Hapo wa lesa nawa oumbo wOruhungu mbwa pitisiwa ombura ndji? Ngatu tare kutja mo yenene okuzira omapuriro ngu maye kongorere mba:

Epsalme 103:8 mari tu pe ongamburiro iṋe indu tji mari tja Jehova ‘u notjari norusuvero orukarerere’?

Eṱe matu tjiwa kutja Jehova motjari tje u yenena okuisira omauvi wetu. Epsalme 103:8 ri tu pa ongamburiro kutja eye wina u tu vatera norusuvero. Ma rire otjiṋa otjiwa tji twa horere ku ye.—w21.01, pomuk. 21.

Ongwaye Jehova tja zika oviuru?

Eye wa tjita nao mena rorusuvero. Jehova wa zika oviuru okutjita kutja eṱunḓu re ri ungure kumwe mohange na momuano omuhirona. Okaṋepo akehe meṱunḓu ku make raisa onḓuviro komurari mbwi, make tjiwa kutja ouṋe ngu nomerizirira okutwa po ondyero osenina nokutjita kutja i yenenisiwe.—w21.02, pomuk. 3.

Ongwaye Ovakriste tji mave sokutjevera indu tji mave hindi ozombuze moviungurisiwa vyomahakaeneno wouye wakandino?

Tji wa tye okuungurisa oviungurisiwa vyomahakaeneno otja imbyo, mo hepa okutoorora nawa kutja oouṋe mbu mamu hindasana ozombuze. Ma rire ouzeu okutjita nao indu tji mamu hindasana ozombuze movimbumba ovinene. (1 Tim. 5:13) Wina pe noumba wokuhandjaura ozombuze nḓu tu hina okutjiwa kutja ouatjiri, nokuungurisa omiano vyomahakaeneno ku novakambure ovakwetu, tjimuna okupitira mozongoze poo motungovi nondando yokurandisasana oviṋa.—w21.03, pomuk. 31.

Omapu yeṋe tjiva nga tjita kutja Mukuru ma yandjere Jesus okutatumisiwa nokuṱa?

Epu etenga, Jesus wa turikwa komuti okukutura Ovajuda kosengiro. (Gal. 3:10, 13) Oritjavari, Jehova aa rongerisa Jesus komerizirira we Otjomupristeri Omunene. Nu epu oritjatatu, ouṱakame wa Jesus nga konḓiro, wa raisa kutja ovandu mave yenene okurira ovaṱakame nandarire kehi yomarorero omazeu. (Job 1:9-11)—w21.04, pomuk. 16-17.

Mo yenene okutjita vi indu tje ri ouzeu okuhakaena ku novandu motjiungura tjokuzuvarisa?

Mo yenene okuhakaena ku na wo moiri owo ndji mape ya ave kara ponganda. Ove wina mo yenene okuzuvarisa potuveze twarwe. Nu mo yenene okupaha omiano vyarwe, tjimuna okutjanga otutuu.—w21.05, pomuk. 15-16.

Omuapostele Paulus aa heye tjike indu tja tja: “Ami mOmatwako mba ṱira Omatwako”? (Gal. 2:19)

Omatwako wa Moses ya raisa kutja ovandu kahomonena, nu ya tjevera Ovaisrael nga Kristus tje ya. (Gal. 3:19, 24) Iho tja tjita kutja Paulus ma yakure Kristus. Ku nao, Paulus wa “ṱira Omatwako.” Omatwako kaya ri nouvara kombanda ye rukwao.—w21.06, pomuk. 31.

Omomuano uṋe Jehova me tu pa otjihorera tjomuretima?

Jehova wa kara nomuretima kondjambu ndja etwa kena re, komapirukiro kousemba we womananeno, komuano ovanatje ve tjiva mu ve mu pirukira, kovizeze vya Satan, komauzeu ovakarere ve ngu ve muna, kokuhihamenwa i yomapanga we nga ṱa, komuano ovandu ovarunde mu ve tatumisa varwe, na komuano ovandu mu ve nyona oviutwa vya Mukuru.—w21.07, pomuk. 9-12.

Josef wa raisa otjihorera tjiṋe ohunga nomuretima?

Eye wa tjinda ondatumisire yomarumbi we nomuretima. Ondatumisire ndjo ya tjita kutja ma kakare moEngipte ma kakumininwa nokupaterwa monḓorongo oure wozombura ozengi.—w21.08, pomuk. 12.

Hagai 2:6-9, 20-22 ya hunganeka ohunga nomazezerisiro waye?

Oviwaṋa vi panḓa okuyakura ombuze yOuhona, nungwari pe novandu ovengi mba yakura ouatjiri. Moruyaveze rwopopezu omazezerisiro woviwaṋa maye yanda indu imba mba nakaura ombuze yOuhona tji va nyonwa.—w21.09, pomuk. 15-19.

Omena raye tji tu ha sere okuyumba ohama motjiungura tjetu tjokuzuvarisa?

Jehova u muna ozongondjero zetu nu u nondjoroka. Indu tji tu hina okuurwa poo okuyumba ohama matu kamuna omuinyo waaruhe.—w21.10, pomuk. 25-26.

Omomuano uṋe Levitikus ekondwa 19 mu mari tu vatere okuyakura eronga ndi mari tja: “Rireye ovayapuke mu avihe mbi mamu tjiti”? (1 Petr. 1:15)

Ezeva ndo mape ya ra za mu Levitikus 19:2. Ekondwa 19 ri tu raera omiano omingi mu matu yenene okuṱakamisa 1 Petrus 1:15 mehupo retu.—w21.12, pomuk. 3-4