1. Ongwaye Jesus tja ningira Jehova okutjevera ovemukongorere?

 ONGUROVA ngunda e hi ya ṱa, Jesus wa ningira otjiṋa otjinanḓengu ku Ihe womeyuru. Eye wa ningira Jehova okutjevera ovemukongorere. (Joh. 17:15, 20) Otjiperi kutja Jehova aruhe aa tjevere nokurikendera ovakarere ve. Posi yokutja, Jesus aa tjiwa kutja Satan ma pirukire ovemukongorere tjinene. Jesus wina aa tjiwa kutja owo mave hepa ombatero ya Jehova okupirukira omatokero wOmudiaboli.

2. Otja kEpsalme 33:18-20, ongwaye tji tu ha sokutira indu tji matu munu ouzeu?

² Ouye mbwi mbu honaparerwa po Satan, u tjita kutja Ovakriste vatjiri ve mune omauzeu omengi ndino. Eṱe tu muna omauzeu nge tu wisa momuinyo, nu wina nge rora ouṱakame wetu ku Jehova. Posi ya morupa ndwi, matu kerihonga kutja kape notjiṋa tji matu hepa okutira. Jehova u tu tjevera. Eye u muna omauzeu ngu tu na wo, nu u vanga okutuvatera okuyetjinda. Ngatu katare kovihorera vivari mbi ri mOmbeibela mbi raisa omuano Jehova me “tjevera avehe mbe nonḓuviro ku ye.”—Lesa Epsalme 33:18-20.

3. Oruṋe tji mape ya atu rimunu ourike?

³ Nandarire kutja tu ri pu novakambure ovakwetu ovengi, povikando tjiva mape ya atu rimunu ourike. Otjotjihorera, omitanda mape ya avi rimunu ourike, indu tji mavi kahurura ongamburiro yawo ku imba mbu ve hita pamwe oskole, poo indu tji va tjindire  kombongo ombe. Tjiva vetu mape ya atu u momuinyo nokuripura kutja tu sokutjinda omauzeu ngo oveni. Eṱe mape ya atu keyakeya okuhungira ku na varwe ohunga nomuano mbu matu fula, mena rokutja matu rikende kutja kave nakutuzuva nawa. Nu povikando tjiva mape ya atu ripura kutja kape nomundu ngu rikendera ku eṱe. Kainatja kutja ongwaye tji tu rimuna ourike, povikando tjiva tu muna kutja katu nokuyenena okurivatera nu tu rikenda. Jehova kavanga kutja tu kare noumune mbwo. Ongwaye tji matu tja nao?

4. Ongwaye omuprofete Elia tja tja: “Owami erike ngu mba sewa po”?

⁴ Tara kotjihorera tjomurumendu omuṱakame Elia. Isebel wa tja me mu zepa, nu eye wa taura na tupuka oure wokombanda yomayuva 40. (1 Ozomb. 19:1-9) Komaandero eye wa kahita mondimba, na tja ku Jehova: “Owami erike [omuprofete] ngu mba sewa po.” (1 Ozomb. 19:10) Pari novaprofete varwe motjirongo. Otjotjihorera, Obadja wa yama ovaprofete 100 ku tja ave ha zepewa i Isebel. (1 Ozomb. 18:7, 13) Nu hapo ongwaye Elia tjee rimunu ourike? Hapo eye ee ripura kutja ovaprofete varwe avehe Obadja mba yama, nai va ṱa? Hapo mape ya ee rimunu ourike mena rokutja kapa ri omundu ngwa uta okukarera Jehova pu na ye, nandarire kutja Jehova wa raisa kutja Eye oMukuru watjiri kOndundu Karmel? Eye hapo aa munu kutja kape nomundu ngu ma tjiwa kutja ovanavita na ye aave vanga okumuzepa, nokutja kape nomundu ngu rikendera ku ye? Ombeibela kai kahurura oumune wa Elia oukoto. Posi yokutja, eṱe matu tjiwa kutja Jehova aa zuu nawa kutja ongwaye Elia tjee rimunu ourike, nu Eye aa tjiwa kutja me mu vatere vi.

