1. Omurumendu Omukriste ma sokutjita vi kutja a kare nondoṋeno?

 OMBARA David wa raera Salomo kutja: “Pandipara nu rira omurumendu.” (1 Ozomb. 2:​1-3) Omambo ngo omananḓengu kovarumendu avehe mbu mave vanga okuhorera ku Jesus ndino. Owo mave sokurihonga okukara nonḓuviro komatwako wa Mukuru, nokukongorera omirari vyOmbeibela mu avihe mbi mave tjiti kutja ve kare nondoṋeno. (Luk. 2:52) Omena raye tje ri ohepero kovarumendu ovakambure omitanda okukara noupanga ouwa ku na Jehova?

2-3. Ongwaye tje ri ounanḓengu komurumendu omukambure omutanda okuhorera ku Jesus?

² Omurumendu Omukriste u nomerizirira omengi meṱunḓu na mombongo. Varumendu ovakambure omitanda, otjiperi kutja mwe ripura ohunga nomerizirira ngu mamu yenene okukara nawo moruyaveze. Mape ya u vanga okurira omukandjira, omuvatere wombongo nokukarira omunene wombongo kombunda. Wina mape ya o vanga okukupa nokukara novanatje. (Ef. 6:4; 1 Tim. 3:1) Kutja u yenenisa ozondando nḓo nokukara nondoṋeno mehupo, ove mo hepa okurira Omukriste ngu horera ku Jesus. b

³ Ovikwaye mbi mavi yenene okukuvatera okuhorera ku Jesus? Pe noviṋa ovinanḓengu mbi mo hepa okurihonga nokuvitjiwa nawa. Mo yenene okurirongerisa vi komerizirira ngu mape ya o kakara nawo moruyaveze kutja u kakare nondoṋeno?

4. Ovihorera oviwa okuhorera ko mo yenene okuvimuna pi? (Wina tara kotjiperendero.)

⁴ Toorora ovihorera oviwa mbi mo yenene okuhorera ko. Ombeibela ye ura novihorera oviwa ovarumendu omitanda mbi mave yenene okuhorera ko. Ovarumendu mbo va suverere Mukuru  naave tjevere ovakarere ve momiano pekepeke. Ove wina mo yenene okumuna ovarumendu Ovakriste mbe novihorera oviwa meṱunḓu roye omuini na mombongo yoye. (Hebr. 13:7) Nu wina u notjihorera otjiwa tja Jesus Kristus. (1 Petr. 2:21) Tji mo konḓonona ovihorera mbi, ripurira kovikaṋena mbi ku tjatera movarumendu mba. (Hebr. 12:​1, 2) Nu okuzambo tara kutja mo yenene vi okuhorera ku wo.

5. Ove mo yenene vi okukara nozondunge, nu ongwaye tje ri ohepero okutjita nao? (Epsalme 119:9)

⁵ Kara nu “kakatera . . . kozondunge.” (Omiano 3:21) Omundu ngu nozondunge poo ngu nouripura ouwa ka hakahana okutoora omikambo, posi ya u ripura nawa ngunda e hi ya tya kutja ma tjiti vi. Ku nao, ungura oukukutu nu tjiwa kutja mo tjiti vi. Omena raye? Mena rokutja ovarumendu ovengi omitanda mouye ve toora omikambo otja komeripura poo oumune mbu ve nawo. (Omiano 7:7; 29:11) Ozotiivi, ozomuvi notungovi twomahakaeneno wina tu yenena okuṱuna komuano mbu u ripura nokuritjinda. Nu hapo omomuano uṋe mu mo yenene okukara nouripura ouwa? Rutenga tjiwa omirari vyOmbeibela, nu u ripure kutja vi nouwa waye. Tjazumba ungurisa omirari mbyo kutja vi ku vatere okutoora omikambo mbi mavi yorokisa Jehova. (Lesa Epsalme 119:9.) Tji we rihongo okuripura momuano mbo, maku ku vatere okurira Omukriste ngu noupanga ouwa ku na Jehova. (Omiano 2:​11, 12; Hebr. 5:14) Tara komuano ouripura ouwa mu mau ku vatere momiano vivari mbi: (1) omuano mu u ritjinda tji u ri pu novakazendu ovakambure (2) nombunikiro yoye nomuano mbu u rizara.

