1. Ovikwaye oviwa omitanda omingi mbi va yenenisa rukuru?

 OMBURA aihe, ovakambure omitanda ovengi ve papitisiwa. Hapo ove wa toora omukambo mbwo? Tji pe ri nao, ovakambure ovakweṋu mombongo ve kara nondjoroka nu Jehova u kara nondjoroka wina. (Omiano 27:11) Ripura noviṋa ovingi oviwa mbi wa yenenisa rukuru. Otjotjihorera, ove ngahino wa konḓonona Ombeibela oure wozombura kaaṋi. Omerihongero woye wOmbeibela ye ku pa ongamburiro yokutja Ombeibela Embo ra Mukuru. Nu wina ove wa uta okutjiwa nokusuvera Omutjange wOmbeibela. Mena rokutja orusuvero rwoye ku Jehova rwe kurira ko, ove wa tya okumukarera nokupapitisiwa. Ove tjiri wa tjita ondando ombwa.

2. Matu kahungirira ku ye morupa ndwi?

 ² Ngunda au hiya papitisiwa, ove wa munine omauzeu ngaaye tjiti kutja i rire ouzeu kove okurira omuṱakame ku Jehova. Posi ya, otja tji mo kuru ove mo kamuna omarorero omape. Satan ma kondjo okungundiparisa orusuvero rwoye ku Jehova nokutjita kutja u ise okumukarera. (Ef. 4:14) Ove ko sokuyandjera otjiṋa ho tji tjitwe. Ovikwaye mbi mavi ku vatere okurira omuṱakame ku Jehova nokuyenenisa omakwizikiro woye wokumukarera? Ove mo sokukayenda komurungu okuungura oukukutu okukurisa ongamburiro yoye. (Hebr. 6:1) Omomuano uṋe mu mo yenene okutjita nao?

3. Ovakriste avehe mave sokutjita vi kombunda ya indu tji va papitisiwa?

³ Kombunda yombapitisimo, auhe wetu ma sokuṱakamisa ondunge omuapostele Paulus ndja yandja kovakambure moEfesus. Eye we ve tunduuza kutja ve rire Ovakriste mbe “kura okuyenena.” (Ef. 4:13) Iho aatji hee kutja owo aave ‘sokukayenda komurungu okukurisa oupanga wawo ku na Jehova.’ Paulus wa sasaneka omuano okanatje mu ke kura ku nomuano mu tu kurisa oupanga wetu ku na Jehova. Okanatje akehe ke eta ondjoroka kovanene vako. Posi ya oko kamaake rire okanatje, nga aruhe. Otja oruveze tji maru kayenda, oko make za ko “koviṋa vyounatje.” (1 Kor. 13:11) Momuano otjingewo, kombunda yombapitisimo Ovakriste mave sokukayenda komurungu okukurisa oupanga wawo ku na Jehova. Ngatu tare koviṋa tjiva mbi mavi tu vatere okutjita nao.

4. Otjikeṋa tji matji yenene okukuvatera okukurisa oupanga woye ku na Jehova? Kahurura. (Ovafilipi 1:9)

⁴ Kurisa orusuvero rwoye ku Jehova. Ove wa suvera Jehova tjinene. Posi ya orusuvero rwoye ku ye maru yenene okukurira ko. Omomuano uṋe? Omuapostele Paulus wa hungirira komuano umwe mbu ri mOvafilipi 1:9. (Lesa.) Paulus wa kumba kutja orusuvero rwOvafilipi ru “ryamene ko.” Ku nao orusuvero rwetu mu Jehova maru sokukurira ko. Omomuano uṋe mu matu yenene okutjita nao? Omokukara ‘nondjiviro’ nozondunge. Otja tji matu kayenda komurungu okutjiwa Jehova, tu mu suverera ko nu tu kara nondangi kovikaṋena vye nomuano me ungura oviṋa. Onḓero yetu yokumuyorokisa i kurira ko, nu katu vanga okutjita otjiṋa ngamwa tji matji mu hihamisa. Eṱe tu kondja pu matu yenene kutja tu zuve nawa imbi mbye vanga kutja tu tjite, nokutja omomuano uṋe mu matu sokuvitjita.