5. Jehova wa raisira vi Elia kutja kaari erike?

⁵ Jehova wa vatera Elia momiano omingi. Eye wa tunduuza Elia kutja ma hungire. Nu wa pura Elia povikando vivari a tja: “Mo ungura tjike mba?” (1 Ozomb. 19:9, 13) Otjikando atjihe Jehova wa puratena indu Elia tjee mu raere kutja ma fula vi. Jehova wa raisira Elia omasa we nokutja Eye u ri pu na ye. Eye wina wa raera Elia kutja Ovaisrael varwe ovengi ngamba ve rikotamena ku Ye. (1 Ozomb. 19:11, 12, 18) Ku nao, Elia wa kara nondjoroka indu tja za nokuhungira ku na Jehova okuza komutima, na tja za nokuzuva eziriro re. Jehova wa yandja oviungura pekepeke ovinanḓengu ku Elia. Eye we mu ningira kutja ma twirise Hasael otjombara ya Sirie, Jehu  otjombara ya Israel, na Elisa otjomuprofete. (1 Ozomb. 19:15, 16) Mokumupa oviungura mbi, Jehova wa vatera Elia okuripurira koviṋa oviwa. Mukuru wina we mu pa epanga ropopezu Elisa. Eṱe matu yenene vi okumuna ombatero ya Jehova indu tji matu rimunu ourike?

6. Hapo mo yenene okukumba ohunga na tjike indu tji mo rimunu ourike? (Epsalme 62:8)

⁶ Jehova u ku ningira kutja u kumbe ku ye. Eye u muna omauzeu ngu u na wo, nu u ku pa ongamburiro yokutja ma puratene kozongumbiro zoye oruveze ngamwa aruhe. (1 Tes. 5:17) Eye u kara nondjoroka okupuratena kovakarere ve. (Omiano 15:8) Ove mo yenene okukumba ohunga na tjike indu tji mo rimunu ourike? Kumba ku Jehova okuza komutima otja Elia tja tjita. (Lesa Epsalme 62:8.) Mu raera ohunga nouzeu mbu u na wo nomuano mu u ku ṱuna. Ningira Jehova me ku vatere okutjiwa kutja ngo tjite vi indu tji mo rimunu ourike poo tji wa u momuinyo. Otjotjihorera, tji mo rimunu ourike nokutira, indu imba mbu mu hita pamwe oskole tji mave ku pura omapuriro ohunga nongamburiro yoye, ningira Jehova kutja me ku pe ouvanḓe mbu mo hepa kutja u kare nomasa okuhungira. Ove mo yenene okuningira ounongo ku ye kutja u kahurure ongamburiro yoye momuano omuwa. (Luk. 21:14, 15) Indu tji u nombameno poo tji wa u momuinyo, ningira Jehova me ku vatere kutja u hungire ku nomukambure omukweṋu ngu ma tjiwa ovingi ohunga notjiṋa ho. Ove mo yenene okuningira Jehova ma vatere ingwi ngu mamu kahungira kumwe kutja me ku puratene nu me ku zuve nawa. Kumba ku Jehova okuza komutima, tara kutja ma ziri vi ozongumbiro zoye, nu yakura ombatero yavarwe. Tji wa tjiti nao, komoo rimunu ourike.

