Hapo wa lesa nawa oumbo wOruhungu mbwa za nokupitisiwa oupe? Ngatu tare kutja mo yenene okuzira omapuriro ngu maye kongorere mba:

Kutja ve vatere ovanatje vawo okukara noupanga ouwa kuna Jehova, ongwaye ovanene mba tjindira kehi rarwe tji mave sokukonḓonona nawa kutja eraka riṋe ovanatje ndi ve zuva nawa?

Ovanatje mape ya ave rihongo eraka ndi hungirwa mehi ndo poskole, poo okuza kovandu varwe. Omuatje tji ma tjiwa omaraka wokombanda ya rimwe, ku mu vatera tjinene. Ovanene mave sokuripurira ko nawa kutja omombongo yeraka riṋe, ovanatje vawo mu mave zuu nawa ouatjiri wOmbeibela kutja ve kurise oupanga wawo kuna Jehova. Ovanene mba suvera Jehova, ve twa oupanga wovanatje vawo kuna Jehova komurungu wozonḓero zawo oveni.—w17.05-E, omuk. 9-11.

Indu Jesus tja pura Petrus kutja, “Ove we ndji suvera tjinene okukapita mbi?,” hapo eye aa hee tjike tja tja “mbi”? (Joh. 21:15, NW)

Pe munika aayo Jesus aa hungire ohunga nomahundju nga ri popezu mbo, poo otjiungura tja Petrus tjokupata omahundju. Kombunda yonḓiro ya Jesus, Petrus wa uta okuungura otjiungura tje tjokupata omahundju rukwao. Ovakriste mave sokutara kutja oviungura vyawo ovinanḓengu tjinene pu pe ṱa pi ku wo.—w17.05-E, omuk. 22-23.

Ongwaye Abraham tja raera omukazendu we kutja nga raere ovandu varwe kutja eye omuṱena kwe? (Gen. 12:10-13)

Ouatjiri kutja Sara wa ri omuṱena wa Abraham. Andakuzu Sara wa raera ovandu kutja Abraham omurumendu we, Abraham atja zepewa nu omakwizikiro wa Mukuru ohunga norukwato rwa Abraham katja ye yenenisiwa.—wp17.3-E, omuk. 14-15.

Elias Hutter wa ungurisa omuhingo uṋe okuvatera imba mbaave vanga okurihonga Otjiheberi?

Eye aa vanga okuvatera ovahongwa okutjiwa kutja omambo yeṋe wOtjiheberi nge ri mOmbeibela nga ri omambo oyeni, nokutja ooyeṋe nga ri ovituwakomeho poo ovituwakombunda. Okutja eye wa pirinda omambo oyeni otjozoleṱera nḓa tjangwa outindi, posi yokutja ovituwakomeho novituwakombunda wa pirinda otjozoleṱera nḓe ha tjangwa outindi. Omuano mbwi wina ombwa ungurisiwa mOmbeibela ndji o-New World Translation of the Holy Scriptures—With References, pomambo wokehi.—wp17.4-E, omuk. 11-12.

Omapu yeṋe Omukriste ngu ma sokuripurirako tji ma vanga okukara nondjembo otjomuano wokuritjevera kovandu varwe?

Omapu tjiva owonga: Mukuru u vara omuinyo otjotjiṋa otjiyapuke. Jesus kena pa tunduuza ovahongewa ve okuripahera omangaruvyo kutja ve ritjevere na wo. (Luk. 22:36, 38) Eṱe matu sokuhambura omangaruvyo wetu kutja ye rire otuvyo twovitaure vyehi. Omuinyo womundu omunanḓengu tjinene pomauini wetu. Matu sokuyandja ondengero komeritjiviro wovakwetu womomutima, nu matu sokuraisa otjihorera otjiwa. (2 Kor. 4:2)—w17.07-E, omuk. 31-32.

Ongwaye omahungi nge ri mu Mateus na Lukas ohunga nomautiro wehupo ra Jesus tji ya panguka?

Ehungi raMateus ri serekarera ongaro Josef ndja raisa tja zuva kutja Maria otjingundi, nozombuze okuza ku Mukuru zokutja ngave taurire koEngipte nu ve kotoke kombunda. Nungwari ehungi ra Lukas ri yandja ombango tjinene ku Maria. Otjotjihorera, ri hungira ohunga na ye tja kavarura Elisabet, nongaro ndja raisa indu Jesus tja sewa pondjuwo ondjapuke.—w17.08, omuk. 32.

Ovikeṋa Ombeibela mbi ya tuurunga?

Omaheero womambo nga ungurisiwa mOmbeibela ya runduruka otja oruveze tjaaru kayenda. Omarundurukiro woviṋa mozohoromende zouye ye rundurura eraka rovandu. Pa ri omapirukiro momatorokero wOmbeibela, momaraka nge ungurisiwa tjinene i ovandu.—w17.09, omuk. 19-21.

Hapo tu nomuengeli ngu u tu tjevera?

Kako. Jesus wa hungira ohunga novaengeli wovahongewa ve otja mbe ri momurungu wa Mukuru. (Mat. 18:10) Eye aa hee kutja ovaengeli ve nonḓero movahongewa ve, nu kakutja owo aave tjevere omuhongewa we auhe momuano omuhimise.—wp17.5-E, omuk. 5.

Orusuvero orunenenene orondwi ndu ri vi?

Orusuvero ndwi a·gaʹpe, tji rwa zikamene komirari omisemba, oorusuvero orunenenene. Orwo ru munika indu tji u ripurira ku varwe nokutjita ouwa ku wo.—w17.10, omuk. 7.