1. Tji twe ripurire kongamburiro ya Abraham, epuriro riṋe ndi mape ya atu pura?

 NANDARIRE kutja ovandu ovengi va zuva ohunga na Abraham, ovengi vawo kave tjiwa ovingi ohunga na ye. Nungwari ove mo tjiwa ovingi ohunga na Abraham. Otjotjihorera, ove mo tjiwa kutja Ombeibela i tja Abraham ‘oihe yaavehe mbe kambura mu Ndjambi.’ (Rom. 4:11) Posi yokutja ove mape ya oripura kutja, ‘Hapo me yenene okukayenda mozondambo za Abraham nokukara nongamburiro eye ndja ri na yo?’ Ii, mo yenene.

2. Omena raye tje ri ohepero okukonḓonona otjihorera tja Abraham? (Jakobus 2:​22, 23)

² Omuano umwe mu matu yenene okukara nongamburiro tjimuna oya Abraham omokukonḓonona otjihorera tje. Abraham aruhe aa tjiti oviṋa Mukuru mbye mu raera okutjita. Eye wa tjindira kehi rokokure, wa katurire mozondanda oure wozombura ozengi nu eye we riyandjera okupunguha omuatje we omusuverwa omuzandu Isak. Abraham wa tjita oviṋa mbi avihe mena rokutja wa ri nongamburiro yomasa mu Jehova. Mena rongamburiro ye novitjitwa vye oviwa, Jehova wa ri nonyuṋe mu ye nu Abraham wa rira epanga ra Jehova. (Lesa Jakobus 2:​22, 23.) Jehova u vanga kutja eṱe atuhe nandarire ove, tu kare nozondaya nḓo nu tu rire omapanga we. Ku nao, eye wa hinga ovatjange vOmbeibela Paulus na Jakobus okutjanga ohunga notjihorera tja Abraham. Ngatu yandje ombango kotjihorera tje, otja tji tja hungirwa mOvaroma ekondwa 4 na mu Jakobus ekondwa 2. Paulus na Jakobus aveyevari va hungira otjiṋa otjinanḓengu ohunga na Abraham.

3. Paulus na Jakobus va hungirira ketjangwa riṋe mOmbeibela?

³ Paulus na Jakobus va hungira omambo nge ri mu Genesis 15: 6, ngu ma ye tja: “Nu Abraham wa kambura mu Muhona; nu Muhona ope mu ingonekera [poo otje mu vara otjomusemba, NWT].” Jehova u vara omundu otjomusemba poo omuhinandjo indu tje nonyuṋe mu ye. Otjihimise kutja omundu ngu he ri ohomonena nomunauvi ma yenene okuvarwa i Mukuru otjomuhinandjo. Otjiperi kutja, ove u vanga kutja Mukuru me ku vare otjomusemba nu eye ma yenene okutjita nao. Matu kerihonga kutja omena raye Jehova tja tja Abraham omusemba, nokutja matu sokutjita vi kutja tu isanewe ovasemba.

4. Ovikeṋa mbi tjita kutja ovandu ave ha varwa otjovasemba?

⁴ Morutuu rwe kOvaroma, Paulus wa tja ovandu avehe va tura ondjo. (Rom. 3:23) Ongwaye Mukuru tji ma yenene okukara nohange na eṱe nokutuvara otjovasemba? Paulus wa ungurisa otjihorera tja Abraham okuvatera Ovakriste avehe okuzira epuriro ndo.

5. Omena raye Jehova tja vara Abraham otjomusemba? (Ovaroma 4:​2-4)

⁵ Jehova wa vara Abraham otjomusemba indu tja turire mehi ra Kanaan. Jehova kena pa vara Abraham otjomusemba mena rokutja wa ṱakamisa Omatwako wa Moses. Hapo matu tjiwa vi? (Rom. 4:13) Omatwako ngo ya yandjwa kotjiwaṋa tjOvaisrael ozombura 400 kombunda yaindu Mukuru tja vara Abraham otjomusemba. Nu hapo omena raye Jehova tja vara Abraham otjomusemba? Jehova wa raisa otjari tje tji tji ha yanda ku Abraham ne mu vara otjomusemba mena rongamburiro ye.—Lesa Ovaroma 4:​2-4.

