OTJIPERI kutja ove u yorokera oviyandjewa ovingi Jehova mbye ku pa, nove u nondangi kutja u ku yandjera okuritoororera omuini kutja mo vi ungurisa vi. Ombeibela i tja omavinu otjiyandjewa okuza ku Mukuru. Oyo nandarire i tja: “Omavinu owo omayorokise wehupiro.” (Omuzuv. 10:19; Eps. 104:15) Posi ya ove mape ya wa muna kutja ovandu tjiva ve ungurisa omavinu momuano omuvi. Nu wina ovandu ongondoroka mouye ve nomaumune pekepeke ohunga nokunwa otjikariha. Otjikwaye tji ma tji vatere Ovakriste okutoora omukambo omusemba ohunga nokunwa otjikariha?

Indu tji matu toora omikambo matu sokuriyameka kouripura wa Mukuru. Nungwari kaku riyameka kouripura wovandu ongondoroka na eṱe. Tji twa tjiti nao ehupo retu mari kara nondjoroka.

Ove mape ya wa muna kutja ovandu ovengi mouye aruhe ve nwa otjikariha okukapitisa etota. Tjiva mape ya ve nwa otjikariha mena rokutja tji ve kutura ouruvi. Varwe ve nwa mena rokutja ve vanga okuzemba omauzeu wawo. Nu momahi tjiva ovandu ve muna kutja omundu ngu nwa otjikariha tjinene we kura mouripura poo u nomasa.

Posi ya, Ovakriste ve pewa omuhunga omuwa okuza kOmuute wawo worusuvero. Otjotjihorera, eye we tu raera ohunga noviṋa mbi etwa i yokunwa okukapitisa etota. Eṱe mape ya twa lesa embo rOmiano 23:​29-35, ndi hungira ohunga nomundu ngwa nwa otjikariha tjinene nomauzeu tjiva nga kongorera ko. a Daniel omunene wombongo moEuropa u zemburuka omuano ehupo re mu ra ri ngunda e hi ya rira Omukriste. Eye wa tja: “Ami ee nu otjikariha tjinene nu iho aatji tjiti kutja mbi toore omikambo mbi he ri omisemba. Mena ranao mba tuurunga oviṋa ovivi nu ngamba ouripura wandje undji pa ondjo tji me ripura ohunga noviṋa mbyo.”

Otjovakriste matu yenene vi okutoora omukambo omusemba ohunga notjikariha, nokuyepa omauzeu nge kara po indu omundu tja nu tjinene? Eṱe matu sokuyandjera Mukuru kutja a hongorere po ouripura novitjitwa vyetu.

Nambano ngatu katare kutja Ombeibela i tja vi ohunga notjikariha, nokutja omena raye ovandu tjiva tji ve nwa otjikariha.

Ombeibela kai tja okunwa otjikariha kaṱiṱi otjiṋa otjivi. Ouatjiri owombwi wokutja, Ombeibela i tja okunwa otjikariha maku yenene okukupa ondjoroka. Oyo i tja: “Twende u karye ovikurya vyoye nenyando, nu u kanwe omavinu woye nondjoroka.” (Omuzuv. 9:7) Jesus povikando tjiva aa nu omavinu, nu wina ovakarere va Jehova ovaṱakame aave tjiti nao.—Mat. 26:​27-29; Luk. 7:34; 1 Tim. 5:23.

Nandarire kutja, Embo ra Mukuru kari tu tjaere okunwa otjikariha, oro ri tja katu sokunḓoronga. Oro ri tja: “Amu ripurukisa nomanuwa omazeu.” (Ef. 5:18) Oro wina ri tja imba “mba ṱomeva wamururu . . . kamaave kara norupa mouhona waNdjambi.” (1 Kor. 6:10) Jehova ka vanga kutja tu nwe okukapitisa etota nokunḓoronga. Pendje nokuhorera kovandu ongondoroka na eṱe, eṱe matu vanga okutoora omikambo mbi mavi tjata ku Mukuru.

Tjiva ve muna kutja mave yenene okunwa otjikariha otjingi nokuhinokunḓoronga. Posi ya okukara noumune mbwo okunaumba. Omatjangwa ye raisa oukahu kutja “omanuwa omazeu” ye tjita kutja omundu ma tjite ozondataiziro ozonene nokutjita ouvi komurungu wa Mukuru. (Tit. 2:3; Omiano 20:1) Jesus wina wa rakiza kutja ‘okuṱomanuwa omazeu’ mape ya aku tjiti kutja omundu a ha hiti  mouye oupe wa Mukuru. (Luk. 21:​34-36) Ovikwaye mbi mavi yenene okuvatera Omukriste okutja a ha munu omauzeu nge etwa i yokunwa otjikariha?

