1. Okuripurira komakwizikiro wa Jehova wokukahupa nga aruhe maku tu ṱunu vi?

 JEHOVA wa kwizika kutja imba mbe nonḓuviro ku ye mave munu “omuinyo waaruhe.” (Rom. 6:23) Indu tji twe ripurire ku imbi Jehova mbye tu kwizikira, orusuvero rwetu ku ye maru kurire ko. Ripura ohunga notjiṋa hi: Tate wetu womeyuru we tu suvera tjinene nga tje tu pa otjiyandjewa hi, kokutja atu ha roro okuporwa ku ye.

2. Omakwizikiro womuinyo waaruhe maye tu vatere vi?

² Omakwizikiro wa Mukuru womuinyo waaruhe ye tu vatera kutja tu tuurunge omauzeu ngu tu na wo nai. Nandarire kutja ovanavita na eṱe va tja mave tu zepa, eṱe katu nokuisa okukarera Jehova. Omena raye? Mena rokutja eṱe matu tjiwa kutja tji twa ṱu ovaṱakame ku Jehova, eye me tu pendura movakoke nu atu kara nomaundjiro wokuhinokuṱa rukwao. (Joh. 5:28, 29; 1 Kor. 15:55-58; Hebr. 2:15) Matu tjiwa vi kutja matu yenene okuhupa nga aruhe? Tara komapu ngu maye kongorere mba.

3. Eṱe matu tjiwa vi kutja Jehova ma yenene okutjita kutja tu hupe nga aruhe? (Epsalme 102:12, 24, 27)

³ Eṱe matu tjiwa kutja Jehova ma yenene okutjita kutja tu hupe nga aruhe, mena rokutja eye oruharwi rwomuinyo, nu u karerera nga aruhe. (Eps. 36:9) Tara komazeva tjiva ngu maye raisa kutja Jehova aruhe wa kara ko nu ma karerere nga aruhe. Epsalme 90:2 mari tja Jehova ma “karerere . . . aruhe nga aruhe.” Epsalme 102 ri hungira otjiṋa otjingetjo. (Lesa Epsalme  102:12, 24, 27.) Nu omuprofete Habakuk wa tja nai ohunga na Tate wetu womeyuru: “Muhona, okuza kombutiro, tjiri, oOve Ndjambi. OOve Ndjambi wandje, omuyapuke nowaaruhe.”—Hab. 1:12.

4. Hapo eṱe tu sokurikenda indu tji tu hi nokuzuva nawa kutja Jehova aruhe oka ri? Kahurura.

⁴ Hapo ouzeu kove okuzuva nawa kutja Jehova oNdjambi “waaruhe”? (Jes. 40:28) Kaove erike ngu u muna nao. Elihu wa tja nai ohunga na Mukuru: ‘Ozombura ze kaze sora okuvarwa.’ (Job 36:26) Posi ya, nandarire kutja katu nokuzuva otjiṋa, kape nokuheya kutja otjo kauatjiri. Otjotjihorera, nandarire kutja katu zuu nawa omuano orutjeno mu ru ungura, ihi katji nokuheya kutja orutjeno karu ko. Momuano tjingewo, eṱe kamaatu yenene okuzuva nawa kutja Jehova aruhe oka ri nu ma karerere nga aruhe. Posi ya, ihi katji nokuheya kutja Mukuru kamaa yenene okuhupa nga aruhe. Tji tu hi nokuzuva otjiṋa nawa, kaku nokuheya kutja Jehova kamaa yenene okutjitjita. (Rom. 11:33-36) Eye wa kara ko ngunda oviṋa avihe meyuru na kombanda yehi avi hi ya memwa, tjimuna eyuva nozonyose. Jehova u tu raera kutja eye “wa utire ehi momasa we.” Nu eye oka ri ngunda e hi ya ‘tandavarisa omayuru.’ (Jer. 51:15; Oviung. 17:24) Epu riṋe rarwe ndi mari tu vatere okukara nongamburiro kutja mape ya atu hupu nga aruhe?

