1. Omena raye Ovababilon tji va himisirwe i yomuprofete Daniel?

 OMUPROFETE Daniel wa ri omurumendu omutanda indu Ovababilon tji ve mu twara koBabilon otjomupandekwa, kokure na Jerusalem. Posi yokutja, nandarire kutja eye wa ri omutanda, imba mbe mu kambura va himisirwe i ye. Owo aave “tara kombunikiro yomuhapo,” nowo va muna kutja Daniel wa ri ‘omuwa omumanisa’ nokutja eye wa za meṱunḓu enanḓengu. (1 Sam. 16:7) Ku nao, owo ve mu honga kutja ma karere mondjuwo youhona.—Dan. 1:3, 4, 6.

2. Jehova wa ri noumune uṋe ohunga na Daniel? (Esekiel 14:14)

² Jehova ka suverere Daniel mena rokutja wa ri nombuniko ombwa poo mena rokutja wa ri notjihako tjapeke mondjuwo youhona, posi yokutja eye we mu suverere mena romuano eye mee ritjindi otjomurumendu omutanda. Indu Jehova tja tja Daniel u ri tjimuna Noa na Job, Daniel mape ya wa ri nozombura ape 20. Ku nao, Jehova wa vara Daniel otjomurumendu omusemba, tjimuna Noa na Job, mbe mu karera nouṱakame oure wozombura ozengi. (Gen. 5:32; 6:9, 10; Job 42:16, 17; lesa Esekiel 14:14.) Nu Jehova wa kayenda komurungu okusuvera Daniel oure womuinyo we.—Dan. 10:11, 19.

3. Matu katara ku ye morupa ndwi?

³ Morupa ndwi, matu kakonḓonona ovikaṋena vivari mbya tjita kutja Daniel ma suverwe i Jehova. Rutenga, matu kahungirira kotjikaṋena atjihe natu katara komuano eye me tji raisa. Okuzambo, matu katara kutja ovikeṋa mbya vatera Daniel okuraisa ovikaṋena mbyo. Korusenina, matu katara komuano mu matu yenene okuhorera ku ye. Nandarire kutja orupa ndwi rwa tjangerwa ovandu omitanda, eṱe atuhe matu yenene okurihongera kotjihorera tja Daniel.

4. Daniel wa raisa vi ouvanḓe? Yandja otjihorera.

⁴ Ovandu ozombanḓe mape ya ave tira, posi yokutja kave yandjere otjiṋa okuvetjaera okutjita imbi mbi ri ovisemba. Daniel wa ri omurumendu omutanda ngwa ri ombanḓe. Tara kovitjitwa vivari maa raisa ouvanḓe. Otjitjitwa otjitenga mape ya tja tjitwa ape ozombura mbari kombunda yaindu Ovababilon tji va nyona Jerusalem. Ombara Nebukadnesar wa Babilon wa rota oruroto orutirise ohunga notjiserekarera tjomundu otjinene. Eye wa rakiza ovarumendu ovayandjandunge ve nga ku Daniel, okumuraera kutja wa roto tjike, nokutja oruroto maru hee tjike. Indu tji ve hi nokuyenena okutjita nao, eye me ve zepa avehe. (Dan. 2:3-5) Daniel aa sokuhakahana okutjita otjiṋa poo tjarwe ovandu ovengi mave ṱu. Eye “wa ya tjimanga kombara ne keiningira kutja i mu pe oruveze ndwa yenene kutja a sore okuiraera omaheero woruroto.” (Dan. 2:16) Ihi tja raisa kutja Daniel wa ri nouvanḓe nongamburiro. Omomuano uṋe? Ombeibela kai raisa kutja Daniel aa mangurura oturoto komurungu wanao. Eye wa ningira omapanga we mba ri nomana wOvababilon nga Sadrak, Mesak, na Abed-Nego “kutja ve kumbe ku Ndjambi weyuru e ve ṱire otjari, nokumuningira kutja e ve mangururire otjiundikwa tjoruroto.” (Dan. 2:18) Jehova wa zira ozongumbiro nḓo. Nombatero ya Mukuru, Daniel wa mangurura oruroto rwa Nebukadnesar. Daniel nomapanga we va yamwa.