6. Omomuano uṋe Jehova mu ma vara omunauvi otjomusemba?

⁶ Paulus wa tja omundu tje nongamburiro mu Mukuru “eye ma varwa otja omusemba mena rongamburiro ye.” (Rom. 4:5) Paulus wina wa tja: “David wina otji ma hee kutja omundu ngwi ngu ma varwa kutja omusemba komurungu waNdjambi nokuhinoviungura vye, eye omuṋingandu; ‘Ovaṋingandu imba mbe ha vererwa ozongatukiro zawo, nu mbe isirwa omauvi wawo. Omuṋingandu ingwi ngu ha varerwa omauvi we i Muhona!’” (Rom. 4:​6-8; Eps. 32:​1, 2) Mukuru u isira poo u vandeka omauvi wa imba mbe nongamburiro mu ye. Eye u ve isira omauvi wawo nu kazemburuka ozongatukiro zawo. Eye u vara ovandu otja imbo otjovasemba novehinandjo mena rongamburiro yawo.

7. Omena raye tji matu yenene okutja ovakarere va Mukuru morukapitaveze vari ovasemba?

⁷ Nandarire kutja va varerwe otjovasemba, Abraham, David novakarere va Mukuru varwe ovaṱakame kavari ohomonena. Posi ya mena rongamburiro yawo, Mukuru we ve vara ovehinandjo, indu tji mo sasaneke ku na imba mbe hi na vari nongamburiro mu ye. (Ef. 2:12) Morutuu rwe kOvaroma, Paulus wa tja matu sokukara nongamburiro kutja tu rire omapanga wa Mukuru. Abraham na David va ri omapanga wa Mukuru mena rokutja va ri nongamburiro mu ye. Eṱe wina mena rongamburiro yetu matu yenene okurira omapanga we.

8-9. Ovandu tjiva vari noumune uṋe woposyo ohunga noviṋa Paulus na Jakobus mbi va tjangere, nu omena raye?

⁸ Oure wozombura ozengi, ovanane vozongamburiro va ri nombata ohunga nombangu ndji ri pokati kongamburiro novitjitwa. Ovahonge tjiva vozongamburiro ve honga kutja otjiṋa atjiyerike tji mo sokutjita kutja u yamwe orondu tji wa kambura mu Jesus Kristus. Mape ya we ve zuva amave tja, “Kambura mu Jesus nu mo yamwa.” Ovanane tjiva vozongamburiro ve ungurisa omambo ya Paulus nge tja: ‘Omundu u varwa kutja omusemba komurungu waNdjambi nokuhinoviungura vye.’ (Rom. 4:6) Posi ya, tjiva ve tja mo yenene okuyamwa indu tji mo karyangera otuveze tu tu varwa otjotuyapuke i yokereka na indu tji mo tjiti oviṋa oviwa. Kutja  ve ṋunise epu rawo, mape ya owo ave ungurisa Jakobus 2:24 ndi mari tja: “Omundu u varwa otja omusemba komurungu waNdjambi moviungura vye, nungwari ka mongamburiro ye porwayo.”

⁹ Mena roumune mbwa panguka mbwi, ovakonḓonone vOmbeibela tjiva ve muna kutja Paulus na Jakobus kaave i kumwe ohunga nokutja omundu ma sokutjita vi kutja ma yakurwe i Mukuru. Ovanane vozongamburiro tjiva ve muna kutja Paulus aa munu kutja omundu u hepa ongamburiro uriri kutja ma yakurwe i Mukuru, posi ya Jakobus aa munu kutja omundu ma sokuungura oviungura oviwa kutja ma yakurwe i Mukuru. Onongo imwe ndje rihonga ohunga nozongamburiro ya tja: “Jakobus kaa zu nawa kutja omena raye Paulus tja tja omundu u [varwa otjomusemba] mena rongamburiro aiyerike nungwari kamena roviungura.” Posi yokutja Jehova ongwa hinga Paulus na Jakobus okutjanga imbi mbi va tjanga. (2 Tim. 3:16) Ku nao, pe sokukara omuano omupupu okuzuva nawa imbi mbi va hungira. Matu sokutara kutja ovikwaye vyarwe mbi va tjanga motutuu twawo kutja tu zuve nawa omapu wawo.

