• “Ami ee fula tjimuna omurumendu wandje aa katuka orukupo rwetu povikando ovingi.”

• “Ami ee fula tjimuna me yambururwa, hi mba ri omuwa, nu mba ri nonḓengu yokehi.”

• “Ami hee yenene okuhungira ku nomundu ohunga notjiṋa ho. Nu kapa ri nomundu okundjihuhumiṋa.”

• “Ami ee fula tjimuna Jehova ke rikendere kwami.”

Omambo nge ri kombanda mba, maye raisa omuano omukazendu me fula, indu omurumendu we tje tarera oviperendero vyakamuzu. Nu indu tje tjita nao mohamunika, ngahino oure womieze poo ozombura, eye mape ya a munu kutja kamaa yenene okukara nongamburiro momurumendu we rukwao. Omukazendu umwe wa tja: “Ami mbi fula tjimuna hi tjiwa omurumendu wandje. Hapo pe noviṋa vyarwe mbye horeka kwami?”

Orupa ndwi rwa rongerisiwa kovakazendu mbe novarumendu mbe tarera oviperendero vyakamuzu. a Orwo maru hungirire komirari vyOmbeibela mbi mavi mu huhumiṋa nokumuraisira kutja Jehova we mu suvera nu u vanga okumuvatera, nu wina maru mu vatere okukara nohange nokukara popezu na Jehova. b

Nandarire kutja ko nokuyenena okutjevera oviṋa avihe omurumendu woye mbye tjita, pe noviṋa tjiva mbi mo yenene okutjita mbi mavi ku vatere kutja u kare nohange. Tara koviṋa mbi mavi kongorere mba.

O ripondjo. Omukazendu mape ya a munu kutja omurumendu we u tarera oviperendero vyakamuzu mena rokutja u notjiṋa otjivi tja tjita. Alice c aa munu kutja kaa ri nonḓengu ndja yenene komurumendu we. Eye ee ripura kutja, ‘Hapo ongwaye omurumendu wandje tje vanga okutara kovakazendu varwe pendje na ami?’ Ovakazendu tjiva ve rimuna ondjo komuano mbu ve fula mena rokutja ve muna kutja omazenge wawo maye tjiti kutja ongaro i rire ko ombi. Danielle wa tja: “Ami ee munu kutja omazenge wandje ya tjita kutja ongaro i rire ko ombi.”

Indu tji u noumune tjingewo, tjiwa kutja Jehova ke ku pe ondjo koviṋa omurumendu woye mbye tjita. Jakobus 1:14 mari tja: “Omundu u rorwa, indu tji ma twarwa na hemenwa i ozonḓuma ze omuini zourunde.” (Rom. 14:12; Fil. 2:12) Pendje nokukupa ondjo, Jehova u vara ouṱakame mbu mu raisire.—2 Ekuruh. 16:9.

Omukazendu mape ya a munu kutja omurumendu we u tarera oviperendero vyakamuzu mena rokutja  kamuwa, posi yokutja iho kauatjiri. Ovatjiwe mbe tjiwe epu ndo, va kahurura kutja okutarera oviperendero vyakamuzu ku tjita kutja omundu ma kare nozonḓuma zonyama omukazendu nḓe hi nokuyenena okukovisa.

O rikende tjinene. Catherine wa tja eye ee ripura tjinene ohunga nomurumendu we ngwaa tarere oviperendero vyakamuzu. Frances wa tja: “Ami mbi rikenda tjinene eyuva arihe, indu tji mbi hi nokutjiwa kutja omurumendu wandje u ri pi.” Ovakazendu varwe va tja ve ṱohoṋi indu tji ve ri pu novakambure ovakwao mbu mave tjiwa ouzeu wovarumendu vawo. Nu varwe va tja ve rimuna ourike mena rokutja ve muna kutja kape nomundu ngu zuva ongaro yawo.

Okufula nao otjiṋa otjizuvakwa. Posi ya, aruhe tji mo ripura ohunga nomuano mbu fula, mo utu okurikenda tjinene. Kondja okuyandja ombango koupanga woye na Jehova. Tji wa tjita nao, matji tjiti kutja u panḓere po.—Eps. 62:2; Ef. 6:10.

