Omapuriro okuza kovalese
Omomuano uṋe orupa ndwi “Ena roye ngari yapurwe” mokambo kOruhungu ka Juni 2023 mu ra kahurura ongamburiro yetu ohunga nena ra Jehova nousemba we womananeno?
Morupa ndwo twe rihonga kutja pe nepu rimwe enanḓengu ndi ṱuna kovandu avehe novaengeli. Epu ndo omayapuriro wena ra Jehova enene. Ousemba wa Jehova womananeno nouṱakame wovandu ku Mukuru vi hitasana ku nomayapuriro wena re, ndi ri epu enanḓengu tjinene.
Ongwaye tji matu ṋunisa kutja epu enanḓengu tjinenenene ohunga nena ra Jehova nomayapuriro waro? Ngatu katare komapu yetatu.
Satan wa yamburura ena ra Mukuru okuza komapirukiro motjikunino tja Eden nga ku nai
Epu etenga, Satan wa rwisa ena ra Jehova motjikunino tja Eden. Epuriro Satan nda pura Eva aari raisa aayo Jehova kamuharupu nokutja omarakiza nga yandja ku Adam na Eva kaya ri omawa. Satan wa ruka Jehova ovizeze mokuhungira oviṋa Jehova mbye hi na wa hungira, ku nao wa yamburura ena ra Jehova. Satan wa rira “omudiaboli,” ndi mari hee kutja “omuyamburure.” (Joh. 8:44, EEP) Mena rokutja Eva wa kambura movizeze vya Satan, eye ke na wa puratena ku Mukuru nu momuano mbwo wa raisa kutja kaa vanga okunanwa i Jehova. (Gen 3:1-6) Kundino, Satan u kayenda komurungu okukora ovizeze ohunga na Jehova. I rira oupupu ku imba mbe puratena kovizeze mbyo okuhinokukara nonḓuviro ku Jehova. Ku nao, ovakarere va Mukuru ve vara omayambururiro wena ra Jehova eyapuke otjouhasemba ounene tjinene. Ovizeze mbyo ombya eta omauzeu mouye.
Epu oritjavari, kutja ma ete ouwa koviutwa vye avihe, Jehova ma yapura ena re nda yambururwa. Ihi otjiṋa otjinahepero tjinene ku Jehova. Mena ranao, eye opa zokutja: ‘Ami me raisa ouyapuke wena randje enene.’ (Esek. 36:23) Jesus wa raisa kutja otjikwaye tji matji sokurira otjinanḓengu mozongumbiro zovakarere va Jehova avehe ovaṱakame indu tja tja: “Ena roye ngari yapurwe.” (Mat. 6:9) Ombeibela ya raisa povikando pekepeke ounanḓengu wokuyapura ena ra Jehova. Tara kovihorera tjiva: “Tangeye ena raMuhona enandjozikiro.” (1 Ekuruh. 16:29; Eps. 96:8) “Imbureye okuyozika ena re.” (Eps. 66:2) “Me yozike ena roye nga aruhe.” (Eps. 86:12) Otjikando tjimwe Jehova tja hungira okuza meyuru ya ri pondjuwo ye ondjapuke moJerusalem, Jesus pa tja: “Tate, yandja ondjozikiro kena roye!” Jehova wa zira kutja: “Ami mba yandja ondjozikiro kena randje, nu me ri pe ondjozikiro rukwao.”—Joh. 12:28. a
Epu oritjatatu, ondando ya Jehova ya kutwa ku nena re. Tara kounanḓengu wena ra Jehova kombunda yomarorero omasenina komaandero wozombura eyovi zouhonapare wa Kristus. Ovaengeli novandu mave kara noumune uṋe ohunga nena ra Jehova oruveze ndwo? Kutja tu zire epuriro ndo, ngatu tare koviṋa vivari mbi, mbi ri ouṱakame wovandu nousemba wa Jehova womananeno. Oruveze ndwo, ovandu kave nokuhepa okuraisa ouṱakame wawo. Owo mave rire ohomonena nu mave rorwa okuura. Nu wina Jehova ke nokuhepa okuraisa kutja omuano we wokuhonapara ombu ri omusemba. Oviutwa avihe meyuru na kombanda yehi mavi kara nombwaneno nu mavi yakura omananeno wa Jehova. Hapo tjike ohunga nena ra Jehova?
Oruveze ndwo avehe mave katjiwa ouatjiri ohunga na Jehova nu ena re mari kayapurwa. Posi ya ena ra Mukuru mari kayenda komurungu okurira otjiṋa otjinanḓengu kovakarere ve meyuru na kombanda yehi. Omena raye? Mena rokutja mave munu Jehova tji ma kayenda komurungu okutjita oviṋa ovihimise. Ripura notjiṋa hi: Jesus nomerisusuparisiro ma yarura omananeno ku Jehova, nu Mukuru “ma honaparere avihe okumana.” (1 Kor. 15:28) Kombunda yanao, ovandu kombanda yehi mave kara nondjoroka yokukara “norupa monguturiro onandjozikiro yovanatje vaNdjambi.” (Rom. 8:21) Jehova ma yenenisa ondando ye yokukara neṱunḓu rimwe nda wana rovanatje ve meyuru na kombanda yehi.—Ef. 1:10.
Kombunda yoviṋa mbi tji vya zu nokutjitwa, eṱunḓu ra Jehova meyuru na kombanda yehi mari fula vi? Tjiri matu kara nonḓero yokutanga ena ra Jehova. Omutjange wEpsalme David wa tja: “Muhona Ndjambi nga tangwe . . . Ena re enene ngari tangwe aruhe nga aruhe.” (Eps. 72:18, 19) Eṱe matu kayenda komurungu okumuna omapu omape nomayorokise okutjita nao nga aruhe.
Ena ra Jehova ri kuramena po oviṋa avihe ohunga na ye. Indu tji matu ripura ohunga nena ra Jehova tu ripura ohunga norusuvero rwe. (1 Joh. 4:8) Eṱe aruhe matu zemburuka orusuvero Jehova ndwe tu raisira indu tje tu mema na indu tje tu pa otjisuta tjonguturiro. Eṱe wina matu zemburuka kutja omuano we wokuhonapara omusemba nu u honapara norusuvero. Posi yokutja eṱe matu kayenda komurungu okumuna omuano Jehova me raisa orusuvero koviutwa vye. Ihi matji tu hingi okutumbuka popezu ku ye otja Tate wetu nu matu imbura omatangero ohunga nena re enene nga aruhe.—Eps. 73:28.