10. ‘Oviungura’ viṋe Paulus mbya hungirira ko? (Ovaroma 3:​21, 28) (Wina tara kotjiperendero.)

¹⁰ ‘Oviungura’ viṋe Paulus mbya hungirira ko mbi ri mOvaroma ekondwa 3 no-4? Eye tjinene aa hungire ohunga nokukara nonḓuviro ‘kOmatwako waMoses’ nga yandjerwe kOvaisrael kondundu Sinai. (Lesa Ovaroma 3:​21, 28.) Pe munika tjimuna momayuva wa Paulus, Ovajuda tjiva mba ri Ovakriste aave kambura kutja owo ngunda mave sokukongorera Omatwako wa Moses. Ku nao, Paulus wa ungurisa otjihorera tja Abraham okuraisa kutja omundu ke nokuhepa okukongorera Omatwako ngo kutja ma yakurwe i Mukuru. Nungwari, Paulus wa kahurura kutja eṱe matu hepa okukara nongamburiro.  Ihi otjiṋa otjitunduuze mena rokutja matji tu hongo kutja tji twa kara nongamburiro mu Mukuru na mu Kristus, matu yenene okuyakurwa i Mukuru.

11. “Oviungura” viṋe Jakobus mbya hungirira ko?

¹¹ Nungwari “oviungura” mbya tamunwa mu Jakobus ekondwa 2 kavi notjiṋa na imbi mbya tamunwa i Paulus ohunga nokukara nonḓuviro ‘kOmatwako waMoses.’ Jakobus aa hungirire koviungura poo kovitjitwa Ovakriste mbi ve ungura mehupo rawo okuza keyuva nga keyuva. Ovitjitwa otja imbyo vi raisa kutja Omukriste u nongamburiro yatjiri mu Mukuru poo kena yo. Tara kovihorera vivari Jakobus mbya ungurisa.

12. Omomuano uṋe Jakobus ma kahurura omuano ongamburiro noviungura mu vi hitasana? (Wina tara kotjiperendero.)

¹² Motjihorera otjitenga, Jakobus wa tja Omukriste u hepa okutjinda ovandu avehe pu pe ṱeki pamwe. Eye wa ungurisa otjihorera tjomurumendu ngwa raisa ouwa komundu omutumbe, nungwari a ha raisa ouwa komundu omusyona okukahurura epu ndi. Jakobus wa raisa kutja omurumendu otja ingo mape ya atja u nongamburiro, posi ya ovitjitwa vye kavi raisire nao. (Jak. 2:​1-5, 9) Motjihorera otjitjavari, Jakobus wa tamuna omundu ngwa muna omukambure omukwao ‘ngwa hepa ozombanda nu ngu ha ri notjiṋa okurya’ nu ehe mu vatere. Nandarire kutja omundu ngo wa tja u nongamburiro, ovitjitwa vye vya raisa kutja ke nongamburiro. Jakobus opa zokutja “ongamburiro . . . uriri nokuhinovitjitwa, okutja ya koka.” —Jak. 2:​14-17.

13. Otjihorera tjiṋe Jakobus tja ungurisa okuraisa kutja tu hepa okukara nongamburiro na wina okutjita ovitjitwa oviwa? (Jakobus 2:​25, 26)

¹³ Jakobus wa tamuna Rahab otjotjihorera tjomundu ngwa raisa movitjitwa vye kutja u  nongamburiro. (Lesa Jakobus 2:​25, 26.) Eye wa zuva ohunga na Jehova nu aa tjiwa kutja eye aa vatere Ovaisrael. (Jos. 2:​9-11) Ovitjitwa vye vya raisa kutja eye wa ri nongamburiro. Nu mena rongamburiro ye, eye wa yama ozohoze mbari zOvaisrael indu omiinyo vyawo tji vya ri moumba. Epu orondi rokutja, Rahab na Abraham va varwa otjovasemba nandarire kutja kavari ohomonena nu kaave kongorere Omatwako wa Moses. Twe rihongo okuza ku Rahab kutja ohepero tjinene okuraisa movitjitwa vyetu kutja tu nongamburiro.