6. Ouripura ouwa mau vatere vi omurumendu omukambure omutanda okuraisa ondengero kovakazendu ovakambure?

⁶ Omurumendu ngwe rihonga okuripura tjimuna Jehova u raisa ondengero kovakazendu. Otjotjihorera, omurumendu omukambure omutanda mape ya a vanga okutjiwa omukazendu omukambure nawa, nu katjiṋa otjivi okutjita nao. Posi yokutja, omurumendu omukambure ngu nouripura ouwa kamaa hungire, okutjanga poo okutjita otjiṋa tji matji raisa oruhuro ndoovazu ke nonḓero yokumukupa. (1 Tim. 5:​1, 2) Indu tji ma vanga okutjiwa omukazendu omukambure nawa, eye ma kondjo kutja a ha zunḓa ena re, mokukondja kutja ave ha  hakaene aveyevari nokuhinomundu outjatatu.—1 Kor. 6:18.

7. Ouripura ouwa mau yenene vi okuvatera omurumendu omukambure omutanda indu tji ma toorora kutja ma zara ye nokutja ma hora vi ozondjise?

⁷ Omurumendu omutanda ngwe rihonga okuripura tjimuna Jehova, wina u raisa otjiṋa ho mozombanda nḓu ma zara nomuano me hora ozondjise ze. Ovandu ovengi mbe ungura nokuhandjaura omizaro omipe kave nondengero ku Jehova nu wina mape ya ve hupa ehupo ehazendu. Ku nao, ozombanda nḓu ve yatata ze rira ozombame tjinene poo ze tjita kutja omurumendu ma munike tjimuna omukazendu. Indu omurumendu omutanda ngu horera ku Jesus tji ma toorora kutja ma zara ye, u hongorerwa po i yomirari vyOmbeibela novihorera oviwa mbi ri mombongo. Eye ma yenene okuripura omuini kutja: ‘Hapo omuzaro wandje u raisa kutja ami mbi nouripura ouwa nu mbi ripurira ku varwe? Hapo omuano mbu mbi rizara u tjita kutja irire oupupu ku varwe okukambura kutja tjiri ami mbi karera Mukuru?’ (1 Kor. 10:​31-33; Tit. 2:6) Omurumendu omutanda ngu nouripura ouwa ma yenene okumuna ondengero okuza kovakambure ovakwao na wina okuza ku Ihe womeyuru.

8. Omurumendu omukambure omutanda ma yenene vi okurihonga okurira omundu varwe mu mave yenene okukambura mo?

⁸ Rira omundu varwe mu mave yenene okukambura mo. Omurumendu omutanda otja ingo u yenenisa oviungura vye avihe mbya pewa. (Luk. 16:10) Tara kotjihorera otjiwa tja Jesus. Eye wa ri omundu womerizirira. Nu aa yenenisa oviungura avihe Jehova mbye mu pe nandarire indu tja ri ouzeu okutjita nao. Eye wa suverere ovandu nu tjinene wa suverere ovahongwa ve nga tje ri yandjera omuini okuveṱira. (Joh. 13:1) Horera ku Jesus mokuungura oukukutu okuyenenisa ngamwa otjiungura atjihe tji wa pewa. Tji u hi nokutjiwa kutja ngo tjite vi, risusuparisa nu ningira ombatero okuza kovarumendu ovakambure mbe noupanga ouwa ku na Jehova. O kara nohange mokuungura oviṋa oviṱiṱi uriri. (Rom. 12:11) Indu tji mo ungura otjiungura tjoye, tjiwa kutja ‘mo ungurire Muhona nu ko nakuungurira ovandu.’ (Kol. 3:23) Otjiperi kutja ka ove ohomonena, ku nao risusuparisa nu yakura ngamwa ozondataiziro nḓu wa tjiti.—Omiano 11:2.