Indu tji mo lese nokuripurira ko oukoto komahungi wovakazendu mba ri kehi yombameno mOmbeibela, nu mba muna omahuhumiṋino mokukumba ku Jehova, otjiṋa ho matji yenene okukuvatera. Kaaruhe eye tjaa isa po omauzeu wawo, posi ya eye ee ve pe ohange. Otjotjihorera, “Hana wa hihamwa momutima” mena rongaro ma ri. Posi ya indu tja za ‘nokukumba ku Muhona orure tjinene’ eye wa ri nohange momuinyo, nandarire kutja kaa tjiwa kutja moruyaveze mape tjitwa tjike.—1 Sam. 1:10, 12, 18; 2 Kor. 1:3, 4.

Paha ombatero kovanene vombongo. Owo ve ri “otja omawameno kombepo, notja poṋa pomaundiro kotjivepo tjombura.” (Jes. 32:2) Owo nandarire mape ya ave ku raere omukazendu omukambure ngu mo yenene okuhungira ku na ye nu ngu ma yenene okukuhuhumiṋa.—Omiano 17:17.

Hapo mape ya o vatere omurumendu woye okuisa okutarera oviperendero vyakamuzu? Ngahino. Ombeibela i tja “tji mu ri mu vevari” mamu yenene okuzengurura ouzeu poo okurwisa omunavita omunamasa. (Omuzuv. 4:9-12) Omakonḓononeno ye raisa kutja omurumendu u yenena okuisa okutarera oviperendero vyakamuzu, nu omukazendu u kara nongamburiro mu ye indu tji mave ungura pamwe okurwisa ouzeu mbwo.

Posi ya, omurumendu ma sokuungura oukukutu nokukara nonḓero yokuvanga okuisa okutarera oviperendero vyakamuzu. Hapo eye wa kumba ku Jehova kutja me mu pe omasa nokuningira ombatero okuza kovanene vombongo? (2 Kor. 4:7; Jak. 5: 14, 15) Hapo eye wa twa po omikambo mbi mavi mu vatere okuhinokutarera oviperendero vyakamuzu? Otjotjihorera, wa twa po kutja orure ndu ṱa pi ndu ma ungurisa okayendjezewa ke? Nu hapo u nakaura ozongaro nḓu mape ya aze mu twa moumba? (Omiano 27:12) Hapo eye u vanga kutja ove u mu vatere nu u ku raera ouatjiri aruhe? Tji pe ri nao, ove mo yenene okumuvatera.

Omomuano uṋe? Tara kotjihorera tja Felicia ngwa kupwa i Ethan, ngwa uta okutarera oviperendero vyakamuzu okuza kouṱiṱi. Felicia wa tjita kutja i rire oupupu aruhe komurumendu we okuhungira ku na ye indu tje nonḓero yokuvanga okutarera oviperendero vyakamuzu rukwao. Ethan wa tja: “Ami mbi hungira ouatjiri aruhe komukazendu wandje. Norusuvero eye u ndji vatera okunakaura ozongaro nḓu mape ya aze ndji twa moumba nu aruhe u ndji pura kutja mbi ri vi. Nu u ndji vatera kutja e ha ungurisa oindaneta tjinene.” Ouatjiri owo mbwi wokutja Felicia ka fula nawa mena rokutja Ethan u nanukirwa i yokutarera oviperendero vyakamuzu. Eye wa tja: “Posi ya, okufula navi nomapindi kamaaku yenene okuvatera omurumendu wandje okuisa ongaro ombi ndji. Tji twa zu nokuhungirira kouzeu we mbwi, eye u ndji vatera kutja mbi tjinde omuhihamo wandje.”

Okuhungirira komapu otja ingo maku yenene okuvatera omurumendu okuisa okutarera oviperendero vyakamuzu, nu wina maku vatere omukazendu okukara nongamburiro momurumendu we rukwao. Omurumendu tji ma raere omukazendu we, koṋa ku mai, ohunga noungundipare we nokutja ma ungura ye, maku tjiti kutja i rire oupupu komukazendu we okuuta okukambura mu ye rukwao, orondu ma utu okumuna kutja omurumendu we ke notjiṋa tje mu horekera.