5. Ovakupasane ovatenga va ri nomaundjiro yeṋe?

⁵ Oviṋa avihe kombanda yehi Jehova mbya mema aavi sokuṱa, pendje novandu. Eye we ve pa omaundjiro wapeke wokuhinokuṱa. Nungwari, Jehova wa rakiza Adam na tja: “Posi yakomuti mbu yandja ondjiviro okutjiwa ouwa nouvi ko nokurya kovihape vyawo. Tji mo tjiti nao, mo ṱu.” (Gen. 2:17) Andakuzu Adam na Eva va ri nonḓuviro ku Jehova katja ve ṱa. Kanavi okumuna kutja kombunda, Jehova etje ve yandjera okurya ‘komuti womuinyo.’ Ihi atja tji heya kutja owo va ri nongamburiro kutja mave hupu “nga aruhe.” b—Gen. 3:22.

6-7. (a) Ovikwaye vyarwe mbi raisa kutja ovandu va memwa kutja ve hupe nga aruhe? (b) Ovikwaye mbi u vanga okukatjita moruyaveze? (Tara koviperendero.)

⁶ Ovanongonone tjiva vovimemwa va muna oviraisiro vyokutja ouruvi wetu u yenena okuṱiza ondjiviro yoviṋa ovingi kombanda yaimbi mbi tu yenena okurihonga mehupo retu ndino. Mombura ndji 2010 embo rimwe ra kahurura kutja ouruvi wetu u yenena okuṱiza ondjivisiro yoviṋa mbi ṱa pozovidio zoure wozoiri 3 000 000. Ozovidio nḓo  maze kambura ozombura zokombanda 300 okutarera. Pu mape hee kutja ouruvi wetu mape ya u yenena okuṱiza ondjivisiro onyingi kombanda yotjivarero tji tja tamunwa mbo. Ihi matji raisa kutja Jehova wa ungura ouruvi wetu kutja u ṱize ondjivisiro onyingi kombanda ya indji ndji tu rihonga mozombura 70 poo 80 uriri.—Eps. 90:10.

⁷ Jehova wina we tu mema nonḓero yokuhupa nga aruhe. Ombeibela i tja Mukuru “wa twa omakayendero woruveze ndu maru ya momutima womundu.” (Omuzuv. 3:11) Indi epu rimwe ndi tjita kutja tu vare onḓiro otjomunavita. (1 Kor. 15:26) Hapo indu tji twa vere tjinene, tu rihahiza natu undju onḓiro? Kako. Aruhe tu yenda konganga nu povikando tjiva tu nwa ozopera okuverura omutjise. Tu kondja okutjita avihe mbi matu yenene kutja atu ha ṱu. Indu tji twa zepaisa omusuverwa wetu, kutja wa ri omutanda poo omundu ngwa kurupa, eṱe tu kara nomuhihamo momuinyo oure woruveze orure. (Joh. 11:32, 33) Eṱe matu yenene okurihonga nga aruhe nu tu nonḓero yokuhupa nga aruhe, mena rokutja Omuute wetu we tu uta momuano mbwo. Ihi otjiraisiro tjokutja eye ma tjiti kutja tu hupe nga aruhe. Nungwari, pe nomapu warwe omengi ngu maye tu pe ongamburiro yokutja matu yenene okuhupa nga aruhe. Nai, matu kahungirira ku imbi Jehova mbya tjita morukapitaveze na imbi mbye tjita nai, mbi vi raisa kutja eye ke ya rundurura ondando ndja ri na yo.

8. Jesaja 55:11 mari tu hongo tjike ohunga nondando ya Jehova ku eṱe?

⁸ Nandarire kutja Adam na Eva va tjita ouvi mbwa tjita kutja ovanatje vawo ve ute okuṱa,  Jehova ka rundururire omeripura we ohunga nondando ye. (Lesa Jesaja 55:11.) Ondando ye ngunda oyokutja ovandu ovaṱakame ve hupe nga aruhe. Matu yenene okukara nongamburiro ndjo indu tji twa tara koviṋa Jehova mbya hungira na mbye tjita okuyenenisa ondando ye.