9. Ongwaye omurumendu omutanda tji ma sokurihonga oviṋa mbi mavi mu vatere mehupo?

⁹ Kutja u rire omurumendu ngu noupanga ouwa ku na Jehova, ove mo hepa okurihonga oviṋa mbi mavi ku vatere mehupo. Iho matji ku vatere okuyakura omerizirira mombongo, okumuna nokuṱiza oviungura mbi mavi ku vatere omuini poo eṱunḓu roye nokukara noupanga ouwa ku na varwe. Tara koviṋa tjiva ovinanḓengu mbi mavi yenene okukuvatera mehupo roye.

10-11. Omurumendu omutanda ma yenene vi okumuna ouwa nokuvatera ombongo indu tje rihongo okulesa nokutjanga nawa? (Epsalme 1:​1-3) (Wina tara kotjiperendero.)

¹⁰ Rihonga okulesa nokutjanga nawa.  Ombeibela i tja omurumendu ngu lesa Embo ra Mukuru eyuva aruhe nokuripurira ko oukoto u kara nondjoroka nu u ṋingapara. (Lesa Epsalme 1:​1-3.) Indu tji ma lese Ombeibela eyuva arihe, ma tjiwa omeripura wa Jehova ngu maye mu vatere okuripura nawa nokuṱakamisa Omatjangwa. (Omiano 1:​3, 4) Ovarumendu mbe ri nao ve hepwa mombongo. Omena raye?

¹¹ Ovakambure ovakwetu ve hepa ovarumendu mbu mave yenene okuhonga nokuyandja ondunge okuza mOmbeibela. (Tit. 1:9) Ove tji we rihonga okulesa nokutjanga nawa, mo yenene okurongerisa omahungi nomaziriro ngu maye vatere varwe nokuzeuparisa ongamburiro yawo. Ove wina mo yenene okutjanga oviṋa mbi we rihongo okuza momakonḓononeno woye, na indu tji mo puratene komahungi pozombongarero zombongo, pomaworonganeno worukondwa no pomaworonganeno omanene. Oviṋa mbi wa tjanga mbi mavi ku vatere kutja u kare nongamburiro yomasa nokutunduuza varwe.

12. Ovikwaye mbi mavi ku vatere kutja u rire omupuratene nomuhungire omuwa?

¹² Rihonga okupuratena nokuhungira nawa. Omurumendu Omukriste u sokurihonga okuhungira nokupuratena nawa. Iho matji hee kutja ma hepa okupuratena nokuzuva oumune wa varwe nawa. (Omiano 20:5) Eye u tara kongaro omundu ndji ma raisa indu tji ma hungire, nu u puratena kutja ma hungire momuano uṋe. Ove komoo yenene okutjita nao indu tji u kara kokure novandu. Indu tji wa suvera okuhinda ozombuze okupitira motungovi poo momiano vyarwe, irira ouzeu kove okuhungira ku novandu omurungu nomurungu. Ku nao, kondja okupaha omiano vyokuhungira ku novandu omurungu nomurungu.—2 Joh. 12.