5-6. Omomuano uṋe orusuvero rwetu ku Jehova mu rukurira ko? Kahurura.

⁵ Jesus aa horere kovikaṋena vya Jehova. Ku nao tji twa tjiwa Jesus nawa, matu suvere Jehova tjinene. (Hebr. 1:3) Omuano omuwa okutjiwa Jesus, omokukonḓonona Omaevangeli poune wawo. Tji u ha lese Ombeibela eyuva arihe, mo yenene okuuta okulesa Omaevangeli ngo ohunga na Jesus. Otja tji mo lese, yandja ombango kovikaṋena vya Jesus. Ovandu va suverere okukara pu na ye nokuhungira ku na ye, nu mena rorusuvero rwe eye aa pukata ovanatje. (Mar. 10:13-16) Jesus wa ri omundu omuwa ngwa ri notjari nu ovahongewa ve kaave tira okuraisa oumune wawo. (Mat. 16:22) Momuano mbwo Jesus aa horere ku Ihe womeyuru. Wina i rira oupupu okuhungira ku na Jehova. Eṱe matu yenene okukumba ku ye. Indu tji matu kumbu, tu yenena okumuraera ouzeu wetu auhe. Tu kara nongamburiro kutja eye kemeetu nakaura. Eye we tu suvera nu u rikendera eṱe.—1 Petr. 5:7.

⁶ Jesus aa ṱotjari novandu. Omuapostele Mateus wa tja: “Nu Jesus tja muna otjimbumba tjovandu, omutima we arire tji wa hara ondjenda na wo, owo tjinga ava kurungisirwe nu ava ningisire ondjenda tjimuna ozonḓu nḓe hi nomurise.” (Mat. 9:36) Nu hapo Jehova u noumune uṋe? Jesus wa tja: “Iho meyuru otjinga e ha vanga kutja umwe wovaṱiṱi mba ve pandjare.” (Mat. 18:14) Omambo ngo ye tu nyandisa omutima mena rokutja ye raisa kutja Jehova we tu suvera tjinene. Otja tji matu tjiwa Jesus nawa, orusuvero rwetu ku Jehova ru kurira ko.

7. Okukara pu nOvakriste mbe kura mongamburiro maku ku vatere vi?

⁷ Ove wina mo yenene okurihonga okuraisa orusuvero tjinene nokurira Omukriste ngwe kura mongamburiro, indu tji wa paha okutjiwa ovakambure mbe kura mongamburiro mombongo yeṋu. Tara komuano mu ve nondjoroka. Owo kave nomuhihamwatima nomukambo mbu va toora wokukarera Jehova. Ve  ningira okukuraera ohunga novihorera vyawo oviwa motjiungura tja Jehova. Indu tji mo hepa okutoora omukambo omunanḓengu, ningira ondunge ku wo. Tjiwa kutja “ovayandjandunge ovengi owo ondjamo.”—Omiano 11:14.

8. Ovikwaye mbi mo yenene okutjita indu tji u nomakeyakeyero ohunga na imbi Ombeibela mbi i hungira?

⁸ Nakaura omakeyakeyero. Otja tji pa tamunwa  moparagrafa oitjavari, Satan u kondja kutja o ha kara nongamburiro yomasa nu o ha tumbuka popezu na Jehova. Omuano umwe mu mape ya a tjiti nao, omokutjita kutja u kare nomakeyakeyero ohunga nomahongero tjiva wOmbeibela. Otjotjihorera, mape ya ovandu tjiva ave kondjo kutja u kambure momahongero nge yamburura Mukuru, nge tja oviṋa kavi memenwe. Tji wa ri okanatje, ove mape ya koo ripurire ko, posi ya nai tji we kura mape ya wa uta okuhongwa omahongero otjingewo moskole. Mape ya oviṋa ozomiṱiri zoye mbi ze hungira, vi posa aayo ouatjiri. Posi ya owo mape ya kave ya rora okutjita omakonḓononeno wokutja ku nOmuute. Zemburuka omurari mbu ri mOmiano 18:17 mbu mau tja: “Omundu ngu tenga po okuhungira mombanguriro aruhe u ngara aayo ongu ri osemba, nga ingwi ngu notjiposa na ye tja utu okumupirukira motjiposa.” Pendje nokukambura moviṋa avihe mbi u rihonga moskole, ove mo sokukonḓonona nawa kutja Embo ra Mukuru ri tja vi. Tjita omakonḓononeno momambo wetu nga zikamena kOmbeibela. Hungira ku novakambure mbaave kambura momahongero wokutja oviṋa kavi memenwe. Ve pura kutja ovikwaye mbi ve pa ongamburiro kutja ku nOmuute ngwe tu suvera. Omahungi ngo maye yenene okukuvatera okumuna oviraisiro vyokutja ku nOmuute.