9. Mukuru wa kwizika tjike? (Daniel 12:2, 13)

⁹ Jehova wa kwizika kutja ma pendura ovakoke na tjiti kutja ve kare nouyara wokuhupa nga aruhe. (Oviung. 24:15; Tit. 1:1, 2) Omurumendu omuṱakame Job wa ri nongamburiro kutja Jehova tjiri u vanga okupendura imba mba ṱa. (Job 14:14, 15) Omuprofete Daniel aa tjiwa kutja ovandu mave kapendurwa movakoke nave yenene okuhupa nga aruhe. (Eps. 37:29; lesa Daniel 12:2, 13.) Ovajuda moruveze rwa Jesus wina aave tjiwa kutja Jehova ma yenene okuyandja “omuinyo waaruhe” kovakarere ve ovaṱakame. (Luk. 10:25; 18:18) Jesus wa hungira ohunga nomakwizikiro nga povikando ovingi, neye omuini wa pendurwa movakoke i Ihe.—Mat. 19:29; 22:31, 32; Luk. 18:30; Joh. 11:25.

10. Ozombendukiro zovakoke nḓa tjitwa morukapitaveze ze raisa tjike? (Tara kotjiperendero.)

¹⁰ Jehova ongu ri Omuyandje womuinyo nu u nomasa wokukotora ovandu komuinyo. Eye wa yandja omasa komuprofete Elia wokupendura omuzandu womuhepundu wa Sarepta ngwa ṱire. (1 Ozomb. 17:21-23) Kombunda, nombatero ya Mukuru, omuprofete Elisa wa pendura omuzandona womukazendu wa Sunem ngwa ṱire. (2 Ozomb. 4:18-20, 34-37) Ozombendukiro zovakoke nḓo na zarwe ze raisa kutja Jehova u nomasa wokukotora ovandu komuinyo. Indu Jesus tja ri kombanda yehi, eye wa raisa kutja Ihe we mu pa omasa ngo. (Joh. 11:23-25, 43, 44) Nai, Jesus u ri meyuru nu wa pewa “ouvara auhe meyuru na kombanda yehi.” Ku nao, eye ma yenene okuyenenisa omakwizikiro wokupendura imba mbe ri “momayendo wawo,” kutja ve kare nomaundjiro wokukara nomuinyo nga aruhe.—Mat. 28:18; Joh. 5:25-29.

11. Omomuano uṋe otjisuta tjonguturiro mu matji yenene okutjita kutja tu kamune omuinyo waaruhe?

¹¹ Omena raye Jehova tja yandjera Omuna we omusuverwa okuṱa onḓiro ohihamise? Jesus wa yandja eziriro kepuriro ndo, indu tja tja: “Ndjambi wa suverere ouye tjinene nai nga tja yandja Omuna we omukwatwaerike, kokutja auhe ngu ma kambura mu Ye a ha pandjara, nungwari a kare nomuinyo waaruhe.” (Joh. 3:16) Mukuru wa tjita kutja tu yenene okukamuna omuinyo waaruhe, mokuyandja Omuna we otjotjisuta tjonguturiro komauvi wetu. (Mat. 20:28) Omuapostele Paulus wa kahurura orupa orunanḓengu ndwi rwondando ya Mukuru, indu tja tja: “Notja onḓiro punga aya etwa i omundu, ombendukiro yovakoke wina opunga amai etwa i omundu. Notja ovandu avehe punga amave ṱu motjimbe tjokutja va za mu Adam, avehe opunga amave pendurwa movakoke motjimbe tjaKristus.”—1 Kor. 15:21, 22.

12. Omomuano uṋe Ouhona wa Mukuru mu mau vatere okuyenenisa ondando ya Jehova ku eṱe?

¹² Jesus wa honga ovahongewa ve okukumbira Ouhona wa Mukuru kutja u ye, nombango ya Mukuru kutja i tjitwe kombanda yehi. (Mat. 6:9, 10) Ondando ya Mukuru i kamburira mo ovandu kutja ve hupe nga aruhe kombanda yehi. Okuyenenisa ondando ndjo, Jehova wa zika Omuna we otjombara yOuhona we. Mukuru wa woronganisa ovandu 144 000 okuza kombanda yehi, kutja ve kaungure pu na Jesus okuyenenisa ombango ya Jehova.—Omavan. 5:9, 10.

