ORUPA RWOMAKONḒONONENO 5
“Kristus Eye otjiuru tjomurumendu auhe”
“Kristus Eye otjiuru tjomurumendu auhe.”—1 KOR. 11:3.
EIMBURIRO 12 Mukuru wokombanda, Jehova
OMAPU KU MATU KATARA *
1. Ovikeṋa mbi ṱuna komuano omurumendu me tjinda omukazendu novanatje ve?
MO MUNU kutja okurira “otjiuru” ku heya tjike? Ovarumendu tjiva ve tjinda ovakazendu novanatje vawo otja kombazu, poo otja komuano mbu ve kurisiwa. Yanita, omukazendu omukambure ngwa tura moEurope, wa tja: “Momaturiro wandje, ovandu ve kambura kutja ovakazendu ve nonḓengu yokehi povarumendu nu mave sokutjindwa otjovakarere.” Nu omurumendu omukambure wena Luke, ngwa tura moUnited States, wa tja: “Ovarumendu tjiva ve honga ovanatje vawo ovazandu kutja oviṋa ovakazendu mbi ve hungira kavi nanḓengu, kunao kave sokuyandja ombango kotjiṋa atjihe ovakazendu mbi va hungire.” Posi yokutja, Jehova ka vanga ovarumendu okutjinda ovakazendu vawo momuano mbwo. (Sasaneka Markus 7:13.) Nambano omurumendu me rihongo vi okurira otjiuru tjeṱunḓu otjiwa?
2. Otjiuru tjeṱunḓu matji sokutjiwa ye, nu ongwaye?
2 Kutja omurumendu ma rire otjiuru otjiwa tjeṱunḓu, eye rutenga ma sokutjiwa kutja Jehova u undjira ko tjike ku ye. Nu wina ma hepa okutjiwa kutja ongwaye Jehova tja yandja ouvara kovandu tjiva uriri, nokutja ma yenene vi okuhorera kotjihorera tja Jehova na Jesus. Ongwaye tje ri ounahepero komurumendu okutjiwa oviṋa mbyo? Mena rokutja Jehova wa yandja ouvara tjiva kovarumendu, nu u undjira ko kutja ve u ungurise nawa.—Luk. 12:48.
OKURIRA OTJIURU KU HEYA TJIKE?
3. Matu rihongo ye ohunga nokurira otjiuru otja komambo nge ri 1 Ovakorinte 11:3?
3 Lesa 1 Ovakorinte 11:3. Ezeva ndo ri hungira ohunga nomuano Jehova ma rongerisa eṱunḓu re meyuru na kombanda yehi. Mena rokutja Jehova ongu ri otjiuru tjokombandambanda, eye u nouvara auhe. Nu wa yandja ouvara tjiva ku varwe, posi yokutja owo ve nomerizirira ku ye komuano mu mave ungurisa ouvara wawo. (Rom. 14:10; Ef. 3:14, 15) Jehova wa yandja ouvara ku Jesus kombanda yombongo, posi yokutja Jesus ma ziri ku Jehova komuano mu me tu tjindi. (1 Kor. 15:27) Jehova wina wa yandja ouvara komurumendu kombanda yomukazendu novanatje ve, posi yokutja omurumendu ma ziri ku Jehova na Jesus komuano mu ma tjindi eṱunḓu re.—1 Petr. 3:7.
4. Jehova na Jesus ve nouvara waye?
4 Mena rokutja Jehova ongu ri otjiuru tjeṱunḓu re meyuru na kombanda yehi, eye u nouvara wokutwapo ozoveta ohunga nomuano ovanatje ve mu ve sokuritjinda, nokuvevatera kutja ve kare nonḓuviro kozoveta nḓo. (Jes. 33:22) Jesus ngu ri otjiuru tjombongo yOvakriste, wina u nouyara wokutwapo ozoveta nokutara kutja maze kongorerwa.—Gal. 6:2; Kol. 1:18-20.
5. Omurumendu omukambure ngu ri otjiuru tjeṱunḓu u nouvara waye, nu ouvara mbwo mau sokuyandera pi?
5 Tjimuna Jehova na Jesus, otjiuru tjeṱunḓu tji nouvara wokutwapo ozoveta meṱunḓu re. (Rom. 7:2; Ef. 6:4) Posi yokutja ouvara mbwo u nopoṋa pu u yandera. Otjotjihorera, ozoveta ze ze sokuzikamena komirari mbi ri mEmbo ra Mukuru. (Omiano 3:5, 6) Nu otjiuru tjeṱunḓu ka tji nouvara wokutwapo ozoveta ku imba mbe he ri oveṱunḓu re. (Rom. 14:4) Indu ovanatje ve tji ve kuru nu ave tjindi ponganda, owo ve kayenda komurungu okumutenga, posi yokutja kave ri kehi youvara we rukwao.—Mat. 19:5.