5. Otjikando tjiṋe tjarwe Daniel maa hepa okuraisa ouvanḓe?

⁵ Kombunda yaindu, Daniel tja mangurura oruroto ohunga notjiserekarera tjomundu otjinene, ouvanḓe we wa rorwa rukwao. Nebukadnesar wa rota oruroto rwarwe orutirise. Oruroto ndwi rwa ri ohunga nomuti omunene. Daniel wa kahurura omaheero woruroto kombara nouvanḓe. Eye nandarire wa raera ombara kutja mai vere oviyoze nokutja kai nokuhonapara oure woruveze kaaṋi. (Dan. 4:25) Ombara mape ya atjai ripura kutja Daniel omunavita na ye, nai mu zepa. Nandarire nao, Daniel wa raisa ouvanḓe na kahurura oruroto ndwo.

6. Otjikeṋa tji mape ya tja vatera Daniel okukara nouvanḓe?

⁶ Otjikeṋa tji mape ya tja vatera Daniel okukara nouvanḓe oure womuinyo we? Eṱe matu yenene okukara nongamburiro kutja ina na ihe wa Daniel va ri otjihorera otjiwa ku ye, indu tja ri omuṱiṱi. Otjingaperi kutja, owo va kara nonḓuviro komarakiza wa Jehova nga yandja  kOvaisrael mba ri novanatje, nu owo va honga omuatje wawo Omatwako wa Mukuru. (Deut. 6:6-9) Daniel aa tjiwa Omatwako Omurongo, posi yokutja eye wina aa tjiwa oviṋa ovingi ohunga nOmatwako warwe wa Jehova. Otjotjihorera, eye aa tjiwa oviṋa Ovaisrael mbyaave sokurya na mbi ve ha sokurya. b (Lev. 11:4-8; Dan. 1:8, 11-13) Daniel wina we rihonga ekuruhungi rovakarere va Mukuru, nu aa tjiwa oviṋa mbya tjitwa ku wo indu tji ve ha karere nonḓuviro ku Jehova. (Dan. 9:10, 11) Oviṋa mbya tjitwa mehupo ra Daniel vye mu pa ongamburiro yokutja nandarire kutja pa tjitwa tjike, Jehova novaengeli ve ovanamasa mave mu vatere.—Dan. 2:19-24; 10:12, 18, 19.

7. Otjikeṋa tjarwe tji tja vatera Daniel okukara nouvanḓe? (Wina tara kotjiperendero.)

⁷ Daniel wa konḓonona omatjangwa wovaprofete va Mukuru, nge kamburira mo omaprofetero wa Jeremia. Momakonḓononeno ngo, Daniel korusenina wa kamuna kutja oruveze orure rwouhuura rwOvajuda moBabilon rwa ri pokuyanda. (Dan. 9:2) Daniel wa muna kutja omambo wa Jehova ya yenenisiwa nu ihi tje kurisa ongamburiro ye mu Jehova. Nu imba mbe nongamburiro yomasa mu Mukuru mave yenene okukara nouvanḓe wina. (Sasaneka Ovaroma 8:31, 32, 37-39.) Otjiṋa otjinanḓengu tjinene, Daniel aruhe aa kumbu ku Ihe womeyuru. (Dan. 6:10) Eye wa hepura omauvi we ku Jehova nomuano maa fula. Nu Daniel wa ningira ombatero. (Dan. 9:4, 5, 19) Eye wa ri omundu tjimuna eṱe, ku nao ka kwaterwe nouvanḓe. Nungwari, eye we kurisa otjikaṋena ho mokukonḓonona, okukumba nokukara nongamburiro mu Jehova.

