1. Kutja tu horere ku Jesus matu sokutjita vi?

 TJIRI otjiṋa otjihimise okumuna omuano okanatje mu ke kura okurira omundu omunene. Pe munika aayo ovanatje ve kura nokuhinongondjero kaaṋi. Posi ya, indu eṱe tji matu vanga okurira ovandu mbe horera ku Jesus eṱe matu sokutjita ozongondjero. b (1 Kor. 13:11; Hebr. 6:1) Kutja tu yenene okutjita nao, eṱe matu hepa okukara noupanga oupame ku na Jehova. Eṱe wina matu hepa ombepo ondjapuke okutuvatera okukurisa ovikaṋena mbi mavi yorokisa omutima wa Jehova, okukara nondjiviro ndji mai tu vatere mehupo, nokurirongerisira omerizirira ngu mape ya atu kara nawo moruyaveze.—Omiano 1:5.

2. Ovikwaye mbi matu rihongo okuza mu Genesis 1:​27, nu ovikwaye mbi matu kahungirira ko morupa ndwi?

² Jehova wa mema ovandu kutja ve rire omurumendu nomukazendu. (Lesa Genesis 1:27.) Oupupu okumuna kutja ovarumendu novakazendu va panguka motutu, posi ya owo wina va panguka momiano vyarwe. Otjotjihorera, Jehova wa ungura ovarumendu novakazendu okuyenenisa omerizirira wawo, ku nao owo ve hepa ovikaṋena nondjiviro ndji mai ve vatere okuyenenisa omerizirira ngo. (Gen. 2:18) Morupa ndwi, matu katara kutja ovikwaye omukazendu omukambure omutanda mbi ma yenene okutjita kutja ma rire omukazendu Omukriste ngu noupanga ouwa ku na Jehova. Morupa ndu maru kongorere ko, matu katara kutja ovikwaye ovarumendu ovakambure omitanda mbi mave yenene okutjita.

3-4. Ovakazendu ovakambure omitanda mave yenene okuisa pi ovihorera oviwa okuhorera ko? (Wina tara kotjiperendero.)

³ Ombeibela i tamuna ovakazendu ovengi mba suverere Jehova nu mbaave mu karere. (Tara orupa ndwi “Women in the Bible—What  Can We Learn From Them?” ndu ri ko jw.org.) Owo “va ri nomuungutima” nu va ri “ovaṱakame moviṋa avihe,” mbi ri ovikaṋena mbya tamunwa metjangwa ku kwa zikamene orupa ndwi. Nu wina ovakazendu ovakambure mave yenene okumuna ovihorera vyovakazendu mombongo yawo mba suvera Jehova ku mave yenene okuhorera ko.

⁴ Vakazendu ovakambure omitanda, paheye ovakazendu ovakambure mbu mamu tjiwa mbe novihorera oviwa ku mamu yenene okuhorera ko. Tareye kovikaṋena vyawo oviwa. Nu okuzambo ripurireye komuano mu mamu yenene okuraisa ovikaṋena mbyo. Mozoparagrafa nḓu maze kongorere ko, matu katara kovikaṋena vitatu ovinanḓengu ovakazendu ovakambure mbi mave hepa.

5. Omena raye omerisusuparisiro tji ye ri otjikaṋena otjinanḓengu komukazendu Omukriste?

⁵ Kutja tu horere kotjihorera tja Jesus matu hepa omerisusuparisiro. Indu omukazendu tje ri omurisusuparise, eye ma kara noupanga ouwa ku na Jehova na ku novandu varwe. (Jak. 4:6) Otjotjihorera, omukazendu ngwa suvera Jehova eye nomerisusuparisiro u toorora okukongorera imbi mbya tjangwa 1 Ovakorinte 11:​3, Jehova ma kahurura kutja wa yandja ku uṋe omerizirira wokuhongorera po ombongo neṱunḓu. c

