OVANDU ve vanga okukara nondjoroka mehupo rawo. Posi yokutja momayuva omasenina mu tu hupa nga, ovandu ve muna “otuveze otuzeu.” (2 Tim. 3:1) Ovandu tjiva ve pandjara ondjoroka yawo mena rokutjindwa navi, ouvere, okupandjara oviungura, poo okuzepaisa ovasuverwa vawo. Varwe ve pandjara ondjoroka yawo, indu tji pa tjitwa oviṋa vyarwe mbi mavi ve pe ozongendo poo omuhihamwatima. Nangarire ovakarere va Mukuru mape ya ave utu okurihahiza nokupandjara ondjoroka yawo. Ihi tji tja tjitwa kove, mo yenene vi okuhara ondjoroka rukwao?

Kutja tu yenene okuzira epuriro ndo, rutenga matu sokukonḓonona kutja ondjoroka poo enyando ratjiri ri heya tjike, nokutja varwe va yenena vi okukara nondjoroka nandarire ngunda ave nomauzeu. Okuzambo matu konḓonona kutja matu yenene vi okuṱiza ondjoroka yetu nokuikurisa.

Okukara nenyando kaviṋa vimwe nokutjaterwa. Okusasaneka: Omundu ngwa ṱomeva wamururu, u yenena okutjaterwa poo okuyora tjinene. Posi yokutja, meyuva ependukirwa eye kamaa yoro rukwao, nu mape ya a utu okumuna kutja omauzeu we ngunda opu ye ri. Okutja ondjoroka ndja ri na yo, ya ri ondjoroka yokaruveze okasupi uriri, kandjoroka yatjiri.—Omiano 14:13.

Posi yokutja enyando poo ondjoroka yatjiri, “ongaro ndji tu kara na yo mourekoto womutima wetu, indu tji twa pewa otjiṋa otjiwa poo tji matu undju otjiṋa otjiwa.” Okukara nondjoroka yatjiri, ku heya okukara nenyando kainatja kutja tu ri mozongaro ozombwa poo ozombi. (1 Tes. 1:6) Mape ya atu hihamisiwa poo okupindikisiwa i otjiṋa, posi yokutja atu kara nenyando momuinyo. Okutara kotjihorera, ovaapostele va tonwa mena rokutja aave zuvarisa ombuze ohunga na Kristus. Posi yokutja “tji va za mo mOtjira va kayenda amave nyanda, orondu Ndjambi tjinga e ve vara kutja owo va pwa pokutatumisirwa mena ra Jesus.” (Oviung. 5:41) Otjiperi kutja kanaa va ri nenyando mena rokutja va tonwa, nungwari ya ri mena rokutja va yenena okuṱakama ku Mukuru.

Enyando katjikaṋena tji tu kwatwa na tjo, nu katjikaṋena tji tu yenena okukara na tjo uriri. Ongwaye tji matu tja nao? Mena rokutja enyando poo ondjoroka yatjiri otjihape tjombepo ya Mukuru ondjapuke. Ombepo ya Mukuru mai yenene okutuvatera ‘okurihwikika omundu omupe.’ Nu okutjita nao ku kamburira mo okukara notjikaṋena hi enyando. (Ef. 4:24; Gal. 5:22) Tji twa kara nenyando, ku rira oupupu okutjinda omauzeu wetu.

Jehova aa vanga kutja kombanda yehi ku tjitwe oviṋa oviwa, nungwari kandja ri onḓero ye kutja ku tjitwe oviṋa ovivi mbi tu muna ndino. Posi yokutja, nandarire kutja ovandu ve tjita oviṋa ovivi, Jehova karoro okupandjara ondjoroka ye. Embo ra Mukuru ri tja: “Omasa nondjoroka vi urisa Ondjuwo ye ondjapuke.” (1 Ekuruh. 16:27) Nu oviṋa oviwa ovakarere ve mbi ve tjita, vi ‘yorokisa omutima we.’—Omiano 27:11.

