Jehova wa raera Ovaisrael kutja ve sokurira ovayapuke. Okuvevatera kutja ve rire ovayapuke, eye wa tja nai ku wo: “Ko nakuryanga ko nozohukutu mokati kotjiwaṋa tjeṋu. Ko nakutwa ko omuinyo womukweṋu moumba, tje ri mombanguriro. OwAmi ngu mbi ri Muhona.”—Lev. 19:2, 16.

Otja komatjangwa omatenga wOtjiheberi, omambo nga “ko nakutwa ko omuinyo womukweṋu moumba,” wina ye yenena okutorokwa otja “okupirukira.” Posi yokutja hapo omambo ngo ye heya tjike? Embo rimwe rOvajuda nda kahurura embo ra Levitikus ra tja: “Kaupupu okukahurura nawa kutja omambo ngo ye heya tjike, mena rokutja ouzeu okuzuva nawa omuano wOtjiheberi wokuhungira ku kwa zikamena omambo ngo, oyeni nge heya kutja ‘ko nakukurama kombanda, meṋe, poo popezu.’”

Ovahongwandu tjiva ve kuta omambo ngo ku na omambo nge ri mezeva 15 ndi ri komurungu wa indi, ndi mari tja: “Kamu nakutjita ko ouhasemba mombanguriro. Ko nakutjita ko ombangu kotjingundi, nu ko nokutongamisa ko omuvarwandu. Nungwari pangura omundu omukweṋu otja pu pe ri osemba.” (Lev. 19:15) Momuano mbwo, etwako ndi ri mezeva 16 ndi mari tja “ko nakutwa ko omuinyo womukweṋu moumba,” mape ya aari heye kutja Ovaisrael kaave sokutjita ouhasemba mombanguriro, mozongetjefa poo momaṱunḓu wawo, nu kaave sokutjita etiku okuriyetera oveni ouwa. Otjiperi kutja katu sokutjita oviṋa mbyo, posi yokutja pe nomuano omusemba wokuzuva nawa omambo nga, nge ri mezeva 16.

Ripurira komambo nge ri pomautiro wezeva 16. Mukuru wa raera otjiwaṋa tje kutja ave ryangisa ozohukutu. Tjiwa kutja okuyamba varwe otjiṋa tji tji yenena okuyeta ouzeu, posi yokutja okuryangisa ozohukutu otjiṋa otjivi tjinene kombanda ya nao. (Omiano 10:19; Omuzuv. 10:12-14; 1 Tim. 5:11-15; Jak. 3:6) Omundu ngu ryangisa ozohukutu u korera owina ovizeze okuzunḓa ena romundu warwe. Omuryangise wozohukutu ngwi mape ya a yandja omahongonona wovizeze ohunga nomundu warwe, nandarire kutja okutjita nao maku twa mo omuinyo womundu ngo moumba. Zemburuka kutja ovaryangise vozohukutu va serekarera ovizeze ohunga na Nabot, mbya katjita kutja Nabot ma kaṱe nomawe e hina ondjo. (1 Ozomb. 21:8-13) Ku nao, omuryangise wozohukutu u yenena okutwa mo omuinyo womundu warwe moumba mokutjita kutja ma ṱe, otja tji pa tamunwa morupa orutjavari rwa Levitikus 19:16.

Nu wina omundu ngu ryangisa ozohukutu u tjita nao mena rokutonda omundu ingwi owarwe. Johanes omutenga ekondwa 3 ezeva 15 mari tja: “Ingwi ngu ma tondo omukwao eye omuzepe, nu mamu tjiwa kutja omuzepe auhe ngamwa kamaa rumata omuinyo waaruhe.” Mukuru tja za nokuhungira omambo nga, “Ko nakutwa ko omuinyo womukweṋu moumba,” eye wina wa tja: “Ko nakukara ko nongore nomukweṋu momutima woye.”—Lev. 19:17.

Ku nao, etwako enanambango ndi ri mu Levitikus 19:16, ri yandja eronga ekukutu kOvakriste. Matu sokunakaura omeripura ngamwa ayehe omavi, nu katu sokuryangisa ozohukutu ohunga nomundu warwe. Tji matu ‘twa omuinyo womundu warwe moumba,’ mokukora ovizeze ohunga na ye mena rokuhina okumuvanga poo mena reruru, otjiraisiro tjokutja twe mu tonda. Okuisira ku imbi, Ovakriste kave sokutonda omundu.—Mat. 12:36, 37.