Indu tji matu toora omikambo ohunga nokunwa otjikariha, ma rire otjiṋa otjinaumba indu tji matu kongorere imbi ovandu ovengi mbi ve tjita mombazu yetu. Ovakriste ve tjita imbi mbi tjata ku Jehova indu tji pe ya koviṋa tjimuna ovikurya nomavinu. Ombeibela i tu zemburukisa kutja: “Avihe, mbi mamu tjiti, kutja mamu ri poo kutja mamu nu, avihe mbi vi tjiteye kohiviro yaNdjambi.” (1 Kor. 10:31) Ngatu tare komapuriro tjiva nomirari vyOmbeibela mbi mavi kongorere mba:

Hapo mbi nwa otjikariha mena rokutja mbi vanga kutja varwe ve ndji suvere? Eksodus 23:2 mari tja: “Ko nakurikuta ko kuna ouingi wovandu.” Jehova imba aa yandja erakiza kOvaisrael kutja kave sokuhorera kovandu mbe tjita oviṋa mbi ha tjata ku ye. Erakiza ndo mari yenene okuvatera Ovakriste ndino wina. Eṱe tji twa horere kovandu varwe ohunga nokunwa otjikariha, iho matji tjiti kutja atu ha kongorere omirari vya Jehova nu matu pandjara oupanga wetu ku na ye.—Rom. 12:2.

Hapo mbi nwa otjikariha mena rokutja mbi vanga kutja ovandu ve mune kutja mbi nomasa? Mozombazu tjiva, okunwa otjikariha oruveze aruhe nokukapitisa etota, otjiṋa ovandu ovengi tji ve yakura nokutjita. (1 Petr. 4:3) Posi ya tara kutja 1 Ovakorinte 16:13 mari tu tunduuza okutjita vi. Oro ri tja: “Kareye katumba, zikameye mongamburiro, pandipareye nu mu zeupare.” Hapo otjikariha matji yenene okuvatera omundu kutja ma pandipare poo ma kare nomasa? Kako katjiperi. Otjikariha tji tjita kutja omundu ehe ripura nawa nu a ha toora omikambo omisemba. Ku nao, okunwa otjikariha otjingi katji raisa kutja omundu u nomasa, posi ya ihi otjiraisiro tjokutja eye ke nozondunge. Jesaja 28:7 ri hungira ohunga nomundu ngwa ṱomeva wamururu nga tji ma teratera nokuputara.

Omasa ngu tu hepa kutja tu tjite oviṋa ovisemba ye za ku Jehova nu ye kamburira mo okukara katumba nokuzikama mongamburiro. (Eps. 18:32) Tu tjita nao indu tji matu yepe oumba nokutoora omikambo mbi mavi tjiti kutja atu ha teya  oupanga wetu ku na Jehova. Jesus wa ri noupanga ouwa ku na Jehova nu ovandu ovengi ve mu tengere mena rokutja wa ri ombanḓe, nu eye we rimanena okutjita oviṋa ovisemba.

Hapo ami mbi nwa otjikariha mena rokutja mbi vanga okuzemba omauzeu wandje? Omutjange wEpsalme wa tjanga kutja: “Tji mba ri nomeripuriro omazeu morukoro rwandje, omahuhumiṋino woye ya tarareka omuinyo wandje.” (Eps. 94:19) Tji u nomauzeu, riyameka ku Jehova kutja e ku vatere, nungwari o riyameke kotjikariha. Otjiṋa tji matji ku vatere kutja o he ripurire komauzeu woye, okukumba ku Jehova aruhe. Nu wina ovengi va muna kutja okuningira ombatero kepanga ndi noupanga ouwa ku na Jehova mombongo ku vatera. Nu omundu tji ma nu otjikariha kutja a zembe omauzeu we ku tjita kutja eye a ha kara nonḓero yokuungura oviṋa ovisemba. (Hos. 4:11) Daniel ngwa tamunwa rukuru, wa tja: “Ami ee rikende nu ee rimunu ondjo. Ami ee nu otjikariha kutja ehe rikende, posi ya otjiṋa hi aatji tjiti kutja mbi kare nomauzeu omengi. Mba pandjara omapanga nu hee rimunu kutja mbi nonḓengu.” Otjikwaye tji tja vatera Daniel? Eye wa tja: “Ami mba muna kutja ee hepa ombatero ya Jehova, nungwari katjikariha. Jehova we ndji vatera okutjinda omauzeu wandje nokuyetuurunga.” Jehova u ri mbo okutuvatera aruhe, nandarire kutja ongaro mu tu ri onḓeu tjinene.—Fil. 4:​6, 7; 1 Petr. 5:7.