6. Ovakazendu ovakambure omitanda mave yenene okurihongera ko ye okuza komerisusuparisiro wa Rebeka?

⁶ Tara kotjihorera tja Rebeka. Eye wa ri omukazendu onongo nu oure womuinyo we aa toora omikambo omiwa nu aa tjiwa kutja oruṋe nu omomuano uṋe mu ma sokuritjinda. (Gen. 24:58; 27:​5-17) Nandarire nao, eye wa ri nondengero nu ee riwisa kehi ya varwe. (Gen. 24:​17, 18, 65) Indu tji u ri omurisusuparise tjimuna Rebeka nokuyandja oruvara ku imba Jehova mba twa po okutuhongorera po, ove mo rire otjihorera otjiwa kovandu avehe meṱunḓu roye na ku imba mbe ri mombongo.

7. Ovakazendu ovakambure omitanda mave yenene okuhorera vi ku Ester mokuraisa omerisusuparisiro poo okutjiwa poṋa pu mave sokuyandera?

⁷ Omerisusuparisiro poo okutjiwa poṋa pu  mo sokuyandera otjikaṋena Ovakriste avehe tji mave hepa. Ombeibela i tja “okurisusuparisa okwo ounongo.” (Omiano 11:2) Nandarire kutja Ester wa rira ombara oserekaze, eye aa tjiwa poṋa pu ma sokuyandera nu kee ritongamisa. Mena ranao, eye wa puratena kondunge ya Mordekai na tjiti otja pe mu raera. (Est. 2:​10, 20, 22) Ove mo yenene okuraisa omerisusuparisiro poo okutjiwa poṋa pu mo sokuyandera tjimuna Ester, indu tji mo paha nokuṱakamisa ondunge ombwa okuza ku varwe.—Titus 2:​3-5.

8. Otja ku 1 Timoteus 2:​9, 10, omomuano uṋe omerisusuparisiro mu maye yenene okuvatera omukazendu omukambure okutoora omikambo omisemba ohunga nomizaro?

⁸ Ester wina wa raisa omerisusuparisiro momuano warwe. Nandarire kutja eye wa ri “omuwa omumanise, nu wa tungirwe nawa,” eye kaa kondjo okutjita kutja ovandu ve yandje ombango ku ye. (Est. 2:​7, 15) Omomuano uṋe omukazendu omukambure mu ma yenene okumuna mo ouwa okuza kotjihorera tja Ester? Omuano umwe wa tamunwa mu 1 Timoteus 2: 9, 10. (Lesa.) Omuapostele Paulus wa raera ovakazendu okurihwikika momuano omuhirona nu omupwe. Omambo wOtjigrike nga ungurisiwa mba ye raisa kutja omukazendu u sokurihwikika momuano omuwa nokuripurira koumune wa varwe ohunga noviṋa mbye rihwikike. Tjiri vakazendu Ovakriste eṱe tu tjaterwa indu mamu kongorere omurari wokurihwikika mbwi.

9. Ovikwaye mbi matu yenene okurihongera okuza kotjihorera tja Abigajil?

⁹ Ozondunge otjikaṋena tjarwe ovakazendu Ovakriste avehe mbe noupanga ouwa ku na Jehova tji mave hepa okukara na tjo. Ozondunge otjikeṋa? Ozondunge ze tu vatera okutjiwa kutja ovikwaye mbi ri ovisemba na mbi he ri ovisemba, nokutoorora imbi mbi ri ovisemba. Tara kotjihorera tja Abigajil. Omurumendu we wa toora omukambo omuvi mbwa tja u eta oumba keṱunḓu re arihe. Abigajil wa hakahanena po okutoora omukambo. Mena rokutja wa raisa ozondunge, eye wa yama omiinyo. (1 Sam. 25:​14-23, 32-35) Ozondunge wina ze tu vatera okutjiwa kutja oruṋe tji matu sokuhungira nu oruṋe tji matu sokumwina. Nu ze tu vatera okuraisa onḓero mu varwe nokuhina okutjita kutja ve rimune okuṋiṋikiziwa.—1 Tes. 4:11.