7. Mo rihongere ko tjike kotjihorera tja Mauricio?

⁷ Jehova wa yandja oviungura ovinanḓengu ku eṱe atuhe okuungura. Ove mo yenene okukara nongamburiro kutja Eye u muna, nu u nondangi ku avihe mbi u tjita okuyenenisa oviungura mbi wa pewa mombongo, na motjiungura tjokuzuvarisa. (Eps. 110:3) Okukara motjiungura hi, ku ku vatera vi kutja o he rimunu ourike? Tara kotjihorera tjomurumendu omukambure omutanda wena Mauricio. * Ousupi Mauricio tja za nokupapitisiwa, umwe womapanga we wopopezu wa uta okuisa Jehova kouṱiṱiṱiṱi. Mauricio wa tja: “Indu tja isa Jehova, ami mba pandjara ongamburiro mu ami omuini. Ami mba himinwe kutja, hapo me yenene okuyenenisa oruyano rwandje rwokukarera Jehova nokurira orupa rweṱunḓu re? Ami ee rimunu ourike, nu ee ripura kutja kape nomundu ngu ma yenene okuzuva nawa omuano mbwee fula.” Hapo otjikeṋa tji tja vatera Mauricio? Eye wa tja: “Ami mba uta okukara tjinene motjiungura tjokuzuvarisa. Iho tje ndji vatera kutja e he ripurire ku ami omuini na mongaro mu mbari. Ami mba ri nondjoroka nu hee rimunu ourike indu tjee ungura pu na varwe motjiungura tjokuzuvarisa.” Nandarire kutja katu yenene okuungura pu novakambure ovakwetu motjiungura  tjokuzuvarisa, tu yanḓiparisiwa indu tji tu norupa motjiungura tjokuzuvarisa pu na wo momuano wokutjanga otutuu nokutona ozongoze. Ovikeṋa vyarwe mbya vatera Mauricio? Eye wina wa tja: “Ami wina ee ungura ovingi mombongo. Ami ee kondjo okurirongerisa nawa kehungi ndi mba pewa mombongarero yomokati kotjivike. Oviungura mbi vya tjita kutja mbi mune kutja Jehova na varwe ve ndji vara otjorupa rwombongo.”

8. Omomuano uṋe mu matu yenene okuṱunwa i yomauzeu omanene?

⁸ Eṱe tu undjira ko okumuna omauzeu momayuva omasenina nga. (2 Tim. 3:1) Posi yokutja, omauzeu ngo mape ya aye tu wire moruveze na mongaro ndji tu hi nokuundjira ko. Mape ya atu kara nouzeu wotjimariva, poo onganga ai tu raere kutja tu nomutjise omuzeu poo atu zepaisa omusuverwa wetu. Moruveze otja indo, eṱe mape ya atu u momuinyo, nu atu kara nombameno tjinene indu omauzeu ngo tji maye kongorerasana, poo tji ye ere tjimwe. Zemburuka kutja Jehova ma tjiwa omauzeu ngu tu na wo, nu ma yenene okutuvatera okutjinda omazeu ngamwa ayehe.

9. Omauzeu yeṋe tjiva Job nga muna?

⁹ Ripurira komuano Jehova ma vatera omurumendu omuṱakame Job. Eye wa muna omauzeu omanene moruveze orusupi. Job wa zepaisa ovinamuinyo vye, ovakarere ve, na wina ovanatje ve ovasuverwa meyuva rimwe. (Job 1:13-19) Ngunda e noruhoze orunene ndwi, Job wa wirwa i yomutjise omuzeu tjinene. (Job 2:7) Ongaro ye ya ri onḓeu tjinene, nga tja hungira omambo nga: “Ami me rihahiza; mba urwa okukara nomuinyo.”—Job 7:16.

10. Jehova wa vatera vi Job okutuurunga omauzeu we? (Tara kotjiperendero tjokombanda yokambo nga.)

¹⁰ Jehova aa tjevere Job. Mena rokutja Jehova wa suverere Job, Eye we mu pa omasa ngaa hepa okutuurunga omauzeu we nondoṋeno. Jehova wa hungira ku na Job ne mu zemburukisa ounongo we mbu hi nomaandero, norusuvero rwe koviutwa vye. Eye wa hungira ohunga novipuka ovingi ovihimise. (Job 38:1, 2; 39:9, 13, 19, 27; 40:15; 41:1, 2) Jehova wina wa ungurisa omurumendu omutanda nomuṱakame wena Elihu okuyandja omasa nokuhuhumiṋa Job. Elihu we mu raera kutja, Jehova aruhe u sera ovakarere ve ondaya indu tji ve nonḓaro orure. Posi yokutja Jehova wina wa tjita kutja Elihu ma yandje omaronga ku Job momuano omuwa. Elihu wina wa vatera Job kutja e he ripurire ku ye omuini mokumuzemburukisa kutja eṱe kamaatu risasaneke ku na Jehova, ngu ri Omuute weyuru nehi. (Job 37:14) Jehova wa raera Job kutja ma kumbire omapanga we yetatu, nga tjita ouvi. (Job 42:8-10) Omomuano uṋe Jehova me tu vatera ndino indu tji tu ri kehi yomauzeu?