ONGWAYE JEHOVA TJA ZIKA OVIURU?
6. Ongwaye Jehova tja zika oviuru?
6 Jehova wa zika oviuru mena rokutja wa suvera eṱunḓu re. Iho otjiyandjewa okuza ku ye. Jehova wa zika oviuru okutjita kutja eṱunḓu re ri ungure kumwe mohange na momuano omuhirona. (1 Kor. 14:33, 40) Andakuzu katu tjiwa kutja ouṋe ngu ri mouvara, eṱunḓu ra Jehova katja ri ungura kumwe momuano omuhirona nu wondjoroka. Otjotjihorera, katja pe kara omundu ngu ma tjiwa kutja ouṋe ngu ma toora ondyero osenina, nokutja ouṋe ngu mei yenenisa.
7. Otja kOvaefese 5:25, 28, omomuano uṋe Jehova me vanga ovarumendu okutjinda ovakazendu vawo?
7 Ndoovazu onawa kovarumendu okukara nouvara meṱunḓu, ongwaye ovakazendu ovengi tji ve muna kutja ovarumendu vawo kave ve tjindi nawa, nu ve ve ṋiṋikiza? Iho omena rokutja ovarumendu ovengi kave kongorere omirari vya Jehova ohunga neṱunḓu, nungwari ve kongorera otuzo nozombazu. Owo mape ya ave tjindi ovakazendu vawo navi kutja ve rimune kutja ve ri mouvara. Otjotjihorera, omurumendu mape ya a ṋiṋikiza omukazendu we kutja me rimune kutja omunahepero, poo ma raisire varwe kutja kaa kavirwa. Eye mape ya a munu kutja kamaa tjiti kutja omukazendu we me mu suvere, posi yokutja ma yenene okutjita kutja me mu tire. Eye mape ya a ungurisa ondira ndjo okuhonaparera po omukazendu we. * Ovarumendu mbe ripura nao nokutjita oviṋa mbyo, ve tjita oviṋa vyoposyo. Owo kave nondengero kovakazendu vawo nu ve tjita oviṋa Jehova mbye ha vanga.—Lesa Ovaefese 5:25, 28.
OMURUMENDU ME RIHONGO VI OKURIRA OTJIURU OTJIWA TJEṰUNḒU?
8. Omurumendu me rihongo vi okurira otjiuru otjiwa tjeṱunḓu?
8 Omurumendu ma yenene okurihonga okurira otjiuru tjeṱunḓu otjiwa, indu tja horere komuano Jehova na Jesus mu ve ungurisa ouvara wawo. Ngatu tare kovikaṋena vivari Jehova na Jesus mbi ve raisa, nokutja otjiuru tjeṱunḓu matji raisa vi ovikaṋena mbyo komukazendu novanatje ve.
9. Jehova u raisa vi omerisusuparisiro?
9 Omerisusuparisiro. Jehova u nounongo okukapita ovandu avehe, posi yokutja u puratena koumune wovakarere ve. (Gen. 18:23, 24, 32) Eye wa yandjera imba mbe ri kehi youvara we okuyandja oumune wawo. (1 Ozomb. 22:19-22) Jehova ohomonena, posi yokutja eye ka undjire ko ovingi kweṱe. Nungwari, u vatera ovandu mbe heri ohomonena okumukarera nondoṋeno. (Eps. 113:6, 7) Ombeibela i tja Jehova “omuvatere” wetu. (Eps. 27:9; Hebr. 13:6) Ombara David wa tja, eye wa yenenisa otjiungura tje otjinene ho mena romerisusuparisiro wa Jehova nombatero ndje mu pa.—2 Sam. 22:36.