Hapo mo munu kutja mape ya o vatere omurumendu woye momuano tjingewo? Tji pe ri nao, leseye nokuhungirira korupa ndwi pamwe. Ondando ye oyokuisa okutarera oviperendero vyakamuzu, nokutjita kutja ove u kambure mu ye rukwao. Moruveze rwokupindika mena rokutja ove mo vanga okuhungirira kouzeu mbwi, omurumendu woye ma sokuzuva nawa kutja ouzeu mbwi u ku ṱuna vi. Ondando yoye oyokuyandja oruvara kozongondjero ze zokuisa okutarera oviperendero vyakamuzu nokumupa oruveze rwokuraisa kutja ove mo yenene okukambura mu ye rukwao. Amuyevari mamu sokurihonga kutja otjikwaye tji tji hinga ovandu okuvanga okutarera oviperendero vyakamuzu, nomuano mu mave yenene okutuurunga ouzeu mbwi. d

Indu tji mo tira kutja nomukweṋu ngu mwa kupasana mape ya amu pose tji mamu hungirire kepu ndi, ningira omunene wombongo ngu mamu tjiwa  nawa kutja ma kare po ovikando tjiva tji mamu hungirire kepu ndo. Nandarire kutja omundu ngu mwa kupasana wa isa okutarera oviperendero vyakamuzu, mape ya aku kambura oruveze orure kove okuuta okukara nongamburiro mu ye rukwao. O yumbu ohama. Tara koviṋa mbi mu ungura nawa morukupo rweṋu. Kara nomaundjiro kutja orukupo rweṋu maru rire oruwa rukwao indu tji mu nomuretima.—Omuzuv. 7:8; 1 Kor. 13:4.

Indu omurumendu woye tja utu okutarera oviperendero vyakamuzu rukwao, hapo ihi matji hee kutja kee ritanaura poo kamaa roro okuisa okutarera oviṋa mbyo? Kako, katjiperi. Indu omurumendu woye tja irira okutarera oviperendero vyakamuzu, eye mape ya a kondjo nouzeu mbwi oure womuinyo we. Eye mape ya a utu okutarera oviperendero vyakamuzu rukwao, nandarire kutja wa kara ozombura ozengi nokuhinokuvitarera. Kutja iho atji ha tjitwa rukwao, eye ma sokuritjevera tjinene, kainatja kutja wa isa okutarera oviperendero vyakamuzu oure wozombura ozengi. (Omiano 28:14; Mat. 5:29; 1 Kor. 10:12) Eye ma sokukondja okuyarura ‘omutima nomeripuriro’ we koupe nokurihonga ‘okutonda ouvi,’ mbi kamburira mo oviperendero vyakamuzu, poo oviṋa vyarwe ovihakohoke tjimuna okurinyandisa oviṋepo vyourumendu poo vyoukazendu. (Ef. 4:23; Eps. 97:10; Rom. 12:9) Hapo eye u nonḓero yokutjita ozongondjero azehe nḓa? Tji pe ri nao, kouṱiṱiṱiṱi eye mape ya a isa okutarera oviperendero vyakamuzu. e

Hapo mo tjiti vi indu omundu ngu mwa kupasana tje hi nokutjita ozongondjero okuisa okutarera oviperendero vyakamuzu? Otjingaperi kutja mape ya o pindike nu o u momuinyo. Yumba omerikendero woye ku Jehova. Tji wa tjiti nao, mo kara nohange momuinyo. (1 Petr. 5:7) Kayende komurungu okutumbuka popezu na Jehova mokukonḓonona Ombeibela, okukumba, nokuripura oukoto ku imbi mbi mo lese. Tji wa tjiti nao, tjiwa kutja Jehova wina ma tumbuka popezu na ove. Otja ku Jesaja 57:15, eye u kara “puna imba mba ningisa ondjenda,” nu u vanga okuvevatera kutja ve kare nondjoroka rukwao. Kondja okukara noupanga ouwa ku na Jehova. Paha ombatero okuza kovanene vombongo. Nu kara nomaundjiro wokutja eyuva rimwe omurumendu woye mape ya a tjiti omarundurukiro.—Rom. 2:4; 2 Petr. 3:9.