11. Hapo Ombeibela i tu pa omahuhumiṋino yeṋe indu tji tu ri mouzeu?

¹¹ Jehova ka hungire ku na eṱe momuano mbwa hungira ku na Job, posi yokutja u hungira ku na eṱe okupitira mEmbo re Ombeibela. (Rom. 15:4) Eye u tu huhumiṋa mokutupa omaundjiro woruyaveze. Ripurira komatjangwa tjiva nge ri mOmbeibela ngu maye yenene okukuhuhumiṋa indu tji u ri kehi yomauzeu. MOmatjangwa Jehova we tu kwizikira kutja, “kape notjiṋa tji matji sora okutupora korusuvero rwaNdjambi,” nandarire omauzeu omanene. (Rom. 8:38, 39) Eye wina we tu kwizikira kutja “u ri popezu na imba avehe mbe Mu isana” mongumbiro. (Eps. 145:18) Jehova u tu raera kutja indu tji twe riyameke ku ye, matu yenene okutuurunga omauzeu ngamwa ayehe, natu kara nondjoroka nandarire kutja tu ri kehi yomauzeu. (1 Kor. 10:13; Jak. 1:2, 12) Embo ra Mukuru wina ri tu zemburukisa kutja, omauzeu ngu tu muna kaye karerere tji twa sasaneke nomuinyo waaruhe Jehova mbwe tu kwizikira. (2 Kor. 4:16-18) Jehova  u tu pa omaundjiro watjiri wokutja ma kaisa po Satan na imba mbe mu kongorera, orondu ombe tjita kutja tu kare nomauzeu. (Eps. 37:10) Hapo ove u nomatjangwa wOmbeibela ngu we rihonga motjiuru ngu maye ku vatere okutjinda omauzeu moruyaveze?

12. Jehova u vanga kutja tu tjite tjike indu tji matu vanga okumuna ouwa okuza mEmbo re?

¹² Jehova u vanga kutja aruhe tu twa po oruveze okukonḓonona Ombeibela nokuripurira ko oukoto ku imbi mbi matu lese. Indu tji twa tjiti imbi mbi matu rihongo, ongamburiro yetu mai kurire ko nu matu ryama popezu na Tate wetu womeyuru. Ku nao, matu kara nomasa okutuurunga omauzeu. Jehova wina u yandja ombepo ye ondjapuke ku imba mbe riyameka kEmbo re. Nu ombepo ndjo mai yenene okutupa “omasa nge kapita avihe,” kokutja tu tuurunge omauzeu ngamwa ayehe.—2 Kor. 4:7-10.

13. Hapo ombuze ndja zikamena kOmbeibela ndji yandjwa i ‘yomukarere omuṱakame nomunazondunge,’ i tu vatera vi okutuurunga omauzeu?