8. Omomuano uṋe mu matu yenene okukurisa ouvanḓe?

⁸ Ovikwaye mbi matu hepa okutjita kutja tu kurise ouvanḓe? Ovanene vetu mape ya ave tu tunduuza kutja tu rire ozombanḓe, posi ya kamaave yenene okutjita kutja tu rire ozombanḓe, nandarire kutja owo oveni ozombanḓe. Okukara nouvanḓe ku ri tjimuna okurihonga ondjiviro ombe, poo otjiṋa otjipe. Kutja u tjite nao, mo sokutara kovitjitwa vya ingwi ngu me ku hongo, nokuhorera kotjihorera tje. Momuano tjingewo, tu rihonga okurira ozombanḓe mokutara komuano varwe mu ve raisa otjikaṋena hi nokuhorera ku wo. Ovikwaye mbi twe rihongo okuza ku Daniel? Tjimuna Daniel, eṱe matu hepa okutjiwa Embo ra Mukuru nawa. Eṱe matu sokukurisa oupanga wetu ku na Jehova mokuhungira ku na ye aruhe nokumuraera omuano mu matu fula. Nu eṱe matu hepa okukara nongamburiro mu Jehova kutja eye aruhe me tu vatere. Indu ongamburiro yetu tja rorwa, eṱe matu kara nouvanḓe.

9. Ouwa waye mbu tu muna mokurira ozombanḓe?

⁹ Eṱe tu muna ouwa momiano omingi pekepeke indu tji tu ri ozombanḓe. Ngatu tare kotjihorera tja Ben. Eye aa hiti oskole moGermany, ovandu ovengi mu ve kambura moviṋa kutja kavi memenwe, nu aave kambura kutja oviṋa Ombeibela mbi i hungira ohunga noviutwa kauatjiri. Eyuva rimwe, Ben wa ningirwa okukurama komurungu woklasa okukahurura kutja ongwaye tje kambura kutja oviutwa vya memwa. Eye wa raisa ouvanḓe nu wa raera ovandu avehe oviṋa mbye kambura. Pa tjitwa tjike? Ben wa tja: “Omiṱiri yandje ya puratena nawa nu ai tjiti oviherengururwa vyondjivisiro ndji mba ungurisa nu ai yandja kovanatje avehe moklasa.” Ovanatje moklasa ya Ben va tjita vi? Ben wa tja: “Ovengi vawo va puratena koviṋa mbi mba hungira nu va tja aave tjaterwa i ami.” Otjihorera tja Ben tja raisa kutja ovandu ozombanḓe potuingi ve muna ondengero okuza ku varwe.  Owo wina mave yenene okuvatera tjiva okutjiwa Jehova. Tjiri, eṱe tu nomapu omawa okukurisa ouvanḓe.

10. Ouṱakame otjikeṋa?

¹⁰ Ombeibela potuingi i hungira ohunga nouṱakame poo orusuvero oruṱakame Mukuru ndwe raisa komapanga we. Ombeibela wina i hungira ohunga nouṱakame ovakarere va Mukuru mbu ve raisasana. (2 Sam. 9:6, 7) Ouṱakame wetu mau yenene okukurira ko otja oruveze tji maru kayenda. Ngatu tare komuano ouṱakame wa Daniel mu we kurira ko.

11. Omomuano uṋe Daniel ma raisa ouṱakame moukurundu we? (Tara kotjiperendero tjokombanda yokambo nga.)

¹¹ Oure womuinyo wa Daniel, ouṱakame we ku Jehova aau rorwa. Posi ya, otjiṋa otjizeu tjinene tja tjitwa indu Daniel tja ri nozombura zokombanda 90. Oruveze ndwo, Ovababilon va huurirwe i yOvamedi nOvapersi, nu va ri kehi youhonapare wOmbara Darius. Ouṋepo mbwaau ungura pondjuwo youhona wOmbara Darius kaave vanga Daniel nu kava ri nondengero ku Mukuru we. Ku nao, owo va tjita kutja Daniel ma zepewa. Owo va tjita kutja ombara i twa ko ena re komarakiza ngu maye roro Daniel kutja ma raisa ouṱakame ku Mukuru poo kombara. Daniel aa sokuraisa ouṱakame we kombara mokuhinokukumba ku Jehova oure womayuva 30, tjimuna ovandu avehe. Daniel wa toorora okurira omuṱakame ku Jehova. Iho tja tjita kutja Daniel ma umbwe motjitoto tjozongeyama. Posi ya, Jehova wa yama Daniel kozongeyama mena rouṱakame we. (Dan. 6:12-15, 20-22) Omomuano uṋe, mu matu yenene okurira ovaṱakame ku Jehova, tjimuna Daniel?

