Omuapostele Paulus wa tjanga ku Timoteus, ngwa ri omunene wombongo tjimuna ye kutja: “Me ku ningire komurungu waNdjambi na Kristus Jesus novaengeli ovatoororwa kutja u ṱakamise omahongero nga au hi na ngu mo ingonoke nau hi na ku mo karere.”—1 Tim. 5:21.

Okutuvatera kutja ovaengeli veṋe mbu mave hungirwa mba, rutenga matu kahungirira kovaengeli mbe he ri motjimbumba hi. Oukahu kutja ovaengeli mba karupa rwotjimbumba hi 144 000. Indu Paulus tja tjanga ku Timoteus, kapa ri ovatwirisiwa mba pendurwa okuyenda keyuru. Ovaapostele novatwirisiwa varwe tjandje kava rira oviutwa vyombepo, ku nao owo kamaave rire orupa ‘rwovaengeli ovatoororwa.’—1 Kor. 15:​50-54; 1 Tes. 4:​13-17; 1 Joh. 3:2.

Wina, ‘ovaengeli ovatoororwa’ karupa rwovaengeli imba mbe ha ri nonḓuviro moruveze rwomupupo wa Noa. Ovaengeli mbo va kongorera Satan nu ave rire ozondemone, ku nao va rira ovanavita va Jesus. (Gen. 6:2; Luk. 8:​30, 31; 2 Petr. 2:4) Moruyaveze, Jesus me keveyumba morutjiva rwokehi yehi mu mave kakara ozombura 1 000, nu okuzambo mave nyonwa pu na Satan.—Judas 6; Omavan. 20:​1-3, 10.

Ku nao, ‘ovaengeli ovatoororwa’ mba tamunwa mezeva ndi, mape ya owomba mbe ri meyuru nu mbe ri ovaṱakame ku ‘Ndjambi na Kristus Jesus.’

Pe novaengeli ovaṱakame omayovi omengi. (Hebr. 12:​22, 23) Pe munika tjimuna ovaengeli avehe mba ve pewa oviungura mbya panguka okuza ku Jehova. (Omavan. 14:​17, 18) Otjotjihorera, Jehova wa ningira omuengeli umwe okuzepa ovarwe vovita vOvaasirie 185 000. (2 Ozomb. 19:35) Posi ya ovaengeli ovengi mape ya va pewa otjiungura ‘tjokuwonga mOuhona [wa Jesus] imba avehe mbe tjitisa kutja ovandu ve ture ondjo, na imba avehe mbe tjita ourunde.’ (Mat. 13:​39-41) Ovaengeli varwe mape ya va pewa otjiungura ‘tjokukawonga otjiwaṋa tje otjitoororwa’ okuyenda keyuru. (Mat. 24:31) Nu wina, ovaengeli varwe va pewa otjiungura ‘tjokututjevera akuhe ku matu i.’—Eps. 91:11; Mat. 18:10; sasaneka na Mateus 4:11; Luk. 22:43.

‘Ovaengeli ovatoororwa’ mba tamunwa mu 1 Timoteus 5:​21, mape ya va perwe otjiungura tjokutjevera ozombongo. Otja kekondwa ndo, Paulus wa yandja omaronga ohunga nomuano ovanene vombongo mu mave sokutjinda omerizirira wawo, nokutja imba mbe ri mombongo mave sokuraisa ondengero kovanene vombongo. Paulus wa tja ovanene vombongo kave ‘sokuingoneka’ poo ‘okukarera,’ nu kave sokutjita ozondando nokuhinokuripurira ko nawa. Nu okuzambo Paulus we ve pa epu enanḓengu kutja ve kongorere omaronga we. Eye wa tja ovanene vombongo ve karera ovakambure ovakwao “komurungu waNdjambi na Kristus Jesus novaengeli ovatoororwa,” pu mape hee kutja Jehova, Jesus, “novaengeli ovatoororwa” ve tarera omuano ovanene vombongo mu ve tjevera ombongo. Ku nao, ovaengeli tjiva ve nomerizirira wokuvatera ombongo. Owo ve tjevera ovakarere va Mukuru, okuvevatera notjiungura tjokuzuvarisa, nokuraera Jehova ohunga noviṋa mbi va munu.—Mat. 18:10; Omavan. 14:6.