Eyuva rimwe, omukazendu omukambure moNew Zealand wa tarera okavidio morungovi ndwi jw.org ku ke hungirira komuano Jehova me notjari na me raisa otjari. (Jes. 63:7-9) Eye wa tya okuungurira ku imbi mbye rihongo nokupaha omuano wokuvatera varwe. Kombunda eyuva ndo, ngunda ama randa oviṋa vye, eye wa hakaena ku nomukazendu ngu hi nopoṋa pe kara nu wa ningira okumurandera ovikurya. Omukazendu ngo wa itavera. Omukazendu omukambure tja kotoka novikurya, eye wa ungurisa oruveze ndwo okuhungira ku na ye ohunga na Jehova. Neye we mu pa okambapira ku make tja Okumuna omauzeu mape ya aku yanda?

Omukazendu wa uta okurira. Eye we mu raera kutja we kurisiwa Otjomuhongonone wa Jehova, posi ya wa isa ouatjiri oure wozombura ozengi. Posi ya katjisupi, eye wa uta okukumba ku Jehova kutja e mu vatere okukotoka kouatjiri. Omukazendu omukambure we mu pa Ombeibela nu omukazendu ngwi wa yakura kutja ve rihonge pamwe Ombeibela. a

Matu yenene okuhorera ku Jehova mokuraisa otjari kovandu avehe, nu okwo maku kamburire mo ovazamumwe vetu novakambure ovakwetu. Nu eṱe wina matu yenene okuraisa otjari mokuungurisa oruveze aruhe ndu twa munu okuzuvarisa ku varwe.