10-11. Ouwa waye ove novandu varwe mbu mamu munu indu ove tji wa tjiwa okulesa nokutjanga nawa? (Wina tara kotjiperendero.)

¹⁰ Omukazendu Omukriste ma hepa okukara nondjiviro ndji mai mu vatere mehupo. Ondjiviro omuatje omukazona ndje rihonga indu tje ri omuṱiṱi i kayenda komurungu okumuvatera indu tja rire omunene. Tara kovihorera tjiva.

¹¹ Rihonga okulesa nokutjanga nawa. Mozombazu tjiva okulesa nokutjanga kavi varwa otja oviṋa ovinanḓengu ovakazendu okurihonga. Posi ya, otjiṋa otjiwa nu otjinahepero kOvakriste avehe okurihonga okulesa nokutjanga  nawa. d (1 Tim. 4:13) Ku nao, nandarire kutja ouzeu okutjita nao, kayende komurungu okukondja okurihonga okulesa nokutjanga nawa. Ouwa waye mbu mo munu? Ondjiviro ndjo mape ya ai ku vatere okumuna oviungura. Nu wina mai tjiti kutja i rire oupupu kove okukonḓonona nokuhonga varwe Ombeibela. Tjinenenene, ove mo tumbuka popezu na Jehova otja tji mo lese Embo re nokuripurira ko oukoto.—Jos. 1:8; 1 Tim. 4:15.

12. Ovikwaye mbi mo rihongo okuza kOmiano 31:26?

¹² Rihonga okupuratena nokuhungira momuano omuwa. Ounahepero kOvakriste okutjita nao. Jakobus we tu pa ondunge ombwa indu tja tja: “Omundu auhe nga hakahane okupuratena, nungwari nga wombe okuhungira.” (Jak. 1:19) Indu tji u puratena nawa ku varwe tji mave hungire, ove u raisa kutja u ‘nondjenda’ poo u notjari. (1 Petr. 3:8) Indu tji u hi nokutjiwa nawa oviṋa omundu mbi ma hungire poo omuano mbu ma fula, pura omapuriro nge ri wo. Ripura ngunda au hi ya hungira. (Omiano 15:28) Ripura omuini kutja: ‘Hapo oviṋa mbi me vanga okuhungira ouatjiri nu oviyanḓiparise? Hapo omambo omawa nu maye raisa ondengero?’ Rihongera kovakazendu ovakambure mbe puratena nawa nokuhungira momuano omuwa. (Lesa Omiano 31:26.) Yandja ombango komuano mbu ve hungira. Indu tji we rihongo oviṋa mbi nawa, mai rire oupupu kove okukara noupanga ouwa ku na varwe nokukara nohange ku na wo.

13. Omomuano uṋe ove mu mo yenene okurihonga okuungura oviungura vyoponganda? (Wina tara kotjiperendero.)

¹³ Rihonga okuungura oviungura ponganda. Momahi omengi ovakazendu ombe ungura oviungura ovingi ponganda. Nyoko poo omukazendu omukambure warwe mape ya e ku vatere okurihonga okuungura oviungura mbyo nawa. Omukazendu omukambure wena Cindy wa tja: “Ami mbe rihonga otjiṋa tjimwe otjinanḓengu okuza ku mama, kutja ondjoroka i za mokuungura oukukutu. Mena rokutja mbe rihonga okuzika, okukohorora, okuyatata nokuungurisa ovimariva momuano omuwa indu tji me randa, kwa tjita kutja mbi yenene okurivatera omuini nokuungura ovingi motjiungura tja Jehova. Mama wina we ndji honga okusekirisa varwe, nu ihi tja tjita kutja mbi hakaene ku novakambure ovakwetu mbe novikaṋena oviwa ku me yenene okuhorera ko. (Omiano 31:​15, 21, 22) Omukazendu ngu ungura oukukutu, ngu sekirisa varwe, nu ngwe rihonga okuungura oviungura ponganda, otjihorera otjiwa keṱunḓu re novakambure mombongo.—Omiano 31:​13, 17, 27; Oviung. 16:15.