10. Jesus wa raisa vi omerisusuparisiro?
10 Ngatu tare kotjihorera tja Jesus. Nandarire kutja eye wa ri Omuhona nOmunauvara kombanda yovahongewa ve, eye wa koha ozombaze zawo. Ongwaye Jehova tja yandjera kutja ehungi ndi ri tjangwe mOmbeibela? Eye aa vanga kutja oviuru vyomaṱunḓu novandu avehe ve kongorere otjihorera ho. Jesus omuini wa tja: “Ami mbe mu pe otjihorera kokutja eṋe wina mu tjite tjingetjo ihi tji mba tjiti ku eṋe.” (Joh. 13:12-17) Nandarire kutja Jesus wa ri nouvara ouingi, eye kaa undjire ko okukarerwa. Nungwari eye aa karere varwe.—Mat. 20:28.
Otjiuru tjeṱunḓu matji yenene okuraisa omerisusuparisiro norusuvero mokuungura oviungura vyoponganda, nokuvatera eṱunḓu re okukurisa oupanga wawo kuna Jehova (Lesa oparagrafa 11, 13)
11. Otjiuru tjeṱunḓu matji rihongo ye ohunga nomerisusuparisiro okuza kovihorera vya Jehova na Jesus?
11 Matu rihongo tjike? Otjiuru tjeṱunḓu matji yenene okuraisa omerisusuparisiro momiano omingi pekepeke. Otjotjihorera, eye ka undjire ko ouhomonena okuza komukazendu novanatje ve. Eye u puratena koumune wawo, nandarire kutja kau nokuyenda kumwe noumune we. Marley, ngwa tura moUnited States, wa tja: “Ami nomurumendu wandje povikando tjiva tu kara noumune mbwa panguka. Posi yokutja, mbi tjiwa kutja owami omunanḓengu ku ye nu eye we ndji tenga mena rokutja u pura oumune wandje, nu e ripurire ko ngunda e hiya toora omukambo.” Nu wina omurumendu omurisusuparise u vatera noviungura ponganda, nandarire kutja ovandu momaturiro we ve muna kutja oviungura mbyo ovyovakazendu. Ingo mape ya aye rire omatokero. Omena raye? Omukazendu omukambure wena Rachel, wa tja: “Koṋa ku mba za, indu omurumendu tja vatere omukazendu we okukoha ovitjiuma poo okukohorora ondjuwo, ovararanganda novazamumwe ve, ve muna kutja ka ‘murumendu wa katjiri.’ Owo ve muna kutja eye ka yenene okuhonaparera po omukazendu we.” Indu ovandu ovengi momaturiro woye tji ve noumune mbwo, zemburuka kutja Jesus wa koha ozombaze zovahongewa ve, nandarire kutja aa tji varwa otjotjiungura tjovakarere. Otjiuru otjiwa tjeṱunḓu katji vanga kutja varwe ve mune kutja u nomasa poo omunanḓengu, nungwari u vanga kutja omukazendu novanatje ve ve kare nondjoroka. Otjikaṋena tjiṋe tjarwe otjiuru otjiwa tjeṱunḓu tji matji hepa pendje nomerisusuparisiro?
12. Orusuvero ru hinga Jehova na Jesus okutjita ye?
12 Orusuvero. Oviṋa avihe Jehova mbye tjita vi hingwa i yorusuvero. (1 Joh. 4:7, 8) Eye u raisa kutja we tu suvera nu u vanga kutja tu rire omapanga we mokutupa Embo re notjira tje. Nu wina u rikendera eṱe. Nu tjike novihepwa vyetu vyokorutu? Jehova u ‘tu pa avihe otja konḓero yetu.’ (1 Tim. 6:17) Indu tji twa tataiza, u tu vyura posi yokutja ka isa okutusuvera. Jehova we tu pa otjisuta tjonguturiro mena rokutja we tu suvera. Nu Jesus we tu suvera tjinene nga tja yandja omuinyo we mena retu. (Joh. 3:16; 15:13) Kape notjiṋa tji matji tjaere Jehova na Jesus okusuvera imba mbe ri ovaṱakame ku wo.—Joh. 13:1; Rom. 8:35, 38, 39.
13. Ongwaye tje ri ounahepero kotjiuru tjeṱunḓu okuraisira eṱunḓu re orusuvero? (Wina lesa okaongo nga “ Omurumendu ngwa kupu ma yozikwa vi i yomukazendu we?”)
