Hapo wa lesa nawa oumbo wOruhungu mbwa pitisiwa ombura ndji? Ngatu tare kutja mo yenene okuzira omapuriro ngu maye kongorere mba:

Hapo Jehova u vara ovakazendu momuano uṋe?

Eye ke nombangu, nu ka vara ovarumendu otjovasemba kombanda yovakazendu. Mukuru u puratena kovakazendu nu u rikendera komuano mbu ve fula, nomauzeu wawo. Nu eye u nongamburiro kutja owo mave ungura otjiungura tje.—w24.01, pomuk. 15-16.

Matu yenene okuṱakamisa vi Ovaefese 5:​7, ndi tja: “Otji mu hi nokusokuwana novandu otja imba”?

Omuapostele Paulus we tu rakiza kutja atu ha kara pu novandu mbu mave tjiti kutja i rire ouzeu kweṱe okuṱakamisa omirari vya Mukuru. Ovandu otja imbo ve kamburira mo ovandu mbu tu kara pamwe, na imba mbu tu hakaena kotungovi twomahakaeneno.—w24.03, pomuk. 22-23.

Hapo ozombuze zeṋe zoposyo nḓu matu hepa okukengeza?

Matu sokukengeza ozombuze nḓu tu hi nokutjiwa kutja ze nouatjiri nḓu tu muna okuza kovakambure ovakwetu. Nu wina matu sokukengeza ozo-email nḓe nozombuze ozonaumba okuza kovandu mbu tu hi nokutjiwa, nozombuze okuza kovandu mba isa okurikotamena ku Jehova nu mbe mu pirukira, posi ya mbe tjita tjimuna ve nonḓero mombuze yetu.—w24.04, pomuk. 12.

Ovikwaye mbi matu tjiwa na mbi tu hi nokutjiwa ohunga nomuano Jehova mu ma pangura Ombara Salomo, na imba mba ṱa moSodom na Gomora na momupupo wa Noa?

Eṱe katu nokutjiwa kutja Jehova we ve yandeka oparukaze. Posi ya, matu tjiwa kutja eye ma tjiwa oviṋa avihe nu u notjari otjinene.—w24.05, pomuk. 3-4.

Okutjiwa kutja Mukuru “oruuwa” ku tu pa ongamburiro yaye? (Deut. 32:4)

Eṱe matu yenene okupaha omaundiro mu Jehova. Eye omuṱakame, nu aruhe u yenenisa omakwizikiro we. Nu ovikaṋena vye nondando ye kavi runduruka.—w24.06, pomuk. 26-28.

Ovikwaye mbi mavi ku vatere indu tji wa tjindire kombongo yarwe?

Riyameka ku Jehova ngu me ku vatere tjimuna tja vatera ovakarere ve morukapitaveze. O sasaneke ombongo mu u ri ku na indji mu wa ri. Kara norupa mombongo ku wa tjindire, nu kondja okutjita omapanga omape.—w24.07, pomuk. 26-28.

Ovisasanekero vitatu mbya tamunwa mu Mateus 25, mavi tu hongo tjike?

Otjisasanekero tjozonḓu nozongombo matji ṋunisa epu rokurira ovaṱakame. Otjisasanekero tjovasuko ovanazondunge na imba omayova matji ṋunisa epu rokurongera nokukara katumba. Nu otjisasanekero tjovimariva ovisilveri matji ṋunisa epu enanḓengu rokuungura oukukutu.—w24.09, pomuk. 20-24.

Etuwo romahitiro rOndjuwo ondjapuke ya Muhona ndja tungwa i Salomo ra ri noutonga mbu ṱa pi?

Me 2 Ekuruhungi 3:​4, omatorokero omakuru tjiva wOmbeibela ye tja etuwo romahitiro ra ri “nozokubit 120” koutonga, mbu ri ozometa 53. Posi ya, omatjangwa warwe nge nondjivisiro yatjiri ye tja ra ri “nozokubit 20,” poo outonga wozometa muvyu. Pe munika kutja ozokubit 20 onḓu maze hitasana nawa noupapi womira yOndjuwo ondjapuke ya Muhona.—w24.10, pomuk. 31.

Ku heya tjike komuvatere wombongo okurira “omurumendu womukazendu umwe”? (1 Tim. 3:12)

Ku heya kutja eye u sokukupa omukazendu umwe uriri nu ka sokutjita oruvakiro. Nu wina ka sokunyanda orombe ku novakazendu varwe.—w24.11, pomuk. 19.

Ongwaye tji matu yenene okutja omambo nge ri mu Johanes 6:53 kaye hungirire komuano Omariro Omayapuke wa Muhona maaye sokukayendisiwa?

Johanes 6:53 ri hungira ohunga nokurya onyama ya Jesus nokunwa ombinḓu ye. Jesus wa hungira omambo ngo mombura ndji 32 O.Z., moGalilea kOvajuda mbaave hepa okukara nongamburiro mu ye. Posi ya, Omariro Omayapuke wa Muhona ya zikamisiwa ombura kombunda yanao moJerusalem. Jesus tja zikamisa omariro ngo, eye aa hungire ku imba mbu mave kahonapara pu na ye meyuru.—w24.12, pomuk. 10-11.