14. Ovikwaye mbi mo rihongo okuza kotjihorera tja Crystal, nu ovikwaye mbi mo sokuzemburuka?

¹⁴ Rihonga okuriungurira oviṋa omuini. Iho otjiṋa otjinanḓengu kOvakriste avehe okurihonga. (2 Tes. 3:​7, 8) Omukazendu omukambure wena Crystal wa tja: “Ovanene vandje ve ndji tunduuza okurihonga oviṋa poskole mbi mavi ke ndji vatera mehupo randje kombunda. Tate we ndji rakiza okuhita ozoklasa nḓu me yenene  okukerihonga mo omahongero nga tjama nongetjefa, nu iho tje ndji vatera tjinene.” Ove mo hepa okurihonga okuungurisa ovimariva momuano omusemba, pendje nokukara nondjiviro ndji mai heperwa po okumuna oviungura. (Omiano 31:​16, 18) Indu tji wa kowa moviṋa oviṱiṱi mbi u na vyo nokuhinokuritwa mozondjo, iho ma tji tjiti kutja pe kare ovingi mbi mo yenene okuungurira Jehova.—1 Tim. 6:8.

15-16. Omena raye ovakazendu ovakambure ovakombe tji ve ri ovananḓengu? (Markus 10:​29, 30)

¹⁵ Indu tji wa kara novikaṋena mbi mavi yorokisa Jehova nokurihonga ondjiviro ndji mo yenene okuungurisa mehupo, ovyo mavi ku vatere kutja u yenene okutoora omikambo omisemba moruyaveze. Tara kovihorera tjiva vyoviṋa mbi mo yenene okutjita.

¹⁶ Ove mo yenene okurira omukombe oure woruveze kaaṋi. Tjimuna Jesus tja hungira, tjiva mape ya ave toorora okuhinokukupwa, nandarire kutja ombazu yawo i vanga kutja ovandu ve kupwe. (Mat. 19:​10-12) Varwe mape ave rire ovakombe mena romapu yarwe. Ove mo yenene okukara nongamburiro kutja Jehova na Jesus kave ku munu kutja ko nonḓengu mena rokutja ko ya kupwa. Mouye auhe, ovakazendu ovakombe ovihorera oviwa mombongo. Mena rokutja va suvera nu ve rikendera varwe, owo ve ri tjimuna ovaṱena nooina kovakambure ovakwao ovengi.—Lesa Markus 10:​29, 30; 1 Tim. 5:2.

17. Omomuano uṋe omukazendu omukambure omutanda mu ma yenene okurirongerisa nai okuungurira Jehova oruveze aruhe?

¹⁷ Ove mo yenene okuungurira Jehova oruveze aruhe. Ovakazendu Ovakriste ve ungura ovingi motjiungura tjokuzuvarisa mouye auhe. Ove mo yenene okuuta nai okuungura ovingi motjiungura tja Jehova. Ove mo yenene okukarera otjomukandjira, okuvatera okutunga omatuwo wOuhona poo okuyenda ko Betel. Kumba ohunga nondando yoye. Hungira ku na varwe mba yenenisa ondando otja indjo, nokutja ovikwaye mbi mo sokuungurira ko kokutja u yenenise ondando ndjo. Nu okuzambo twa po kutja mo yenenisa vi ondando yoye. Indu tji wa utu okukarera Jehova oruveze aruhe mai rire oupupu okuungurira Jehova moviṋa vyarwe ovingi.