13. Ovikwaye vyarwe omurumendu omutanda mbi ma sokurihonga? (1 Timoteus 5:8) (Wina tara kotjiperendero.)

¹³ Rihonga okurihupisa omuini. Omurumendu Omukriste ma sokuyenena okurihupisa omuini na imba veṱunḓu re. (Lesa 1 Timoteus 5:8.) Momahi tjiva, ovarumendu ovakambure omitanda mape ya ave rihongo okuungura otjiungura kaaṋi okuza kooihe poo kovazamumwe vawo varwe. Momahi warwe, omurumendu omutanda mape ya e rihongo oviungura vyokomake ngunda e ri moskole. Aruhe irira nawa okurihonga otjiṋa tji matji ku vatere okumuna oviungura. (Oviung. 18:​2, 3; 20:34; Ef. 4:28) Ovandu nga ve ku tjiwe otjomundu ngu ungura oukukutu nu ngu mana otjiungura tji wa utu. Indu tji wa tjiti nao, mape ya o munu nu oṱiza oviungura mbi wa munu. Ovikaṋena nondjiviro ndji twa hungirire ko wina mavi yenene okuvatera omurumendu Omukriste okuyenenisa omerizirira ngu ma kamuna moruyaveze. Ngatu katare ku tjiva womerizirira ngo.

14. Omurumendu omutanda ma yenene okurirongerisa vi kutja ma ungurire Jehova oruveze aruhe?

¹⁴ Okuungurira Jehova oruveze aruhe. Ovarumendu Ovakriste ovengi va uta okuungurira Jehova oruveze aruhe ngunda ave ri ovaṱiṱi motjiwondo. Okurira omukandjira ku vatera omurumendu omutanda okurihonga okuungura ku novandu mbe nozongaro poo ovikaṋena pekepeke. Wina ku mu vatera okuungurisa otjimariva tji ma munu momuano omusemba. (Fil. 4:​11-13) Tji wa rire omukandjira omuvatere, irira oupupu okuungurira Jehova oruveze aruhe. Ovengi ve ungura otjovakandjira ovavatere oure woruveze orusupi, nu iho tji ve vatera kutja ve yenene okurira ovakandjira ovakarerere. Tji va zu nokuungura otjovakandjira, mape ya ave ṋangwa okukaungura oviungura vyarwe tjimuna okutunga omatuwo wouhona poo okuungura poBetel.

15-16. Ovikwaye mbi mavi yenene okuvatera omurumendu omukambure omutanda okurira omuvatere poo omunene wombongo?

¹⁵ Omuvatere poo omunene wombongo. Ovarumendu Ovakriste avehe mave sokukara nondando yokukara novikaṋena mbi mavi tjiti kutja ve karere ovakambure ovakwao mombongo otjovanene vombongo. Ombeibela i tja omurumendu ngu vanga okuyenenisa ondando ndjo “eye ma zeri otjiungura otjiwatjiwa.” (1 Tim. 3:1) Ngunda omurumendu omukambure e hi ya rira omunene wombongo, eye rutenga ma sokurira omuvatere wombongo. Ovavatere vombongo ve vatera ovanene vombongo moviṋa ovingi. Ovanene novavatere vombongo ve vatera ovakambure ovakwao nomerisusuparisiro nu ve zuvarisa noupyuke motjiungura tjokuzuvarisa. Ovarumendu omitanda mave yenene okurira ovavatere vombongo okuza kozombura 17 ngandu 19. Nu omuvatere wombongo ngu ungura nawa ma yenene okurira omunene wombongo ngunda e nozombura 20.

¹⁶ Ove mo yenene vi okukara novikaṋena mbi mavi tjiti kutja u rire omuvatere poo omunene wombongo? Ombeibela i yandja ovikaṋena mbi mo sokukara na vyo. Posi ya zemburuka kutja ovikaṋena avihe mbi, vya zikamena kOmbeibela na korusuvero rwoye ku Jehova, na keṱunḓu roye na kombongo. (1 Tim. 3:​1-13; Tit. 1:​6-9; 1 Petr. 5:​2, 3) Kondja okutjiwa nawa ovikaṋena avihe mbi. Kumba ku Jehova kutja e ku vatere okukara novikaṋena mbi. c

17. Omurumendu omutanda ma yenene vi okurirongerisa kutja a rire omurumendu ngwa kupa notjiuru tjeṱunḓu? (Wina tara kotjiperendero.)

