasemba nomihihamo kavi tji nakukara po rukwao. (Omavan. 21:4) Eṱe katu nakuhepa okurikenda ohunga noviṋa mbi matu hepa, mena rokutja mape kara oviṋa mbya yenene komundu auhe. (Eps. 72:16; Jes. 54:13) Tjiri inḓo ozondaya ozombwa.

19. Hapo Jehova u tu rongerisa ku ye nai?

¹⁹ Moruveze ndwi, Jehova u tu rongerisira okuhupa kehi youhonapare we mokutuvatera okutuurunga ozongaro ozombi nokukara novikaṋena mbi tjata ku ye. O yumbu ohama nu kayende komurungu okukarera Jehova. Oviṋa oviwa vi ri komurungu. Otja tji matu undju oruveze oruwa ndwo, ngatu kayende komurungu okukara nondjoroka ngunda amatu undju nomuretima ku Jehova okuyenenisa omakwizikiro we.