12. Omomuano uṋe Daniel me kurisa ouṱakame we ku Jehova?

¹² Kutja tu kare nouṱakame ku Jehova, eṱe matu sokumusuvera nomasa. Daniel wa kayenda komurungu okurira omuṱakame ku Jehova, mena rokutja eye wa suverere Ihe womeyuru. Otjingaperi kutja Daniel wa suverere Jehova tjinene, mena rokutja eye aa twa po oruveze okuripura ohunga novikaṋena vya Jehova nomuano me vi raisa. (Dan. 9:4) Daniel ee ripurire oukoto koviṋa avihe oviwa Jehova mbye mu tjitira novakarere ve, nu eye wa ri nondangi.—Dan. 2:20-23; 9:15, 16.

13. (a) Ouṱakame wovandu omitanda u rorwa momuano uṋe? Yandja otjihorera. (Wina tara kotjiperendero.) (b) Otja tji pa raisiwa mokavidio, mo ziri vi indu varwe tji va pura kutja Ovahongonone va Jehova ve yandja oruvara ku imba mba toorora omahakaeneno womonyama pokati kovarumendu vevari poo ovakazendu vevari?

 ¹³ Tjimuna Daniel, omitanda vya kondorokwa i yovandu mbe hi nondengero ku Jehova nomirari vye vyomeritjindiro. Ovandu otja imbo ve nyengwa omundu ngu tja wa suvera Mukuru. Tjiva nandarire ve tatumisa omitanda okutjita kutja ave ha kara nouṱakame ku Jehova. Otjotjihorera, tara ku imbi mbya tjitwa komurumendu omutanda wena Graeme, ngwa tura moAustralia. Eye wa ri mongaro onḓeu indu tja ya kosekondere. Ojefrou ya pura koklasa kutja owo mave tjiti vi indu epanga rawo tji re ve raere kutja eye u nanukirwa i yovarumendu poo ovakazendu ovakwao. Ojefrou ya tja ovanatje avehe moklasa mbu mave munu kutja onawa kepanga rawo okunanukirwa i yomurumendu poo omukazendu omukwao ngave kurame munda umwe, nu imba mbe hi nokuyandja oruvara ngave kurame munda imbwo warwe. Graeme wa tja: “Oklasa aihe aai yandja oruvara, pendje na ami nomukwetu ngwa ri Omuhongonone wa Jehova.” Ongaro ya ririra ko onḓeu tjinene nu Graeme aa sokuraisa kutja omuṱakame ku Jehova poo indee. Eye wa tja: “Oure woiri aihe ombomba, ovanatje imbo varwe nojefrou aave tu hungire omambo omavi. Ami mba kondja pu me yenene okuvekahururira ongamburiro yandje momuano omuwa nomupore, posi ya owo kaave puratene kembo nandarire rimwe ndi mba hungira.” Otjiṋa ho tja tjita kutja Graeme ma fule vi? Eye wa tja: “Ami hee tjaterwa indu ovanatje moklasa tjaave ndji hungira omambo omavi, posi ya mba ri nondjoroka mena rokutja mba raisa ouṱakame ku Jehova, nokurwira ongamburiro yandje.” c

14. Omomuano uṋe umwe mu matu yenene okukurisa ouṱakame wetu ku Jehova?

¹⁴ Tjimuna Daniel, eṱe tji twe kurisa ouṱakame wetu ku Jehova, orusuvero rwetu ku ye ru kurira ko. Eṱe tu kurisa orusuvero ndwo mokurihonga ovikaṋena vye. Otjotjihorera, eṱe matu yenene okurihonga ohunga noviṋa mbya mema. (Rom. 1:20) Indu tji mo vanga okukurisa orusuvero rwoye nondengero ku Jehova, ove mo yenene okulesa otupa twi “Hapo tja memwa?” poo okutarera ouvidio mbwo. Ove wina mo yenene okulesa okambo nga Was Life Created? na inga The Origin of Life—Five Questions Worth Asking. Tara kutja omukazendu omukambure omutanda wena Esther ngwa za koDenmark wa tja vi ohunga nomambo ngo. Eye wa tja: “Oviṋa mbi ri momambo ngo vya kahururwa nawa. Owo kaye ku raere oviṋa mbi mo sokukambura mo, nungwari ye ku pa ondjiviro ndji mai ku vatere okutoorera ko omukambo.” Ben, ngwa tamunwa rukuru wa tja: “Oviungurisiwa mbi vya pamisa ongamburiro yandje. Ovyo vye ndji raisira kutja Mukuru wa mema oviutwa.” Kombunda yokukonḓonona oviṋa mbi, ove mape ya o i kumwe nomambo wOmbeibela nga: “Muhona, Ndjambi wetu, Ove wa pwa ondjozikiro nondengero nomasa; orondu Ove wa uta oviṋa avihe.”—Omavan. 4:11. d