¹⁷ Okurira omurumendu ngwa kupa notjiuru tjeṱunḓu. Otja Jesus pa hungira, ovarumendu tjiva Ovakriste ve tya okurira ovakombe. (Mat. 19:12) Posi ya, ove tji wa toorora  okukupa mo kara nomerizirira warwe nge kara nomurumendu ngwa kupa notjiuru tjeṱunḓu. (1 Kor. 11:3) Jehova u undjira ko kutja omurumendu ma suvere omukazendu we, me mu parure, nu ma rire epanga re nokumuvatera kutja a kare noupanga ouwa ku na Jehova. (Ef. 5:​28, 29) Ovikaṋena noviṋa mbi twa hungirire ko rukuru morupa ndwi, tjimuna okuripura nawa, okuraisa ondengero kovakazendu nokurira omundu varwe mu mave yenene okukambura mo, mavi tjiti kutja u rire omurumendu ngu novikaṋena oviwa. Nu iho matji tjiti kutja u yenenise omerizirira ngu u nawo otjomurumendu ngwa kupa notjiuru tjeṱunḓu.

18. Omurumendu omutanda ma yenene vi okurirongerisa kutja ma rire omunene omusemba?

¹⁸ Okukara novanatje. Kombunda yokukupa, mape ya o kara novanatje. Ovikwaye mbi mo yenene okurihongera ku Jehova ohunga nokurira omunene omusemba? Ove mo yenene okurihonga oviṋa ovingi. (Ef. 6:4) Jehova wa raera Omuna we Jesus kutja we mu suvera nu u nonyuṋe mu ye. (Mat. 3:17) Ove tji wa kakara novanatje, raisira ovanatje voye aruhe kutja we ve suvera. Aruhe ve tanga mena roviṋa oviwa mbi va tjiti. Ovarumendu mbe horera ku Jehova ve vatera ovanatje vawo okukarira ovarumendu novakazendu Ovakriste mbe noupanga ouwa ku na Jehova. Ove mo yenene okurirongerisa nai mokuraisa orusuvero nokurikendera ku imba veṱunḓu roye na kombongo. Nokurihonga okuveraera kutja we ve suvera nu ovahuze kove. (Joh. 15:9) Ihi matji ku vatere kutja u rire omunene omuwa na wina omurumendu omusemba moruyaveze. Ngunda oruveze ndwo aru hi ye ya, ove mo yenene okuungurira Jehova momiano vyarwe nu ovatere imba veṱunḓu roye nombongo.

19-20. Ovikwaye mbi mavi yenene okuvatera ovarumendu ovakambure omitanda okuhorera ku Jesus? (Tara kotjiperendero tjokombanda yokambo nga.)

¹⁹ Varumendu omitanda, eṋe mamu hepa okutjita ozongondjero kutja mu rire ovarumendu mbe horera kotjihorera tja Jesus. Eṋe mamu sokupaha ovihorera oviwa ku mamu yenene okuhorera ko, okukara nomeripura omawa, okurira omundu varwe mu mave yenene okukambura mo, okukara nondjiviro yehupo nokurirongerisa komerizirira ngu mamu kakara nawo moruyaveze.

²⁰ Tji we ripura ohunga noviṋa avihe mbi mo sokuungurira ko, mape ya o munu kutja ouzeu kove okutjita nao. Posi ya ove mo yenene okutjita nao. Zemburuka kutja Jehova tjiri u nonḓero okukuvatera. (Jes. 41:​10, 13) Ovakambure ovakweṋu mombongo wina mave ku vatere. Ove tji wa rire Omukriste ngu noupanga ouwa ku na Jehova, ehupo roye mari kara nondjoroka nu wina mari kara nondoṋeno. Eṱe twe mu suvera varumendu omitanda. Jehova nge mu sere ondaya otja tji mamu ungura oukukutu okurira ovarumendu Ovakriste mbe noupanga ouwa ku na Jehova.—Omiano 22:4.