Ove povikando tjiva tji u nwa otjikariha, mo yenene okutara kutja mo hepa okutjita omarundurukiro kaaṋi, mokuripura omuini omapuriro nga: ‘Hapo okaṋepo keṱunḓu poo epanga randje ropopezu ra rora okuhungirira komuano mu mbi nwa otjikariha?’ Tji pe ri nao, mape ya iho otjiraisiro tjokutja ove mo utu poo u nouzeu wokunwa otjikariha, ove omuini mbu u hi nokutjiwa. ‘Hapo ami mbi nwa tjinene okukapita indu tjee nu rukuru?’ Iho mape ya otjiraisiro tjokutja u ri momuhunga wokuuta okunwa otjikariha tjinene. ‘Hapo ouzeu ku ami okuhinokunwa otjikariha oure womayuva omasupi poo oure woruveze orure?’ Tji pe ri nao, mape ya ove ko sora okuhinokunwa otjikariha. Iho matji hee kutja ove mape ya mo hepa ombatero yozonganga okukuvatera nouzeu mbwo.

Mena rokutja okunwa otjikariha ku eta omauzeu  omengi, Ovakriste tjiva va tya okuhinokunwa otjikariha. Varwe kave nu mena rokutja kave vanga omuano mbu tji tjata. Indu epanga roye tje ku raere kutja ke nokunwa otjikariha, ma rire nawa okuraisa ondengero komukambo mbwa toora mbo pendje nokumuhungira navi.

Mape ya wa muna kutja ma rire ounongo okutwa po kutja mo nu pu pe ṱa pi, poo kutja ovikando vingapi mbi mo nu. Porumwe ma rire otjikando tjimwe motjivike poo indu tji mo ri ovikurya. Tjiva ve twa po kutja omavinu yeṋe ngu mave nu, tjimuna okunwa oveina poo ombira kaṱiṱi, nu ka wonga nge nḓorongisa tjimanga, poo nge rungwa mumwe. Indu omundu tja twa po kutja ma nu pu pe ṱa pi, irira oupupu ku ye okutjita nao. Omukriste ngu noupanga ouwa ku na Jehova ka sokurikenda kutja varwe mave tja vi ohunga nomukambo mbwa tye okutoora.

Eṱe matu sokuripurira ku varwe indu tji matu toora omukambo ohunga notjikariha. Ovaroma 14:21 ri tja: “Okokuwa omundu tje hi nokurya onyama poo tje hi nokunwa omavinu poo tje hi nokutjita otjiṋa ngamwa tji matji putarisa omukwao.” Ove mo yenene vi okuṱakamisa eronga ndi? Raisa orusuvero. Tji mo munu kutja okunwa otjikariha mape ya aku putarisa omundu, orusuvero maru yenene okutjita kutja o ha nu otjikariha oruveze ndwo. Ove tji wa tjiti nao mo raisa kutja u nondengero norusuvero ku varwe nokutja ko ripurire kove omuini, nungwari u ripurira ku varwe.—1 Kor. 10:24.

Ohoromende mape ya wina ai kara nozoveta nḓu ya twa po ohunga notjikariha, nu Omukriste ma sokukara nonḓuviro kozoveta nḓo. Ozoveta nḓo mape ya aze twa po kutja omundu ma sokunwa otjikariha tje nozombura nga pi, poo mape ya aze tjaere omundu okuhinokunwa indu tji ma hingi, poo tji ma ungurisa ozomahina kaaṋi.—Rom. 13:​1-5.

Jehova we tu pa oviyandjewa ovingi oviwa, nu tjimwe tjavyo ouyara wokuritoororera oveni kutja matu vi ungurisa vi. Ovyo vi kamburira mo okutoorora kutja matu ri ye nu matu nu ye. Eṱe matu raisa kutja tu nondangi kouyara wokuritoororera oveni indu matu toora omikambo mbi mavi yorokisa omutima wa Tate wetu womeyuru.