¹³ Nombatero ya Jehova, “omukarere omuṱakame nomunazondunge” u pitisa omambo, ouvidio nomizumbi mbi mavi yenene okukurisa ongamburiro yetu, kutja tu kare popezu na Jehova. (Mat. 24:45) Eṱe matu hepa okuungurisa oviṋa Jehova mbye tu pa momuano omusemba. Omukazendu omukambure okuza koUnited States wa raisa ondangi koviṋa avihe Jehova mbye tu pa. Eye wa tja: “Oure wozombura 40 nḓu mba kara motjiungura tja Jehova, ouṱakame wandje wa rorwa povikando ovingi.” Eye wa muna omauzeu omanene. Ihe omunene wa ṱa indu ohauto yomuhinge ngwa nḓorongere tji ye riveta mu indji oye. Ovanene ve, va verere tjinene nave ṱu, neye omuini wa ri nomutjise wokangera povikando vivari. Otjikeṋa tji tje mu vatera okutjinda omauzeu ayehe nga? Eye wa tja: “Jehova aruhe ee ndji pe omasa. Ombuze ndji ri mOmbeibela ndjee ndji pe okupitira momukarere omuṱakame nomunazondunge, ye ndji vatera kutja mbi tjinde omauzeu ayehe nga. Ku nao, ami mbi rimuna tjimuna Job ngwa tja: ‘Me kara pokutja hi nondjo nga keyuva ronḓiro yandje!’”—Job 27:5.

14. Omomuano uṋe Jehova me ungurisa ovakambure ovakwetu okutuvatera tji tu ri mouzeu? (1 Ovatesalonika 4:9)

¹⁴ Jehova wa honga ovakarere ve okusuverasana nokuhuhumiṋasana tji ve ri motuveze otuzeu. (2 Kor. 1:3, 4; lesa 1 Ovatesalonika 4:9.) Otja Elihu tja tjita, ovakambure ovakwetu ve nonḓero okutuvatera kutja tu rire ovaṱakame indu tji tu ri mouzeu. (Oviung. 14:22) Otjotjihorera, tara komuano ombongo mu ya vatera Diane okukara noupanga ouwa ku na Jehova indu omurumendu  we tja verere tjinene. Eye wa tja: “Iho tja ri otjiṋa otjizeu tjinene. Posi yokutja aatu munu ombatero ya Jehova momieze mbi twa munine ouzeu mbwo. Ovakambure mombongo yetu va tjita oviṋa ovingi okutuvatera. Owo ve tu raisira orusuvero, aave tu ryangere, nu aave tu tonene ozongoze. Avihe mbi vye tu vatera kutja tu tuurunge omauzeu ngu twa ri na wo. Mena rokutja hee tjiwa okuhinga ohauto, ovakambure ovakwetu aave ndji twaerere kozombongarero zombongo na motjiungura tjokuzuvarisa indu tji me yenene.” Iho aatji tu pe ondjoroka, mena rokutja twa ri novakambure ovakwetu mba ri norusuvero mombongo.

15. Omena raye tji tu nongamburiro kutja matu yenene okutjinda omauzeu?

¹⁵ Atuhe matu yenene okumuna ouzeu momuano umwe poo omukwao. Posi yokutja kamaatu kara atuyerike indu tji tu ri kehi youzeu. Jehova aruhe u tu tjevera otja ihe worusuvero. Eye u ri popezu na eṱe nu u nonḓero yokutuvatera nokuzuva ondjuriro yetu. (Jes. 43:2) Eṱe tu nongamburiro yokutja matu yenene okutjinda omauzeu, mena rokutja eye we tu pa oviṋa avihe mbi matu hepa kutja tu ye tjinde. Eye we tu pa oviyandjewa mbi ongumbiro, Ombeibela, oviṋa ovingi mbya zikamena kOmbeibela, novakambure ovakwetu mbe norusuvero okutuvatera tji tu ri momauzeu.

16. Omomuano uṋe mu matu yenene okukara kehi yondjeverero ya Jehova?

¹⁶ Eṱe tu nondangi okukara na Tate womeyuru ngu tu tjevera. Nu “tu yoroka mu Ye.” (Eps. 33:21) Matu yenene okuraisira Jehova kutja tu nondangi korusuvero rwe, indu tji matu ungurisa oviṋa avihe mbye tu pa okutuvatera. Eṱe wina matu hepa okukondja nomasa kutja tu kare kehi yondjeverero ya Mukuru. Nu wina indu tji matu kondjo okukara nonḓuviro ku Jehova nokutjita imbi mbi tjata ku ye, eye me tu tjevere nga aruhe.—1 Petr. 3:12.