9. Ovikwaye mbi mo rihongo okuza kotjihorera tja Melissa?

⁹ Omukazendu omukambure wena Melissa wa konḓonona ohunga noviutwa, nu iho tje mu vatera okunakaura omakeyakeyero nga ri na wo. * Eye wa tja: “Moskole, ozomiṱiri aaze hongo omahongero wokutja oviṋa kavi memenwe momuano mbwaau tjiti kutja ovandu ve mune kutja ouatjiri. Rutenga, ami hee vanga okutjita omakonḓononeno mena rokutja ee tira kutja omahongero wokutja oviṋa kavi memenwe ouatjiri. Posi ya, ami mbe rizuvisa kutja Jehova u vanga kutja tu kare nomapu omawa ku kwa zikamene ongamburiro yetu. Ku nao ami mba uta okutjita omakonḓononeno. Ami mba lesa embo ndi Is There a Creator Who Cares About You? noumbo mbwi Was Life Created? na The Origin of Life—Five  Questions Worth Asking. Imbyo tjiri ombyee hepa. Ami mbi zera kutja andakuzu mba tjita nao rukuru.”

10-11. Ovikwaye mbi mavi yenene okukuvatera okunakaura omarorero wokutjita ouvi? (1 Ovatesalonika 4:3, 4)

¹⁰ Nakaura omeritjindiro omavi. Tji u ri omutanda, ozonḓuma ze kara nomasa, nu povikando tjiva varwe ve kondja okukuṋiṋikiza okutjita oruvakiro. Satan u vanga kutja u tjite nao. Ovikwaye mbi mavi ku vatere okunakaura omarorero ngo? (Lesa 1 Ovatesalonika 4:3, 4.) Tji mo kumbu ku Jehova, mu raera ouzeu woye auhe nu ningira kutja me ku pe omasa. (Mat. 6:13) Tjiwa kutja Jehova u vanga okukuvatera nu kavanga okukuvera. (Eps. 103:13, 14) Ombeibela wina mai yenene okukuvatera. Melissa ngwa tamunwa rukuru, aa kondjo okunakaura omeripura omavi. Eye wa tja: “Okulesa Ombeibela eyuva arihe kwe ndji vatera kutja mbi rwise ozonḓuma ozombi. Kwe ndji zemburukisa kutja owami omukarere wa Jehova nokutja mbi vanga okumukarera.”—Eps. 119:9.

¹¹ O kondjo okuzengurura omauzeu woye omuini. Hungira ku novanene voye ohunga nouzeu woye. Otjingaperi kutja kaupupu okuhungira ohunga noviṋa mbyo, posi ya ounahepero okutjita nao. Melissa wa tja: “Ami mba kumba kutja mbi kare nouvanḓe nu okuzambo mba hungira ku na tate ohunga nouzeu wandje. Tji mba za nokutjita nao, mba kutuka momuinyo. Ami ee tjiwa kutja Jehova u nonyuṋe mu ami.”