13 Matu rihongo tjike? Oviṋa avihe otjiuru tjeṱunḓu mbi ma tjiti vi sokuhingwa i yorusuvero. Ongwaye tje ri ohepero? Omuapostele Johanes wa tja: “Tje hi nokusuvera omukwao ngwe mu muna, ma sora vi okusuvera Ndjambi ngwe ha munu.” (1 Joh. 4:11, 20) Omurumendu ngwa suvera eṱunḓu re nokuvanga okuhorera ku Jehova na Jesus, u vatera eṱunḓu re okukara noupanga ouwa kuna Jehova, okutjita kutja ve rimune kutja va suverwa nokuveparura novihepwa vyawo. (1 Tim. 5:8) Eye u honga nokuvyura ovanatje ve. Nu wina u kayenda komurungu okutjita ozondando nḓu maze yozike Jehova nokuyeta ouwa keṱunḓu re. Nai matu katara koviṋa otjiuru tjeṱunḓu mbi ma sokutjita, nokutja ma horere vi ku Jehova na Jesus.
OVIṊA OTJIURU TJEṰUNḒU MBI MA SOKUTJITA
14. Omomuano uṋe otjiuru tjeṱunḓu mu matji vatere eṱunḓu ratjo okutumbuka popezu na Jehova?
14 Okukurisa oupanga weṱunḓu re kuna Jehova. Jesus wa raisa kutja u ri tjimuna Ihe, mena rokutja aa vanga okuvatera ovemukongorere okukara nongamburiro yomasa. (Mat. 5:3, 6; Mar. 6:34) Momuano otjingewo, otjiṋa otjinanḓengu kotjiuru tjeṱunḓu okuvatera eṱunḓu re okutumbuka popezu na Jehova. (Deut. 6:6-9) Eye u tjita nao mokulesa nokukonḓonona Embo ra Mukuru pu neṱunḓu re, okukara pozombongarero zombongo, okuzuvarisa ombuze ombwa nokukurisa oupanga wawo kuna Jehova.
15. Omomuano uṋe eṱunḓu mu mari munu kutja otjiuru tjeṱunḓu tje ve suvera?
15 Raisira eṱunḓu roye kutja we risuvera. Jehova wa raera Jesus kutja we mu suvera komurungu wovandu. (Mat. 3:17) Jesus potuingi aa raisa kutja wa suvera ovakongorere ve moviṋa mbya hungire nokutjita. Ovemukongorere wina ve mu raera kutja ve mu suvera. (Joh. 15:9, 12, 13; 21:16) Otjiuru tjeṱunḓu tji raisa kutja tja suvera omukazendu novanatje ve moviṋa mbye tjita, tjimuna okukonḓonona Ombeibela kuna wo. Eye wina u ve raera kutja we ve suvera nu ovaingona ku ye, nu tje ri ohepero u ve tanga komurungu wovandu.—Omiano 31:28, 29.
Otjiuru tjeṱunḓu matji sokuparura eṱunḓu ratjo novihepwa vyawo vyokorutu, kutja ma yorokise Jehova (Lesa oparagrafa 16)
16. Otjikeṋa tjarwe otjiuru tjeṱunḓu tji matji sokutjita, nu otjikwaye tje ha sokutjita?
16 Okuparura eṱunḓu re novihepwa vyawo vyokorutu. Jehova aa tjiti kutja Ovaisrael ve kare noviṋa mbi mave hepa nandarire indu tjaave vyurwa mena rokuhinonḓuviro. (Deut. 2:7; 29:5) Eye wina u tu pa oviṋa mbi matu hepa ndino. (Mat. 6:31-33; 7:11) Momuano otjingewo, Jesus aa parura imba mbaave mu kongorere. (Mat. 14:17-20) Eye wina wa verura ovengi mba verere. (Mat. 4:24) Kutja otjiuru tjeṱunḓu tji yorokise Jehova, eye ma sokutumba eṱunḓu re. Posi yokutja, pe notjiṋa tje ha sokutjita. Eye ka sokuungura oruveze oruingi nga tje hi noruveze okurikendera eṱunḓu re, nokuvevatera kutja ve kurise oupanga wawo kuna Jehova.
17. Omomuano uṋe Jehova na Jesus mu ve tu honga nokutuvyura?
17 Ve honga. Jehova u tu honga nokutuvyura mena rokutja u vanga okutuvatera. (Hebr. 12:7-9) Tjimuna Ihe, Jesus u honga imba mbe ri kehi youvara we momuano worusuvero. (Joh. 15:14, 15) Eye u yandja omavyuriro posi yokutja momuano omuwa. (Mat. 20:24-28) Eye u tjiwa kutja kaweṱe ohomonena nu potuingi tu tataiza.—Mat. 26:41.