 Matu yenene okuhorera ku Jehova, mokuhina okupandjara ondjoroka yetu, indu oviṋa tji vi hi nokukayenda otja pu matu vanga. Moruveze rokurikenda, matu sokuyandja ombango koviṋa oviwa mbi tu na vyo nai, natu undju nomuretima koviṋa oviwa mbi mavi ya moruyaveze. *

MOmbeibela mu novihorera ovingi vyovandu mba ṱiza ondjoroka yawo nandarire kutja va ri nomauzeu. Abraham i umwe wawo ngwa ṱiza ondjoroka ye nandarire kutja omuinyo we wa ri moumba, na indu varwe tjaave mu pe ouzeu. (Gen. 12:10-20; 14:8-16; 16:4, 5; 20:1-18; 21:8, 9) Nangarire kutja Abraham wa muna omauzeu ngo, eye wa ri nenyando momuinyo. Otjikwaye tji tje mu vatera? Eye wa ri nomaundjiro wokukahupa mouye oupe kehi yomananeno wa Messias. (Gen. 22:15-18; Hebr. 11:10) Jesus wa tja: “Iho Abraham wa nyanda omutima kutja maa munu eyuva Ami ndi me ya.” (Joh. 8:56) Eṱe matu yenene okuhorera ku Abraham, indu tji matu ripurire kondjoroka ndji matu kamuna moruyaveze.—Rom. 8:21.

Tjimuna Abraham, omuapostele Paulus na Silas va yandjere ombango komakwizikiro wa Mukuru. Owo va ri nongamburiro yomasa nu va ṱiza ondjoroka yawo, nangarire kutja va munine omauzeu omengi. Otjotjihorera, indu tji va za nokutonwa nave yumbwa mondeko, “ouṱuku ounene” owo “iyave kumbu nokuimburira Ndjambi omatangero.” (Oviung. 16:23-25) Owo aave yenene okutjinda omauzeu wawo, mena rokutja aave ripurire komakwizikiro wa Mukuru woruyaveze. Nu okutjiwa kutja aave tatumisiwa mena rokutja va ri ovakongorere va Kristus, kwe ve pa enyando. Eṱe matu yenene okuhorera ku Paulus na Silas, indu tji matu zemburuka oviṋa oviwa mbi za mokukarera Mukuru nouṱakame.—Fil. 1:12-14.

Kundino wina, pe novihorera oviwa vyovakambure ovakwetu mba ṱiza ondjoroka yawo nandarire kutja va muna omauzeu. Otjotjihorera, mu Novemba 2013, otjivepo otjisukusuku (Super Typhoon Haiyan) tja nyona ozonganda zokombanda 1 000 zomaṱunḓu wOvahongonone va Jehova moPhilippines. George ngwa turire motjihuro tja Tacloban, wondjuwo ndja nyonwa, wa tja: “Kehi yozongaro azehe nḓa, ovakambure ovakwetu va ri nondjoroka. Ouzeu kwami okumuraera ondjoroka ndji tu na yo.” Nandarire kutja twa munu omauzeu omanene, eṱe matu yenene okuṱiza ondjoroka yetu, indu tji matu ripurire koviṋa Jehova mbye tu tjitira. Ovikwaye vyarwe Jehova mbye tupa, mbi tupa enyando?

Epu enanḓengu ndi tu pa enyando, oupanga wetu kuna Mukuru. Ripurira ku imbi: Eṱe tu tjiwa Omuhonapare Erike wevaverwa arihe. Eye oTate wetu, oMukuru wetu nu Epanga retu!—Eps. 71:17, 18.

Eṱe wina tu nondangi kutja Jehova we tupa omuinyo, nomasa wokuyorokera wo. (Omuzuv. 3:12, 13) Mena rokutja eye wetu nanena ku ye, tu tjiwa ondando ye kweṱe. (Kol. 1:9, 10) Kunao, tu tjiwa kutja ondando yehupo oyatjike, nu tu tjiwa kutja matu sokuhupa vi. Posi yokutja, ovandu ovengi kave tjiwa kutja ondando yehupo oyatjike. Okutara kombangu pokati kotjiṋa hi, Paulus wa tja: “‘Ihi omundu tje ha munine nu tje ha zuvire nu tje he ripurire momutima we, otjo Ndjambi otja ṱunina imba mbe Mu suvera.’ Nu Ndjambi wa tjiukisa otjiundikwa tje ku eṱe mOmbepo ye.” (1 Kor. 2:9, 10) Okutjiwa ombango nondando ya Jehova, tjiri ku tu pa enyando!