12. Omomuano uṋe mu mo yenene okutoora omikambo omisemba?

¹² Omirari vyOmbeibela ngavi ku hongorere po. Otja tji mo kuru, ovanene voye mave ku yandjere okutoora omikambo vyoye omuini. Posi ya pe noviṋa ovingi mbi u hi nokutjiwa. Ovikwaye mbi mo yenene okutjita kutja o ha tjiti ondataiziro ndji mai ṱunu koupanga woye ku na Jehova? (Omiano 22:3) Omukazendu omukambure wena Kari wa kahurura kutja ovikwaye mbye mu vatera okutoora omikambo omisemba. Eye wa zuva nawa kutja indu tji u ri Omukriste ngwe kura mongamburiro, ko hepa ozoveta nḓu maze hongorere po oviṋa avihe mehupo roye. Eye wa tja: “Ee hepa okuzuva oumune wa Jehova ohunga noviṋa nu kaku kongorera ozoveta uriri.” Indu tji mo lese Ombeibela, ripura omuini omapuriro nga: ‘Hapo orupa ndwi maru ndji raere ye ohunga noumune wa Jehova? Pe nomirari mbi mavi ndji vatere okutjita imbi mbi ri ovisemba? Tji pe ri nao, ouwa waye mbu me munu indu tji mba ṱakamisa imbi Ombeibela mbi mai ndji hongo?’ (Eps. 19:7; Jes. 48:17, 18) Indu tji mo lese Ombeibela nokuripurira ko oukoto ku imbi mbi mo lese, maku tjiti kutja i rire oupupu okutoora omikambo mbi mavi tjata ku Jehova. Otja tji mo kayenda komurungu okutjita omarundurukiro, ove mo munu kutja ko nokuhepa ozoveta motjiṋa atjihe tji mo tjiti, mena rokutja mo utu okuzuva nawa kutja Jehova u vanga ye.

13. Omomuano uṋe omapanga omawa mu maye yenene okukuvatera? (Omiano 13:20)

¹³ Toorora omapanga nga suvera Jehova. Omapanga ngu mo toorora maye ku vatere okurira Omukriste ngwe kura mongamburiro. (Lesa Omiano 13:20.) Omukazendu omukambure wena Sara aa pandjara ondjoroka ye. Pe notjiṋa tji tja tjitwa tji tje mu vatera okukara nondjoroka rukwao. Sara wa tja: “Ami mba muna omapanga omawa moruveze ndu ri ro. Ami nomukazendu omukambure omutanda aatu konḓonona pamwe okambo kOruhungu otjivike atjihe. Epanga randje rarwe re ndji vatera kutja mbi ute okuyandja omaziriro pozombongarero zombongo. Mena rombatero okuza komapanga wandje, ami mba uta okuyandja ombango tjinene komakonḓononeno wOmbeibela wandje omuini nokukumba okuza komutima tjiri. Oupanga wandje ku na Jehova we kurira ko nu mba uta okukara nondjoroka rukwao.”

14. Julien wa yenena vi okukara nomapanga omawa?

¹⁴ Hapo mo yenene vi okutjita oupanga ku novandu mbu mave rire otjihorera otjiwa kove?  Omurumendu omukambure wena Julien, nai ngu karera otjomunene wombongo wa tja: “Ami tji mba ri omutanda, mba uta omapanga omawa ngunda ambi ri pu na wo motjiungura tjokuzuvarisa. Owo aave ungura otjiungura hi nonḓero onene, nu ve ndji vatera okumuna kutja otjiungura tjokuzuvarisa tji yenena okutuyetera ondjoroka onene. Ami mba hara ondando yokuungurira Jehova motjiungura tjokuzuvarisa oruveze aruhe. Nu wina mba muna kutja otjiṋa tji tje ndji tjaera kutja e ha kara nomapanga omengi omawa, omena rokutja ami ee paha omapanga wotjiwondo tjandje uriri. Kombunda, ami wina mba kakara nomapanga omawa moBetel. Ovihorera vyawo oviwa vye ndji vatera okutoorora omanyando omasemba, nu ihi tje ndji vatera okutumbuka popezu tjinene na Jehova.”

15. Erakiza riṋe Paulus nda yandja ku Timoteus ohunga nomapanga? (2 Timoteus 2:20-22)

¹⁵ Mo sokutjita vi indu tji wa munu kutja omundu ngu mwa pangasana mombongo mape ya a zunḓa oupanga woye ku na Jehova? Paulus aa tjiwa kutja ovandu tjiva mombongo kaave ripura poo okuritjinda otjOvakriste. Ku nao eye wa rakiza Timoteus okukara kokure na wo. (Lesa 2 Timoteus 2:20-22.) Oupanga wetu ku na Jehova ounanḓengu tjinene. Nu twa ungura oukukutu okutunga oupanga mbwo ku na Jehova, okutja katu sokukara nomapanga ngu maye teya oupanga mbwo.—Eps. 26:4.