13. Jehova nai u ungura tjike, nove mo sokutjita vi?

¹³ Jehova nai u woronganisa “otjimbumba otjinene tjovandu,” nu u ve honga okuhupa  kehi yomananeno wOuhona we. (Omavan. 7:9, 10; Jak. 2:8) Nandarire kutja ovandu ovengi mouye ndino va haṋika mena ronyengo novita, imba mbe tjiukwa otja “otjimbumba otjinene” ve kondja pu mave yenene okuisa mo onyengo mokati kawo. Owo ve raisa mongaro yawo kutja ve hambura omangaruvyo wawo ye rire ovitaure vyehi. (Mika 4:3) Moruveze rwokukara norupa movita mbi zepa ovandu tjinene, owo ve vatera ovandu okumuna “omuinyo watjiri” mokuvehonga ohunga na Mukuru watjiri nondando ye. (1 Tim. 6:19) Ouṋepo weṱunḓu rawo mape ya au ve tanaukire poo mape ya ave kara nouzeu wotjimariva, mena rokutja ve yandja oruvara kOuhona wa Mukuru. Posi ya Jehova u tjita kutja ve kare na imbi mbi mave hepa. (Mat. 6:25, 30-33; Luk. 18:29, 30) Omapu ngo ye tu pa ongamburiro yokutja Ouhona wa Mukuru ohoromende yatjiri, nokutja mai kayenda komurungu okuyenenisa ondando ya Jehova.   

14-15. Omakwizikiro wa Jehova wokuyandeka onḓiro nga aruhe maye kayenenisiwa vi?

¹⁴ Jesus nai ombara yOuhona wa Mukuru meyuru, nu ma kayenenisa omakwizikiro ayehe Jehova nga tjita. (2 Kor. 1:20) Okuza mombura ndji 1914, Jesus otja uta okuhonaparera ovanavita na ye. (Eps. 110:1, 2) Eye na imba mbu mave kanana pu na ye mave yandeke  ovandu ovarunde avehe kombanda yehi moruyaveze rwatjimanga.—Omavan. 6:2.

¹⁵ MOzombura Eyovi zOuhonapare wa Jesus, eye ma kapendura ovakoke na vatere avehe mbe nonḓuviro ku Jehova okurira ohomonena. Kombunda yombanguriro osenina, imba Jehova mbu ma pangura otjovasemba “mave rumata ehi, nu mave tura mu ro nga aruhe.” (Eps. 37:10, 11, 29) Ouṋingandu, ‘omunavita omusenina ndji ri onḓiro’ ma ‘yandekwa.’—1 Kor. 15:26.

16. Epu riṋe enanḓengu ndi mari sokutuhinga okukarera Jehova?

¹⁶ Morupa ndwi, twa munu kutja omaundjiro wetu yokukahupa nga aruhe ya zikamena kEmbo ra Mukuru. Omaundjiro ngo maye yenene okutuvatera okurira ovaṱakame momayuva omasenina wouzeu nga. Okutjata ku Jehova ku kamburira mo ovingi pendje nonḓero yokuvanga okuhupa nga aruhe. Epu enanḓengu nda sokutuhinga okurira ovaṱakame ku Jehova na Jesus orusuvero rwetu ku wo. (2 Kor. 5:14, 15) Orusuvero ndwo ondu tjita kutja tu horere ku wo, nu tu raere varwe omaundjiro ngu tu na wo. (Rom. 10:13-15) Indu tji matu rihongo okuhinokuripurira ku eṱe oveni nokuhaṋasana imbi mbi tu na vyo ku na varwe, Jehova otji me tu yakura otjomapanga we nga aruhe.—Hebr. 13:16.

17. Maku undjirwa ye ku auhe wetu? (Mateus 7:13, 14)

¹⁷ Hapo eṱe matu kakara mokati kaimba mbu mave kamuna omuinyo waaruhe? Jehova we tu pa ouyara mbwo. Nai, matji zu ku eṱe okutoorora okukara mondjira ndji twara komuinyo. (Lesa Mateus 7:13, 14.) Hapo ehupo mari sana pi indu tji matu hupu nga aruhe? Matu kahungirira keziriro repuriro ndo morupa ndu maru kongorere ko.