15. Omomuano uṋe warwe mu matu yenene okukurisa oupanga wetu ku na Jehova?

¹⁵ Omuano warwe mu matu yenene okukurisa orusuvero rwetu ku Jehova omokukonḓonona ehupo rOmuna we, Jesus. Omukazendu omutanda wena Samira, ngwa tura moGermany, wa tjita nao. Eye wa tja: “Ami mba uta okutjiwa Jehova nawa okupitira mu Jesus.” Indu Samira tja ri omuṱiṱi, eye aa munu ko ouzeu okuzuva kutja Jehova u yenena okufula. Posi ya, eye aa yenene  okuzuva nawa omuano Jesus maa fula. Eye wa tja: “Ami ee tjaterwa i Jesus, mena rokutja eye aa raisa ouwa nu wa suverere ovanatje.” Otja tjee rihongo ovingi ohunga na Jesus, oupanga we ku na Jehova au kurire ko. Omena raye? Eye wa tja: “Ami mba uta okuzuva nawa kutja Jesus u horera ku Ihe. Owo ve nozongaro zemwe. Ami mba muna kutja iho i tjimwe tjoviṋa Jehova tja hindira Jesus kombanda yehi, kutja ovandu ve tjiwe Jehova nawa.” (Joh. 14:9) Indu tji mo vanga okukurisa oupanga woye ku na Jehova, ove mo sokuungurisa oruveze rwoye okurihonga ovingi ohunga na Jesus. Indu tji wa tjiti nao, orusuvero rwoye ku Jehova nouṱakame woye ku ye mavi kurire ko.

16. Omena raye tji matu sokurira ovaṱakame? (Epsalme 18:25; Mika 6:8)

¹⁶ Imba mbe ri ovaṱakame potuingi ve tunga oupanga wopopezu nu mbu karerera. (Rut 1:14-17) Nu indu tji tu ri ovaṱakame ku Jehova, eṱe tu kara nohange momuinyo. Omena raye? Mena rokutja Jehova wa kwizika kutja ma rire omuṱakame ku imba mbe ri ovaṱakame ku ye. (Lesa Epsalme 18:25; Mika 6:8.) Ripura notjiṋa hi. Mukuru ngu ri Omuute omunamasaaehe u vanga okukara noupanga wopopezu ku na eṱe. Nu indu tji tu noupanga wopopezu ku na Jehova, kape nomarorero, kape nomupirukire, nu nangarire onḓiro, kai nokutupora korusuvero rwe. (Dan. 12:13; Luk. 20:37, 38; Rom. 8:38, 39) Tjiri ounanḓengu kweṱe okuhorera ku Daniel nokukayenda komurungu okurira ovaṱakame ku Jehova.

17-18. Ovikwaye vyarwe mbi matu yenene okurihongera ku Daniel?

¹⁷ Morupa ndwi, twa konḓonona ovikaṋena vya Daniel vivari uriri. Posi ya, pe na vyarwe ovingi mbi matu yenene okurihongera ku ye. Otjotjihorera, Jehova wa yandja ku Daniel ovirimunikise noturoto, nu wa tjita kutja ma yenene okumangurura omaprofetero ngo. Omaprofetero ngo omengi ya yenenisiwa rukuru. Yarwe ye hungira ohunga noviṋa mbi mavi katjitwa moruyaveze, mbi mavi ṱunu kovandu avehe kombanda yehi.

¹⁸ Morupa ndu maru kongorere ko, matu katara komaprofetero yevari nga tjangwa i Daniel. Indu tji twe ye zuu nawa, maye yenene okutuvatera atuhe, kutja oweṱe ovanene poo ovaṱiṱi okutoora omikambo omisemba. Omaprofetero ngo wina maye pamisa ouvanḓe nouṱakame wetu kutja tu rirongere ku imbi mbi mavi katjitwa moruyaveze rwopopezu.