16. Ozondando zeṋe nḓu mo sokutoorora?

¹⁶ Twa po ozondando ozombwa. Toorora ozondando nḓu maze ku vatere okukurisa ongamburiro yoye nokukuvatera okukurisa oupanga woye ku na Jehova. (Ef. 3:16) Otjotjihorera, mo yenene okutya okulesa nokukonḓonona Ombeibela aruhe. (Eps. 1:2, 3) Poo mo yenene okukondja okukumba aruhe nokukumba okuza komutima. Ngahino mo hepa okukengeza ohunga nomanyando ngu mo toorora poo oruveze ndu mo ungurisa komanyando ngo. (Ef. 5:15, 16) Indu Jehova tji me ku munu tji mo ungura oukukutu okukurisa oupanga woye ku na ye, eye ma kara nonyuṋe.

17. Ouwa waye mbu za mokuvatera varwe?

¹⁷ Ove mo kuru otjOmukriste indu tji mo vatere varwe. Jesus wa tja: “Mokuyandja mu nenyando tjinene pokupewa.” (Oviung. 20:35) Mo kara nondjoroka indu tji mo ungurisa oruveze rwoye nomasa woye okuvatera varwe. Otjotjihorera,  ove mo yenene okukara nondando yokuvatera imba mbe ri ovanene motjiwondo na imba mbe ri ovingundi poo mbe noungundipare motutu mombongo yeṋu. Mo yenene okuvevatera mokukeverandera oviṋa mbi mave hepa, poo okuvevatera okuungurisa oviungurisiwa vyomahakaeneno vyouye wakandino. Indu tji u ri omurumendu omukambure, kara nondando yokurira omuvatere wombongo, kutja u vatere ovakambure ovakweṋu. (Fil. 2:4) Ove wina u raisa orusuvero indu tji mo zuvarisa ombuze ombwa yOuhona ku imba mbe he ri Ovahongonone va Jehova. (Mat. 9:36, 37) Indu tji mo yenene, kara nondando yokukarera Jehova oruveze aruhe motjiungura tjokuzuvarisa.

18. Okukara motjiungura tjokuzuvarisa oruveze aruhe ku ku vatera vi okutumbuka popezu na Jehova?

¹⁸ Okuungura motjiungura tjokuzuvarisa oruveze aruhe maku ku pe oruveze rwokutumbuka popezu na Jehova. Tji u ri omukandjira, ove mo yenene okuyenda kOskole yOvazuvarise vOuhona. Ove mo yenene okukarera moBetel poo moviungura vyokutunga. Omukazendu omukambure omukandjira wena Kaitlyn wa tja: “Okukara motjiungura tjokuzuvarisa pu novakambure ovakwetu mbe nondjiviro, kwe ndji vatera okutumbuka popezu na Jehova tji mba za nokupapitisiwa. Otjihorera tjawo tje ndji tunduuza okukurisa ondjiviro yandje yOmbeibela nu tje ndji vatera momuano wandje wokuhonga.”

19. Otja tji mo kayenda komurungu okukurisa ongamburiro yoye, ozondaya zeṋe nḓu mo munu?

¹⁹ Otja tji mo kayenda komurungu okukura mongamburiro yoye, ove mo munu ozondaya ozengi. Ove ko nokuungurisa omasa woye moviṋa vyomungandjo. (1 Joh. 2:17) Ove mo yepe omihihamo mbi za mokutoora omikambo omivi. Nu mo kara nondoṋeno nondjoroka yatjiri. (Omiano 16:3) Otjihorera tjoye otjiwa matji tunduuza ovakambure ovakweṋu avehe. (1 Tim. 4:12) Nu otjiṋa otjinahepero tjinene, ove mo kara nohange nondjoroka ndji za mokuyorokisa Jehova na mokukara noupanga wopopezu ku na ye.—Omiano 23:15, 16.