18. Otjiuru otjiwa tjeṱunḓu tji zemburuka ye?
18 Otjiuru tjeṱunḓu tji tji horera ku Jehova na Jesus, tji zemburuka kutja omukazendu novanatje ve kavandu ohomonena. Eye ke ve tjindi “nombeze.” (Kol. 3:19) Nungwari, eye u ungurisa omurari mbu ri mOvagalate 6:1 nu u kondja okuvevyura “nomutima omutarazu,” nokuzemburuka kutja eye wina kamundu ohomonena. Tjimuna Jesus, eye u muna kutja okukara notjihorera otjiwa oomuano omusemba wokuhonga.—1 Petr. 2:21.
19-20. Otjiuru tjeṱunḓu matji horere vi ku Jehova na Jesus, indu tji matji tjiti ozondando?
19 Toora ozondando a moripurire ku varwe. Jehova u tjita ozondando nḓu maze eta ouwa ku varwe. Otjotjihorera, eye wa mema ovandu kutja ve yorokere ehupo, nungwari ka kutja ma munine po ouwa. Kape nomundu ngwe mu ṋiṋikiza okuyandja Omuna we okutukutura kouvi. Eye wa tjita nao mena rokutja aa vanga okutuvatera. Jesus wina wa tjita ozondando nḓa vatera varwe. (Rom. 15:3) Otjotjihorera, indu tja urirwe tjinene, eye wa honga otjimbumba tjovandu pendje nokusuva.—Mar. 6:31-34.
20 Otjiuru otjiwa tjeṱunḓu tji tjiwa kutja okutjitira eṱunḓu re ozondando katjiṋa otjipupu, nu omerizirira ngo omananḓengu ku ye. Eye ka toora ozondando nokuhina epu esemba poo nḓu maze rekarekere koumune we oruveze ndwo. Nungwari u yandjera Jehova okumuvatera okutjita ozondando ozombwa. * (Omiano 2:6, 7) Momuano mbwo eye u ripurira ku varwe pendje nokuripurira ku ye omuini.—Fil. 2:4.
21. Matu ka hungirira kuye morupa ndu ma ru kongorere ko?
21 Jehova wa yandja oviuru vyomaṱunḓu otjiungura otjizeu. Eye u undjira ko ku wo kutja ve ungure pu mave yenene okuyenenisa otjiungura tjo. Posi yokutja, indu omurumendu tja kondjo okuhorera ku Jehova na Jesus, eye ma rire otjiuru tjeṱunḓu otjiwa. Nu omukazendu tja yenenisa omerizirira we meṱunḓu, orukupo rwawo ma ru rire oruṋingandu. Hapo omukazendu ma sokuvara vi omerizirira womurumendu we otjotjiuru tjeṱunḓu? Nu omatokero yeṋe ngu ma munu? Orupa ndu ma ru kongorere ko ma ru kazira omapuriro ngo.
EIMBURIRO 16 Tanga Jehova kOmuna we, omutwirisiwa
^ par. 5 Indu omurumendu tja kupu eye u rira otjiuru tjeṱunḓu. Morupa ndwi matu katara kutja okurira otjiuru tjeṱunḓu ku heya tjike, nokutja Jehova ouvara mbwo wa yandja koouṋe nu ongwaye tja tjita nao. Nu wina matu katara koviṋa ovarumendu mbi mave yenene okurihongera ko okuza ku Jehova na Jesus. Morupa ndu maru kongorere ko, matu katara komuano omurumendu nomukazendu mu mave yenene okurihongera kotjihorera tja Jesus, na kovihorera vyarwe mOmbeibela. Morupa orusenina matu katara komuano ovarumendu ovakambure mu mave sokuungurisa ouvara wawo mombongo.
^ par. 7 Oumune wokutja onawa komurumendu okutjinda omukazendu we navi, nandarire okumuhihamisa korutu, vi raisiwa mozomuvi, omanyando nu nandarire momambo. Kunao, ovandu ovengi ve muna kutja kanavi omurumendu okutjinda omukazendu we momuano mbwo.
^ par. 20 Tji mo vanga ondjiviro yokomurungu ohunga nokutjita ozondando ozombwa, lesa orupa ndwi “Make Decisions That Honor God,” ndwa pitisiwa mokambo kOruhungu 15 ku April 2011, omuk. 13-17.