18. Omena raye omukazendu omukambure tji ma sokutoorora nawa omurumendu ngu me mu kupu? (Wina tara kotjiperendero.)

¹⁸ Ove mo yenene okutoorora okukupwa. Ovikaṋena nondjiviro yehupo mbi twa hungirire ko mavi ku vatere okurira omukazendu omusore. Otjingaperi kutja indu mo ripurire okukupwa mo sokutoorora nawa. Indjo i imwe yozondando ozonanḓengu nḓu mo tjiti mehupo roye. Zemburuka  kutja ove mo sokukeriwisa kehi yomurumendu woye. (Rom. 7:2; Ef. 5:​23, 33) Ku nao, ripura omuini kutja ‘Hapo eye u kondja okuripura nokuritjinda tjimuna Jesus? Hapo eye u twa po Jehova poruveze orutenga? Hapo eye u toora omikambo omisemba? Eye u yakura ozondataiziro ze? Hapo u raisa ondengero kovakazendu? Hapo eye ma yenene okundjivatera kutja oupanga wandje ku na Jehova u rire oupame? Ma yenene okundjiparura nokurira epanga ewa ku ami? Hapo eye u tjinda omerizirira we nawa? Otjotjihorera, hapo eye u nomerizirira mombongo nu u ye yenenisa vi?’ (Luk. 16:10; 1 Tim. 5:8) Otjingaperi kutja, indu tji mo vanga omurumendu wovikaṋena oviwa, ove mo sokukara novikaṋena oviwa wina.

19. Omena raye omukazendu tji ma yenene okukara nondjoroka okuisanewa “omuvatere” womurumendu we?

¹⁹ Ombeibela i tja omukazendu ngu novikaṋena oviwa “omuvatere” womurumendu we nu ‘u pwa ku ye.’ (Gen. 2:18) Hapo ihi matji hee kutja omukazendu ke nonḓengu? Kako. Omukazendu okurira omuvatere otjiṋa tji tji eta ondjozikiro ku ye. Zemburuka kutja povikando ovingi Ombeibela i tja Jehova “omuvatere.” (Eps. 54:4; Hebr. 13:6) Omukazendu omuvatere komurumendu we indu tje mu pa oruvara nokumuvatera kutja ma yenenise ozondando ze nḓa twa po keṱunḓu. Nu mena rokutja wa suvera Jehova eye u tjita otja pu ma yenene okuvatera varwe okumuna ovikaṋena oviwa vyomurumendu we. (Omiano 31:​11, 12; 1 Tim. 3:11) Ove mo yenene okurirongerisa nai mokupamisa orusuvero roye ku Jehova nokuvatera varwe ponganda na mombongo.

20. Ovikwaye oviwa omukazendu omukwate mbi ma yenene okutjitira eṱunḓu re?

²⁰ Ove mape ya o kara novanatje. Kombunda yokukupwa ove nomurumendu woye mape amu kara novanatje. (Eps. 127:3) Ku nao, o nawa okuripura komurungu woruveze. Ovikaṋena nondjiviro yehupo mbi twa hungirire ko morupa ndwi mavi ku vatere indu tji wa rire omukazendu omukupwa nu tji wa kara novanatje. Indu tji u norusuvero, ouwa, nomuretima, ove u vatera eṱunḓu roye okukara nondjoroka nu ovanatje voye mave munu kutja ve ri mondjeverero nu va suverwa.—Omiano 24:3.

21. Eṱe tu noumune uṋe ohunga novakazendu ovakambure ovakwetu, nu omena raye? (Tara kotjiperendero tjokombanda yokambo nga.)

²¹ Vakazendu ovakambure twe mu suvera koviṋa avihe mbi mu tjitira Jehova novakarere ve. (Hebr. 6:10) Eṋe mu ungura oukukutu okukurisa ovikaṋena nondjiviro mehupo ndji tjita kutja ehupo reṋu nehupo rovandu ongondoroka na eṋe ri kare nondjoroka. Nu mu rirongerisa nawa koruyaveze. Tjiri oweṋe ovananḓengu kotjira tja Jehova.