Wina tara koviṋa vyarwe Jehova mbya tjitira ovakarere ve. Eye wa tjita kutja tu yenene okuisirwa omauvi wetu. (1 Joh. 2:12) Mena rotjari tja Mukuru, eṱe tu nomaundjiro wokutja ouye oupe u ri pokuya. (Rom. 12:12) Nandarire nai, Jehova we tupa otjimbumba tjovakambure ovakwetu. (Eps. 133:1) Embo ra Mukuru wina ri tu raisira nawa kutja Jehova u tjevera ovakarere ve ku Satan nozondemone. (Eps. 91:11) Indu tji matu ripurire kozondaya azehe nḓe za ku Mukuru, ondjoroka yetu mai kurire ko.—Fil. 4:4.

Omukriste ngu nondjoroka rukuru, mape ya e  kurisa ondjoroka ye? Jesus wa tja: “Ami mbe mu raera omambo nga kokutja ondjoroka yandje i kare mu eṋe, nokutja ondjoroka yeṋu i urisiwe.” (Joh. 15:11) Hapo ihi katjiraisiro tjokutja matu yenene okukurisa ondjoroka yetu? Mo yenene okusasaneka ondjoroka yetu kuna omuriro. Tji matu vanga kutja omuriro u runde, tu twako ozonguṋe ozengi. Momuano otjingewo, tji mo vanga okukurisa ondjoroka yoye, mo sokukurisa oupanga woye kuna Mukuru. Tjiwa kutja, ombepo ondjapuke ondji i tu vatera okukara notjikaṋena hi enyando. Okutja tji matu vanga ondjoroka onyingi, matu sokukayenda komurungu okuningira Jehova kutja me tu pe ombepo ye ondjapuke, nokuripurira oukoto kEmbo re nda tjangwa nombatero yombepo ye ondjapuke.—Eps. 1:1, 2; Luk. 11:13.

Wina mo yenene okukurisa ondjoroka yoye, mokuungura oviungura mbi yorokisa omutima wa Jehova. (Eps. 35:27; 112:1) Omena ratjike? Mena rokutja twa memwa kutja tu ‘kare nondira ku Ndjambi, nu tu ṱakamise omatwako we; orondu ihi otjiṋa tji tji sokutjitwa i omundu auhe.’ (Omuzuv. 12:13) Pu mape hee kutja, eṱe twa utwa kutja tu tjite ombango ya Mukuru. Kunao, tji matu karere Jehova, tu kara nondjoroka onyingi mehupo retu. *

Otja tji matu kurisa ondjoroka yetu, matu munu ozondaya zarwe ozengi wina. Otjotjihorera, eṱe matu yenene okuyorokisa omutima wa Tate wetu womeyuru, tji matu kayenda komurungu okumukarera, nandarire kutja tu nomauzeu kaaṋi. (Deut. 16:15; 1 Tes. 5:16-18) Nu wina mena rokutja tu nondjoroka yatjiri, eṱe katu ripurire kokukara noviṋa ovingi mehupo retu. Posi yokutja, tu tjita ozongondjero kutja Ouhona wa Mukuru u rire outenga mehupo retu. (Mat. 13:44) Nu tji matu munu ouwa mbu za mozongondjero nḓa, ondjoroka yetu i kurira ko. Tu kara nohange momuinyo, nu tu tjita kutja varwe wina ve kare nondjoroka.—Oviung. 20:35; Fil. 1:3-5.

Omukonḓonone wouveruke poUniversity ya Nebraska moAmerika, tja za nokutjita omakonḓononeno we, wa tja: “Indu tji u nondjoroka nohange mehupo roye nai, u yenena okurira omuveruke moruyaveze.” Ombeibela wina i hungira omambo otjingewo. Oyo i tja: “Okukara nondjoroka ku eta omberukiro.” (Omiano 17:22) Otjingaperi kutja tji mo kurisa ondjoroka yoye, ku tjita kutja u rire omundu omuveruke.

Nandarire kutja tu hupa moruveze rozombamisiro, eṱe matu yenene okukara nenyando indu tji matu ningire ombepo ondjapuke ku Jehova, na tji matu konḓonona Ombeibela nokuripurira ko oukoto. Wina matu kurisa ondjoroka yetu indu tji matu ripurire koviṋa oviwa Jehova mbye tupa nai, nokuhorera kongamburiro ya varwe, na tji matu kondjo okutjita ombango ya Mukuru. Okuzambo eṱe matu munu imbi mbya tjangwa mEpsalme 64:10, ndi tja: “Omusemba ma nyanda mu Muhona nu ma munu omaundiro we mu Ye.”