14. Omena raye tji matu yenene okutja oviṋa Paulus na Jakobus mbi va tjanga vi yenda kumwe?

¹⁴ Ku nao, Paulus na Jakobus aave kahurura ongamburiro novitjitwa momiano vivari pekepeke. Paulus wa raera Ovajuda mba ri Ovakriste kutja owo kamaave yakurwa i Jehova mokutjita poo mokuungura oviṋa otja kOmatwako wa Moses uriri. Jakobus aa tja Ovakriste avehe mave hepa okuraisa ongamburiro yawo mokutjita ouwa ku varwe.

15. Omomiano viṋe mu matu yenene okuraisa ongamburiro movitjitwa vyetu? (Wina tara kotjiperendero.)

¹⁵ Jehova ke nokutja tji matu vanga okuvarwa otjovasemba matu sokutjita oviṋa tjimuna imbi Abraham mbya tjita. Nungwari, pe nomiano omingi mu matu yenene okuraisa ongamburiro okupitira moviungura poo movitjitwa vyetu. Eṱe matu yenene okuyakura ovandu ovape mombongo, okuvatera ovakambure ovakwetu mbe nouhepe, nokutjita ouwa koveṱunḓu retu, imbi oviṋa Mukuru mbi ma yakura nokusera ko ondaya. (Rom. 15:7; 1 Tim. 5:​4, 8; 1 Joh. 3:18) Omuano umwe omusemba mu matu yenene okuraisa kutja tu nongamburiro omokuzuvarisa ombuze ombwa ku na varwe noupyuke. (1 Tim. 4:16) Atuhe matu yenene okuraisa moviungura vyetu kutja tu nongamburiro yokutja omakwizikiro wa Jehova maye yenenisiwa nokutja  omirari vye omisemba. Indu tji twa tjiti nao, matu yenene okukara nongamburiro yokutja Mukuru me tu vara otjovasemba nu matu rire omapanga we.

16. Abraham wa ri nomaundjiro waye nu wa ri nongamburiro mu ye?

¹⁶ MOvaroma ekondwa 4 matu yenene okurihonga otjiṋa tjarwe otjinanḓengu okuza ku Abraham. Matu rihongo kutja matu sokukayenda komurungu okuundja omaundjiro wetu kutja ye yenenisiwe. Jehova wa kwizika kutja okupitira mu Abraham ‘omihoko omingi’ mavi serwa ondaya. Ripura nomakwizikiro omawa Abraham ngaa undju. (Gen. 12:3; 15:5; 17:4; Rom. 4:17) Nandarire kutja Abraham wa ri nozombura 100 nu Sara wa ri nozombura 90, omakwizikiro wokutja mave munu omuatje omuzandu tjandje kaye ya yenenisiwa. Iho aatji munika aayo Sara na Abraham kamaave yenene okumuna omuatje mozombura zawo nḓo. Iho tjiri tja ri otjiṋa tjaatji roro ongamburiro ya Abraham. Posi yokutja, “Abraham wa kara nomaundjiro nongamburiro, notja rira ‘ihe yoviwaṋa ovingi.’” (Rom. 4:​18, 19) Omaundjiro we tjiri ya yenenisiwa. Eye wa karira ihe ya Isak otja komaundjiro nga ri nawo.—Rom. 4:​20-22.

17. Matu tjiwa vi kutja matu yenene okuvarwa otjovasemba nokurira omapanga wa Mukuru?

¹⁷ Eṱe matu yenene okuyakurwa i Mukuru nokuvarwa otjovasemba natu rire omapanga wa Mukuru tjimuna Abraham. Paulus wa ṋunisa epu ndi indu tja tja: “Omambo nga ‘eye wa varwa otja omusemba’ kaye tjangererwe ye [Abraham] porwe, owo ya tjangerwa eṱe wina mbu matu varwa kutja oweṱe ovasemba, nu mbu tu kambura mu Ndjambi ngwa pendura Jesus oMuhona wetu movakoke.” (Rom. 4:​23, 24) Tjimuna Abraham, eṱe matu hepa okukara nongamburiro nokutjita oviṋa oviwa na wina okukara nomaundjiro. Paulus wa kayenda komurungu okuhungira ohunga nomaundjiro wetu membo rOvaroma ekondwa 5, ngu matu kahungirira ko morupa ndu maru kongorere ko.